1 He pono tāku e mea atu nei ki a koutou, e aku hoa, kei te hoatu e au he kupu tohutohu ki a koutou, me tētahi whakahaunga, e pā ana ki ngā rawa katoa nō te ritenga kua whakahaua kia whakaritea, ā, kia whakapūmauhia, hei ritenga kotahi, ā, hei ritenga mau tonu mō te painga o taku hāhi, ā, mō te whakaoranga o te tangata tae noa ki taku haerenga mai—

2 E tāpirihia atu ana anō ki taua tikanga taku kupu whakaari e kore nei e taea te whakapeau kē, te whakarerekē rānei, nā, ki te mea ka ū te hunga kua whakahaua nei e au ka manaakitia rātou ki ngā manaakitanga tinitini noa atu;

3 Engari ki te mea ka kore rātou e ū ka whakatata atu te kanga ki a rātou.

4 Nō reira, ki te mea kāore ētahi o aku pononga i pupuri nei i te whakahaunga, engari kua whatia te kawenata mā runga i te pūhaehae, me ngā kupu tinihanga, kua kangaia rātou e au ki tētahi kanga nanakia rawa atu.

5 Nā te mea au, te Ariki, kua whakapuakina i roto i taku ngākau, nā, ki te mea ka kitea tētahi tangata nō te ritenga i runga i te hara, kia pēnei kē rānei ngā kupu, ka whatia te kawenata kua mauherea nei koutou, ka kangaia ia i roto i tana oranga, ā, ka takahia iho ia e tāku e pai ai;

6 Nā te mea, me kore au, te Ariki e whakatoingia i roto i ēnei mea—

7 Ā, ka pēnei katoa kia kaua te hunga harakore i roto i a koutou e whakahēngia tahitia ki te hunga haututū; ā, kia kaua anō te hunga hē i waenganui i a koutou e mawhiti atu; nā te mea kua whakaari au, te Ariki, tētahi karauna korōria ki a koutou ki taku ringa matau.

8 Nō reira, ki te mea kua kitea ake he kaihara koutou, tē taea e koutou te mawhiti atu i te riri i roto i ō koutou oranga.

9 Ki te mea kua hātepea atu koutou i te hara, tē taea te mawhiti atu i ngā pakinga a Hātana tae noa ki te rā o te hokonga.

10 Ināianei ā, kei te hoatu ki a koutou he mana mai i tēnei hāora pū anō, nā, mehemea ka kitea ake tētahi kaihara i waenganui i a koutou, nō te ritenga, kātahi ka kore ia e rīpenetā i tana kino, nā, mā koutou ia e tuku atu ki ngā pakinga a Hātana; ā, kua kore ōna mana ki te kukume iho i te kino ki runga ki a koutou.

11 He whai mātauranga i roto i ahau; nō reira, kei te hoatu e au tētahi whakahaunga ki a koutou, kia whakaritea koutou anō me te whakatau atu i ngā tūranga kaitiaki ki tēnā tangata, ki tēnā tangata;

12 Kia taea ai e tēnā tangata, e tēnā tangata, te tuku pūrongo e pā ana ki tana mahi kaitiaki kua whakataua atu nei ki a ia.

13 Nā te mea e tika pū ana māku, mā te Ariki, ngā tāngata katoa e tuku pūrongo mai ki ahau, anō he kaitiaki i runga i ngā manaakitanga o te whenua, ngā mea nāku i hanga, ā, nāku i whakarite mō ōku katoa i hanga ai.

14 Nāku, nā te Ariki ngā rangi i toro, ā, te whenua i hanga, ngā mahi pū o ōku ringa; ā, nāku katoa ngā mea kei roto rā.

15 Ā, ko Tāku hoki he tuku oranga ki aku hunga tapu, nā te mea nāku ngā mea katoa.

16 Engari e tika pū ana kia pēnātia i runga i tōku ake āhua; ā nana, koinei te āhua i whakapuakina ake e au, e te Ariki hei tuku atu ki aku hunga tapu, nā, ka whakateiteingia te hunga rawakore, mā konā ka whakapāpakuhia te hunga whairawa.

17 Nā te mea kua kī te ao, ā, e rawaka ana ōna rawa; āe rā, nāku ngā mea katoa i whakarite, ā, kua tukuna atu ki ngā tamariki a te tangata kia tū ai hei kaiwhakariterite ki a rātou anō.

