Ua Fautuaina e Elder Christofferson le Au Paia i Amerika Tutotonu

Saunia e Elder Don L. Searle

fai saofaga i Tala Fou o le Ekalesia

Na ta’u atu e Elder D. Todd Christofferson o le Korama a Aposetolo e Toasefululua i le au paia o le Siteki a Arraiján Panama, i le aso 20 o Ianuari, 2013, e faapea, o le galuega a le Ekalesia i le taimi nei, o le tapenaina lea o tagata o e o le a saunia e maua ma auauna atu i le Alii pe a afio mai o Ia.

O se autu sa fofogaina e Elder Christofferson i ni taimi i le faagasologa o se malaga taamilo i Amerika Tutotonu mai le aso 11 o Ianuari e oo i le aso 20, a o saunoa atu ai i faapotopotoga a le autalavou, i le autalavou matutua nofofua, i faifeautalai, i taitai i le lotoifale, ma i le au paia i fonotaga o konafesi a siteki.

Sa malaga faatasi ia Elder Christofferson ma lona faletua o Kathy Christofferson, ma Elder Richard J. Maynes o le Au Peresitene o Fitugafulu ma lona faletua o Nancy Maynes. A o malaga muamua atu i Costa Rica, sosoo ai ma Kuatemala, ae mulimuli ai i Panama, sa faapea ona faatasi atu i ai i nofoaga eseese ia sui o le Au Peresitene o le Eria: o Elder James B. Martino, Peresitene; Elder Carlos H. Amado, Fesoasoani Muamua; ma Elder Kevin R. Duncan, Fesoasoani Lua.

Sa malaga atu foi Elder Maynes i Honotura ma Pelisi e feiloai ai ma taitai ma le au paia iina.

Sa saunoa atu Elder Christofferson i le faitau selau o tagata talavou sa faatasitasi i konafesi sa ta’ua o le Malosi o le Autalavou i Costa Rica ma Panama; i vaega o faifeautalai i San José, Costa Rica; Aai o Kuatemala, ma le Aai o Panama; i vaega toatele o le autalavou matutua nofofua i atunuu e tolu; ma i faapotopotoga o taitai perisitua ma ausilali.

Sa feiloai atu foi o ia i peresitene o Costa Rica ma Kuatemala e fesoasoani e faamautu ni sootaga taua ma na malo.

I Costa Rica sa uunaia ai e Elder Christofferson le autalavou ma le autalavou matutua nofofua ia usitai i poloaiga, ia manatua e silafia ma alofa le Tama Faalelagi ia i latou, ma ia faitau tusitusiga paia i aso uma ma saili ia maua mea uma o le a tuuina atu e le Agaga ia i latou a o latou faitau.

Sa ia tuuina atu se molimau malosi i le Perofeta o Iosefa Samita ma ia Iesu Keriso. “Ou te tuuina atu se faamanuiaga i o outou luga ina ia mafai ona outou maua lenei lava foi molimau ua ou faailoaina atu,” sa ia saunoa atu ai ma faaopoopo atu, “O [Iesu Keriso] e moni. Ou te talosagaina i o outou luga i le afiafi nei Ana faamanuiaga.”

I Kuatemala sa ia faamamafaina ai le taua o le aiga.

“I le fatuina o se aiga, ua tatou faataunuu ai lo tatou faamoemoega silisili i luga o le fogaeleele,” o lana saunoaga lea.

Sa ia saunoa atu i le autalavou i Panama ma molimau atu, “O le taitai o lenei Ekalesia o lo tatou Alii o Iesu Keriso. O Ia o se taitai e matuai aofia ai ma e matuai malosi patino i le taitaiga o Lana Ekalesia.”

O se konafesi faaleautaitai perisitua sa faamamafa ai le aua nei taulai atu i galuega ma le pisi, ae ia taulai atu i taunuuga o auaunaga faaleperisitua, ae maise lava i le liua o le tagata lava ia.

Sa pulefaamalumalu foi Elder Maynes i ni fonotaga eseese, e aofia ai fonotaga a le autalavou matutua nofofua ma faifeautalai i Pelisi ma Honotura, ma ofoina atu fautuaga ma le taitaiga faaleagaga i le faitau selau o i latou i laueleele o Amerika Tutotonu.

O Elder D. Todd Christofferson o loo faafeiloai atu i se tamaitai talavou ina ua maea se fonotaga i Panama, ia Ianuari.