1 Pērā i tāku i kī ai ki a koutou i taku reta i mua i taku wehenga i tōku kāinga, tērā au ka tuhi atu ki a koutou i tēnei wā, i tēnei wā ki te tuku kōrero e pā ana ki ngā kaupapa maha, ināianei ā, ka haere tonu taku aro ki te kaupapa o te rumakitanga mō te hunga mate, i te mea kua warea tōku hinengaro e taua kaupapa, me te pēhi kaha iho ki runga i ngā kare ā-roto, mai i taku arumanga e ōku hoariri.

2 nāku ētahi kupu whakakitenga ruarua i tuhi ki a koutou e pā ana ki te kaituhi. Kua riro mai i ahau ētahi atu tirohanga e pā ana ki tēnei take, māku e whakamana ināianei. Koia, i whakapuakina i taku reta o mua kia matua rapu i tētahi kaituhi, māna hei kaititiro, ā, hei whakarongo ki ōna ake taringa, kia tuhia e ia tētahi kōrero pono i te aroaro o te Ariki.

3 Nā, e pā ana ki tēnei take, ka uaua kia tae atu ai tētahi kaituhi i ngā wā katoa, me te mahi i ngā mahi katoa. Hei whakamāmā ake i tēnei uauatanga, e āhei ana kia whakataua tētahi kaituhi i ia wāri o te pā, tētahi e whai pukenga ki te hopu tika i ngā mīniti; ā, tukua ia kia āta tuhituhi i ngā whakahaeretanga katoa, e whakamana ana i roto i tana tuhinga tāna i kite ai ki ōna karu, me tāna i rongo ai ki ōna taringa e tuhia ana te wā, me ngā ingoa, me ērā atu mea, me te hītori o ngā whakahaere katoa; e whakahuahia ana anō hoki ngā ingoa o ngā tāngata tokotoru i reira, mehemea i reira ētahi, e taea ana te tautoko ahakoa he aha te wā e tonoa ai i ngā kōrero rā, kia whakapūmauhia e te māngai o ngā kaiwhakaatu tokorua, tokotoru rānei ngā kupu katoa.

4 Kātahi ka tukua tētahi hei kaituhi tūmatawhānui, e taea ai te tuku atu i ērā atu tuhinga ki a ia, e haria ngātahitia ana me ngā tiwhikete i runga i ā rātou ake waitohu, e whakamana ana i te pono o tā rātou tuhinga. Kātahi ka taea e te kaituhi tūmatawhānui ki te whakauru i aua kōrero rā ki roto i te pukapuka whānui o te hāhi, me ngā tiwhikete me ngā kaiwhakaatu katoa hoki, me tāna ake kōrero e mea ana kei te whakapono ia he mea pono te kōrero o runga me ngā tuhinga rā, e ai ki tana mātauranga e pā ana ki te āhuatanga noa me te whakataunga o aua tāngata e te hāhi. Ā, ina meatia tēnei i te pukapuka whānui o te hāhi, ka tapu anō taua tuhinga, ā, ka whakautua te tikanga tapu rā me te mea nei kua kitea e ōna ake karu, ā, kua rangona e ōna ake taringa, ā, kua meatia tētahi tuhinga o taua mea i te pukapuka whānui o te hāhi.

5 Tērā pea e whakaaro ana koe he mea āta whakarite tēnei whakaraupapa mea; engari tukua au kia kī atu ki a koutou ko tāna hei whakautu noa i tā te Atua e pai ai, mā te ū ki te tikanga tapu me ngā whakarite i whakamanaia ai, ā, i whakaritea ai e te Ariki i mua i te orokohanganga rā anō o te ao, mō te whakaoranga o te hunga mate e mate ai kāore ō rātou mātauranga ki te rongopai.

