1 E whakapono ana mātou kua whakatūria ngā kāwanatanga e te Atua hei painga mō te tangata; ā, māna te tangata e whakawā e rite ana ki ā rātou mahi e pā ana ki aua mea, i runga i te whakatakoto ture me te whakahaere, hei painga, hei haumarutanga mō te hapori.

2 E whakapono ana mātou kāore he kāwanatanga e kaha te tū i te rangimārie, ki te kore ngā ture e hangaia ai, ā, e whakaaro nuitia ai kia whiwhi ia tangata, ia tangata ki te tikanga herekore, te tikanga me te mana whakahaere i ana taonga, me te tiakanga i te ora.

3 E whakapono ana mātou, nā, e tika ana kia whai āpiha, ā, kia whai kaiwhakawā ngā kāwanatanga katoa hei whakahaere i ngā ture; ā, kia whakahaerehia te ture i runga i te whakaaro taurite me te tika, ā, kia whaia, ā, kia tautokona tētahi mea pērā e te reo o te iwi mehemea he iwi kīngi kore, ki tā te kīngi rānei e pai ai.

4 E whakapono ana mātou kua whakaritea te whakapono e te Atua; ā, kei raro katoa ngā tāngata i a ia, ā, ko ia anake, ki te kore ō rātou whakaaro whakapono e takahi i ngā tikanga o ētahi atu; engari kāore mātou i te whakapono kei te ture te mana ki te whakatakoto i ngā ture koropiko hei whakahere i ngā whakaaro o te tangata, ki te whakatau rānei i ngā tikanga tūmatanui, tūmataiti rānei mō te karakia; kia aukati te kaiwhakawā i ngā mahi hē, engari kia kaua rawa e whakahere i te whakaaro; me whakawhiu i te kino, engari kia kaua rawa e whakapēhi i te herekoretanga o te wairua.

5 E whakapono ana mātou kua takoto te tikanga kia tautoko ngā tāngata katoa i ngā kāwanatanga kei ngā wāhi e noho nei rātou, e tiakina ana rātou i roto i ō rātou tikanga tūturu e ngā ture o aua kāwanatanga; ā, kāore e pai ana te kino me te haututū ki ngā tāngata katoa e tiakina ana, ā, me rite te whakawhiu ki te hē; ā, kei ngā kāwanatanga katoa te tikanga ki te whakatakoto ture pērā e rite ana ki ā rātou ake whakawā e hāngai ana ki ngā mea e pai ana mō te iwi; heoi, hei taua wā anō, e pupuri tapuhia ana te tikanga herekore o te whakaaro.

6 E whakapono ana e tika ana kia whakahōnoretia ngā tāngata katoa i roto i tōna tūranga, arā, ngā kaiwhakahaere tikanga me ngā kaiwhakawā pērā, kua whakatūria hei tiaki i te hunga hara kore, ā, hei whakawhiu i te hunga hara; ā, kia whakaaro nuitia e te tangata ngā ture, i te mea ki te kore aua ture kāore he rangimārie, kāore he aiō engari ka ai kē ko te ture kore me te kino; ko ngā ture o te tangata kua whakaritea nei hei whakahaere i ngā mea e whai tikanga ana ki ia tangata, ki ia iwi, i waenganui i te tangata me te tangata; me ngā ture o te rangi i homai i runga rawa, e whakatau ana i ngā ture e pā ana ki ngā māharahara ā-wairua, mō te whakapono me te koropiko, hei mea e whakautua ai e te tangata ki tōna Kaihanga.

7 E whakapono ana mātou kei ngā kaiwhakahaere tikanga, ngā whenua, me ngā kāwanatanga, ā, kua herea hei whakamana i ngā ture hei tiaki i ngā tāngata i tō rātou herekoretanga whakapono; engari kāore mātou i te whakapono kei a rātou te tikanga i runga i te tika kia murua tēnei tikanga i ngā tāngata, kia whakahaerehia rānei ō rātou whakaaro, mehemea e kitea ana kua whakaaro nuitia ngā ture, ā, kāore hoki aua whakaaro whakapono e mea ana e tika ana kia mahi tutu.

8 E whakapono ana mātou, nā, me whakawhiu te whakahaere hara e rite ana ki te āhua o te hara; nā, ko te kōhuru, te tutu, te pāhua, te tāhae, me te takahi i te rangimārie, koinei āhua katoa, e tika ana kia whakawhiua e rite ai ki te mahi kino me te hiahia kia mahi kino i waenga i te iwi, e hāngai ana ki ngā ture o te kāwanatanga i taua wāhi i takahia ai te ture; ā, me whakapau kaha ngā tāngata katoa ki te kawe mai i ngā tāngata takahi ture pai ki tā rātou whakawākanga, mō te rangimārie me te aiō o te iwi.

9 Kāore mātou i te whakapono e tika ana kia hanumi te mana whakapono ki te kāwanatanga, mā konā atawhaitia tētahi huinga whakapono kātahi ka takahia ngā tikanga o tētahi atu, ā, e whakakorengia hoki ngā tikanga ake o ōna mema, o ōna tāngata.

10 E whakapono ana mātou kei ngā huinga whakapono katoa te tikanga kia whakahaere whakawā mō ngā mahi tutu a ō rātou mema, e rite ana ki ngā ture me ngā tikanga o aua huinga; mehemea e whakahaerehia ana aua āhuatanga i runga i te tikanga whakawhanaungatanga me te aroha; engari kāore mātou e whakapono ana kei ngā huinga whakapono te mana hei whakawā i te tangata e pā ana ki ana taonga, ki tōna oranga rānei, kia murua i a rātou ngā taonga o tēnei ao, kia whakamamaetia rānei kei wehi ka mate, ka mamae rānei te tinana. He mana noa tō rātou kia hātepea atu rātou i tō rātou huinga.

11 E whakapono ana mātou e tika ana kia tono atu ngā tāngata ki te kāwanatanga hei whakatika i ngā mahi hē ki a rātou, mō ngā wā kua taunu, mō te tikanga rawa, ā, mehemea kua takahia te mana o te tangata rānei, mehemea i reira ngā ture e hāngai ana ki tēnei; engari e whakapono ana mātou kei ngā tāngata katoa te tikanga ki te tiaki i a rātou anō, i ō rātou hoa, i ō rātou taonga, me te kāwanatanga, mai i ngā karawhiunga hē me ngā takahitanga a ngā tāngata katoa i ngā wā e hiahia ana, hei ngā wā kāore e taea ana te tuku tono ki ngā ture, ā, kāore hoki he āwhina e taea te tuku.

12 E whakapono ana mātou e tika ana kia kauhau i te rongopai ki ngā iwi katoa i runga i te whenua, me te whakatūpato i te hunga tika kia whakaora rātou i a rātou anō i ngā kino o te ao; engari kāore mātou i te whakapono e tika ana kia whakararu i ngā pononga-here, kia kauhau rānei i te rongopai ki, kia kaua e rumaki rānei i a rātou ahakoa kāore ō rātou māhita e whakaae ana, kia kaua e whakakōtiti, e kukume rānei i ō rātou whakaaro kia whakaaro ake kāore e pai ana ō rātou oranga, mā konā raru nui ō rātou haumarutanga; e whakapono ana mātou kāore e tika ana ēnei momo mahi, ā, he mōrearea ki te rangimārie o ia kāwanatanga e whakaae ana kia whakaponongatia ngā tāngata.