Oka se Maoae o le Fuafuaga a lo Tatou Atua!
I se taimi lea sa tele ai lava le tiga ma le tuua toatasi i lo’u loto, o lo’u malamalama o le talalelei sa aumaia ia te au le to’a e agai ai i luma.
Ata na tusia e Cynthia Clark
Sa ou ola ae i se nuu lea sa tau le iloa ai le Ekalesia—o se taulaga lea ua ta’ua nei o Berkh, i Monokolia i matu. O a’u o le tamaitiiti ogatotonu o ni tama e toatolu, ma o le tuputupu ae, sa matou faatasi ai i taimi uma lava. Ina ua alu lo’u uso matua i le aai e aoga ai, sa ou matuai misia lava o ia. O le lua tausaga mulimuli ane, sa sau ai o ia i le matou aiga mo lana malologa o le taumafanafana. O le taumafanafana lena sa o ai le fanafanaga a le matou aiga i mauga papa mo le tolu masina. O se tasi lea o malologa silisili o le taumafanafana o lo’u olaga.
Sa amata ona faamatala mai e lo’u uso ia te au e uiga i se lotu ua auai e ta’ua o Le Ekalesia a Iesu Keriso o le Au Paia o Aso e Gata Ai. I le taimi lena sa ou le fiafia i lotu Kerisiano, o lea sa ou le ano tele ai i mea sa ia ta’uina mai ia te a’u.
I se tasi aso o le tautoulu sa matou taunuu atu ai i le fale mai se fanafanaga ma tau atu ai i nisi o malo asiasi mai le aai. O i latou mai le Ekalesia lea sa talanoa mai ai lo’u uso. Sa latou toe foi atu ma ia i le aai i lena po. Mulimuli ane, sa matou faalogo ai i le mafuaaga sa alu ai o ia: sa maua mai lona valaauga o le misiona. E le’i fai mai foi ia i matou na ia aveina i totonu lana talosaga! E le’i leva ae alu lo’u uso i lana misiona i le Iunaite Setete o Amerika.
Liliu i le Talalelei
O le tausaga na sosoo ai, ina ua uma la’u aoga maualuga, sa ou alu ai i le aai ou te aoga i le iunivesite. O le aiga sa ou nofo ai sa ou iloa ane o ni tagata o le Ekalesia. I le taeao o le Aso Sa, sa latou valaaulia ai a’u matou te o faatasi i le lotu. Ona sa tele ni mea sa ou faalogo i ai e uiga i lenei Ekalesia, o lea sa ou filifili ai o le a ou faataitai tasi lava ona alu i ai.
Sa iu ina ou auai i le lotu i le tele o taimi. Sa le mafai ona ou tatalia le lagonaina o le toafilemu i taimi uma sa ou i ai iina. O tagata iina sa agalelei, o taimi uma matou te lululima ai. Sa ese lava le Ekalesia mai le mea sa ou mafaufau i ai. E le’i umi ae amata ona fai a’u lesona e faifeautalai. Na toeitiiti atoa le lua tausaga o matou feiloai ma faifeautalai.
Sa ou iloa sa ou fia papatiso, ae o lo’u papatisoga sa tolopoina ona o a’u tauiviga ma le Upu o le Poto. Sa faigata ia te a’u, ae mulimuli ane, sa ou saunia ai e papatiso. Sa faamanuiaina au ina ua papatisoina a’u e lo’u uso matua, o lē sa foi mai lana misiona i ni nai masina na muamua atu. A ou toe mafaufau i lena taimi i le taimi nei, ou te tagi ai i nisi o taimi. O le taimi aupito sili lea ona fiafia o lo’u olaga.
Ina ua ou auai i le Ekalesia, sa talanoa mai lo’u uso e uiga i le galuega faafaifeautalai na toetoe lava i aso uma. Sa le aunoa ona ia uunaia au ou te alu i se misiona. Faatasi ai ma lana fesoasoani, sa ou faatumuina ai la’u talosaga mo le misiona. O le a le galo ia te a’u lo ma fiafia ma lo’u uso matua i na aso.
O Se Aafiaga Taufaamatau
I se tasi afiafi na valaau mai ai lo’u uso ou te alu atu ma te feiloai pe a manava galuega. Sa fia talanoa mai ia te au e uiga i nisi o mea e faatatau i la’u misiona. Sa ma faatulagaina se taimi e feiloai ai i le lotoa tutotonu.