6 Waihoki, kei te hiahia au ki mahara koutou i te whakaaro a Hoani te Kaiwhakakite tēnei kaupapa pū anō e pā ana ki te hunga mate, i tāna whakapuakitanga atu, e kitea ai e koutou i Whakakitenga 20:12—Ā, i kite au i te hunga mate, iti mai, nui mai, e tū ana i te aroaro o te Atua; ā, ka whakatūwheratia ngā pukapuka; ā, ka huakina tētahi atu pukapuka, he pukapuka ora tērā; ā, ka whakawākia te hunga mate kia rite ki ngā mea kua tuhia i roto i ngā pukapuka, e rite ana ki ā rātou mahi.

7 Ka kite koutou i tēnei hopunga kōrero, nā, kua tūwheratia ngā pukapuka; kātahi ka huakina tētahi atu pukapuka, koia te pukapuka o te oranga; engari i whakawākia te hunga mate e rite ana ki aua mea i tuhia nei i ngā pukapuka, e rite ana ki ā rātou mahi; nō konā, kāore e kore ko ngā pukapuka kua kōrerotia ake nei ngā pukapuka e mau ana ngā tuhinga mō ā rātou mahi, ā, e hāngai ana ki ngā tuhinga kua mau nei i runga i te whenua. Ā, ko te pukapuka koia te pukapuka o te oranga te tuhinga kua mau nei i te rangi; e tino whakaae ana te tikanga ki te whakaakoranga kua whakahaua atu nei koutou i roto i te whakakitenga kei roto i te reta i tuhia nei e au i mua i taku wehenga i tōku kāinga—koia tērā i roto i ā koutou tuhinga e tuhia anōtia ai i te rangi.

8 Nā, ko te āhua o tēnei tikanga tapu kei roto nei i te mana o te tohungatanga, mā te whakakitenga a Ihu Karaiti, i reira tukuna ai ko tāu e here nei i te whenua e here anō i te rangi, ā, ko tāu e wewete ai i te whenua e wewete ai anō i te rangi. Kia pēnei kē rānei te kupu, kia rerekē te titiro ki te whakapākehātanga, ko tāu katoa e tuhi i runga i te whenua e tuhia i te rangi, ā, ko tāu katoa e kore nei e tuhi i te whenua e kore hoki e tuhia i te rangi; nā te mea mai i ngā pukapuka e whakawākia ai ō koutou hunga mate, e rite ana ki ā rātou ake mahinga, ahakoa mēnā kua tae atu rātou anō ki ngā tikanga tapu i roto i tō rātou ake propria persona, mēnā rānei nā ō rātou ake āpiha, e rite ana ki te tikanga tapu kua whakaritea nei e te Atua mō tō rātou whakaoranga i mua i te orokohanganga o te ao, e rite ana ki ngā tuhinga kua meatia nei e rātou e pā ana ki ō rātou mate.

9 Ki ētahi he tino māia te whakaakoranga e kōrerotia nei e tātou—he mana e tuhia ai, e herea ai rāneii runga i te whenua, ā, e herea nei i te rangi. Hei aha koa, i roto i ngā rautau katoa o te ao, i ngā wā i homai e te Ariki tētahi mana o te tohungatanga ki tētahi tangata mā te whakakitenga tūturu, ki ētahi huinga tāngata rānei, he rite tonu te hoatu i tēnei mana. Nā konā, ajakoa he aha tā aua tangata i mea ai i runga i te mana, i runga i te ingoa o te Ariki, ā, i meatia i runga i te pono me te ū, ā, i mau anō tētahi tuhinga tika, tētahi tuhinga pono o aua mea, i meinga ia hei ture i runga i te whenua me te rangi, ā, tē taea te whakakore, e rite ana ki ngā whakapuakitangaa te Ihowā nui. He kōrero pono tēnei. Ko wai e taea te rongo?

10 Hei āpiti anō, mō te āhuatanga, Matiu 16:18, 19: Ā, ko taku kupu anō tēnei ki a koe, Ko Pita koe, ā, i runga i tēnei kāmaka māku taku hāhi e hanga; ā, e kore rawa ngā kuaha o te ao rēwera e wikitōria. Ā, ka hoatu e au ki a koe ngā kī o te kīngitanga o te rangi: ā, ko tāu katoa e herea nei e koe i runga i te whenua e herea anōtia i te rangi; ā, ko tāu katoa e wewete nei i te whenua e wewete anō i te rangi.

