1 I te tuatoru o Oketopa, i te tau kotahi mano e iwa rau tekau mā waru, i noho au i roto i tōku ruma e whakaaroarohia ana ngā karaipiture;

2 Ā, e huri ana ngā whakaaro ki te whakahere whakamārie nui i meatia ai e te Tama a te Atua, mō te hokonga o te ao;

3 Ā, ko te aroha nui whakamīharo i whakakitea mai e te Matua me te Tama i te haerenga mai a te Kaihoko ki roto i te ao;

4 Nā, mā roto i tana whakamārietanga, ā, mā te ngohengohe ki ngā tikanga o te rongopai, e whakaorangia ai te tangata.

5 I ahau e pēnei ana, ka hoki ōku whakaaro ki ngā tuhinga a te āpotoro a Pita, ki ngā hunga tapu tōmua i whakamararatia atu ai ki roto o Ponotuhi, Karatia, Kapatoria, me ērā atu wāhanga o Āhea, arā, ki ngā wāhi i kauhautia ai te rongopai whai muri iho i te rīpekatanga o te Ariki.

6 I huaki au i te Paipera kātahi ka pānui i ngā upoko tuatoru me te tuawhā o te pukapuka a Pita, ā, i ahau e pānui ana ka rongo au i tētahi mea kaha ake i tāku i rongo ai i mua, he mea nā ngā rerenga whiti e whai ake nei:

7 “Nā te mea kua whakamamaetia anō hoki te Karaiti mō ō tātou hara, te mea tika mō ngā mea kāore i te tika, kia kawea mai ai tātou ki te Atua, i te mea kua whakamatea i roto i te kikokiko, engari kua whakaorangia e te Wairua:

8 “Mā konā hoki haere ai ia ki te kauhau ki ngā wairua e hereherea ana;

9 “I te hunga kāore i whakarongo i ētahi wā, i te wā i whanga manawanui mai ai te Atua i ngā rā o Noa, i te wā e hangaia ana te Āka, nā konei ētahi mea ruarua, arā, ko ngā mea tokowaru i whakaorangia ai he mea nā te wai.” (1 Pita 3:18–20.)

10 “Nā te mea ko tēnei kaupapa i kauhautia anōtia ai te rongopai ki te hunga mate, kia whakawākia rātou e rite ana ki te tangata i te kikokiko, engari e ora ana i ngā ritenga o te Atua i te wairua.” (1 Pita 4:6.)

11 I ahau e whakaaroaro ana i ēnei mea kua tuhia mai nei, i whakatūwheratia ake ngā karu o tōku māramatanga, ā, i tau mai te wairua o te Ariki ki runga ki ahau, ā, i kite au i ngā mano o te hunga mate, ngā mea iti me ngā mea nui.

12 Ā, i reira whakahui ngātahitia ki te wāhi kotahi tētahi whakaminenga wairua manomano o te hunga tika, te hunga pono i roto i te whakaaturanga o Ihuu i te wā o te ora;

13 Ā, te hunga kua tāpae whakahere hei ritenga mō te whakahere nui o te Tama a te Atua, ā, kua whakamamaetia mō te ingoa o te Kaihoko te take.

14 Kua wehe atu ēnei mea katoa i te ao o te ora, e pakari ana i te manako ki te aranga whai korōria, mā roto i te aroha o te Atua te Matua me tana Tama Kotahi Anake, a Ihu Karaiti.

15 I kite au kua kī rātou i te hari me te koa, ā, i te hari tahi nā te mea kua tae mai tō rātou whakaputanga.

16 I te huitahi rātou e tatari ana ki te putanga mai a te Tama a te Atua ki roto i te ao wairua, ki te whakapuaki i tō rātou hokonga mai i ngā here o te mate.

17 Te tikanga ia ka whakahokia ō rātou puehu moe ki tōna āhua tika, kōiwi ki te kōiwi, ā, iaia ki te iaia me te kikokiko ki runga rā, ko te whakakotahitanga mai anō o te wairua me te tinana e kore rawa e weheruatia atu anō, kia whiwhi ai rātou ki tētahi raneatanga o te hari.

