Te parururaa o te Varua
Te hinaaro nei au e ia maramarama maitai e ia ti‘a atu vau i mua i te haavâraa a te Atua e ua faaite vau i to te ao, ma te reo papû maitai e e parau mau te Buka a Moromona.
Te faahiti pinepine nei te mau tohuraa i te mau ati rahi e tae mai i roto i te mau tau hopea mai te mau aueueraa fenua, aore râ te ‘o’e, aore râ te pape pu‘e. E nehenehe teie nei mau ati rahi e arata‘i ti‘a’tu i te mau faahuehueraa i te pae tereraa faufaa aore râ i te pae politita.
Te vai nei râ te hoê ati rahi no te tau hopea no‘u no te taata tata‘itahi eiaha râ no te huiraatira, no te taata iho eiaha râ no te taatoaraa – te hoê faaararaa i te feia i roto i te ekalesia eiaha râ i to rapae. Ua faaara te Faaora e, i te mau mahana hopea e nehenehe te feia « no te fafauraa », te feia iho tei ma‘itihia, e haavarehia e te enemi o te parau mau.1 Mai te mea te mana‘o nei tatou o te reira te hoê huru o te haamouraa i te pae varua, e maramarama ia no te tahi atu tohuraa no te mau mahana hopea nei. A feruri ma te aau ei hoê pû faahoho‘a no to tatou faaroo, te hoê vahi pehepeheraa no to tatou haapamaitai e no to tatou faufaa ; a hi‘o ia i te faahitiraa parau a Iesu e i te mau mahana hopea nei « e [hahi ê] te aau o te mau taata i te reira ».2
Oia mau, te mea e faaitoito nei, ua ite ïa to tatou Metua i te Ao ra i teie nei mau ati atoa no teie nei mau mahana hopea nei, teie nei mau pe‘ape‘a o te aau e o te varua, e ua horo‘a mai oia i te a‘o e te mau parururaa i teie nei mau ati.
No reira e mea faufaa rahi roa no‘u te Buka a Moromona, te hoê o te «mau mauhaa faufaa rahi »3 a te Fatu i roto i teie aroraa i te mau ino no teie nei mau mahana hopea nei, ua omuahia ia na roto i te hoê parabole faahiahia no te oraraa, te hoê parabole no te ti‘aturiraa ia faauhia i te ri‘ari‘a, no te maramarama ia faaauhia i te poiri, te ora ia faaauhia i te haamouraa, te hoê parabole tei faahitihia e te tuahini Ann M. Dibb ma te oto i teie po‘ipo‘i.
I roto i te orama a Lehi, ua rahi roa’tu â te fifi o te hoê tere fifi a maraa mai ai te hoê mahu poiri o tei haapouri i te e‘a papû e te piriha‘o o ta to’na ho‘i utuafare e o vetahi ê e ti‘a ia pee atu. E mea faufaa rahi roa ia ite e e pou mai teie mahu poiri i ni‘a i te mau taata ratere atoa : tei haapa‘o e tei faaoti i to ratou mana‘o (e parau paha tatou te feia ma‘itihia) e te feia paruparu e te papû ore. Te haapiiraa tumu no te aamu o te mau ratere manuïa ïa tei pato‘i i te mau faaare‘are‘araa atoa, e tae noa’tu i te faatianiraa i te mau e‘a rahuihia e te parau faaoo a te feia vahavaha e te te‘ote‘o tei pee i taua mau e‘a rahuihia ra. Te faaite ra te mau papa‘iraa e, te feia tei paruruhia « nenei maira ratou ma te mau maite [e te rohirohi ore] »4 i te hoê tapu auri o te toro ra na te hiti o te e‘a mau. Noa’tu eaha te poiri o te ru‘i aore râ te mahana, e faaite mai te tapu auri i te e‘a no te e‘a o te horo‘a mai i te ora.
