Tala Faamamai o le Talalelei
Tapuai i le Atua Moni Soifua
Aumaia mai le “O Atua Sese o Loo Tatou Tapuai i ai,” Liahona, Aok. 1977, 1–4.
O le a la se mea tatou te fefefe ai pe a faatasi le Alii ma i tatou?
Ua tatou iloa mai tusitusiga paia, e faapea ona o le faatinoga o le faatuatua sa foliga mai pea e sili atu ona faigata nai lo le faalagolago i mea e vave maua e lima, ua foliga mai ai ua avatu e le tagata lona faalagolago i le Atua ma tuu i mea o le lalolagi. O le mea la lea, soo se taimi lava e pau atu ai le tagata i le mana o Satani ma aveese ai lo latou faatuatua, ua faapea lava ona latou faalagolago i le “malosi o le tino” ma “atua ario, ma auro, ma apamemea, ma uamea, ma laau, ma maa, e le vaai i latou, e le lagona, e le iloa ni mea” (Tanielu 5:23)—o le ifo lena i tupua. Ou te iloa o se mataupu tumau lenei i totonu o le Feagaiga Tuai. Soo se mea lava e faatuatua ma talitonu i ai se tagata ma faasilisili ia te ia, o lona atua lena, ma afai la o lona atua e le o le Atua lea o Isaraelu, ua galue lava lena tagata i le ifo i tupua.
Ou te matua talitonu afai tatou te faitau i ia tusitusiga paia ma taumafai e “faatatau ia [i tatou] lava” (1 Nifae 19:24), e pei ona fautuaina mai e Nifae, o le a faapea lava ona tatou iloa le tele o mea e tutusa i le va o talitonuga anamua i faatusa ma faataitaiga tau amio ua tatou i ai i nei ona po.
Ua faamanuiaina i tatou e le Alii. … E lelei tele punaoa ua tuuina mai i lo tatou malosi ma ua tatau mo la tatou galuega iinei i le lalolagi. Ae peitai e i ai ia te au lava le faanoanoa ona o le toatele o i tatou … ua amata ona fai le tamaoaiga ma atua sese ua tatou ifo i ai, ona o le tele o le faatosinaga o ia mea i o tatou olaga. Po ua sili atu ea ia mea ia i tatou nai lo le malosi o lo tatou faatuatua? E toatele tagata ua latou galulue i le tele o taimi o lo latou olaga i le galuega o le fia lauiloa e aofia ai le tele o tupe, oloa, pisinisi, teugatupe, fanua, meaafale, taavale, ma le manao e faamaonia ai le tamaoaiga faaletino. …
O La Tatou Tofiga
O le mea moni lava ua tatou faagaloina le tofiga na tuu mai ia i tatou o le faaaoga lea o nei punaoa e tele mo o tatou aiga ma korama e fausia ai le malo o le Atua—faalauteleina ai le galuega faafaifeautalai atoa ma galuega tau gafa ma galuega tau malumalusa; ia tausia ai a tatou fanau e avea ma ni auauna aoga mo le Alii; e faamanuiaina ai isi tagata i soo se ala, ina ia faapea foi ona latou manuia. Ae, ua tatou faaaogaina nei faamanuiaga e tusa ma o tatou lava manao, ma e pei ona fai mai Moronae, “Ua outou teuteuina ai outou lava i mea ua leai ni ola, ae ua outou tuu e ua fia aai, ma e ua matitiva, ma e ua le lavalava, ma e ua mamai ma puapuagatia, e ui ane i o outou tafatafa, ma outou le amanaiaina i latou” (Mamona 8:39).
E pei ona fetalai mai le Alii lava Ia i o tatou aso, “Ua latou le sailia le Alii e faatu lana amiotonu, ae ua taitoatasi le tagata ma savali i lona lava ala, ma e tusa ai ma le faatusa o lona lava atua, o lona foliga ua tusa ma foliga o le lalolagi, ma o lona uiga lena o se tupua, lea e oo ina tuai ma o le a fano i Papelonia, o Papelonia tele lava lea o le a pau” (MF&F 1:16; ua faaopoopo le faamamafa).
O Se Faafesuiaiga Le Lelei
Ou te iloa se tasi alii na valaauina i se tofiga e auauna ai i le Ekalesia, peitai na manatu o ia e le mafai ona ia taliaina ona e tele ona taimi e tatau ona alu i ana galuega i ana teugatupe nai … lo se taimi e mafai ona ia faasaoina mo le galuega a le Alii. Sa ia tuua le galuega a le Alii ona o le sailiga o Mamone, ma o loo avea nei o ia ma se milionea i aso nei.
Ae na ou iloa talu ai nei lava se mea moni mataina: Afai e umia e se tagata se auro e miliona tala lona tau … , ua umia pe tusa o le tasi vae 27 piliona o auro uma o loo i ai nei i le atigi manifi o le lalolagi lava ia. O se vaega tupe itiiti tele lea e le mafai e le mafaufau o le tagata ona fuafuaina. Ae o loo i ai se isi mea e sili atu i lea: O le Alii o le na foafoaina ma o loo i ai le mana i le lalolagi atoa na ia foafoaina foi isi lalolagi e tele, ma “e le mafaitaulia lalolagi” (Mose 1:33); ma ina ua talia e lea tagata le tautoga ma le feagaiga o le perisitua (tagai MF&F 84:33–44), na te mauaina se folafolaga mai le Alii o “mea uma ua i ai i lo’u Tama” (MF&F 84:38). O le faagaloina la o ia folafolaga sili ona o le fiafia i le auro ma se tamaoaiga faaletino o se mea sese lea pe a faatusatusa i mea taua. A mafaufau atu la i se tagata ua faamalieina i sina mea itiiti lava o se mea lea e faanoanoa ma e momomo ai le loto; e sili atu lava ona taua agaga o tagata nai lo lenei mea.
