Wāhanga 129
Ko ngā kī i homai ai e Hōhepa Mete te Poropiti, i Nāwhu, Irinoi, Pēpuere 9, 1843, e whakamōhiotia atu ana ngā kī nui e toru mā konā mōhio ai ki te āhua e minita mai ai ngā anahera me ngā wairua.
1–3, Kei te rangi ngā tinana kua whakaarahia me ngā tinana wairua; 4–9, Kua homai ngā kī mā konā mōhio ai ki ngā karere nō tua i te ārai.
1 E rua ngā momo mea i te rangi, arā: Ko ngā anahera, koinā ngā mea kua whakaarahia, he tinana kikoiwi ō rātou—
2 Hei tauira, i kī a Ihu: Whakapā mai ki ahau kia kite, nā te mea kāore he kikoiwi ō tētahi wairua, pērā i tāu i kite nei i tōku.
3 Tuarua: ko ngā wairua o te hunga tika kua whakatikaina ake, te hunga kāore anō kia whakaarahia, engari ka whiwhi i taua korōria anō.
4 Ina haere mai tētahi karere e mea ana he karere tāna nā te Atua, tukua atu tō ringa ki a ia kātahi ka tonoa ia kia harirū kōrua.
5 Mehemea he anahera ka pērātia, kātahi ka rongo koe i tōna ringa.
6 Mehemea he wairua nō tētahi tangata tika kua whakatikaina ake ka puta mai ia i runga i tōna korōria; nā te mea koinā anake te āhua e taea ai e ia te haere mai.
7 Tonoa ia kia harirū ki a koe, engari e kore ia e neke, nā te mea he tauaro tērā ki te ritenga o te rangi kia tinihanga tētahi tangata tika; engari ka tukua tonutia mai e ia tana karere.
8 Mehemea rānei ko te rēwera tērā anō nei he anahera o te māramatanga, ina tonoa ia kia harirū ringa ka tukua e ia tōna ringa, heoi, e kore koe e rongo i tōna ringa; nā konā mōhio koe ko wai ia.
9 Koinei ngā kī nui e toru mā konā mōhio ai koe nā te Atua rānei te whakahaere, ehara rānei.