Ua parau Nephi i muri mai, « E ua ite au e, te auri… o te parau ïa a te Atua, [e arata‘i ra]… i te raau o te ora… o te faaauraa ïa o te aroha o te Atua ». I to’na iteraa i teie faaiteiteraa o te aroha o te Atua, ua parau Nephi :
« E ua hi‘o atura vau e ite atura i te Faaora o te ao nei… [tei] haere i te tautururaa i te feia i te mana e te hanahana rahi…
« … E ite atura vau i te mau taata ma‘i, o tei pohe i tera ma‘i i tera ma‘i, o tei uruhia i te mau diabolo, e te mau varua faufau ho‘i… E ua faaorahia’tura ratou i te mana o te Arenio a te Atua ; e ua ti‘avaruhia’tu te mau diabolo e te mau varua faufau ho‘i ».5
Te aroha. Te faaoraraa. Te tautururaa. Te ti‘aturiraa. Te mana o te Mesia no te faaruru i te mau pe‘ape‘a atoa i te mau taime atoa – e tae noa’tu i te hopea o te mau tau. O tera ïa te tapaeraa paruruhia ta te Atua e hinaaro no tatou i te mau mahana hepohepo o te taata tata‘itahi aore râ o te mau taata atoa. Tera ïa te poro‘i i te omuaraa o te Buka a Moromona e tera atoa te poro‘i i te pae hopea o te buka, te piiraa i te taata atoa ia « haere mai i te Mesia ia maitai roa ratou ia’na ».6 Taua parau – tei ravehia mai roto mai i te iteraa papû hopea a Moroni, tei papa‘ihia 1000 matahiti i muri a‘e i te orama a Lehi – o te hoê ïa iteraa papû a te hoê taata te fatata ra i te pohe no ni‘a i te e‘a mau ana‘e.
E faahiti na vau i te hoê « iteraa papû apî no te mau mahana hopea » ? I to Iosepha Semita e to’na taea‘e Hairamu haereraa i Carthage no te farii i te mea ta raua i ite, to raua taparahi-pohe-raa-hia, ua tai‘o o Hairamu i teie nei mau parau no te tamahanahana i te aau o to’na taea‘e.
« Ua haapa‘o maitai oe ; no reira e mâ’i to ahu… E riro oe ei mea puai, e e parahi ho‘i oe i te vahi ta‘u i faanehenehe i te mau fare o tau Metua ra.
« E teie nei, te parau nei au o Moroni, ia ora na… ia farerei faahou tatou i mua i te haavaraa no te Mesia ».7
Tau irava poto noa no roto mai i te pene 12 no Etera i roto i te Buka a Moromona. Hou oia a tapiri ai i te buka, ua tufetu o Hairamu i te poro o te api ta’na i tai‘o mai, ei tapa‘oraa i te tuhaa o te iteraa papû mure ore o teie na taea‘e e fatata ra i te pohe. Ua tape‘a vau i roto i to‘u rima taua buka ra, te buka iho ta Hairamu i tai‘o, e te ite-noa-hia ra te poro tufetuhia o te api. I muri, a tape‘ahia ai oia i roto i te fare tape‘araa no Carthage, ua fariu atu ra te peropheta Iosepha i ni‘a i te mau tia‘i tei tape‘a ia’na, e ua faaite atu ra i te hoê iteraa papû puai no te parau mau hanahana no te Buka a Moromona e te faaho‘i-raa-hia mai te evanelia.8 I muri noa iho, ua rave te pupuhi e te ofa‘i pupuhi i te ora o teie na taata faaite parau e piti.
Ei hoê o te mau tauasini tuhaa no to‘u iho iteraa papû no ni‘a i te hanahana o te Buka a Moromona, te tuu faahou atu nei au i teie â tapa‘o no te parau mau o te buka. I roto i to raua hora hopea fifi roa‘e i roto i te hepohepo, te ui nei au ia outou, e anatema anei teie nei na taata i mua i te Atua ma te tamau i te niu i to raua mau oraraa, to raua tura e to raua iho ma‘imiraa i te ora mure ore i roto i te hoê buka (e te hoê ekalesia e te hoê taviniraa) ta raua i hamani na roto noa i te parau e aore e haapapûraa?
