1. Nana, ko taku kupu tenei ki a koe e Oriwa, tenei ake te hoatu ai ki a koe te wa e whakarangona ai koe e te Hahi mo runga i nga mea katoa e whakaako ai koe i a ratou rite tonu ki ta te Kai-whakamarie, mo runga i nga whakakitenga me nga whakahaunga kua hoatu e ahau.

2. Otira nana, he pono, he pono taku e mea atu nei ki a koe, e kore e whakaritea tetahi kia whiwhi ki nga ture me nga whakakitenga i roto i tenei Hahi, haunga ia, taku pononga, a Hohepa Mete, tamaiti, no te mea, e whiwhi ana ia ki aua mea pera ano i a Mohi.

3. A me ngohengohe koe ki nga mea e hoatu ai e ahau ki a ia, kia pera me Arona, kia ata hangai hoki te whakapuaki i nga ture me nga whakakitenga, kia meatia ano hoki ki te Hahi i runga i te kaha me te mana.

4. A me he mea ka whakamaharatia koe i etahi wa e te Kai-whakamarie, kia korero, kia whakaako ranei, a i nga wa katoa ranei, e whakahaua koe kia korero, kia ako ranei ki te Hahi e pai ana kia pera koe.

5. Engari kaua koe e tuhituhi i runga i te ahua whakahau, engari i runga i te whai-whakaaro:

6. A kaua hoki koe e whakahau i a ia e tu na i runga ake i a koe, i runga ake ano hoki i te Hahi.

7. No te mea kua hoatu e ahau ki a ia nga kii o nga mea ngaro, o nga whakakitenga ano kua oti te hiiri, kia whakaturia ra ano tetahi atu mo aua mea hei tu i tona turanga.

8. A, nana, ko taku kupu tenei ki a koe, me haere koe ki nga Ramana, me te kauwhau i taku Rongo-pai ki a ratou; a ina manako mai ratou ki au whakaakoranga, meinga e koe kia whakaturia taku Hahi ki waenganui i a ratou, a e whiwhi koe ki nga whakakitenga, otira ko aua mea kaua koe e tuhituhi i runga i te ahua whakahau.

9. A nana, ko taku kupu tenei ki a koe, kaore ano kia whakakitea noatia, kaore hoki he tangata kia matau ki te wahi e hangaa ai te pa, engari tenei ake te wa e whakaaturia ai. Nana, ko taku tenei ki a koe, ka tu ia ki nga rohe e patata atu ana ki nga Ramana.

10. Kaua koe e haere atu i konei kia mutu ra ano te hui, ma te reo hoki o taua hui e whakaritea ai taku pononga a Hohepa, hei kai-whakahaere mo taua hui ano, a ko tana (ko ta Hohepa) e korero ai ki a koe, ko tena tau e whakapuaki ai.

11. Me tenei ano, me mau koe ki tou teina, ki a Hairama Peeti, a i waenganui i a korua anake, ka ki atu ki a ia ko nga mea i kapea (i tuhituhia) mai e ia o te kohatu na, e hara i a au, engari ko Hatana e tinihanga ana i a ia;

12. No te mea, ko nga mea penei kaore i whakaritea hei puta atu ki a ia, e kore ano tetahi mea e whakaritea kia puta atu ki tetahi tangata o roto i te Hahi, e tika ke ana i nga kawenata o te Hahi.

13. No te mea me whakaoti nga mea katoa i runga i te tikanga, i runga ano i te kupu whakaae tahi a te Hahi, i runga hoki i te inoi whakapono.

14. A i mua atu i to haerenga ki waenganui i nga Ramana, me awhina koe kia oti pai enei mea katoa kia rite ki nga kawenata o te Hahi.

15. A tera ka whakakitea atu ki a koe, timata atu i te wa e haere ai koe, tae noa ki te wa e hoki mai ai koe, nga mea hei mahinga mau.

16. A i nga wa katoa kia hamama tou mangai, me te whakapuaki ano i toku Rongopai i runga i te reo hari. Amine.