Gade sou Jezikri
L ap ede nou viv alyans nou yo ak mayifye apèl nou kòm ansyen nan Izrayèl.
Pandan Jezi t ap mache nan yon ri tou pre Kapènawòm1 antoure pa yon foul moun, yon madanm ki te gen yon maladi grav depi douzan te pwoche epi l te touche rad li. Li te geri imdeyatman.2
Ekriti yo rapòte ke Jezi, ki te santi “te gen [yon fòs] ki te soti nan [li],”3 “te vire nan mitan foul moun nan”4 epi “li te gade … kiyès ki te manyen rad li a.”5 “Madanm nan, ki te wè yo dekouvri li,”6 te “lage kò l nan pye Jezi, li te di l tout verite a.”7
“Epi Jezi te di li: Mafi, se lafwa ou nan Bondye ki geri ou; ale ak kè poze”8
Jezikri te sove madanm nan. Li te geri fizikman, men, lè Jezi te vire gade l la, li te deklare lafwa l nan li epi Jezi te geri kè li.9 Li te pale avèk li ak lanmou, li te asire l ke l te dakò avèk li, epi l te beni l avèk lapè li.10
Frè m yo, antanke detantè sent prètriz la, nou angaje nan travay sali a. Nan ane k sot pase a, Senyè a te mete direksyon travay sa a dirèkteman sou zepòl ansyen nan Izrayèl yo.11 Nou gen yon travay enspiran Senyè a ba nou—pou n travay avèk sè nou yo, pou nou sèvi nan yon fason ki pi sen, pou n akselere rasanbleman Izrayèl nan toulèdebò vwal la, fè fwaye nou vin sanktyè lafwa ak aprantisaj levanjil la, epi prepare mond lan pou Dezyèm Vini Jezikri a.12
Tankou nan tout bagay, Sovè a montre nou mwayen an: nou bezwen gade sou li epi sèvi li menmjan li gade sou Papa a epi l sèvi l la.13 Sovè a te di Pwofèt Joseph Smith sa nan fason sa a:
“Gade sou mwen nan chak panse; pa doute, pa pè.
“Gade blese ki te pèse bò kòt mwen yo, epi tou gade mak klou yo nan men m yo ak pye m yo; rete fidèl, respekte kòmandman m yo, epi n ap eritye wayòm syèl la.”14
Nan wayòm premòtèl la, Jezi te pwomèt Papa a ke l t ap fè volonte li epi li t ap vin Sovè nou ak Redanmtè nou. Lè Papa a te mande: “Kiyès pou m voye?”15 Jezi te reponn:
“Men mwen, voye m”16
“Papa, se pou volonte ou fèt, epi se pou ou laglwa a pou tout tan gen tan.”17
Pandan tout lavi l nan mòtalite a Jezi te kenbe pwomès sa a.” Nan imilite, dousè ak amou, li te anseye doktrin Papa a epi l te fè travay Papa li avèk pouvwa ak otorite Papa l te ba li.18
Li te bay Papa l kè li. Li te di:
“Mwen renmen Papa .”19
“Mwen toujou fè sa ki fè l plezi.”20
“Mwen vini ... non pa pou m fè volonte pa m, men pou m fè volonte [Papa a ki] voye m nan”21
Nan agoni li nan Jetsemani an, li te priye: “Toutfwa, se pa volonte pa m, men volonte pa w ki pou fèt.”22
Lè Senyè a rele ansyen nan Izrayèl yo pou yo “vire gade l nan tout panse” yo epi “gade blese yo” nan kò resisite l la, se yon apèl pou nou detounen nou de peche ak de mond lan epi pou n vire gade l epi renmen li epi obeyi li. Se yon apèl pou n anseye doktrin ni an ak pou n fè travay li nan fason pa li. Se poutèt sa, se yon apèl pou nou fè l konfyans totalman, pou n soumèt nou anba volonte li epi ba l kè nou, epi atravè pouvwa redanmtè l la, pou n vin menmjan avèk li.23
Frè m yo, si nou gade sou Jezikri, l ap beni nou pou n ka vin ansyen Izrayèl pa li enb, sou, soumi, ranpli avèk amou li.24 Epi n ap pote lajwa ak benediksyon levanjil li yo ak Legliz li a bay fanmi nou ak frè n ak sè nou yo nan toulède bò vwal la.
Prezidan Russell M. Nelson mande nou pou nou gade sou Jezikri nan fason sa a: “Pa gen anyen ki fasil ni otomatik nan vin kalite disip puisan konsa. Atansyon nou dwe konsantre sou Sovè a ak levanjil li a. Sa mande anpil rigè mantal pou n fè efò pou n leve je gade li nan chak panse. Men, lè nou fè sa, dout nou yo ak laperèz nou yo efase.”25
Konsantre a se yon mo puisan. Li vledi atache byen fèm, atire oubyen kenbe totalman.26 Nou konsantre fokis nou sou Jezikri ak sou levanjil li a respekte alyans nou yo.
