2013
Ua Molimauina e le Ekalesia ni Suiga Iloga i le vaitaimi o le Auaunaga a Peresitene Monson
Iuni 2013

Ua Molimauina e le Ekalesia ni Suiga Iloga i le vaitaimi o le Auaunaga a Peresitene Monson

I le vaitaimi o le lima tausaga ua tuanai o le taitaiga a Peresitene S. Monson, ua molimauina ai e le Ekalesia ni suiga iloga ua aafia ai le au paia i le lalolagi atoa. Ua mafai ona vaaia le o’oo’o o le uunaiga a le Peresitene lona 16 o le EKalesia i le mau faasilasilaga taua ma le faatinoga o aiaiga fou, mai le galuega faafaifeautalai ma le aoaoina o le taitaiga faaleperisitua e oo atu i le anoanoai o malumalu ua fausia.

O le tele o aiaiga ma faasilasilaga sa faailoa mai i le vaitaimi o le taitaiga a Peresitene Monson ua i ai se uunaiga i le lalolagi atoa—ae, o le ute lava, ua fuafua e tautuaina ai ma vaavaaia tagata taitoatasi. O lona popolega i lona soifuaga atoa mo le tasi, ua faaalia manino i ia taimi iloga taitasi.

O ni nai faatumutumuga nei mai le lima tausaga muamua o le au peresitene a Thomas S. Monson:

  • I se gaoioiga ina ia faalautele avanoa mo tagata talavou o le Ekalesia e auauna atu ai faamisiona, na fofogaina ai e Peresitene Monson i le aso 6 o Oketopa, 2012, e faapea, ua mafai ona amata faamisiona alii i le 18 o o latou tausaga ae o tamaitai i le 19 tausaga. O lana faasilasilaga sa faia i le taimi o le sauniga amata o le Konafesi Aoao Faaleafatausaga Lona 182 a le Ekalesia ma na faaosofia ai se naunautai o le anoanoai o faifeautalai. Talu mai le faasilasilaga, ua maoae le fuainumera o talosaga ua tauaaoina e le Matagaluega o Faifeautalai a le Ekalesia mai i alii ma tamaitai talavou ua naunau e auauna atu.

  • I se tusi o loo taufai saini uma ai ma ona fesoasoani i le Au Peresitene Sili o—Peresitene Henry B. Eyring ma Peresitene Dieter F. Uchtdorf—Sa fofogaina mai ai e Peresitene Monson le faaaogaina i le 2013 o se mataupu aoaoina fou a le autalavou ua fuafuaina “e faamalolosia ma atiina ae ai faatuatua, liuaina, ma molimau” i tagata talavou o le Ekalesia. O le mataupu aoaoina fou e mafai ai ona tele atu le fefaasoaai faafaiaoga i le Perisitua Arona, Tamaitai Talavou, ma vasega a le autalavou i le Aoga Sa e mamanu i le auala sa aoao atu ai le Faaola i le taimi o Lana galuega i le lalolagi. O vasega i vaiaso taitasi e faaaoga ai le tele o punaoa o loo i le initoneti ia ua mafai ona faaavanoaina e le Ekalesia i aso nei, e mafai ai e le autalavou ona olioli i le faaalia o manatu ma faaaofia atili ai nai lo se isi lava taimi muamua.

  • I lalo o le taitaiga a Peresitene Monson ma le Au Peresitene Sili, o loo faaauau ai pea ona tuuina atu e le Ekalesia ni fonotaga faaleaoaoga a taitai i le lalolagi atoa e fesoasoani ai i taitai perisitua ma ausilali i le lotoifale ma aiga i a latou taumafaiga e auauna atu i le au paia ma faaloloto atili ai le liuaina. O aoaoga faamasani e mafai ai e taitai ma le au paia i le lotoifale ona maua faatonuga mai sui o le Au Peresitene Sili, Korama a Aposetolo e Toasefululua, ma isi Pulega Aoao ma taitai aoao o ausilali. O le aoaoga i le lalolagi atoa na aofia ai faatonuga i le faaaogaina o tusitaulima fou mo le taitaiga (sa faalauiloaina i le 2010), aoaoga i le faatautaia o fonotaga anoa a aufono a le uarota, ma le faamalolosia o aiga ma le Ekalesia e ala i le perisitua.