Ma te tuu i te hiti i ta ratou mau vahine faaipoipo o te riro mai ei vahine ivi e ta ratou mau tamarii ei otare. Ma te tuu i te hiti e e riro mai to raua feia apee ei « feia aore e utuafare, aore e fare e aore e hoa » e e vaiiho mai ho‘i ta ratou mau tamarii i te « mau taahiraa avae » na ni‘a i te mau anavai to’eto’e e te afaa tei ore i faaeahia’tura.9 Ma te tuu i te hiti i te mau naho‘a taata o te pohe e e rave rahi atu â o te haere atu e poro i na poro e maha no te ao nei e ua ite ratou e e parau mau te Buka a Moromona e te Ekalesia o te poro nei i te reira. Ma te haafaufaa ore i te reira mau mea atoa e a parau mai na ia‘u mai te mea e tomo anei teie na taata e piti i teie hora no to raua poheraa i mua i te aro o to raua Haava Mure Ore ma te faahitiraa e te iteraa i te tamahanahanaraa i roto i te hoê buka, mai te mea e ere te parau iho a te Atua, o te faariro ia ratou ei feia haavare e e feia faahua e tae noa’tu i te hopea o te tau ? Eita roa ïa raua e na reira! Ua ineine raua i te pohe eiaha râ i te huna i te tumu hanahana e te parau mau mure ore no te Buka a Moromona.
I roto i te area e hoê 179 matahiti ua hi‘opo‘ahia e ua arohia, ua pato‘ihia e ua tuatapapa-hu‘ahu‘a-hia, ua faahapahia e ua haavahia teie buka e aita’tu paha e buka i na-reira-hia i roto i te aamu no te pae faaroo no teie nei anotau – peneia‘e e ere mai te tahi atu buka i roto i te aamu no te faaroo. E te ti‘a noa mai ra â teie buka. Ua parauhia te mau aamu no ni‘a i te fâraa mai teie buka e ua morohi atu te reira – mai Ethan Smith e tae mai ia Solomon Spaulding, tae roa’tu i te mau taata maamaa e tae roa’tu i te ino. Aore roa te hoê o te tahi atu mau pahonoraa maamaa no te buka i manuïa noa‘e i mua i te hi‘opo‘araa no te mea aita’tu e pahonoraa maori râ te pahonoraa ta Iosepha i horo‘a na ni‘a i to’na ra ti‘araa taata apî ite ore no te iritiraa i te parau. No reira te turu nei au i to‘u iho tupuna tei parau, « Aita roa e taata ino e nehenehe e papa‘i i teie huru buka, e aita e taata maitai e nehenehe e papa‘i i te reira maori râ e e parau mau e ua faauehia ho‘i oia e te Atua ia papa‘i ».10
Te faaite papû atu nei au e eita roa e nehenehe i te hoê taata ia farii i te taatoaraa o te faaroo i roto i teie nei ohipa no te mahana hopea nei – e ia ite i te faito mau no te hau e te tamahanahanaraa no to tatou tau – e tae noa’tu i te taime e farii ai oia i te ti‘araa hanahana o te Buka a Moromona e o te Fatu o Iesu Mesia ta te buka ho‘i e faaite papû ra. Mai te mea te vai ra te hoê taata tei nava‘i i te maamaa aore râ tei arata‘i-hape-hia no te pato‘i i na api e 531 o te hoê buka tei ore i itehia na mua’tu e tei î i te huru papa‘iraa e te paari no te ati Semiti ma te ore e tamata i te tuatapapa ma te ti‘a i te tumu no taua mau api ra – ma te ore ihoa râ e tau‘a i te reira mau api o te faaite ra i te iteraa puai no ni‘a ia Iesu Mesia e te mana varua hohonu ta teie iteraa i faatupu i ni‘a e ahuru milioni taata tai‘o i teie nei – ua haavarehia ïa taua mau taata ra, tei ma‘itihia e te Atua aore râ aita, e mai te mea e faarue ratou i teie Ekalesia, e ti‘a ïa ia ratou ia pato‘i aore râ ia ore e farii i te parau mau o te Buka