Savali a le Au Peresitene Sili
Savavali i Li’o
Na e faalogo muamua i le agana ua leva foi lea e faapea o tagata e leiloloa e matele lava ina savavali i li’o?
Sa manao Jan L. Souman, o se polofesa Siamani i amioga ma aafiaga, e suesue faasaienitisi pe moni lava lenei mea. Sa ia aveina ni tagata sa auai i se faataitaiga i se eria tele o se vaomatua ma ave i le toafa o Sahara ma faaaoga se faiga o le faatulagaga aoao e tulituliloa ai le mea na o i ai. E le’i i ai ni tapasa po o se isi lava masini. O faatonuga sa tuuina atu ia i latou sa faigofie lava: savavali i se laina sa’o i le itu sa faasino i ai.
Sa faamatala mulimuli ane e Dr. Souman le mea na tupu. “O [nisi] o i latou sa savavali i se aso puaoa, o le la sa ufitia i ao [ma sa le iloa atu ni vaega na faasino i ai]. … Sa [latou] savavali uma lava i ni li’o, ma [o nisi] o i latou sa fesopoai soo o latou ala e aunoa ma le iloaina.” O isi tagata auai sa savavali a o susulu le la, ma sa iloa atu lava vaega faasino sa taumamao. “O i latou nei … sa mulimuli i se auala na toetoe lava a sa’o lelei.”1
O lenei suesuega sa toe faia foi e isi i ni metotia eseese.2 Sa latou foi mai uma ma ni taunuuga talitutusa.
A aunoa ma ni faailoilo vaaia, e matele lava tagata ina savavali i li’o.
O Le Faailo o Tusitusiga Paia
A aunoa ma faailo faaleagaga, e faapena foi ona feseai solo tagata. A aunoa ma le afioga a le Atua, tatou te savavali i li’o.
I le avea ai o ni tagata taitoatasi ma ni faalapotopotoga, tatou te vaaia lenei mamanu o tupu pea lava pea i tisipenisione taitasi talu mai le amataga o taimi. A tatou le taulai atu i le afioga a le Atua, e matele lava ina tatou leiloloa.
E le masalomia lava o le mafuaaga lea na poloaiina ai e le Alii ia Liae e toe auina atu ona atalii i Ierusalema mo papatusi apamemea. Sa silafia e le Atua o le a manaomia e e tupuga mai ia Liae ni faailo faatuatuaina—ni vaega e faasino i ai—o le a saunia ai se taiala e mafai ona latou faaaogaina e iloa ai pe o latou savavali i le ala.
O tusitusiga paia o afioga ia a le Atua. O faailo ia a le Atua e faailoa mai ai ia i tatou le ala e tatau ona tatou malaga ai ina ia mafai ona tatou faalatalata atili atu i lo tatou Faaola ma ausia ai sini tauaogaina.
O Le Faailo o le Konafesi Aoao
O faatonuga e tuuina mai i konafesi aoao o se isi lea faailo e mafai ona fesoasoani tatou te iloa ai pe o tatou i ai i le ala.
E masani ona ou fesili ia te a’u lava ia, “Pe sa ou faalogo i saunoaga na tuuina mai e tamalii ma tamaitai o e sa saunoa i le konafesi aoao aupito lata mai a le Ekalesia? Pe ua ou faitauina ma toe faitauina a latou saunoaga? Pe ua ou mafaufau loloto i ai ma faaaogaina i lo’u olaga? Pe na o lo’u fiafia lava i saunoaga matagofie ae musu e faaaoga a latou savali musuia i lo’u lava olaga?
Atonu a o e faalogologo pe faitau, sa e tusia i lalo se faamatalaga se tasi pe lua foi. Atonu sa e faia se tautinoga e fai ia sili atu pe ese atu foi ni isi o mea. Sei mafaufau i savali o le konafesi aoao ua mavae atu. O le toatele lava sa uunaia i tatou e faamalolosia o tatou aiga ma faaleleia atili a tatou faaipoipoga. O le lomiga lenei o le Liahona o loo taulai atu foi i nei tulaga faatauaina e faavavau, faatasi ai ma le tele o fautuaga aoga e faamanuiaina ai o tatou olaga.
Pe o tatou matauina ma faaaogaina lenei fautuaga aoga? Pe o tatou iloa ma savavali agai atu i nei faailo moni ma taua?
O Le Fofo o le Feseseai Solo
O faailo faaleagaga e taua mo le faatumauina o i tatou i luga o le ala sa’o ma le vaapiapi. Latou te tuuina mai faatonuga manino i le ala e tatau ona tatou ui ai—pe afai lena tatou te iloaina ma savavali agai atu i ai.
Afai tatou te mumusu e taitaiina e nei faailo, o le a avea ma ni mea faatosina e leai ni aoga, ua leai se faamoemoega ae ua na ona momotuina ai o le faisoo o mea lava e tasi o le olaga.
E le lava le faaaoga na o o tatou lava uiga faalenatura.
E le lava le i ai o faanaunauga sili ona lelei.
E leai se uiga o le faalagolago tasi i o tatou lagona faalenatura.
E tusa lava pe tatou te manatu faapea o loo tatou mulimuli i se ala sa’o faaleagaga, a leai ni faailo moni e taialaina i tatou—a aunoa ma le taitaiga a le Agaga—o le a iu lava ina tatou fesesea’i.
O lea, ia pupula o tatou mata ma vaai i faailo ua saunia e lo tatou Atua agalelei mo Lana fanau. Ia tatou faitau, faalogologo, ma faaaoga le afioga a le Atua. Ia tatou tatalo ma le manatu tonu i ai ma faalogo i ai ma mulimuli i uunaiga a le Agaga. A tatou iloaina loa faailo faalelagi ua ofoina mai e lo tatou Tama Faalelagi agaalofa, ua tatau loa ona faatulaga lo tatou ala i na faailo. E tatau foi ona tatou faia e le aunoa ni faasa’oga o le ala, a o tatou faatulagaina i tatou lava agai i faailo faaleagaga.
O lenei auala, o le a tatou le fesesea’i ai i li’o ae savavali ma le to’a ma le mautinoa agai atu i lena faamanuiaga faalelagi o le tofi lea o i latou uma o e savavali i le ala sa’o ma le vaapiapi o soo o Keriso.
Aoao atu mai lenei Savali
A o e sauni e aoao atu mai lenei savali, e mafai ona e suesue i mau mo faataitaiga o tagata o e sa taitaiina e faailo faaleagaga po o tagata o e sa fesesea’i i li’o. E mafai ona amata au suesuega i mau nei: Numera 14:26 en 33; 1 Nifae 16:28–29; Alema 37:38–47. Afai e te lagona ua musuia oe, e mafai ona e faasoa atu ni manatu mai nei faataitaiga ia i latou o loo e aoaoina. Fesili atu ia i latou po o a ni mea e mafai ona tatou aoao mai nei tala.
Atapue © Thinkstock/iStockphoto