1 Ko te Kupu me te Hiahia o te Ariki e pā ana ki te Hōpuni o Iharaira i ā rātou haerenga ki te Uru:

2 Tukua ngā tāngata katoa o Te Hāhi o Ihu Karaiti o te Hunga Tapu i ngā Rā o Muri Nei, me te hunga e haere tahi ana me rātou, kia whakaritea hei kamupene, me tētahi kawenata me tētahi oati kia puritia ngā whakahaunga me ngā ture katoa a te Ariki tō tātou Atua.

3 Tukua ngā kamupene kia whakaritea ngā kāpene o ngā rau, ngā kāpene o ngā rima tekau, me ngā kāpene o ngā tekau, me tētahi tumuaki me āna kaikaunihera tokorua kei ōna upoko, i raro iho i te whakahaere o ngā Āpotoro Tekau Mā Rua.

4 Ā, ko tā tātou kawenata tēnei—ka hīkoi tātou i roto i ngā tikanga tapu katoa o te Ariki.

5 Tukua ia kamupene, ia kamupene kia whakarite mō rātou anō ngā tīma, ngā wākena, ngā ō, ngā kākahu, me ērā atu mea e tika ana mō te haerenga, arā, ngā mea katoa e taea ana e rātou.

6 Ina whakaritea ngā kamupene, tukua rātou kia haere i runga i tō rātou kaha, ki te whakariterite mō te hunga e noho mai ai.

7 Tukua ia kamupene, ia kamupene, me ōna kāpene me ōna tumuaki, kia whakatau tokohia e taea te haere hei tērā kōanga; kātahi ka kōwhiria i ngā tāngata e kaha ana te tinana me ngā mea mātanga, kia haria e rātou ngā tīma, ngā kākano, me ngā taputapu ahu whenua kia haere ake hei paionea hei whakarite mō te whakatō i ngā kai kōanga.

8 Tukua ia kamupene, ia kamupene kia rite tonu te te wāhi ki a ia, e rite ana ki te wehewehenga o ngā taonga, ki te haringa i te hunga rawa kore, ngā pouaru, ngā pani, me ngā whānau o te hunga kua uru atu ki roto i te ope tauā, kia kore ai te reo karanga o te pouaru me te pani e tae ake ki ngā tāringa o te Ariki hei whakahē i tēnei iwi.

9 Tukua ia kamupene, ia kamupene kia whakarite whare, me ngā whīra whakatupu kākano, mō te hunga e noho tonu mai ki muri nei; ā, koinei te hiahia o te Ariki e pā ana ki tēnei iwi.

10 Tukua ngā tāngata katoa kia whkaamahia tōna mana katoa me āna taonga katoa kia whakanekehia tēnei iwi ki te wāhi e whakatūria ai e te Ariki tētahi pou o Hīona.

11 Ā, ki te pēnei koutou i runga i te ngākau urutapu, i runga i te whakapono katoa, ka manaakitia koutou; ka manaakitia ā koutou whīra, me ā koutou whīra, me ō koutou whare, me ō koutou whānau.

12 Tukua aku pononga a Etera T. Penehana rāua ko Eratuha Hukarere kia whakaritea tētahi kamupene.

13 Ā, tukua aku pononga a Orihana Parata rāua ko Wiriwha Wuruwha kia whakaritea tētahi kamupene.

14 Waihoki, tukua aku pononga a Amaha Raimana rāua ko Hōri A. Mete kia whakaritea tētahi kamupene.

15 Ā, me whakatū he tumuaki, he kāpene o ngā rau, o ngā rima tekau, o ngā tekau hoki.

16 Ā, tukua aku pononga kua whakaritea mai nei kia haere ki te whakaako i tēnei, tāku e pai ai, ki ngā hunga tapu, kia rite ai rātou kia haere atu ki te whenua o te maungārongo.

17 Haere i runga i tō huarahi me te mahi i tāku ki a koe, ā, kaua e wehi i ō hoariri; i te mea kua kore ō rātou kaha ki te aukati i taku mahi.

18 Ka hokona a Hīona i tōku ake wā.

19 Ā, ki te whai tētahi tangata ki te whakakake i a ia anō, ā, ki te kore e whai i aku tohutohu, kāore ōna kaha, ā, ka whakamōhiotia tōna hē.

20 Whāia e koutou; ā, kia pupuri i ō kotuou oati katoa tētahi ki tētahi; ā, kaua e pūhaehae ki ngā mea o tō teina.

21 Kia māwehe koutou i te kino me te whakahua noa i te ingoa o te Ariki, nā te mea ko au te Ariki tō koutou Atua, arā, ko te Atua pū anō o ō koutou tūpuna, te Atua o Aperahama me Ihaka me Hākopa.