18 I te wā e tatari ana, ā, e kōrero ana tēnei whakaminenga nui, e hari ana i te hāora o tō rātou whakaputanga i ngā mekameka o te mate, ka puta mai te Tama a te Atua, e whakpuaki ana i te herekoretanga ki ngā mauhere i ū pono ai;

19 Ā, i reira kauhautia atu ai e ia te rongopai mau tonu, te whakaakoranga o te aranga me te hokonga o te tangata mai i te takanga, ā, mai i ngā hara takitahi i runga i ngā tikanga o te rīpenetātanga.

20 Engari kīhai ia i haere atu ki te hunga whakarihariha, ā, ki waenganui i te hunga atua kore me te hunga rīpenetā kore i whakapokea rātou anō i a rātou i te kikokiko, kīhai i ara ake tōna reo;

21 Kīhai hoki te hunga haututū, arā, te hunga i whakaparahako i ngā whakaaturanga me ngā whakatūpato o ngā poropiti onamata i kite i tōna aroaro, i tōna kanohi hoki.

22 Ko te wāhi i reira ēnei, ko te pōuritanga te kaiwhakahaere, engari i waenganui i te hunga tika, ko te maungārongo;

23 Ā, i hari te hunga tapu i tō rātou hokonga, ā, ka piko te turi, ā, ka mihia te Tama a te Atua koia tō rātou Kaihoko me tō rātou Kaiwhakaputa i te mate me ngā mekameka o te ao rēwera.

24 I kānapanapa ō rātou āhua, ā, ka tau iho te mauri mai i te aroaro o te Ariki ki runga ki a rātou, ā, i waiatahia e rātou ngā whakamoemiti ki tōna ingoa tapu.

25 I mīharo au, nā te mea i mārama ahau, nā, kua āhua toru tau te Kaiwhakaora i roto i tana minitatanga ki waenganui i ngā Hūrai me te hunga nō te whare o Iharaira, e whakapau kaha ana kia whakaakona rātou te rongopai mau tonu me te karanga rīpenetātanga ki a rātou;

26 Heoi anō, hei aha koa ana mahinga nui, me ana merekara, me tana whakapuakitanga o te pono, i runga i te kaha me te mana, he ruarua ngā mea i aro mai ki tōna reo, ā, i hari i tōna aroaro, ā, i whiwhi whakaoranga i ōna ringaringa.

27 Engari kua whakawhāitihia tana minitatanga i waenganui i te hunga mate ki te wā i waenganui i tana rīpekatanga me tana aranga;

28 Ā, i mīharo au i ngā kupu a Pita—i reira kī ake ia, nā, i kauhau atu te Tama a te Atua ki ngā wairua e hereherea ana, te hunga kīhai i whakarongo i ētahi wā, i te wā i manawanui mai ai te Atua i ngā rā o Noa—ā, te huarahi i taea ai e ia te kauhau atu ki aua wairua me te mahi i ngā mahi e tika ana hei mahi i waenganui i a rātou i tētahi wā poto.

29 Ā, i ahau e mīharo ana, ka tūwheratia ōku karu, ā, ka whakaohongia tōku māramatanga, ā, ka kite au kīhai te Ariki i haere ā-tinana ki waenganui i te hunga whakarihariha me te hunga kīhai i whakarongo, arā, te hunga i whakaparahakotia ai ngā mea pono, ki te whakaako i a rātou;

30 Engari nana, mai i te hunga tika, nāna ana mea kaha i whakarite, ā, i whakatau hei karere, e kākahuria ana ki te kaha me ngā mana, ā, e whakamanaia ana rātou kia haere, ā, kia haria te māramatanga o te rongopai ki a rātou te hunga kei te pōuriuri, ki ngā wairua pū anō o ngā wairua o te tangata; pēnei kauhautia ai te rongopai ki te hunga mate.

