Wāhanga 131
He tohutohu nā Hōhepa Mete te Poropiti, i homai i Rama, Irinoi, Mei 16 me te 17, 1843.
1–4, E tika ana te mārenatanga Tikitiki o Rangi kia rapua ai te whakateiteitanga i roto i te rangi tiketike ake; 5–6, Ka whakamāramahia te āhua e hīria ake ai te tangata ki te oranga tonutanga; 7–8, He momo matū ngā wairua katoa.
1 E toru ngā rangi, ngā taumata rānei kei roto i te korōria Tikitiki o Rangi;
2 Ā, me tomo atu tētahi tangata ki roto i tēnei ritenga o te tohungatanga [e hāngai ana ki te kawenata hou mau tonu o te mārena] e whiwhi ai ki te mea tiketike rawa;
3 Ā, ki te kore e pērā ia, tē taea e ia te whiwhi.
4 Ka taea e ia te tomo atu ki roto ki tētahi atu, engari koinā te mutunga o tana kīngitanga; tē taea te kake ake ki runga.
5 (Mei 17, 1843.) Ko te tino tikanga o te kupu poropititanga e hāngai ana ki tō te tangata mōhio kua oti ia te hīri ake ki te oranga tonutanga, he mea nā te whakakitenga me te wairua poropititanga, mā roto i te mana o te Tohungatanga Tapu.
6 He uaua rawa mō te tangata kia whakaorangia ai i roto i te kuaretanga.
7 Kāore i hangaia tētahi mea matū kore. He matū ngā wairua katoa, engari he mea rauangiangi rawa, he mea nanu kore rānei, ā, e taea ana anake te kite atu e ngā karu tapu;
8 Tē taea e tātou te kite atu; engari ina whakapoke koretia ō tātou tinana ka kite tātou he matū ngā mea katoa e kite ai tātou.