11 Nā, ko te mea nui me te mea tino pai o tēnei take katoa, ā, ko te summum bonum o te kaupapa katoa e huapae mai ana ki mua i a tātou, koia ko te rapunga i ngā mana o te Tohungatanga Tapu. Kāore he uauatanga mō te tangata e hoatu ai ki a ia ēnei kī i roto i tana rapu mātauranga mō ngā meka kōrero e pā ana ki te whakaoranga o ngā tamariki a te tangata, mō te hunga mate me te hunga ora.

12 Kei konei te korōria me te hōnore, me te matenga kore me te oranga tonutanga—Ko te tikanga tapu o te rumakitanga ki te wai, kia tapokotia ai i reira e taea ai te whakaea i te ritenga o te hunga mate, e hāngai ai tētahi tikanga ki tētahi atu; kia tapokotia iho ki roto i te wai me te puta ake anō i te wai koia tētahi ritenga ki te aranga o te hunga mate me tana putanga ake i ō rātou rua tūpāpaku; koia, i whakaritea tēnei tikanga tapu kia kōtuia ai tētahi hono whakanaungatanga ki te tikanga tapu o te rumakitanga mō te hunga mate, he āhua rite tonu ki tō te hunga mate.

13 Nō konā, kua whakaritea te rumakanga e āhua rite tonu ana ki te rua tūpāpaku, ā, i whakahaua kia whakatūria ki tētahi wāhi i raro iho e huihui ai te hunga ora, kia whakaaturia atu te hunga ora me te hunga mate, ā, kia whai ritenga ngā mea katoa, ā, kia hāngai tētahi ki tētahi atu—ko te mea nō te whenua e hāngai ana ki tētahi mea nō te rangi, pērā i tā Pāora i whakapuaki ai, 1 Korinihi 15:46, 47, me te 48:

14 Ahakoa ehara te mea wairua i te tuatahi, engariko te mea māori; kātahi ko te mea wairua. Nō te whenua te tangata tuatahi; ko te tangata tuarua te Ariki nō te rangi. Ko ngā mea o te whenua, e pērā ana anō te hunga nō te whenua; ā, ko ngā mea o te rangi, e pērā ana anō te hunga nō te rangi. Ā, e pērā ana anō ngā tuhinga o tre whenua e hāngai ana ki ō koutou mate, kua tino pono te waihanga, e pērā ana anō hoki ngā tuhinga i te rangi. Nō reira tēnei, te mana hīri me te mana here, ā, i tētahi āhuatanga o te kupu, ko ngā kī o te kīngitanga, arā, ko te kī o te mātauranga.

15 Ināianei ā, e aku teina me aku tuāhine aroha, tukua au kia akiaki i a koutou, nā, koinei ngā tikanga e pā ana ki te hunga mate me te hunga ora e kore nei e tika ana ki kore e manakohia, hei mea e pā ana ki tō tātou whakaoranga. Nā te mea e tika ana kia whakaorangia rātou e whakaorangia ai tātou, pērā i tā Pāora e pā ana ki ngā tūpuna—tē taea rātou kia whakatikaina mehemea kāore i reira tātou—e kore rānei e taea tātou kia whakatikaina mehemea kāore i reira ō tātou mate.

16 Ināianei ā, kia hāngai ki te rumakitanga mō te hunga mate, māku tētahi atu hopunga kōrero a Pāora e hoatu ki a koutou, 1 Korinihi 15:29: Me aha kē atu rātou te hunga e rumakina ai mō te hunga mate, ki te kore e ara ake te hunga mate? He aha rātou e rumakina ai mō te hunga mate?