  • I le 2010 sa amata ai e le Au Peresitene Sili ona tofia sui o le Korama a Aposetolo e Toasefululua e faatautaia ni ituaiga fonotaga fou se lua faavaomalo—konafesi faaleautaitai o le perisitua ma iloiloga a eria. I taimi o konafesi taitasi faaleautaitai o le perisitua, e faapotopoto faatasi mai ai au peresitene o siteki, epikopo, ma peresitene o paranesi i totonu o se eria atofaina a le Ekalesia mo ni aoaoga. I taimi o iloiloga taitasi a eria e silasila loloto ai foi taitai i mea o loo tutupu i le Ekalesia i se eria faale-ekalesia atofaina ma iloilo ia mea e pei o auaunaga fesoasoani alofa, manaoga i mea tau uelefea, galuega faafaifeautalai, ma galuega o talafaasolopito o aiga ma malumalu.

  • I le vaitau o le taitaiga a Peresitene Monson, ua 31 malumalu fou ua fofogaina i le lalolagi atoa. E sefuluono ua uma ona faapaiaina ma le isi lima na toe faapaiaina ina ua maea ni faafouga tetele. O Peresitene Monson lava ia sa pulefaamalumalu i le faapaiaina o malumalu i Calgary, Alberta, Kanata; Cebu City, Filipaina; Curitiba, Pasila; Kyiv, Iukureini; Panama City, Panama; Vancouver, British Columbia, Kanata; ma Draper, Iuta; Kansas City, Misuri; Rexburg, Idaho; South Jordan, Iuta; The Gila Valley, Arisona; ma Twin Falls, Idaho, ISA; ma faapea foi i le toe faapaiaina o malumalu i Mexico City, Mekisiko; ma Atlanta, Georgia; Boise, Idaho; ma Laie, Hawaii, ISA.

  • Sa pulefaamalumalu foi Peresitene Monson i se vaitau ua mafai ai e le au paia ona maua gofie punaoa a le Ekalesia e ala i le initoneti nai lo se isi lava taimi muamua, e molimoli atu ai saunoaga a perofeta ma polokalama a le Ekalesia i le tusa ma le 14 miliona o le au paia i le salafa o le lalolagi. O faatumutumuga o le initoneti e aofia ai ni vitio eseese ua gaosia e le Ekalesia, e aofia ai se faasologa o ata pupuu ua faaalia ai mea taua na tutupu mai le Feagaiga Fou.

  • I lalo o le taitaiga a le Au Peresitene Sili, na gaosia ai e le Ekalesia se tusi fou ua faaautuina O Afafine i Lo’u Malo: O Le Talafaasolopito ma le Galuega a le Aualofa. O le tusi ua fuafuaina o se punaoa patino a le tagata lava ia ma le aiga e faamalolosia ai tamaitai i o latou tiutetauave.

  • I lalo o le taitaiga a Peresitene Monson, ua tali atu ai le Ekalesia i faalavelave i le salafa o le lalolagi, e aapa atu ma fesoasoani ia i latou e manaomia le fesoasoani. O nisi o tulaga iloga na tali atu ai e ala i fesoasoaniga alofa i le lima tausaga ua mavae e aofia ai taumafaiga e aapa atu i se mafuie i Haiti, se mafuie ma se galulolo i Iapani, ma lologa i Taialani. Sa tali atu foi le Ekalesia i se faafitauli ogaoga mo taumafa i Aferika i sasae, fesoasoani i tui puipui o tamaiti i le tele o atunuu, ma na tuuina atu suavai mama i le tele o afioaga taumamao. Ma le isi, sa faapaiaina e le Ekalesia se nofoaga fou o le uelefea e 570,391-futu-faatafafa (53,000 mita faatafafa) i le Aai o Sate Leki, Iuta, ISA.

O loo saunoa atu Peresitene Thomas S. Monson i le au faasalalau i le fofogaina o le Au Peresitene Sili fou a Le Ekalesia a Iesu Keriso o le Au Paia o Aso e Gata Ai, i le Aso Gafua, 4 Fepuari, 2008.

Ata na pueina e August Miller, Deseret News