a Moromona hou a faarue ai i te Ekalesia. I taua taime ra e riro mau ïa te buka mai ta te Mesia iho i parau e riro – « ei ofa‘i turoriraa… ei păpă maheaituraa »11 te hoê paruru i ni‘a i te e‘a o te hoê taata e hinaaro i te ti‘aturi ore i roto i teie ohipa. Ua faaite papû te mau ite, e tae noa’tu i te mau ite tei aro na ia Iosepha, e tae noa’tu i to ratou poheraa, e ua ite mata ratou i te hoê melahi e ua tape‘a i te mau papaa parau. Ua parau ratou e « ua faaitehia mai ia matou e te mana o te Atua, e ere ïa te mana o te taata…. I ite ai matou e te faaite atu nei ho‘i e, e parau mau ïa teie mau mea nei ».12
I teie nei, aita vau i ti‘a i piha‘iho ia Lehi aore râ ia Nephi aore râ i te taea‘e no Iareda i te tereraa na ni‘a i te moana e te faaearaa i roto i te hoê ao api. Aita vau i faaroo i te arii Beniamina i te horo‘araa mai te hoê melahi i ta’na a‘oraa. Aita vau i poro na muri ia Alama e Amuleka aore râ i ite i te pohe ri‘ari‘a o te mau feia faaroo hara ore. Aita vau i rotopu i te mau Ati Nephi tei fafa i te mamae o te Fatu o tei Ti‘afaahou mai, aita atoa vau i heva e Moromona e Moroni no te haamou-raa-hia te hoê nunaa taatoa. Ua riro râ to‘u iteraa papû no ni‘a i teie nei buka e te hau ta’na e hopoi mai i te aau taata e mea mau e te papû maitai mai to ratou iteraa papû. Mai ia ratou « te tuu atu nei [au] i [to‘u i‘oa] i to te ao nei, ei faaite i to te ao nei i [ta‘u] i ite ra. » E mai ia ratou, « aore [au] i haavare, o te Atua ho‘i tei ite ».13
Te ani nei au e ia papa‘ihia to‘u iteraa papû no te Buka a Moromona e te mau mea atoa e vai ra i roto, o tei horo‘ahia’tu i teie mahana na roto i ta‘u iho tapu e to‘u ti‘araa, e te mau taata i ni‘a i te fenua nei e te mau melahi i te ra‘i ra. Te ti‘aturi nei au e te vai nei te tahi mau matahiti e toe nei ia‘u i roto i « to‘u mau mahana hopea » e noa’tu ra te vai ra e aore râ aita, te hinaaro nei au e ia maramarama maitai e ia ti‘a atu vau i mua i te haavâraa a te Atua e ua faaite vau i to te ao, ma te reo papû maitai e e parau mau te Buka a Moromona, e ua tae mai te reira mai te au i ta Iosepha i parau, e ua horo‘ahia mai te reira no te hopoi mai i te oaoa e te ti‘aturiraa i te feia faaroo i roto i te mau pe‘ape‘a o teie tau hopea.
Te tuea nei to‘u iteraa i te iteraa o Nephi tei papa‘i i te tahi tufaa no te buka i to’na « mau mahana hopea »
« A faaroo mai na i teie nei mau parau, e e faaroo ho‘i i te Mesia ra. E ia faaroo outou i te Mesia ra, e faaroo atoa ïa outou i teie nei mau parau, no te mea o te parau ïa te reira a te Mesia,… e te haapii nei ho‘i te reira i te taata atoa ia rave i te maitai.
E ahiri aore te reira i te parau a te Mesia ra, ia ite outou – no te mea i te mahana hopea ra, e faaite mai ai te Mesia ma te mana e te hanahana rahi ia outou e, o ta’na ïa parau te reira.14
E te mau taea‘e e te mau tuahine, e paruru maite te Atua i te Varua. A haamana‘o i teie nei parau ta Iesu iho i parau, « O te haaputu i ta‘u ra parau e ore ïa oia e haavarehia »15 – e i te mau mahana hopea nei eita atoa to outou aau aore râ faaroo e ma‘iri ia outou. Te faaite u’ana nei au i to‘u iteraa papû no ni‘a i te reira, i te i‘oa o Iesu Mesia, amene.