17 Hei āpiti anō, hei hononga atu ki tēnei kōrero māku e hoatu ki a koutou tētahi atu kōrero nā tētahi o ngā poropiti, i hāngai pū ai tōna karu ki te whakahokinga mai o te tohungatanga, ngā korōria e huraina mai ai i ngā rā whakamutunga, ā, i tōna āhua ake anō, i tō tēnei mea tino whakakorōria o ngā kaupapa nō te rongopai mau tonu, arā, te rumakitanga o te hunga mate; nā te mea ka kīa ake e Maraki, upoko whakamutunga, hei ngā whiti 5 me te 6: Nana, ka tuku atu au i a Irāia te poropiti i mua i te haerenga mai o te rā nui whakawehi o te Ariki: Ā, māna te ngākau o ngā tūpuna e whakatahuri ki ngā tamariki, me te ngākau o ngā tamariki ki ngā tūpuna, kei haere mai au me te patu i te whenua ki tētahi kanga.

18 Tērā pea kua tukuna e au tētahi whakapākehātanga ngāwari ake i tēnei, engari ka mātua rā tana ngāwari mō tōna take. Ka mātua rā kia mōhio, i tēnei āhuatanga, nā, ka patua te whenua ki tētahi kanga ki te kore i reira tētahi hononga i waenganui i ngā tūpuna me ngā tamariki, i runga i tētahi kaupapa, ētahi atu mea rānei—ā nana he aha taua kaupapa? Koia ko te rumakitanga mō e hunga mate. Nā te mea tē taea kia whakatikaina ake tātou ki te kore i reira rātou; tē taea hoki kia whakatikaina ake rātou ki ter kore i reira tātou. Tē taea rānei kia whakatikaina ake rātou me tātou ki te kore i reira te hunga kua mate i roto i te rongopai hoki; nā te mea e tika ana mō te whakaritetanga mō te homaitanga o te raneatanga o ngā wā, kua tīmata kē te whakarite mō taua homaitanga, kia meatia tētahi taumautanga tika katoa, me tētahi hononga tahi o ngā homaitanga, ngā kī, me ngā mana, me ngā korōria, kātahi ka huraina mai i ngā rā o Arama ā mohoā noa nei. Ā, ehara tēnei anake, engari ko aua mea kāore anō kia huraina mai mai i te orokohanganga rā anō o te ao, engari kua hunaia i te hunga matatau me te hunga mōhio, ka huraina ki ngā nohinohi, ki ngā mea ngote ū i tēnei, te homaitanga o te raneatanga o ngā wā.

19 Nā, he aha tā tātou e rongo ai i te rongopai kua riro mai nei i a tātou? He reo hari! He reo aroha mai i te rangi; me tētahi reo e ahu mai ana i te whenua; he rongo whakahari mō te hunga mate; he reo hari mō te hunga ora me te hunga mate; he rongo whakahari o te koa nui. Anō te ātaahua i runga i ngā maunga ngā waewae o te hunga e hari mai i ngā rongo whakahri o ngā mea pai, me te kī ake ki a Hīona: Nana, e kīngi ana tō koutou Atua! Pērā i nga tōmairanga o Kāmera, ka pērā anō te hekenga iho o te mātauranga a te Atua ki runga ki a rātou!

20 Hei āpiti anō, he aha tā tātou e rongo ai? Ko ngā rongo whakahari mai i Kamora! Ko Moronai, tētahi anahera mai i te rangi, e whakapuakina ana te whakatutukitanga o tā ngā poropiti—te pukapuka e huraina mai ai. He reo nō te Ariki i te koraha o Wheiete, takiwā o Heneka, e whakapuakina ana kia whakaaturia e ngā kaiwhakaatu tokotoru mō te pukapuka! Te reo o Mikaera i runga i ngā tahatika o te Hakuahana, e hopu ana i te rēwera i tōna putanga mai anō nei he anahera nō te māramatanga! Te reo o Pita, Hēmi me Hoani i te koraha i waenganui o Hāmoni, te takiwā o Hakuahana, me Kourawira, takiwā o Puruma, i runga i te awa o Hakuahana, e whakapuakina ana i a rātou ngā kī o te kīngitanga, me te homaitanga o te raneatanga o ngā wā!

