O Se Meaalofa mo Tinamatua
O le tusitala e nofo i Kalefonia, ISA.
O se tusi faatauvaa e faafetai atu ai sa tele sona taua i lo’u tinamatua.
Ata na tusia e Roger Motzkus
A o o’u laitiiti, sa masani ona fai e tinamatua ni faatasiga mo i matou ma o’u tausoga. Pe a ma le 14 o i matou, ma sa matou fiafia lava i taimi uma pe a valaaulia i matou e Tinamatua mo aiga i afiafi, moetasi, po o taaloga, ma aso malolo. O le fale o Tinamatua o le nofoaga lea e tatau ona i ai!
O gaoioiga uma lava i le fale o Tinamatua sa malie. Ae ou te le’i mafaufau lava i le taimi ma galuega uma sa alu ai i ia gaoioiga taitasi. Sa na ona ou mafaufau faapea, o mea na e fai e tinamatutua, ma sa ou fiafia tele i ai!
Ina ua mavae tausaga o mea malie e manatua ma tausoga i le fale o Tinamatua, sa siitia ese lo matou aiga. Mulimuli ane sa sau ai lo’u tinamatua e faaalu se aso faapitoa ma i matou i le matou fale fou. Sa umi o mafaufau loloto lo’u aiga e sue se meaalofa lelei lava mo ia. E tele ana mea ua i ai, nai lo se isi tagata ua ou iloa. O le a se mea e mafai ona matou tuuina atu i le tinamatua ua i ai mea uma?
Sa ou fesili atu i lo’u tama mo ni manatu, sa ta’u mai foi e ia le mea lava e tasi sa fai mai ai i tausaga uma lava: “Aisea e te le tusia ai se tusi manaia lava ia te ia?” Sa leai ni o’u manatu, ma o le taeao po lava o le aso na sosoo ai, ao le’i ala mai se tasi, sa ou saofai ai i le laulau i le umukuka ma o’u vae sa tu i luga o le maamora malulu, ma tusi atu i lo’u tinamatua se tusi faapitoa.
O le taimi muamua sa ou mafaufau i se mea e mafai ona ou tusia nai lo o le, “E ese lou lelei. Faafetai mo mea uma.” A o ou tilotilo atu i fafo i le faamalama o le umukuka i niu ma le lagi, sa ou mafaufau ai i le tele o mea sa fai e Tinamata mo i matou i le tele o tausaga. Sa ou manatua ou te le’i ta’ua lava i lo’u tinamatua le taua ia te au o na taimi sa faaaluina faatasi o se aiga.
I la’u tusi, sa ou ta’u atu ai ia tinamatua ou te alofa ia te ia, ma sa ou faafetai ia te ia mo manatuaga faapitoa uma. Sa ou faailoa atu ia te ia lo latou taua tele ia te a’u, e oo lava i tausaga e tele mulimuli ane. Ona ou tuua lea o le tusi i se teutusi, nonoa i se lipine lanumumu, ma ou toe alu i totonu o lo’u potu mafanafana, e fola i le kapeta.
Ina ua oo mai le taimi e ave atu ai ia Tinamatua ana meaalofa, sa ou aumaia lemu i fafo la’u tusi. Sa ou le iloa po o le a lo’u lagona e uiga i la’u meaalofa mo ia.
Sa vaaia lona te’i ina ua ou tuuina atu i ai le teutusi. Sa ou vaavaai ma le totoa a o ia sasaeina ma le faaeteete le tulimanu o le teutusi ma aumai i fafo le tusi i se pepa piniki lauiti. A o ia faitaua, sa amata ona ataata ma iu ai ina tagi o ia. Ou te le’i vaai muamua lava o tagi lo’u tinamatua. Sa ea malie a’e i luga o ia ma faliu mai ia te au i mata alofa, lanuenaena. Sa musumusu mai, “Faafetai lava, faafetai lava. Ou te le’i manatu o le a manatua e se tasi.”
O Tinamatua, o le sa faia ni mea se tele e fausia ai ni sootaga malolosi faaleaiga, sa leai ma sona manatu sa ou manatuaina pe sa faafetai mo na taimi na faatasitasi ai. Sa ia soloia ona mata ma fai mai, “Kimberly, faafetai lava. O le meaalofa sili lea e mafai e se tasi ona aumai ia te a’u.”
Sa ou tago atu ma opo tele mai Tinamatua, ma lagonaina lona pa’u lamolemole i lo’u alafau ma sosogi lona manogi “tinamatua” lea sa fefiloi i le pauta pepe ma le fagusausau o le musk. Sa matuai o’u faafetai mo le manatu o lo’u tama e tusi atu se tusi ia te ia. Ou te le’i iloa o upu o le loto faafetai ma le alofa o le a sili atu ona anoa i lo’u tinamatua nai lo mea teuteu uma, fagusausau, ma keke o fualaau aina suamalie e mafai ona faatau i tupe.