Sa E Aveesea Lo’u Faanoanoa
Kissy Riquelme Rojas, Chile
Mo se taimi sa ou toaga ai i le faiga o galuega o talafaasolopito o aiga ma galuega faalemalumalu. E ui sa agai i luma a’u sailiiliga, ae sa ou iloaina o le a faigata ia te a’u ona maua faamatalaga e uiga i se tagata se toatasi—le tamā o lo’u tina.
Sa le’i ola ae faatasi lo’u tina ma lona tamā ma leai ai se fesootaiga ma ia, nai ona tei, ma tagata uma o le aiga o lona tamā. Sa leai foi se mea e faamaonia ai lona aso fanau po o le nuu na fanau ai, ma sa le’i mautinoa foi e ia po o fea ae po o anafea foi na maliu ai. Sa ou mafaufau pe mata o le a ou mauaina ea ia faamatalaga manaomia.
I se tasi aso, a o ou suesue i le api talaaga a lo’u tina, sa ou matauina ai se ata o lo’u tamamatua. A o o’u fulia ane le isi itu, sa ou vaaia ai sa ia sainia ma tusi ai le aso i le ata ma faaalia ai lona matua na i ai i le taimi lea. O lenei la ua ou mauaina tonu lona aso fanau! Sa ou sueina ma le fiafia ia lona igoa ma aso i luga o le FamilySearch. Sa matuai o’u tei lava, ina ua ou vaaia ua uma ona fai ona sauniga. Po o ai sa na faia galuega faalemalumalu o lo’u tamamatua?
E le’i umi ae ou iloaina sa faia galuega e se tasi o toeaina ou te le’i toe vaai i ai o le aiga o lo’u tina. Sa ou suea ona faamatalaga e faafesootai ai ma iu ina ou maua le numera o lana telefoni.
Sa ou popole i le valaau atu ia te ia aua sa feiloai ia te i le 30 tausaga ua mavae-ao tasi lo’u tausaga. Ou te le’i iloa po o le a faape’i sana tali mai.
Ae, sa ou filifili lava e valaau i ai. Ina ua ia tali mai, sa ou faamatala atu i ai le ala na ou maua ai le faamatalaga e uiga i lo’u tamamatua—lona tamā—ma fai atu ia te ia o a’u o le tama a lona tuafafine.
O le a ou manatua pea lana tali: “E le mafai ona e iloa le faanoanoa na ou lagonaina i le leai o se fesootaiga ma lou tina. O lenei ua e aveesea lena faanoanoa mai ia te a’u!”
Sa ou iloa ai o lona aiga ma lo’u aiga, e ui ina valavala, sa papatisoina ma faamauina o ni tagata o Le Ekalesia a Iesu Keriso o le Au Paia o Aso e Gata Ai, pe tusa o le vaitaimi lava e tasi, ma sa malolosi uma aiga e lua i le talalelei. O se taimi fiafia, ma ootia lena mo i maua.
Ua leva ona ou malamalama o talafaasolopito o aiga ma galuega faalemalumalu e mafai ona faafesootaia i tatou i o tatou tuaa ua maliliu, ae ou te le’i mafaufau lava e mafai ona faafesootaia foi i tatou i o tatou aiga o feola pea. Ou te faafetai ona ua mafai ona ou fesoasoani e tuufaatasia lo matou aiga e ala i talafaasolopito o aiga—e le gata i le lalolagi o agaga ae faapena foi i o tatou olaga i le lalolagi.