Sa tali atu se tasi alii talavou, ina ua valaauina i se misiona, e le o ia te ia se taleni tele mo lena ituaiga o galuega. O le mea sa lelei ai o ia o le tausia o lana taavale fou malosi ina ia lelei i taimi uma. … Na faasolosolo ai lava faapena, ma ua faamalieina ai lona tama i upu e faapea, “E fiafia lava o ia e faaaoga ona lima e galue ai. Ua lava lava lena mo ia.”
Pe ua lava ea lena mo se atalii o le Atua? E le’i iloa e lena alii talavou o le malosi o lana taavale o se mea e matua faatauvaa lava i le faatusatusa atu i le malosi o le sami, po o le la; ma e tele la o loo i ai, ua faatonutonuina uma i le tulafono ma le perisitua, ao le mea sili—o se mana o le perisitua lea e tatau ona ia atiina ae i le galuega a le Alii. Ae ua uai atoa lona mafaufau i se atua sese, fausia i uamea ma pau ma apa iila.
E i ai se ulugalii matutua ua litaea mai i galuega faalelalolagi ma faapea ai foi, i se taunuuga, ua litaea mai le Ekalesia. Na la faataua se taavale pikiapu e i ai ni totoga mo tolauapiga ma … malaga loa e matamata i le lalolagi. … E lei i ai so la taimi mo le malumalu, sa pisi tele ma leai ai se taimi mo le sailiga o gafa ma galuega faafaifeautalai. Sa ia le toe maua se fesootaiga ma lana korama a faitaulaga sili ma ua le lava se taimi e nofo ai i le fale e galue i lana talafaasolopito faaletagata lava ia. Sa matuai manaomia lava lo laua poto masani ma le taitaiga e lo latou paranesi, ae … sa laua le avanoa. …
Afai tatou te tumau pea i le faaalu o o tatou taimi ma punaoa uma mo le atiina ae o se malo faalelalolagi mo i tatou lava, o le mea foi lena o le a tatou mauaina.
Lafoai Mea o le Lalolagi
E ui lava i lo tatou fiafia i le taua o i tatou lava o tagata o ona po nei, ma lo tatou mafaufau e faapea ua tatou maua se atamai faalelalolagi e lei maua lava e se isi tagata i le tuanai—e ui lava i ia mea, i se aotelega, o i tatou lava o tagata ifo i tupua—o se tulaga lea e sili ona inosia e le Alii.
O i tatou … e faigofie lava ona faalavelaveina i la tatou galuega o le sauniaina mo le afio mai o le Alii. … E galo ia i tatou afai tatou te amiotonu, o le a le faatagaina e le Alii o tatou fili e oo mai ia i tatou … a le o lena o le a tau o Ia a tatou taua mo i tatou (tagai Esoto 14:14; MF&F 98:37, e na o le lua lena o le tele o mau ua ta’ua)….
O le a la se mea tatou te fefefe ai pe a faatasi le Alii ma i tatou? Pe le mafai ea ona tatou talitonu i le Alii i Lana afioga ma faatino sina vaega o le faatuatua ia te Ia? Ua faamautuina la tatou galuega: ia lafoai mea o le lalolagi ona e muta ia i latou lava; ia faataatia ese le ifo i tupua ae fetaomi i luma i le faatuatua; ia avatu le talalelei i o tatou fili, ina ia mafai ona le toe avea i latou ma o tatou fili.
Faaaoga le Faatuatua Sili Atu
Ua tatau ona tatou lafoai le tapuai atu i tupua faanei ona po ma le faalagolago i le “malosi o le tino,” aua ua fetalai mai le Alii i le lalolagi atoa i o tatou nei aso, “o le a Ou le faasaoina soo se tasi e tumau i Papelonia” (MF&F 64:24). … Ua tatou talitonu o le ala e saunia ai tagata ma aiga taitoatasi ua tuuina mai e le Alii o le amata lea ona faamalosia o le faatuatua, ia salamo, ma ia ulufale atu i le galuega o lona malo i le fogaeleele, o le Ekalesia lea a Iesu Keriso o le Au Paia o Aso e Gata Ai. Atonu e foliga mai e faigata i le amataga, ae peitai e amata loa ona maua e se tagata se faaaliga o le galuega moni, pe a amata ona vaaia e ia se mea o le faavavau i lona faamoemoega tonu, o le a faapea foi ona amata ona faatuatuanai le “lalolagi” i le tele o faamanuiaga.”
E na o totonu lava iinei o loo i ai le fiafia moni, ma o lea tatou te valaau atu ai i tagata uma ma talia i latou ma le fiafia, i soo se nofoaga, ia auai i lenei galuega. Mo i latou ua tonu i o latou mafaufau e auauna i le Alii i soo se mea, o le ala lava lenei i le ola e faavavau. O isi mea uma e gata ma e pala.
Ata na tusia e J. Beth Jepson