18 Nō reira, mehemea ka tango tētahi tangata i te raneatanga o tāku i hanga ai, ā, ki te kore ia e wāwahi atu i te wāhi ki a ia, e rite ana ki te ture o taku rongopai, ki te hunga rawakore me te hunga hapa, māna, me te hunga whakarihariha, e hiki ake i ōna karu i te ao rēwera, e whakamamaetia ana.

19 Ināianei ā, he pono tāku e mea atu nei ki a koutou, e pā ana ki ngā rawa o te ritenga—

20 Tukua kia whakataua atu ki taku pononga a Hirini Rikitana te wāhi e noho nei ia i tēnei wā, me te whenua o te tanarihi hei tiaki māna, hei oranga māna i a ia e mahi ana i roto i taku māra wāina, pērā pū anō i tāku e pai ai, ina whakahaua ia e ahau.

21 Ā, tukua kia meatia ngā mea katoa kia rite ki te kaunihera o te ritenga, me te kupu whakaae kotahi, te reo rānei o te ritenga, e noho nei i te whenua o Katarana.

22 Ā, māku, mā te Ariki tēnei mana kaitiaki me tēnei manaakitanga e whakatau iho ki runga ki taku pononga a Hirini Rikitana hei manaakitanga ki runga ki a ia, ā, me ōna uri whai muri i a ia;

23 Ā, māku e whakarea ngā manaakitanga ki runga ki a ia, mehemea ka noho whakaiti ia i tōku aroaro.

24 Hei āpiti anō, tukua kia whakataua atu ki taku pononga a Mātini Hārihi, hei mahi kaitiaki māna, te whenua i rapua ai e taku pononga a Hōani Teonetana mō tana taonga tuku iho o mua, mōna, mō ōna uri whai muri i a ia;

25 Ā, ki te mea ka pono ia, māku āna manaakitanga e whakarea ki runga ki a ia me ana uri whai muri i a ia.

26 Ā, tukua taku pononga a Mātini Hārihi kia whakapau atu i ana moni ki te whakapuakitanga i aku kupu, e rite ana ki ngā tohutohu a taku pononga a Hōhepa Mete, Tama.

27 Hei āpiti anō, tukua taku pononga a Whererika T. Wiremu kia noho tonu ki te wāhi e noho nei ia i tēnei wā.

28 Ā, tukua taku pononga a Oriwa Kautere kia mau i a ia te whenua e hono atu ana ki te whare, arā, te mea mō te tari pūreretā, koia ko te whenua nama tahi, me te whenua anō e noho ana tōna matua ki reira.

29 Ā, tukua aku pononga a Whererika T. Wiremu rāua ko Oriwa Kautere kia riro i a rāua te tari pūreretā me ngā mea katoa kei roto rā.

30 Ā, koinei te tūranga kaitiaki e whakataua atu nei ki a rāua.

31 Ā, ki te mea ka pono rāua, nana māku rāua e manaaki, ā, ka whakarea i ngā manaakitanga ki runga i a rāua.

32 Ā, koinei te tīmatanga o te mahi kaitiaki kua whakataua atu nei e au ki a rāua, mā rāua me ō rāua uri whai muri i a rāua.

33 Ā, ki te mea ka pono rātou, māku e whakarea ngā manaakitanga ki runga ki a rāua me ō rāua uri whai muri i a rāua.

34 Hei āpiti anō, tukua taku pononga a Hōani Teonetana kia riro i a ia te whare e noho nei ia, me te taonga tuku iho, ngā mea katoa hāunga ko te whenua kua rāhuitia mō te hanganga ake o aku whare, e hāngai atu ana ki tō rātou taonga tuku iho, me ērā whenua kua whakaingoatia mō taku pononga a Oriwa Kautere.

35 Ā, mehemea ka pono ia, māku ana manaakitanga e whakarea ki runga ki a ia.

36 Ā, ko tāku e pai ai kia hoko atu ia i ngā whenua kua whakatakotoria atu mō te hanganga ake o te pā mō aku hunga tapu, ki te mea ka whakamōhiotia ki a ia e te reo o te Wairua, ā, e rite ana ki te kaunihera o te ritenga, me te reo o te ritenga.

37 Ā, koinei te tīmatanga o ngā mahi kaitiaki kua whakataua atu nei ki a ia, hei manaakitanga ki a ia me ana uri whai muri i a ia.