31 Ā, i haere atu ngā karere i kōwhiria ai ki te whakapuaki i te rā tika o te Ariki me te whakapuaki i te herekoretanga ki ngā mauhere, ki te hunga katoa e rīpenetā ai i ō rātou hara kia whiwhi ai i te rongopai.

32 Pēnei kauhautia ai te rongopai ki te hunga i mate ai i roto i ō rātou hara, kāore ō rātou mātauranga ki ngā mea pono, i roto i te hē rānei, kua whakaparahakotia ngā poropiti.

33 I whakakona ēnei te whakapono ki te Atua, te rīpenetātanga i te hara, te rumakitanga mō te murunga hara, te takohatanga o te Wairua Tapu mā te whakapākanga o ngā ringaringa,

34 Ā, me ērā atu tikanga katoa o te rongopai e tika ana kia mōhio ai rātou e tika ai tō rātou whakawākanga e rite ana ki te tangata i te kikokiko, engari kia ora kia rite ki te Atua i te wairua.

35 Nā konei whakamōhiotia te hunga mate, ngā mea iti me ngā mea nui, te hunga tika me te hunga whakapono, kua whakaputaina mai te hokonga mā roto i te whakahere o te Tama a te Atua i runga i te rīpeka.

36 Pēnei whakamōhiotia i pau te wā ki te Kaihoko i tana haerenga ki te ao wairua, e tohutohua ana, ā, e whakariteritea ana ngā wairua pono o ngā poropiti i whakaaturia mōna i te kikokiko;

37 Kia kawea e rātou te karere o te hokonga ki te hunga mate katoa, ki te hunga kāore i taea e ia ake kia haere, nā tō rātou haututū me ā rātou hē, kia rangona ai e rātou ana kupu mā roto i te minitatanga o ana pononga.

38 I waenganui i te hunga nui me te hunga kaha i whakakotahitia ai i tēnei whakaminenga nui o te hunga tika, arā, ko Matua Arama, te Onamata o ngā Rā me te matua o te katoa,

39 Ā, ko tō tātou Whaea korōria a Iwi, me ana tamāhine tika tokomaha i ora ai i roto i ngā whakatipuranga, ā, i koropikotia te Atua pono e ora ana.

40 I reira a Apera, te tangata whakapono tuatahi i kōhurutia, me tana teina a Heta, tētahi o te hunga kaha, i rite tonu tōna āhua ki tōna matua, Arama.

41 Ko Noa, nāna i whakatūpato mō te waipuke; Hema, te pirihi teitei nui; Aperahama, te matua o te hunga whakapono; Ihaka, Hākopa, me Mohi, te kaiwhakatakoto-ture nui i Iharaira;

42 Me Īhāia, nāna i whakapuaki mā runga i te poropititanga, nā, kua whakawahia te Kaihoko hei tuitui i te hunga ngākau marū, ki te whakapuaki i te herekoretanga ki ngā mauhere, me te whakatūwhera i te whare herehere ki te hunga e hereherea ana, ā, i reira anō rātou.

43 Waihoki, ko Ehekiera, i whakakitea ki a ia te whakakitenga o te raorao nui o ngā kōiwi maroke, ngā mea e kākahuria ki te kikokiko, kia haere mai ai anō i te aranga o te hunga mate, ngā wairua ora;

44 Ko Rāniera, i matakite ai i te whakapūmautanga o te kīngitanga o te Atua i ngā rā o muri nei, e kore rawa anō e whakangaromia, e hoatu rānei ki tētahi atu iwi;

45 Ko Eria, i te taha o Mohi i runga i te Maunga o te Panonitanga;

46 Me Maraki, te poropiti nāna nei i whakaatu e pā ana ki te haerenga mai o Irāia—te mea i kōrero ai ki te Poropiti Hōhepa Mete, e whakapuakina ana, nā, me haere mai ia i mua i te taenga mai o te rā nui whakawehi o te Ariki—i reira anō hoki rātou.

