Tatou te Talanoa ia Keriso
“O Le A Le Galo Ia Te A’u Lau Afio”
O le tusitala e nofo i Iuta, ISA.
A o ou savali atu i totonu mo la’u siaki masani i le fomai, sa faatumulia a’u i le fiafia ma le faamoemoe. O le masaini e siaki ai le tata o le fatu o se pepe e lei fanau mai, na uma ai ona ou vaai i le tata o le fatu o si a’u tamai pepe, ae o le taimi nei, i ni nai vaiaso mulimuli ane, o si mosimosi o loo i totonu o a’u o le a faasolo tele. O le maua o se aafiaga i le vavega o maitaga e tolu talu ai, e le mafai ai lava ona uma lo’u maofa.
O le sefulu minute mulimuli ane, sa ou tagi ai na o a’u i totonu o la’u taavale—o le vaaiga o se pepe ua le minoi ma ua leai se tātā o le fatu na faailoga e faavavau i lo’u mafaufau.
I aso na sosoo ai, sa ou le toe lagonaina se mea i lou mafaufau. Sa ou lagona le leai o se faamoemoe ma le tuua toatasi. Sa tatau ona toe foi lo’u toalua e faigaluega, ae taufetuli solo i le fale le ma fanau e toatolu a o o’u fafagaina i latou ma leai o se loto i ai a o taumafai e faatumauina le mama o le fale. Ae sa ou le i ai moni iina. Pe a ou foi mai i le fale mai le faiga o nisi o fuafuaga, o le mea muamua lava ou te faia o le siaki lea pe na i ai ni telefoni na ou misia. Leai se mea. Ou te siakia la’u imeli i itula uma lava. Sa leai lava se mea. Sa amata ona ou mafaufau pe sa popole a’u uo ma tuaoi ia te a’u. Pe na avea moni ea i latou ma ni a’u uo? Sa ou le iloaina le auala na galue ai Satani ia te a’u.
Sa ou faasoa atu o’u lagona i lo’u toalua i se tasi po, ma sa vave ona ia iloa le mea o loo tupu. Sa ia faasoa mai ia te a’u le 1 Nifae 21:15–16:
“O le [a] le galo ia te a’u oe, le aiga e o Isaraelu.
“Faauta, ua Ou togitogia oe i luga o alofilima o o’u lima; o ou pa ua i ai pea i o’u luma.”
Sa ou aoao ma suesue muamua i le Togiola. Sa ou faapea na ou iloaina le uiga o lena mea. Ae sa ou toilalo e faaaoga tatau i lo’u lava olaga. Ua uma ona puapuagatia Iesu i o’u faanoanoaga uma. Sa Ia silafiaina lelei lava o’u lagona.
“O Lana galuega sili ona atoatoa, o le Togiola, na manaomia ai Iesu e alu ifo ‘i lalo o mea uma’ (MF&F 88:6) ma mafatia ‘i tiga o tagata uma’ (2 Nifae 9:21). O lea ua tatou malamalama ai, e lautele le faamoemoega o le Togiola nai lo le saunia o se auala e manumalo ai i se agasala. O lenei mea aupito sili i mea uma na ausia i le lalolagi na maua ai e le Faaola le mana e faataunuu ai lenei folafolaga: ‘Ae afai tou te liliu atu i le Alii ma le faamoemoe atoa o le loto, … o le a laveaiina … outou e ia’ (Mosaea 7:33).”1
O ai se uo e sili atu e mafai ona ou maua i lenei taimi pagatia nai lo le e mafai moni ona ia faanoanoa faatasi ma a’u? Sa ou iloaina sa ou manaomia lo’u Faaola e fesoasoani ia te a’u e faatoilalo lo’u faanoanoa. A o ou liliu atu i le Alii, sa vave lava ona ou vaaia Lona alofa mo a’u. Sa ou lagona le mafanafana ma le filemu, ma sa ou lagona sa malamalama Iesu ia te a’u i se auala ou te lei manatu e mafai ai. O Ia tonu lava o le ituaiga o uo sa ou momoo i ai i na aso ina ua fafano lo’u maitaga—o le ituaiga o uo sa sili ona ou manaomiaina.
Ou te iloa e mafai ona ou liliu atu i lo’u Faaola i taimi uma, e le gata i taimi e manaomia ai ona ou salamo mai a’u agasala, ae e faapena foi pe a ou manaomia se tauau ou te tagi ai i luga. E i ai lava o Ia iina i taimi uma. Pe a tatou sailia se tagata e malamalama i o tatou tiga ma faanoanoaga, ia aua nei galo ia i tatou la tatou uo sili ona faamaoni, o Iesu Keriso.
Sa faasoa mai e lo’u toalua ia te a’u le 1 Nifae 21:15–16. Sa ou iloaina sa ou manaomia lo’u Faaola e fesoasoani ia te a’u e faatoilalo lo’u faanoanoa.
Ata na tusia e Welden C. Andersen