1. He pono te kupu a te Ariki ki a koe e taku pononga e Tamati, kua tae ake ou inoinga ki a au me ou mahi atawhai, hei whakamaharatanga ki a au mo ou teina kua whiriwhiria nei hei whakaatu i toku ingoa, a ka tono atu ki te ao ki waenganui i nga reo, i nga tangata, a ka whakaritea e aku pononga.

2. He pono taku e mea atu nei ki a koe, tera ano etahi mea ruarua nei, i roto i tou ngakau, na runga i aua mea kahore au, te Ariki, e ahuareka atu ki a koe.

3. He ahakoa ra i runga i te mea kua whakaiti koe i a koe ano, ka whakateiteitia koe; no konei ra, kua murua katoatia ou hara i a koe.

4. Kia koa koe, kia hari i mua i a au, a tera koe e whakaatu mo toku ingoa, e hara i te mea ki nga Tauiwi anake, engari ki nga Hurai ano hoki; a era e tukuna e koe taku kupu ki nga pito o te whenua.

5. Kia kaha koe i tena ata, i tena ata, a i tena ra, i tena ra, tukua atu te reo whakatupato, a i te mea ka tae ki te po, kaua e tukua nga tangata o te whenua kia hia moe i runga i tou korero.

6. Whakaatutia tou kainga i Hiona, a kaua e nukuhia to whare, no te mea kei a au, kei te Ariki, tetahi mahi nui hei mahi mau, he whakaatu i toku ingoa i waenganui i nga tamariki a te tangata.

7. No reira rapakitia to hope mo te mahi. Mauria he hu mo o waewae, no te mea kua whiriwhiria koe, a ko te huarahi ko runga i nga maunga, a ko waenganui i nga iwi maha.

8. A ma runga i to kupu he nui nga hunga teitei e whakapapakutia iho, a ma runga i tau kupu he nui nga hunga whakaiti e whakateiteitia ake.

9. Ko tou reo hei riri atu ki te kai mahi i te he, a ma tou riri atu ka whakamutua ai te korero tito o te tangata korero tito.

10. Kia whakaiti koe, a ma te Ariki, ma tou Atua koe e arahi i to ringaringa, a mana e hoatu ki a koe te utu mo o inoi.

11. E mohio ana ahau ki tou whakaaro, a kua tae ake hoki o inoinga mo o tuakana. Kaua e rahi ake to aroha ki etahi, engari kia rite to aroha ki a ratou, me tou ki a koe ano, a kia aroha koe ki nga tangata katoa, a me nga hunga ano hoki e aroha ana ki toku ingoa.

12. A me inoi mo o tuakana o te Tekau-ma-rua. Ka tohutohu kaha i a ratou mo toku ingoa, a kia whakatupatotia ratou mo o ratou hara, a ka u i mua i a au i roto i toku ingoa.

13. A i muri iho i o ratou whakamatautauranga, a he nui te mate, na ko ahau ko te Ariki, ka aroha atu ki a ratou, a ki te kore o ratou ngakau e uaua, ki te kore o ratou kaki e maro mai ki a au, ka manaakitia ratou, a ka whakaorangia ratou.

14. Inaianei, ka mea atu ahau ki a koe, a ko aku i korero ai ki a koe e korerotia e ahau ki te Tekau-ma-rua. E ara, rapakitia o koutou hope, ka mau i to ripeka, ka whai mai i a au, a ka whangai i aku hipi.

15. Aua e whakanui i a koutou ake: e tutu atu ki taku pononga ki a Hohepa, no te mea he pono taku e mea atu nei ki a koe, kei a ia ahau, a ko toku ringa kei runga i a ia: a ko nga kii kua hoatu nei e ahau ki a ia, a ki a koutou ano e kore e tangohia atu i a ia kia tae mai ra ano ahau.

16. He pono taku e mea atu nei ki a koe, e taku pononga e Tamati, ko koe te tangata naku i whiriwhiri hei pupuri i nga kii o toku kingitanga (mo te taha ki nga Apotoro) kia puta atu ki waenganui i nga iwi katoa,

17. A tera pea koe, taku pononga mana e huaki te tatau o toku kingitanga i roto i nga wahi katoa e kore ai e tae atu taku pononga a Hohepa, taku pononga ranei a Hirini, me taku pononga a Hairama.