47 Ko tā te Poropiti a Irāia he whakatō i roto i ngā ngākau o ngā tamariki ngā whakaari i meatia ai ki ō rātou tūpuna,

48 I mua i te mahi nui hei mahi i roto i ngā temepara o te Ariki i tēnei whakatipuranga o ngā raneatanga o ngā wā, mō te hokonga o te hunga mate, me te hīritanga o ngā tamariki ki ō rātou mātua, kei pākia te ao katoa ki tētahi kanga, ā, e whakangaromia rawatia hei tana haerenga mai.

49 Koinei katoa me ētahi atu mea tokomaha, arā, ko ngā poropiti pū anō i noho ai i waenganui i ngā Nīwhai, ā, i whakaaturia e pā ana ki te haerenga mai a te Tama a te Atua, kei roto pū i te whakaminenga nui, ā, e tatari ana ki tō rātou whakaputanga,

50 Nā te mea kua whakaarohia e te hunga mate he herenga te wehenga o ō rātou wairua i ō rātou tinana.

51 I whakaakona ēnei e te Ariki, ā, i hoatu mana ki a rātou kia haere mai, whai muri iho i tana aranga i te mate, kia tomo atu ai ki roto i te kīngitanga o te Matua, kia karaunatia ki te mate kore me te oranga tonutanga,

52 Ā, kia hono tonu i reira tā rātou mahi pērā i te mea i whakaaria mai ai e te Ariki, ā, kia meinga hei kaitango i ngā manaakitanga katoa i rāhuitia mō rātou te hunga e aroha ana ki a ia.

53 Ko te Poropiti Hōhepa Mete, me tōku matua, a Hairama Mete, ko Pirikama Ianga, ko Hoani Teira, ko Wiriwha Wuruwha, me ērā atu wairua kōwhiria i rāhuitia ai kia haere mai i te raneatanga o ngā wā ki te tautoko i te whakatakotoranga iho o ngā tūāpapa o te mahi nui i ngā rā o muri nei,

54 Tae atu ana ki te hanganga ake o ngā temepara me te meatanga o ngā tikanga tapu i reira mō te hokonga o te hunga mate, i reira anō rātou i te ao wairua.

55 I kite ahau, nā, kei waenganui anō hoki rātou i te hunga ariki me te hunga nui i kōwhiria ai i te tīmatanga kia tū ai hei kaiwhakahaere i roto i te Hāhi o te Atua.

56 I mua pū anō i te wā i whānau mai ai rātou, i whakaakona tuatahitia rātou me te hunga tokomaha i te ao wairua, ā, i whakaritea kia haere mai ai hei te wā o te Ariki kia mahi i tana māra wāina mō te whakaoranga o ngā wairua o te tangata.

57 I kite au i ngā erata pono o tēnei whakatipuranga wā, i te wā e wehe ai i te ao kikokiko, ka haere tonu ā rātou mahi ki te kauhau i te rongopai o te rīpenetātanga me te hokonga, mā roto i te whakahere o te Tama Kotahi Anake a te Atua, ki waenganui i te hunga kei roto i te pōuritanga, ā, te hunga kei raro i te herenga o te hara i te ao nui o ngā wairua o te hunga mate.

58 Ka hokona te hunga mate e rīpenetā ai, mā roto i te ngohengohe ki ngā tikanga tapu o te whare o te Atua,

59 Ā, whai muri i tā rātou utu i te whakawākanga o ō rātou hē, kātahi ka horoia kia mā, ka whiwhi i tētahi taonga e rite ana ki ā rātou mahinga, nā te mea he kaiwhiwhi ki te whakaoranga.

60 Pēnei whakakitea mai ai te kitenga o te hokonga o te hungamate ki ahau, ā, kei te whakaatu atu au, ā, e mōhio ana au he pono tēnei tuhinga, mā roto i te manaakitanga o te Ariki te Kaiwhakaora, a Ihu Karaiti, koia anō. Āmine.