Mo Le Malosi o le Autalavou
Loto faafetai
O i tatou uma taitoatasi o le a fiafia pe afai e tumu i tatou i le loto faafetai.
I le taumafanafana o le 2011, sa ou maua ai se avanoa e feiloai ai ia Josh Larson i le Philmont Scout Ranch i Niu Mekisiko, ISA. O ni nai masina mulimuli ane, sa fesoasoani ai Josh i lona tama e tapena le faletele teuoloa. E aunoa ma se lapataiga, sa faafuasei ai ona motu se filifili sa siligi ai se laau faalava e 1,480 pauna (670 kg), ma pau i luga o Josh, ma taomia ai o ia mai lona ua i ona vae. O se vavega lava, le mafai e le tamā o Josh ona aveese le laau faalava mai le tino o si ona atalii. Sa ia faatinoina le fesoasoani muamua o le manava faaola (CPR) seia oo ina taunuu atu tagata e nafa ma faalavelave faafuasei e ave Josh i le falemai lea sa le’i manava lava.
Sa tele ni aso sa i ai Josh i se tulaga ogaoga. Sa galulue ma le filiga fomai e toe faaleleia lona poo na ta’e, fogifogi na faaleagaina, ma isi manuaga tuga. Ina ua uma le anoano o taotoga, sa iu ina to’a mai Josh. Ona ia amataina ai lea o le auala umi ma tuai i le toe manuia.
O le taimi nei e oo lava ia Josh le tele o aafiaga o le faalavelave na oo ia te ia. Ua i ai sona mata ua leaga, ma ua tau le lagona se mea i le tasi o ona taliga, ma o loo i ai se uamea i totonu o lona ulu. Ae ua filifili o ia e taulai atu i lona puapuaga o se faamanuiaga. Ua ia iloa o loo nofo aitalafu i le Tama Faalelagi i lona ola ma lona toe manuia ma le lagolago a i latou o loo siomia o ia. Ua tumu lona loto i le faafetai.
O le toe manuia o Josh sa umi ma tuai. O loo ia lagonaina pea le tele o aafiaga o lona faalavelave ae ua manatu o le faalavelave ua sili atu ona avea ma se faamanuiaga nai lo se tofotofoga.
Loto Faafetai i le Taimi o Faigata
I se konafesi talu ai nei mo le autalavou, sa lauga ai Josh e uiga i tatalo ma anapogi sa faia e aiga, uo, tuaoi, ma taitai o le uarota ma le siteki: “O loo o’u faitauina o’u faamanuiaga. Na tali mai talosaga. Ou te manatu o lenei mea ua sili atu ona avea o se faamanuiaga nai lo o se tofotofoga. Ou te alofa ia te outou uma lava.”
O Josh o se faataitaiga o le aoaoga o loo i le Mo le Malosi o le Autalavou: “Ia ola ma se agaga o le faafetai ma o le a e maua le fiafia sili atu ma le faamalieina i le olaga. … E oo lava i ou taimi e sili ona faigata, e mafai lava ona e mauaina le tele o mea e ao ona faafetai ai.”1
O le loto faafetai e mafai ona suia ai tofotofoga i ni faamanuiaga, e oo lava i tofotofoga ogaoga e pei o lea sa feagai ma Josh. E manaomia se taumafaiga e faatino ai le loto faafetai ma maua se manatu o le a lelei mea uma i le olaga. Peitai, e faamanuia moni lava i tatou e le Alii, ma o Lona alofa mutimutivale agamalu e le tatau ona le amanaiaina pe le talisapaiaina. Ua faamanatu mai e le perofeta o Moronae o le Tusi a Mamona le taua o le loto faafetai ma uunaia i tatou ia “manatua le alofa mutimutivale tele o le Alii i le fanauga a tagata, mai i le foafoaga o Atamu e oo mai lava i lalo seia oo mai i le taimi o le a outou maua ai nei mea ma manatunatu i ai i o outou loto” (Moronae 10:3).
Fesoasoani a le Agaga Paia
I o tatou olaga pisi, e mafai ona faigofie ona laaloa la tatou vaai ma galo le taitaiga a le Tama Faalelagi i a tatou gaoioiga i aso uma. O le Agaga Paia e fesoasoani tatou te manatua ai e tele mea ua tatou maua e tatau ai ona tatou faafetai. Ua aoao mai Peresitene Henry B. Eyring, Fesoasoani Muamua i le Au Peresitene Sili, “O le Agaga Paia lea e fesoasoani tatou te iloa ai mea o loo faia e le Atua mo i tatou.” Sa ia uunaia i tatou “e saili auala e faailoa ai ma manatua le agalelei o le Atua.”2
A o tatou faatagaina le Agaga Paia e faamanatu mai ia i tatou le agalelei ma le alofa o le Atua mo i tatou, o le a faatumuina i tatou i lagona o le loto faafetai. O nei lagona o le a faaofosia ai i tatou e faafetai atu i lo tatou Tama oi le Lagi. Ua aoao mai le Faamaoni i le Faatuatua: “Faafetai i lou Tama Faalelagi mo Lona agalelei ia te oe. E mafai ona e faaali atu lou loto faafetai i le Atua e ala i le faailoa o Lona aao i mea uma, faafetai atu ia te Ia mo mea uma ua Ia tuuina mai ia te oe, tausi Ana poloaiga, ma auauna atu i isi. … Galue ia maua le loto faafetai. O le a e iloa ai e aumaia ai ni taunuuga matagofie.”3
A o tatou iloa o tatou faamanuiaga, o le a tuputupu ae a tatou molimau. O le tele lava o le mafai ona tatou iloa le aao o le Alii i o tatou olaga, o le latalata foi lea o le tatou o atu ia te Ia. O le tasi o auala sili ona lelei e mafai ona faaali atu ai lo tatou loto faafetai i lo tatou Tama Faalelagi, o le faailoa atu lea o lo tatou faafetai ia te Ia ma isi mo auala ua latou pai mai ai i o tatou olaga.4
O nei lagona o le loto faafetai o le a musuia ai i tatou e mulimuli i le Alii ma ola i se olaga o auaunaga—o se olaga e musuia ai i latou o loo siomia i tatou ma uunaia ai suiga lelei.
Ata mai faaaloaloga a Vicki Larson ma le Church Publishing Services