I te 30 o Hepetema, 1978, i te Huinga Whānui ā-Ono Marama o Te Hāhi o Ihu Karaiti o te Hunga Tapu i ngā Rā o Muri Nei, i whakapuakitia ngā mea e whai ake nei e Tumuaki N. Eretana Tana, te Kaikaunihera Tuatahi i te Tumuakitanga Tuatahi o te Hāhi:

I te tīmatanga o te Hune i tēnei tau, i whakapuakina ake e te Tumuakitanga Tuatahi kua whiwhi a Tumuaki Peneha W. Kimipara i tētahi whakakitenga e toro atu ana i te tohungatanga me ngā manaakitanga o te temepara ki ngā mea tāne katoa o te Hāhi e ū ana. Kua tonoa mai e Tumuaki Kimipara māku hei whakamōhio atu ki te huinga nei, nā, whai muri iho i tana whiwhi i tēnei whakakitenga, i tau mai ai ki a ia i muri iho i te āta whakaaroaro roa me te inoi i roto i ngā ruma tapu o te temepara tapu, i kawea atu e ia ki ana kaikaunihera, nā, ka whakaaehia, ā, ka tautokona. Kātahi ka kawea atu ki te Kōrama o ngā Āpotoro Tekau Mā Rua, ā, ka whakaae tahi rātou, kātahi ka kawea atu ki ngā Kaiwhakamana Whānui, ā, i whakaae tahi mai anō rātou.

Kua tonoa au e Tumuaki Kimipara kia pānuitia tēnei reta ināianei:

I te mea kua kite tātou i te whakaaturanga me te whakawhānuitanga atu o te mahi a te Ariki ki runga it e whenua, kua nui te whakawhetai kua aro mai ngā iwi maha ki te karere o te rongopai kua whakahokia mai nei, ā, kua kaha hono mai ki te Hāhi. Nā konei, kua whakaaweawehia mātou i runga i te hiahia kia torona atu ngā tikanga me ngā manaakitanga o te rongopai ki ngā mema ū pono katoa o te Hāhi.

I mataara ana ki ngā whakaari i whakaaria mai nei e ngā poropiti me ngā tumuaki o te Hāhi i mua i a mātou, e mea ana a tōna wā, i te mahere mau tonu a te Atua, ka whiwhi ngā tāne ū pono katoa i te tohungatanga, ā, nā tā mātou kite atu i te ū pono o te hunga i kaiponuhia ai te tohungatanga i a rātou, kua roa tā mātou inoi pono mō tēnei hunga, ō tātou teina whakapono nui, e whakapau i ngā hāora maha i te Ruma o Runga o te Temepara e inoi kaha ana ki te Ariki kia ārahina mai.

Kua rongo Ia i ā mātou inoi, ā, kua whakaūngia nā te whakakitenga, nā, kua tae mai te rā kua roa e whakaaria ana ina whiwhi ia tāne ū pono o te Hāhi ki te tohungatanga tapu, me te mana hei whakahaere i tōna mana, me te whiwhi i ngā manaakitanga katoa me ō rātou whānau ngā mea katoa e ahu mai ana i reira, tae atu ana ki ngā manaakitanga o te temepara. Waihoki, e whakaae ana kia torona atu te tohungatanga ki ngā tāne ū pono katoa ahakoa ō rātou whakapapa. E tohutohua ana ngā rangatira o te Hāhi kia āta whai i ngā tikanga uiui i ngā kaitono katoa mō te whakamanatanga ki te Tohungatanga o Arona, o Merekihereke rānei e tika ai tā rātou whakatutuki i ngā tikanga whakaae.

E whakapuakina ake e mātou i runga i te whai whakaaro, nā, kua whakmōhiotia ināianei e te Ariki tāna e pai ai mō te manaakitanga i ana tamariki katoa puta noa i te ao e aro mai ai ki te reo o ana pononga kua whakamanahia, me te whakatakatū i a rātou anō kia whiwhi i ngā manaakitanga katoa o te rongopai.

E whakaae ana ko Peneha W. Kimipara hei poropiti, matakite, ā, hei kaiwhakakite, ā, hei tumuaki o Te Hāhi o Ihu Karaiti o te Hunga Tapu i ngā Rā o Muri Nei, e tonoa ana kia whakaae ngātahi tātou hei huinga kotahi i tēnei whakakitenga hei kupu nā te Ariki. E whakaae katoa ana mā runga i te whakatūnga ake o te ringa matau. Mā taua tohu anō mēnā he tangata whakahē.

Kua tautoko katoa ngā pōti katoa.