38 Ā, ki te mea ka pono ia, māku ngā manaakitanga tini e whakarea ki runga ki a ia.

39 Hei āpiti anō, tukua taku pononga a Nuera K. Witini kia whakataua atu ki a ia ngā whare me te whenua o te wāhi e noho nei ia i tēnei wā, me te whenua me te whare kei reira te toa hokohoko taonga e tū ana, me te whenua hoki kei te kokonga ki te tonga o te toa hokohoko, me te whenua hoki kei reira te whare ngārahu e tū ana.

40 Ā, kua whakataua atu ēnei katoa ki taku pononga a Nuera K. Witini hei tūranga kaitiaki māna, hei manaakitanga mōna rātou ko ana uri whai muri i a ia, hei painga mō te toa hokohoko o taku ritenga kua whakapūmauhia mōku i te whenua o Katarana.

41 Āe rā, koinei te tūranga kaitiaki kua whakataua atu e au ki taku pononga a N. K. Witini, koia ko tēnei toa hokohoko katoa, koia anō hei kaiwhakariterite, me ana uri whai muri i a ia.

42 Ā, ki te mea ka pono ia ki te pupuri i aku whakahaunga, kua hoatu nei e au ki a ia, māku ngā manaakitanga e whakarea ki runga ki a ia me ana uri whai muri i a ia, arā, ngā manaakitanga tini ngerongero.

43 Hei āpiti anō, tukua taku pononga a Hōhepa Mete, Tama., kia whakataua atu ki a ia te whenua kua whakatakotoria atu mō te hanganga ake o tōku whare, koia he whā tekau ngā rora te roa, ā, he tekau mā rua rora te whānui, me te taonga tuku iho anō hoki e noho nei tana matua i tēnei wā;

44 Ā, koinei te tīmatanga o ngā mahi kaitiaki kua whakataua atu e au ki a ia, hei manaakitanga ki runga ki a ia me tōna matua.

45 Nana rā, kua rāhuitia e au tētahi taonga tuku iho mō tana matua, hei oranga mōna; nō reira ka huia ngātahitia atu ia me te whare o taku pononga a Hōhepa Mete, Tama.

46 Ā, māku ngā manaakitanga e whakarea ki runga ki te whare o taku pononga a Hōhepa Mete, Tama., ki te mea ka pono ia, he manaakitanga tini ngerongero pū anō.

47 Ināianei ā, kei te hoatu e au tētahi whakahaunga e pā ana ki Hīona, kia kore ai koutou e mauheretia tonutia hei ritenga kotahi ki ō koutou tuakana ki Hīona, i runga anake i tēnei āhua—

48 Whai muri i tā koutou whakapūmautanga, ka karangatia koutou ko te Ritenga o te Kotahitanga o Hīona, te Pā o Katarana. Ā, ko ō koutou tuakana, ina oti te whakarite, ka karangatia nei ko te Ritenga o te Kotahitanga o te Pā o Hīona.

49 Ā, ka whakaritea rātou i tōna ake ingoa, i ō rāua ake ingoa; ā, ka mahi hoki rāua i ā rāua mahi i runga hoki i tōna ake ingoa, ā, i ō rāua ake ingoa;

50 Ā, māu e mahi i ō mahi i runga i tō ake ingoa, ā, i ō koutou ake ingoa hoki.

51 Ā, koinei tāku i whakahau atu nei kia mahia hei whakaoranga mō koutou, hei whakaoranga anō hoki mō rātou, hei whakautu mō tā rātou āinga atu me ngā mea e kainamu mai ana.

52 Ko ngā kawenata e whatia iho ana mā roto i te hara, me te pūhaehae me ngā kupu tinihanga—

53 Nō reira, kua whakakorea koutou ko ō koutou tuākana hei mea nō te ritenga o te kotahitanga, kia kore ai koutou e mauheretia i tēnei hāora pū anō ki a rātou, i runga i tēnei whakaaro, pērā i tāku i kī ai, mā runga anake i te pūtea taurewa e whakaaehia e tēnei ritenga i roto i te huihuinga, e rite ana ki ō mea e taea ana, ā, e te reo tōtika o te kaunihera.

54 Hei āpiti anō, kei te hoatu e au tētahi whakahaunga ki a koutou e pā ana ki ō koutou tūranga kaitiaki kua whakataua atu nei ki a koutou.