18. No te mea kei runga i a ratou nga whakahaerenga mo nga peka mo tetahi takiwa iti;

19. No reira, he aha ta ratou e tono ai i a koe kia haere, me haere koe, a ko ahau tena hei hoa mou, ahakoa i hea wahi e whakapuaki ai koe i taku ingoa, a te hunga i rongo ai tuwhera noa nga tatau ki a koe, kia whiwhi ai ratou ki taku kupu;

20. Ko ia e manako ana ki taku kupu e manako ana ki a au, ko ia e manako ana ki a au e manako ana ki te hunga (Tumuakitanga Tuatahi) i tonoa ai e ahau, i runanga tahi ai mo te whakaaro ki taku ingoa, ki a koe ano.

21. A tenei ano taku e mea nei ki a koe, ko tau e tono ai i runga i toku ingoa kia haere, he mea na te reo o o tuakana, nga Apotoro, i runga i nga painga i kitea e koe me tou whakamananga, tena ka whai kaha ki te whakatuwhera i te tatau o toku kingitanga, ahakoa ko wai ranei te iwi i tonoa atu ai ratou e koe ki reira.

22. Ki te mea ra, ka whakaiti ratou i a ratou ano i mua i a au, ka u ano ki taku kupu, me te whakarongo ki te reo o toku Wairua.

23. He pono taku e mea atu nei ki a koe, kua taupoki te pouritanga i runga i te whenua, kua hipa te pouritanga i nga mahara o te iwi, a ko nga kikokiko katoa kua anga, a kua pirau i mua i toku mata.

24. Nana, ka hohoro te putanga atu o nga whiu ki te hunga e noho ana i te whenua, a te ra o te riri, o te ra o te weranga, a te ra o nga tukinotanga, o te tangihanga, o te whanautanga, o te auetanga, me nga awhiowhio ka puta mai ki runga ki te mata katoa o te whenua, e ai ta te Ariki.

25. A kei runga i toku whare te timatanga me te haerenga atu ano i toku whare, e ai ta te Ariki.

26. Tuatahi i te hunga e noho tahi na koutou, e ai ta te Ariki, e mohio nei ki toku ingoa, a kahore e mohio ana ki a au, kua kohukohu ano hoki ki a au i waenganui o toku whare, e ai ta te Ariki.

27. No reira, me titiro koe ki a koe ake, kei raruraru i nga tikanga e pa ana ki taku Hahi i roto i tenei whenua, e ai ta te Ariki.

28. Engari kia whakamana o koutou ngakau i mua i a au, a ka haere ai ki roto ki te ao katoa, ka kauwhau ai i taku Rongo-pai ki roto ki nga iwi katoa kahore nei ano i whiwhi i te Rongo-pai.

29. A ko ia e whakapono, a ka rumakina ia, tera e whakaorangia, a ko ia e kore e whakapono, a e kore e rumakina, tera e tau te he ki a ia.

30. Ki a koutou (te Tekau ma rua) ki nga mea (te Tumuakitanga Tuatahi) kua whakaingoatia nei koe, hei tohutohu i a koe, hei arahi, i hoatu nei te kaha o tenei Tohungatanga mo nga ra whakamutunga i roto i te takiwa o te kianga o nga wa o nga taima.

31. No reira nei tou kaha e mau na i a koe hui atu ki nga mea kua whiwhi ki tenei wa me era atu taima mai ano o te timatanga o te ao.

32. No te mea he pono taku e mea atu nei ki a koe, ko nga kii o tenei wa kua whiwhi ra koe, i heke mai ano i nga matua, a no te mutunga rawatanga, katahi ano ka tukua mai i te rangi ki a koutou.

33. He pono taku e mea atu nei ki a koutou, titiro ki te nui o o koutou karangatanga. Whakamakia o koutou ngakau me o koutou kakahu, ki te kore ko te toto o tenei whakatupuranga ka rapua he utu i o koutou ringaringa.

34. Kia tae noa ki toku haerenga mai, ka hohoro hoki taku haerenga atu, kei a au ano toku utu hei hoatutanga ki nga tangata katoa e rite ana ki a ratou mahi. Ko ahau te Arepa me te Omeka. Amine.