1 Nā, i te mea kua whakakitea mai e te Ariki ki ahau i te aruaru mai anō ōku hoariri i ahau i ngā whenua o Mītori me tēnei whenua; ā, ki te mea ka aruaru tonu rātou i ahau i runga i te tikanga kore, ā, kāore noa he paku ātarangi, he paku kano rānei o te tika i tō rātou taha i tā rātou whakaara i ngā whakahē ki ahau; ā, i te mea e ahu mai ana ō rātou whakahē i te teka uriuri rawa, kua whakaaro au e tika ana anō, ā, he whai mātauranga i roto i ahau kia wehe atu i taua wāhi mō tētahi wā poto, hei haumarutanga mōku me te haumarutanga o tēnei iwi. Māku e kī atu ki te hunga katoa e mahi tahi ana me au, nā, kua mahue aku mahi katoa ki ngā kaiwhakarite me ngā karaka mā rātou aku mahi katoa e whakahaere i runga i te kaha me te tika, ā, mā rātou e whakarite kia whakaeangia aku nama katoa i tōna wā, mā te hoko atu i ngā whenua, mā tētahi atu huarahi rānei, e rite ana ki tēnā, ki tēnā āhuatanga. Ina rongo au kua tau te marangai, kātahi au ka hoki mai anō.

2 Ā, ko ngā mamaetanga kua karangatia au kia uru atu ai ki roto, ko te āhua nei, he mea moroiti noa ki ahau, i te mea ko te pūhaehae me te whakatakariri o te tangata tāku i kite ai i ngā rā katoa o tōku oranga; ā, mō te aha, kāore e mōhiotia ana, anō te āhua he mea whakarite ahau i mua noa i te ōrokohanganga rā anōo te ao mō te pai, mō te kino rānei, e aua, mā koutou e whakatau. Engari hei aha koa, ka kau tonu ahau i roto i te wai hohonu. Kua waia haere au ki tēnei āhuatanga; ā, ki ahau anō, pērā i a Pāora, kia whai korōria i roto i te pōuritanga; nā te mea kua whakaputaina ahau e te Atua o ōku tūpuna i ērā mea katoa, ā, ka whakaputaina ahau haere ake nei; nā te mea nana, ā, titiro, ka wikitōria au i runga i ōku hoariri katoa, nā te mea kua kōrerohia ake nei e te Ariki te Atua.

3 Nō reira tukua ngā hunga tapu katoa ki hari, ā, kia tino koa rawa atu; nā te mea ko tō Iharaira Atua tō rātou Atua, ā, māna e hoatu tētahi utu tika ki runga i ngā māhunga katoa o ō rātou kaiwhiu.

4 Hei āpiti anō, he pono tā te Ariki: Tukua te mahi o taku temepara, me ngā mahi katoa kua tohua e au ki a koutou, kia hono tonu, ā, kia kore e mutu; ā, tukua tō koutou kaha, me tō koutou ū, me tō koutou manawanui, me ā koutou mahi katoa kia pūruatia, ā, kua kore rawa e ngaro i a koutou tō koutou taonga, e ai tā te Ariki o ngā mano. Ā, ki te whakatoi rātou i a koutou, pērā i tā rātou whakatoi i ngā poropiti me ngā tangata tika i mua i a koutou. Mō ēnei katoa he taonga kei te rangi.

5 Hei āpiti anō, kei te hoatu e au tētahi kupu e hāngai ana ki te rumaki mō te hunga mate.

6 He pono, pēnei tā te Ariki ki a koutou e pā ana ki ō koutou mate: Ina rumakina tētahi o koutou mō te hunga mate, tukua he kaituhi i reira, ā, tukua ia hei kaititiro mō ō koutou rumakitanga; tukua ia kia rongo ki ōna taringa, kia whakaatu ai ia mō te pono, e ai tā te Ariki;

7 Nā, kia mau ai ā koutou tuhinga katoa i te rangi; ahakoa he aha tāu e here nei i te whenua, e herea ai i te rangi; ahakoa he aha tāu e wewete ai i te whenua, e wewete ai i te rangi;

8 nā te mea whano au ka whakahoki i ngā mea maha ki te whenua, e pā ana ki te tohungatanga, e ai tā te Ariki o ngā Mano.

9 Hei āpiti anō, tukua ngā tuhinga katoa kia tika te whakaraupapa, e pai ai te kuhunga atu ki ngā wharepupuri o taku temepara tapu, kia puritia i te roki o mahara mai i tētahi whakatipuranga ki tētahi whakatipuranga, e ai tā te Ariki o ngā Mano.

10 Māku e kī atu ki aku hunga tapu katoa, kei te hiahia au, i runga i te hiahia tino nui rawa, kia kōrero atu ki a rātou i runga i te paparewa e pā ana ki te kaupapa o te rumakitanga mō te hunga mate, i te Hāpati e heke iho nei. Engari i te mea kāore au i te whai kaha kia pērāhia ai, māku te kupu a te Ariki e tuhi mai i tētahi wā ki tētahi wā, ki runga i taua kaupapa, me te tuku ki a koutou mā te mēra, me ētahi atu mea maha anō hoki.

11 Kei te whakakopani mai nei au i taku reta mō nāianei, i te korenga o te taima; nā te mea kua mataara mai te hoariri, ā, he pērā i tā te Kaiwhakaora i kī ai, kei te haere mai te wheao o te ao, engari kāore ōna mea i roto i ahau.

12 Nana, ko taku inoi ki te Atua koia ka whakaorangia koutou katoa. Ā, ka waitohua e au anō tā koutou pononga i te Ariki, te poropiti me te matakite o Te hāhi o Ihu Karaiti o te Hunga Tapu i ngā Rā o Muri Nei.