1. Ka korero te Ariki ki a Enoka (Hohepa Mete, tamaiti), ka mea, Whakarongo mai ki a au, e ai ta te Ariki to Atua; ko koutou nei kua whakaritea ki te tohungatanga nui i roto i taku Hahi kua huihui tahi nei ano koutou.

2. Whakarongo mai ki ana tohutohu; nana hoki koutou i whakarite mai i runga rawa. Ka korero ano ia ki o koutou taringa nga kupu o te matauranga, e whiwhi ai koutou ki te oranga i roto i aua mea kua whakatakotoria mai e koutou ki toku aroaro e ai ta te Ariki, ta te Atua.

3. He pono taku e mea atu nei ki a koutou, kua tae mai te wa, a inaianei ano; na e tika ana kia takoto he huihuinga o toku iwi hei whakahaere, hei whakariterite i nga tikanga o te whare-taonga, hei whakaaro ki te hunga rawa-kore o toku iwi i konei, i te whenua o Hiona ano hoki;

4. Ara tetahi kupu, ko te pa o Enoka (Hohepa) hei tikanga tu tonu ia, mau tonu ia mo taku Hahi; hei whakanui haere i te mahi kua tangohia nei e koutou hei whakaoranga mo te tangata; mo te kororia ano hoki o to koutou Matua e noho nei i te rangi.

5. Kia rite tahi ai koutou i roto i nga mea o te rangi; ae ra i nga mea hoki o te whenua kia riro mai ai hoki nga mea o te rangi.

6. Ki te kore e rite i a koutou nga mea o te whenua; e kore to koutou whiwhi ki nga mea o te rangi.

7. Na, ki te hiahia koutou kia hoatu e ahau ki a koutou tetahi wahi ki roto i te ao o te Tikitiki-o-rangi (celestial) me whakariterite i a koutou ano i runga i ta koutou whakarite i nga mea kua whakahaua e ahau kia meatia e koutou.

8. Na, he pono e ai ta te Ariki, e tika ana kia mahia katoatia enei mea hei whakaaro ki toku kororia, ma koutou kua uru tahi nei ki roto i tenei tikanga.

9. Ara kia penei, tukua taku pononga a Ahita (Nuera K. Witini) ratou ko taku pononga a Ekerama; ara Enoka (Hohepa Mete, tamaiti) ko taku pononga a Perekorama (Hirini Rikitana) kia noho runanga me te hunga tapu i roto nei i Hiona.

10. E mea ana a Hatana ki te whakatahuritia ketia o ratou ngakau i te pono kia matapo ai ratou kia kore ai e mohio ki nga mea kua whakaritea nei mo ratou.

11. No reira he whakahaunga tenei, ka hoatu nei e ahau ki a koutou kia whakariterite me te whakakotahi i a koutou ano i roto i tetahi here; ara tetahi kawenata mau tonu, kahore nei e taea te whakataka.

12. A, ko te tangata e whakataka ana ka tangohia atu tona karangatanga me tona turanga i roto i te Hahi; a ka tukua ia ki nga whakamamaetanga a Haana tae noa ki te ra o te hokonga.

13. Nana ko tenei te whakaritenga e whakaritea ai koutou e ahau; koia te kaupapa me te tauira e hoatu nei e ahau ki a koutou hei mea ia e taea e koutou te whakatutuki i nga whakahaunga e hoatu nei e ahau ki a koutou.

14. He mea na toku aroha noa; ahakoa nga whakamatautauranga tera e tau iho ki runga i a koutou; ka tu tonu te Hahi i runga i tona ake kaha, i runga ake ano i era atu mea katoa i raro iho nei i te ao o te rangi.

15. Kia kake ake ai koutou ki te karauna kua whakaritea mo koutou kia meinga ai koutou hei rangatira i runga i nga kingitanga maha e ai ta te Ariki, ta te Atua; te Mea Tapu i Hiona; nana i whakatu nga turanga o Arama—Onotai—Amana (te wahi i noho ai a Arama me tona iwi);

16. Nana nei a Mikaera to koutou piriniha i whakatu, i whakapumau ano i ona waewae, a whakanoho ana i a ia ki runga rawa me te hoatu nga kii o te whakaoranga ki a ia i raro i te tohutohu me te whakahaere a te Mea Tapu; kahore he timatanga o ona ra, mutunga ranei o te ora.

17. He pono, he pono taku e mea atu nei ki a koutou, he tamariki nonohi koutou, a kahore ano koutou kia mohio noa, pewhea te nui o nga manaakitanga a te Matua kei roto nei i ona ringa kua rite nei ma koutou.

18. Kahore e taea e koutou nga mea katoa inaianei, engari kia whai-hari, maku koutou e arahi; ko te kingitanga mo koutou me ona painga ano hoki mo koutou me nga taonga o te oranga-tonutanga mo koutou ano hoki.

19. Ko te tangata e tango ana enei mea i runga i te whakawhetainga ka whakakororiatia ia, a, ka tapiritia nga mea o tenei whenua; ae ra mana he tataki rau; ae ra, he nui atu.

20. No reira mahia nga mea kua whakahaua e ahau ki a koutou; e ai ta to koutou Kai-hoko; ae ra te Tama ko Amana, nana nei i whakarite nga mea katoa i mua atu i tona tangohanga i a koutou.

21. Ko koutou te hahi o te matamua, mana koutou e tango ake i roto i tetahi kapua, a, ka hoatu ki ia tangata, ki ia tangata tona ake wahi.

22. Ko te tangata e u ana he tuari whai-whakaaro ano hoki; ka whiwhi ia ki nga mea katoa. Amine.