21 Hei āpiti anō, ko te reo o te Atua i roto i tētahi ruma o te koroua Matua Witima, i Wheiete, takiwā o Heneka, ā, hei ngā wā maha, hei ngā wāhi maha i roto i ngā hāereere me ngā taumahatangao tēnei Hāhi o Ihu Karaiti o te Hunga Tapu i ngā Rā o Muri Nei! Ko te reo o Mikaera, te tino anahera nui; te reo o Kaperiera, me Rāpaera, me ngā anahera maha, mai i a Mikaera, Arama rānei heke iho ana ki tēnei wā tonu, e whakapuakina katoatia e rātou tō rātou homaitanga, ō rātou tika, ō rātou kī, ō rātou hōnore, ō rātou rangatiratanga me ō rātou korōria, me te mana o tō rātou tohungatanga; e tuku ana raina i runga raina, tikanga i runga tikanga; he iti ki konei, he iti ki konā; e whakaaio ana i a tātou mā te mau mai i ērā mea e heke mai ai, e tūtohia ana tō tātou tūmanako!

22 E ngā teina, me kore rānei tātou e haere tonu atu i tēnei kaupapa nui? Haere whakamua kaua e whakamuri. Kia māia, teina mā; haere tonu, haere tonu ki te wikitōria! Tukua ō koutou ngākau kia hari, ā, kia tino hari rawa atu. Tukua te whenua kia pakaru iho mai i runga i te reo waiata. Tukua te hunga mate kia kōrero mai i ngā oriori o te whakawhetai mutunga kore ki a Kīngi Manuera, kua whakamanaia nei, i mua i te ao, tērā e whakaāhei ai i a tātou kia hokona rātou i tō rātou whareherehere; nā te mea ka haere herekore atu ngā herehere.

23 Tukua ngā maunga kia hāmama i te koa, me koutou e ngā raorao kia karanga kaha; me koutou e ngā moana me ngā whenua maroke me whakahua ake e pā ana ki tō koutou Kīngi Ora Tonu! Me koutou e ngā awa, e ngā awa ririki, e ngā manga, rere tonu iho i runga i te koa. Tukua ngā ngahere me ngā rākau katoa o te whira kia tuku whakamoemiti ki te Ariki; me koutou e ngā kāmaka tūturu e tangi iho i runga i te hari! Ā, tukua te rā, te marama, me ngā whetū takiata kia waiata ngātahi, ā, tukua ngā tama katoa a te Atua kia hāmama i te koa! Ā, tukua ngā mea ora tonu kua hangaia nei kia whakapuakina tōna ingoa mō āke tonu atu! Ā, ka kōrerohia ake anō, anō te korōria o te reo e rangona ai mai i te rangi, e whakapuakina ana i ō tātou taringa, te korōria, me te whakaoranga, me te hōnore, me te oranga mutunga kore, me te oranga tonutanga; ngā kīngitanga, ngā rangatiratanga, me ngā mana!

24 Nana, kua tae mai te rangi nui o te Ariki; ā, ko wai e noho mai ai i te rā o tana haerenga mai, ā, ko wai e taea te tū ina puta mai ai ia? Nā te mea he rite ia ki te ahi o te kaiwhakaparuhi, ā, e rite ana ki te hopi a te kaihoroi; ā, ka noho ia anō nei he kaiwhakaparuhi, he kaitahi para hiriwā, ā, ka whakamākia ngā tama a Rewi, me te horoia ērā anō ko te kōura me te hiriwā, kia tāpaea e rātou tētahi tāpaenga i runga i te tika. Nō reira tukua tātou, hei hāhi, hei iwi hoki, ā, hei Hunga Tapu i ngā Rā o Muri Nei, kia tāpaea atu ki te Ariki i tētahi tāpaenga i runga i te tika; ā, tukua tātou kia hoatu atu i roto i tōna temepara tapu, ina oti, tētahi pukapuka e mau ana ngā tuhinga o ō tātou mate, e tika ana kia whakaaehia e te katoa.

25 Teina mā, he maha aku kōrero ki a koutou i runga i tēnei kaupapa; engari ka whakakopanihia ināianei mō tēnei wā, ā, ka hono tonu tēnei kaupapa ā tōna wā. Ko au tēnei, tā koutou pononga whakaiti me tō koutou hoa pono,