Lè nou viv alyans nou yo, yo enfliyanse tout sa nou fè ak tout sa nou di. Nou viv yon lavi alyans27 ranpli avèk senp aksyon lafwa kotidyen santre sou Jezikri: nan priye nan non li, fè festen ak pawòl li, vire gade li pou nou repanti pou peche nou, respekte kòmandman li pran sentsèn ak sanktifye Jou Saba li a, adore nan tanp sakre li osi souvan nou kapab, epi egzèse prètriz sakre l la pou n sèvi pitit Bondye yo.
Aksyon devosyon anvè alyans nou sa yo ouvri kè nou ak espri nou pou pouvwa redanmtè Sovè a ak enfliyans sanktifyan Sentespri a. Liy apre liy, Sovè a chanje nati nou, nou vin pi pwofondeman konvèti nan li epi alyans nou yo vin vivan nan kè nou.28
Pwomès nou fè Pè Selès la yo vin angajman solid tankou wòch, dezi ki pi pwofon nou. Pwomès Pè Selès la fè nou yo ranpli nou avèk rekonesans ak lajwa.29 Alyans nou yo sispann tounen règ pou nou suiv men yo vin tounen prensip ke nou cheri, ki enspire nou ak gide nou e kenbe nou konsantre sou Jezikri.30
Aksyon devosyon sa yo disponib pou nou tout, jèn ak granmoun. Noumenm jènjan ki detni Prètriz Aawon yo, tout sa m di la yo aswè a aplike pou nou. Mwen remèsye Bondye pou nou. Nou fè òdonans ak alyans sakre vin disponib pou dè milyon Sen Dènye Jou chak semèn. Lè nou prepare, beni, ak distribye sentsèn, fè sèvis pastoral, fè batèm nan tanp; envite yon zanmi nan yon aktivite; oubyen mennen yon manm kowòm nou retounen; se travay sali a n ap fè. Nou menm tou nou ka gade sou Jezikri epi viv alyans nou yo chak jou. Mwen pwomèt nou ke, si nou fè sa, n ap vin sèvitè Sovè a fè konfyans, epi nan yon jou pwòch, n ap vin ansyen puisan nan Izrayèl.
Frè m yo, Mwen konnen tout bagay sa yo gen dwa parèt entimidan. Men tanpri, sonje pawòl sa yo Sovè a te di: “Mwen pa poukont mwen, paske Papa a avèk mwen.”31 Se konsa sa ye pou nou. Nou pa poukont nou. Senyè a, Jezikri, ak Pè Selès la renmen nou, yo avèk nou.32 Paske Jezi te vire gade Papa a epi l te akonpli gran sakrifis ekspyatwa a, nou ka vire gade Jezikri avèk asirans ke l ap ede nou.
Pa gen nou youn ki pafè. Pafwa nou bloke. Pafwa nou distrè oubyen dekouraje. Nou trebiche. Men, si nou gade sou Jezikri avèk yon kè repantan, l ap elve nou, l ap pwòpte peche nou, l ap padone nou epi l ap geri kè nou. Li pasyan epi l bon; amou redanmtè li pa janm fini ni l pa janm peri.33 L ap ede nou viv alyans nou yo ak mayifye apèl nou kòm ansyen nan Izrayèl.
Epi, Papa a ap beni nou kote l ap ba nou tout sa ki nesesè pou n akonpli objektif li: “bagay ... ni nan syèl la ni sou tè a, lavi a ak limyè a, Lespri a ak pouvwa a volonte Papa a te voye pa mwayen Jezikri, Pitit Gason li a.”34
Lè limyè ak pouvwa divin devèse nan lavi nou, gen twa bagay mirakile ki rive:
Premyèman, nou ka wè! Atravè revelasyon, nou kòmanse wè jan Jezi te wè fi a: odela sifas la al nan fon kè a.35 Lè nou wè jan Jezi wè a, l ap beni nou avèk lanmou pou nou ka renmen moun n ap sèvi avèk menm amou avèk li yo. Avèk èd li, moun n ap sèvi yo ap wè Sovè a epi y ap santi amou li.36
Dezyèmman, nou gen pouvwa prètriz la! Nou gen otorite ak pouvwa pou nou aji nan non Jezikri pou “beni, gide, pwoteje, fòtifye, ak geri lòt moun epi akonpli mirak nan lavi moun [nou] renmen yo ak kenbe maryaj [nou] ak fanmi nou an sekirite.”37
Twazyèmman, Jezikri avèk nou! Kote nou ale, l ale tou. Lè n ap anseye, li anseye tou. Lè n ap rekonfòte, li rekonfòte tou. Lè nou beni, li beni tou.38
Frè m yo, èske nou pa gen rezon pou nou rejwi? Wi! Nou detni prètriz sakre Bondye a. Si nou gade sou Jezikri, nou viv alyans nou yo, epi nou konsantre nou sou li, n ap ini avèk sè nou yo epi sèvi nan yon fason pi sakre, pou n rasanble Izrayèl dispèse a nan toulède bò vwal yo, fòtifye ak sele fanmi nou, epi prepare mond lan pou Dezyèm Vini Senyè a, Jezikri. Sa ap fèt. Mwen temwaye de sa.
M ap fini avèk priyè sa a nan kè m pou nou tout, chak grenn nan nou, ka gade sou Jezikri nan chak panse nou. Pa doute. Pa pè. Nan non Jezikri, Amèn.