55 Nana, nōku ēnei whenua katoa, me i kore kua moumou noa iho tō koutou whakapono, ā, ka kitea koutou hei hunga arerorua, ā, kua whatia ngā kawenata i meatia nei e koutou ki ahau;

56 Ā, mehemea nōku ngā whenua, koia he kaitiaki koutou; me i kore ehara koutou i te kaitiaki.

57 Engari, he pono tāku e mea atu nei ki a koutou, kua whakataua atu nei koutou e ahau hei kaitiaki mō runga i tōku whare, āe rā he tino kaitiaki.

58 Ā, mō tēnei take kua whakahaua atu nei koutou e ahau kia whakariterite i a koutou anō, kia tāngia pū anō i aku kupu, te raneatanga o aku karaipiture, ngā whakakitenga kua hoatu nei e au ki a koutou, ā, māku, a muri ake nei, e hoatu ki a koutou i tētahi wā, i tētahi wā—

59 Hei hanga i taku hāhi me taku kīngitanga ki runga i te whenua, ā, kia whakaritea taku iwi mō te wā e noho tahi au me rātou, ā, kua tata mai.

60 Ā, me whakarite e koutou tētahi wāhi hei wharepūtea mō koutou, ā, ka whakatapua tēnā ki tōku ingoa.

61 Ā, ka kōwhiria tētahi i waenganui i a koutou hei tiaki i te wharepūtea, ā, ka whakamanaia ia ki tēnei manaakitanga.

62 Ā, ka whakamaua tētahi hīri ki runga i te wharepūtea, ā, ka kawea atu ngā mea tapu katoa ki roto i te wharepūtea; ā, kua kore tētahi i waenganui i a koutou e kī ake nōna tērā, nōna rānei tētahi o ōna wāhi, nā te mea ka meinga nō koutou tahi.

63 Ā, ka hoatu ki a koutou i tēnei hāora pū anō; ināianei ā me whai atu, e haere atu ai koutou me te whakatīnana i ō koutou tūranga kaitiaki kua whakataua atu nei e au ki a koutou, hāunga ngā mea tapu, kia tāngia ēnei mea tapu kua kōrerotia ake nei e au.

64 Ā, ka rau atu ngā hua o ngā mea tapu ki roto i te wharepūtea, ā, ka hīria; ā, e kore rawa e whakamahia, e tangohia atu rānei i te wharepūtea e tētahi, e kore ranei te hīri e whakapiria atu ki reira e wetekina atu, mā te reo anake o te ritenga, mā te whakahau rānei.

65 Ā, pēnei tā koutou tiaki i ngā hua o ngā mea tapu i roto i te wharepūtea, mō ngā take tapu.

66 Ā, ka huaina tēnei ko te wharepūtea tapu a te Ariki; ā, ka mau tonu tētahi hīri ki runga rā kia noho tapu tonu, ā, kia whakatapua ki te Ariki.

67 Hei āpiti anō, ka whakaritea tētahi atu wharepūtea, ā, ka kōwhiria tētahi kaitiaki pūtea hei tiaki i te wharepūtea, ā, ka whakapiria atu tētahi hīri ki runga rā;

68 Ā, ko ngā moni katoa e whiwhi ai koutou i roto i ā koutou mahi kaitiaki, mā runga i te whakatika ake i ngā whenua kua whakataua atu nei ki a koutou, nō ngā whare, nō ngā whenua rānei, nō ngā kau rānei, nō ngā mea katoa rānei hāunga ngā tuhituhinga tapu, kua rāhuitia atu mōku anō mō ngā take tapu, ka makaia wawetia ki roto ki te wharepūtea e rite ana ki te wawe e whiwhi ai aua mōni, ā-rau, ā-rima tekau rānei, ā-rua tekau rānei, ā-tekau rānei, ā-rima rānei.

69 Kia pēnei kē rānei te kupu, ki te whiwhi tētahi tangata i roto i a koutou ki te rima tāra tukua ia kia makaia atu ērā ki roto i te wharepūtea; ki te pupuri rānei ia i te tekau, te rua tekau rānei, te rima tekau rānei, te kotahi rau rānei, tukua ia kia pēneitia;

70 Ā, kaua e tukua tētahi i waenganui i a koutou kia kī ake nōna; nā te mea kua kore e kīa ake nōna tērā, nōna rānei tētahi o ōna wāhi.