O le vaitaimi lena sa fai ai faiga palota faalepalemene i Monokolia. A o ma feiloai i le lotoa tutotonu, sa fai ai e tagatanuu se faaaliga ona o le palota. Sa i ai leoleo iina, ae sa oo ina vevesi ma taufaamatau le faaaliga, ma faateteleina ai i se fetaua’iga. Sa mu se fale tele lava ma nisi o taavale, ma sa feei ma faataio solo tagata. Sa taufaamatau.
Sa mamao le mea sa ma feiloai ai ma lo’u uso mai le mea sa i ai le faaaliga, ae sa popole lava o ia. Sa ia aumaia se tupe mo se tamaitaavale ma fai mai ou te alu sa’o loa i le fale. Sa fai mai o le a ma feiloai i le aso e sosoo ai. Sa fuafua o ia e toe foi atu i lona fale, lea sa latalata i le mea sa faigaluega ai. Sa oo mai le tamaitaavale, ma sa vave ona ma faatofa ae ou te le’i aluese atu.
E le’i leva ae ou iloa ua tapunia e le malo auala uma ona o le vevesi. Sa le mafai ona ou oo atu i lo’u fale, lea sa i tua atu o le aai, o lea sa ou faaaluina ai le po i le galuega. Sa feoai solo taavale ma fitafita faaauupegaina i soo se mea. Sa faateteleina fetauaiga, ma o le po lena sa sau ai se avea’i o se tulaga o faalavelave. Na alu ai le fa o aso.
Ina ua uma le tulaga o le faalavelave, sa sau lo’u uso faaletulafono e piki a’u. Sa ma oo atu i lona fale lea na faatalitali mai ai tagata uma o lo’u aiga. Sa fetagisi uma lava i latou. Sa ou iloaina ai, na fanaina lo’u uso matua a o savali atu o ia i le fale.
Sa pei a pa lo’u fatu. Na maliu lo’u uso a o 24 ona tausaga ona o lena faaaliga. O aso na sosoo mai ma le maliu o lo’u uso, o nisi ia o aso na sili ona matautia o lo’u olaga.
O le vaitaimi faigata lenei na ou mauaina ai lo’u valaauga o le misiona. Ina ua uma ona ma uia lo’u liliu mai, papatisoga, ma le tapenaina o pepa o le misiona faatasi ma lo’u uso, sa tuua ai na o a’u e tatala lo’u valaauga o le misiona. O le mea na ou te’i ai, sa valaauina au e auauna atu i lo’u lava atunuu.
Talu ai ona sa tuua na o a’u, o lea sa ou tootuli ifo ai iina lava ma faafetai atu i lo’u Tama Faalelagi i le tatalo. Ma sa ou tatalo mo lo’u uso. Sa matuai o’u tagi ao o’u tatalo. O le taimi lenei, i le tele o le tiga ma le tuua toatasi i lo’u loto, sa ou lagonaina ai le Agaga o molimau mai ma le o’oo’o tele ia te a’u e uiga i le ata o le faaolataga, ma sa faapea ona faamalosia ai lo’u faatuatua.
Agavale i le taumatau: O Amarsanaa ma ona uso o Dorjsuren ma Amarsaikhan
O Se Molimau i Lana Fuafuaga
E ui ina sa le i ai iina lo’u uso ma te tatalaina faatasi lo’u valaauga, o le a ou faafetai pea ia te ia. Ou te matuai faafetai lava foi ona o le tuuina mai e le Atua ia i tatou o le ata o le faaolataga e ala i le Togiola a Iesu Keriso. O se fuafuaga e silisili ona ofoofogia. A tatou mulimuli i lenei fuafuaga, o le a tatou lagona le toafilemu i o tatou loto.
Ua ta’u mai e tusitusiga paia ia i tatou: “E, le silisiliese naua o le fuafuaga a lo tatou Atua! Aua … e ao i le parataiso a le Atua ona tatala mai agaga o e amiotonu, ma tatala mai e le tuugamau tino o e amiotonu; ma toefuatai le agaga ma le tino ia te ia lava, ma avea ai tagata uma ma tagata tinolepala, ma tino ola pea, ma o i latou o ni tagata ola” (2 Nifae 9:13).
Ua ou iloa o loo ola lo’u uso i le lalolagi o agaga. O lenei malamalama ua aumaia ia te a’u le to’a e manaomia ia ou faia faalelei ai la’u misiona. Ou te iloa o le a faatasi mai o ia ia te a’u i taimi faigata—ma e faapena foi i le Alii.