22 Ko au tēnā nāna nei ngā tamariki o Iharaira i ārahi kia puta i te whenua o Ihipā; ā, kua torona atu tōku ringa i ngā rā whakamutunga, kia whakaorangia taku iwi a Iharaira.

23 Whakamutua atu te tautohetohe tētahi ki tētahi; whakamutua atu te kōrero kino tētahi ki tētahi.

24 Whakamutua atu te haurangi; ā, tukua ō kupu hei mea whakapiki wairua tētahi i tētahi.

25 Ki te nama koe i tō kiritata, māu anō e whakahoki taua nama; ā, ki te kore e taea e koe te whakahoki, nā, me haere tōtika atu koe ki te kōrero ki tō kiritata, kei whakahēngia koe e ia.

26 Ki te rapu te mea i ngaro ai i tō kiritata, me matua haere ki te hoatu taua mea ki a ia.

27 Me kaha koe ki te tiaki i ngā mea kei a koe, kia meinga koe hei kaitiaki whai whakaaro; nā te mea koia te takoha utu kore o te Ariki tō Atua, ā, ko koe tana kaitiaki whai whakaaro.

28 Mehemea kei te harikoa koe, whakamoemititia te Ariki ki te waiata, ki te whakatangitangi, ki te kanikani, ā, ki tētahi inoi whakawhetai me ngā ohaohatanga.

29 Mehemea kei te pōuri koe, karangahia ake te Ariki tō Atua i runga i te inoi, kia hari ai ō koutou wairua.

30 Kaua e wehi i ōu hoariri, nā te mea kei roto rātou i ōku ringaringa, ā, ka meatia tāku e āhuareka ai ki a rātou.

31 Me whakamātau tōku iwi i roto i ngā mea katoa, kia rite ai rātou kia whiwhi ki te korōria kei a au mō rātou, arā, ko te korōria pū anō o Hīona; ā, ko te tangata kāore e pai ana kia whakarongo ki te kohetetangai te tangata e tika ana mō tōku kīngitanga.

32 Tukua te tangata kuare kia ākona ki te mātauranga mā te whakaiti i a ia anō me te karanga ake ki te Ariki tōna Atua, kia tūwhera ai ōna karu e kite ai ia, kia tūwheratia ōna tāringa kia rongo ai ia;

33 Nā te mea kua tonoa atu tōku Wairua ki roto ki te ao hei whakamārama i te hunga whakaiti me te hunga māhaki, ā, ki te whakahēanga o te hunga atua kore.

34 Kua whakaparahakotia koe, me tō whakaaturanga e ō teina, ko te iwi pū anō nāna nei koe e pei atu;

35 Ināianei ā, kei te haere mai te rā o tō rātou whakangaromanga, ko ngā rā pū anō o te pōuritanga, pērā i tētahi wahine rongo ana i te mamae o te whakawhānau pepi; ā, ka nui tō rātou pōuritanga ki te kore rātou e rīpenetā, āe rā, kia wawe rawa.

36 Nā te mea i whakamatea e rātou ngā poropiti, me te hunga i tonoa atu ki a rātou; ā, kua whakahekea e rātou ngā toto hara kore, e karanga ake ana i te whenua hei whakahē i a rātou.

37 Nō reira, kaua e mīharo i ēnei mea, nā te mea kāore anō koutou kia urutapu; kāore anō e taea e koutou tōku korōria; engarika kite koutou mehemea ka ū pono koutou ki te pupuri i aku kupu kua hoatu nei e au ki a koutou, mai i ngā rā o Arama, ki a Aperahama, mai i a Aperahama ki a Mohi, mai i a Mohi ki a Ihu me ana āpotoro, ā, mai i a Ihu ki ana āpotoro ki a Hōhepa Mete, i karangatia e au he mea nā aku anahera, e aku pononga minita, ā, e tōku ake reo mai i ngā rangi, hei whakaputa i taku mahi;

38 Ko te tūāpapa i whakatakotoria e ia, ā, i ū pono; ā, nāku ia i tango ki ahau anō.

39 Kua mīharo ngā mea tokomaha nā tōna matenga; engari i tika kia hīria tōna whakaaturanga ki ōna toto, kia whakahōnoretia ia, ā, kia whakahēngia te hunga whakarihariha.

40 Kāore anō au kia whakaputa i a koutou i ō koutou hoariri, ko te waiho noa tētahi kaiwhakaatu mō tōku ingoa?

41 Nō reira, whakarongo mai, E koutou ngā tāngata o taku hāhi; whakarongo tahi mai koutou ngā erata; kua whiwhi koutou i taku kīngitanga.

42 Kia ū ki te pupuri i aku whakahaunga katoa, kei tau mai ngā whakawākanga ki runga i a koutou, ā, kei hemo tō koutou whakapono, ā, ka wikitōria ō koutou hoariri i runga i a koutou. Nō reira heoi anō i tēnei wā. Āmine, ā, āmine.