O Le Ata Tifaga Leaga
“O le a ou faitau ma matamata na o mea lava e fiafia i ai le Tama Faalelagi” (O O’u Tulaga Faatalalelei).
Ina ua vaai Evelina i le igoa o le tifaga, sa amata ona tatavale lona fatu.
“Vasega, e i ai se mea ou te faate’ia ai outou,” o le tala lea a Mrs. Taylor a o savali atu i le pito i luma o le potu.
Sa ea a’e Evelina mai lana suega, ma ataata. Sa i ai se “A+” lapoa i le pito i luga.
“Sa lelei uma lava tou taumafaiga i tou suega ma o le taui o taeao o le a tatou matamata ai i se tifaga,” o le tala lea a Mrs. Taylor, ma tusi igoa o tifaga e tolu i luga o le laupapa. “O filifiliga nei e mafai ona tatou palota i ai,” o lana tala lea a o alalaga fiafia tamaiti uma.
Sa osooso Evelina i lona nofoa, i le taumafai e vaai po o a igoa o ata. O ata muamua e lua o nisi ia o ata e sili ona ia fiafia i ai. Sa punou atu i lana uo o Katy. “O le a le ata o le a e palota i ai?”
“E mautinoa lava o le numera tolu,” o le tala lea a Katy. “E le faatagaina matou e o’u matua e matamata ai i le fale, ou te le’i matamata ai lava la.”
Sa toe tilotilo Evelina i le laupapa ma iloa ai le igoa o le ata lona tolu. Sa amata ona tatavale lona fatu. Sa faalogo Evelina i le ata lenei, ma sa ia iloa o se ata lea o le a ia le maua ai ni lagona lelei pe a matamata ai. Ae faapefea pe afai e palota i ai lana vasega?
“O ai e fia palota mo le filifiliga muamua?” Na fesili ai Mrs. Taylor.
Sa sii maualuga e Evelina lona lima ma tilotilo solo. Sa ia ūina lona laugutu ma le popole. Sa na o le toalua isi tamaiti sa palota.
Sa tusi e Mrs. Taylor faailoga e iloa ai i luga o le laupapa. “Filifiliga lona lua?”
Sa goto le fatu o Evelina. Sa na o le tolu lima na sii.
“Ma le filifiliga lona tolu?”
E sefululima lima sa o a’e i luga. Sa saofai faapalasi ane Evelina i lona nofoa, sa oo ifo i lona manava se lagona e pei ua ma’i. E mafai faapefea ona aluese mai le matamata i lena ata pe afai ua mananao uma i ai isi?
Ina ua taunuu i le fale, sa alu faasasao Evelina i lona potu ma faapalasi lana ato faafafa i le fola i se palasi mamafa. Sa tumau pea ia te ia i le aso atoa le lagona e pei e ma’i. “Maimau pe ana mafai ona ou ma’i mo’i lava,” o ona mafaufauga ia. “Ina ia ou le alu ai i le aoga taeao.”
Sa laga mai e Evelina lana suega mai fafo o lana atofaafafa ma faataupupula atu i ai, ma uumau i ona lima. “O le tifaga sa tatau ona avea o se taui, ae le o se faasalaga!” o ona mafaufauga ia, ma numinumi ma le ita le suega ma momono i lalo o lona moega. Sa amata ona tagi o ia. Sa tootuli ifo i autafa o lona moega ma amata ona tagi. Ona amata ai lea ona ia tatalo. Sa ia tautala atu ni fuaiupu tautoai, sa ole atu i le Tama Faalelagi e aveese atu le faafitauli, ae ina ua mavae sina taimi sa faapea ona sui lana tatalo. “Faamolemole fesoasoani mai ia te a’u ia ou faaleleia lenei tulaga. Ou te le fia matamata i se tifaga o le a ou maua ai ni lagona leaga, ma ou te faamoeome o le a malamalama ai a’u uo ma la’u faiaoga.”
Sa faauma le tatalo a Evelina. Sa nimo ese le gatete ma le lagona le lelei. Sa le’i toe fefe o ia.
Sa oso tu Evelina i ona vae, ma tamoe atu mai lona potu e sue Tina. Ua i ai sona manatu.
O le aso na sosoo ai, sa savali atu ai Evelina i le vasega. Sa uu i se tasi o ona lima se tusi mai lona Tina sa faamalamalama atu ai o le matamataina o le tifaga o le a le maua ai e Evelina ni lagona logolelei. Ae o le isi lima sa ia uuina ai ni ata tifaga se tolu e sili ona fiafia i ai. Sa tuu atu e Evelina le tusi ia Mrs. Taylor ma vaai atu ia te ia ao ia faitauina.
“Faafetai lava mo le ta’uina mai ia te a’u o ou lagona,” o le tala lea a Mrs. Taylor.
“Fai mai lo’u tina o le a le afaina pe a ou alu i se isi vasega a o faaali le ata,” o le tala atu lea a Evelina. “Ae ua ou aumaia foi nisi o ata ia ina nei mananao tamaiti uma e matamata se tasi o ia ata.”
Sa ataata Mrs. Taylor ma tago atu i le faaputuga ata. “O se ata tifaga e le o se taui tele pe afai tatou te le fiafia faatasi uma ai,” o lana tala lea.
Sa tusi e Mrs. Taylor igoa fou i luga o le laupapa. “Vasega, ou te manao e toe palota i le tifaga mo le aso nei. Ua i ai nisi o filifiliga fou mo outou.”
Sa alu atu Evelina ma saofai i lana kesi, ma fiafia o le a ia le misia le taui a le vasega. Ae o le taui sili lava o le iloaina lea, sa aveese e le Tama Faalelagi lona fefe ae tuu atu ia te ia le lototele e fai ai le mea sa’o.
Ata na tusia e Brad Teare