Wāhanga 137
He whakakitenga i homai ai ki a Hōhepa Mete te Poropiti, i roto i te temepara i Katarana, Ohaio, Hānuere 21, 1836. Ko te whakahaeretanga o ngā tikanga tapu hei whakarite mō te whakatapunga o te temepara.
1–6, Ka kite te poropiti i tōna tuakana a Arawini i te kīngitanga o Tikitiki o Rangi; 7–9, Ka whakakitea mai te whakaakoranga e pā ana ki te whakaoranga i te hunga mate; 10, Ka whakaorangia ngā tamariki katoa i te kīngitanga o Tikitiki o Rangi.
1 I whakatūwheratia ngā rangi ki runga i a mātou, kātahi ka kite au i tētahi kīngitanga Tikitiki o Rangi o te Atua.
2 I kite au i te ātaahua rirerire o te kuaha mā konā tomo atu ai ngā kaiwhiwhi o taua kīngitanga, ko tōna rite ki ngā kāpura o te ahi e porohita ana;
3 Waihoki, ko te torona muramura o te Atua, i reira noho ai te Matua me te Tama.
4 I kite au i ngā tiriti ātaahua o taua kīngitanga, ko te āhua nei kua hangaia ki te kōura.
5 I kite au i a Matua Arama rāua ko Aperahama; me tōku matua rāua ko tōku whaea; tōku tuakana a Arawini, kua roa rawa e moe ana;
6 Ā, i mīharo au i tana whiwhinga i taua kīngitanga, i te mea i wehe noa atu ia i tēnei oranga i mua i te toronga a te Ariki i tōna ringa ki te whakahui i a Iharaira mō te wā tuarua, ā, kīhai i rumakina mō te murunga hara.
7 Pēnei tau mai te reo o te Ariki ki ahau, e mea ana: Ko te hunga katoa i mate ai kāore ō rātou mātauranga ki tēnei rongopai, arā, te hunga kua aro atu mehemea kua whakaae kia noho ora tonu mai, ka meinga hei kaiwhiwhi ki te kīngitanga Tikitiki o Rangi o te Atua;
8 Waihoki, ko te hunga katoa e mate ai a muri ake nei kāore ō rātou mātauranga ki te rongopai, te hunga kua aro atu ō rātou ngākau katoa, ka meinga hei kaiwhiwhi ki taua kīngitanga;
9 Nā te mea Māku, mā te Ariki, e whakawā ngā tāngata katoa e rite ana ki ā rātou mahinga, e rite ana ki te hiahia o ō rātou ngākau.
10 Ā, i kite anō ahau, nā, ka whakaorangia ngā tamariki katoa e mate ai i mua noa i ngā tau e mātau ana ki roto i te kīngitanga Tikitiki o Rangi.