71 Ā, e kore rawa tētahi wāhi ōna e whakamahia, e tangohia atu rānei i te wharepūtea, mā runga anake i te reo o te kupu whakaae o te ritenga.

72 Ā, koinei te reo me te kupu whakaae o te ritenga—kia kī ake tētahi kei waenganui i a koutou ki te kaitiaki pūtea: Me homai e koe ki ahau tētahi mōni hei āwhina i a au i taku mahi kaitiaki—

73 Mehemea ko te rima tāra, mehemea ka tekau tāra rānei, rua tekau rānei, rima tekau rānei, kotahi rau rānei, ka hoatu e te kaitiaki pūtea ngā moni e hiahiatia ana e tika ana hei āwhina i a ia i roto i tana mahi kaitiaki—

74 Tae noa ki te wā e kitea ia hei kaihara, ā, ka whakakitea rānei i te aroaro o te kaunihera o te ritenga i runga i te mārama kua kōtiti kē ia, ā, he kaitiaki kuare hoki.

75 Engari mehemea ka ū tonu ia, ā, e pono ana, ā, he kaitiaki whaiwhakaaro ia, koinei tana tohu ki te kaitiaki pūtea kia kaua e kaiponuhia aua moni e te kaitiaki pūtea.

76 Engari ki te hara, ka noho iho te kaitiaki pūtea ki te aroaro o te kaunihera me te reo o te ritenga.

77 Ā, mehemea ka kitea te kaitiaki pūtea hei mea kōtiti, ā, hei mea kuare, ka noho iho ia ki te aroaro o te kaunihera me te reo o te ritenga, ā, ka tangohia atu i tōna tūranga, kātahi ka kōwhiria tētahi atu hei kaiwhakakapi mōna.

78 Hei āpiti anō, he pono tāku e mea atu nei ki a koutou, e pā ana ki ā koutou nama—nana ko tāku e pai ai kia utua e koutou ā koutou nama katoa.

79 Ā, ko tāku e pai ai kia whakaiti koutou i a koutou anō i taku aroaro, ā, me te hopu i tēnei manaakitanga mā runga i tā koutou ū me tō koutou whakaiti me tā koutou inoi whakapono.

80 Ā, ki te mea ka ū tonu, ā, ka whakaiti koutou, me te ū tonu anō ki te inoi whakapono, nana, māku ngā ngākau o te hunga e nama ana koutou e whakangāwari, tae noa atu ki te wā e tuku mea atu ki a koutou hei whakaputa i a koutou.

81 Nō reira me tuhi wawe atu ki Niu Ioka, ā, me tuhi atu e rite ana ki ērā e āta kōrerohia ai i runga i te Wairua; ā, māku ngā ngākau o te hunga e noho nama ana koutou e whakangāwari, kia tangohia atu i ō rātou hinengaro te hiahia kia kukume iho i te whakamamaetanga ki runga i a koutou.

82 Ā, ki te mea ka whakaiti koutou, ā, ka pono koutou me te karanga ake ki taku ingoa, nana, ka hoatu e au te wikitōria ki a koutou.

83 Kei te tuku whakaari atu au ki a koutou, nā, ka whakaputaina koutou i te hereheretanga mō tēnei wā kotahi.

84 Ki te mea ka waimārie koutou kia riro he pūtea tārewa ā-rau, ā-mano, tae noa pū anō kia nui rawa tō koutou pūtea tārewa ki te whakaputa i a koutou anō i te hereheretanga, nō koutou te waimārie.

85 Me te oati kia tuku i ō koutou whenua kua purua iho e au ki roto i ō koutou ringaringa, mō tēnei wā kotahi, mā te hoatu i ō koutou ingoa i runga i te kupu whakaae, i tētahi atu āhua e rite tonu ana, pērā ki te mea e pai ana ki a koutou.

86 Kei te hoatu tēnei waimārie e au ki a koutou, mō tēnei wā kotahi; ā nana, mehemea ka mahi koutou i ngā mea kua whakatakotoria iho i mua i a koutou, e rite ana ki aku whakahaunga, nōku katoa ēnei mea katoa, ā, he kaitiaki koutou, ā, e kore te māhita e tuku kia pokaina tana whare. Koia anō.