1 He pono, pēnei tā te Ariki ki a koe e taku pononga a Hōhepa, nā, i te mea kua hiahiatia kia mōhio ai, ā, kia mārama ai i taku ringa, tā te Ariki, i whakaae mai ki aku pononga a Aperahama, a Ihaka, rātou ko Hākopa, pērā i a Mohi, Rāwiri, rātou ko Horomona, aku pononga, e pā ana ki te tikanga me te whakaakoranga o ngā hoa wāhine tokomaha me ngā hoa wāhine tūtūā tokomaha—

2 Nana, titiro, ko Au te Ariki tō Atua, ā, ka whakautu ki a koe e pā ana ki tēnei take.

3 Nō reira, whakaritea tō ngākau kia whiwhi, ā, kia ngohengohe ki ngā tohutohu whano au ka hoatu ki a koe; nā te mea me ngohengohe anō te hunga katoa e whakakitea atu ai tēnei ture ki a rātou.

4 Nana rā, kei te whakakite atu au ki a koe tētahi kawenata hou mau tonu; ā, ki te kore e puritia e koe taua kawenata, ka pāpunitia koe; nā te mea e kore e taea e tētahi te whakaparahako i te kawenata kātahi ka tukua kia tomo ki roto ki tōku korōria.

5 Nā te mea ka puritia te ture e te hunga katoa i a rātou tētahi manaakitanga i aku ringaringa, me ngā āhuatanga o reira, pērā i ngā mea kua whakapūmauhia i mua i te orokohanganga rā anō o te ao.

6 Ā, e rite ana ki te kawenata hou mau tonu, he mea whakapūmauhia mō te raneatanga o tōku korōria; ā, ko te tangata e whiwhi ai i tētahi raneatanga o reira e tika ana māna kia pupuri i te ture, ki te kore ka pāpunihia ia, e ai tā te Ariki te Atua.

7 Ā, he pono tāku e mea atu nei ki a koe, nā, koinei ngā tikanga o tēnei ture: Ko ngā kawenata, ngā kirimana, ngā herenga, ngā haepapa, ngā oati, ngā kī taurangi, ngā meatanga, ngā hononga, ngā whanaungatanga, ngā whakaaro rānei, kāore i meatia ai, i tomokia ai rānei, ā, e hīria rānei e te Wairua Tapu o te whakaari, o te mea kua whakawahia, mō tēnei wā, ā, mō te mau tonu katoa hoki, ā, ko taua mea tino tapu rawa, mā te whakakitenga me te whakahaunga mā roto i āku i whakawahia ai, kua whakatūria e au i runga i te whenua kia mau ai tēnei mana (ā, kua whakataua ki taku pononga a Hōhepa kia mau ai tēnei mana i ngā rā whakamutunga, ā, kua kore e waiho mā te mea kotahi anake i runga i te whenua hei pupuri i tēnei mana me ngā kī o te tohungatanga), kua kore e whai hua, tapu, kaha rānei i roto, i muri hoki i te whakaaratanga i te mate; nā te mea ka mutu ngā kirimana katoa kīhai i meatia i runga i tēnei tikanga i te wā e mate ai te tangata.

8 Nana, he whare tika tōku whare, e ai tā te Ariki te Atua, ehara i te whare whakararuraru.

9 Ka whakaae rānei au ki tētahi tāpaenga, e ai tā te Ariki, kīhai i meatia i runga i tōku ingoa?

10 Ka whiwhi rānei ahau i ō ringaringa ērā mea kīhai au i whakatau?

11 Ā, ka whakataua rānei e au ki a koutou, e ai tā te Ariki, ki te kore e meatia e te ture, pērā i tā māua ko taku Matua i whakamana ai i a koutou, i mua i te orokohanganga rā anō o te ao?

12 Ko au te Ariki tō koutou Atua; ā, e hoatu ana e au tēnei whakahaunga ki a koutou—nā, e kore tētahi tangata e haere ake ki te Matua ki te kore ahau, ki te kore rānei taku kupu, koia taku ture, e ai tā te Ariki.

13 Ā, ko ngā mea katoa kei roto i te ao, ahakoa mehemea kua whakamanaia e te tangata, e ngā torōna, e ngā kīngitanga, e ngā mana rānei, e ngā mea whai ingoa rānei, ahakoa he aha aua mea, ehara noa nāku, ehara rānei nā taku kupu, e ai tā te Ariki, ka turakina iho, ā, e kore e mau tonu i muri i te matenga o te tangata, i te wā rānei o te whakaaratanga ake, i muri iho rānei, e ai tā te Ariki tō koutou Atua.

14 Nā te mea nāku ngā mea katoa e toe ana; ā, ka whakangāueuehia, ā, ka whakangaromia ngā mea katoa ehara i ahau.

15 Nō reira, ki te mārena tētahi tāne i tētahi wahine i te ao, engari ki te kore e mārenatia rāua e ahau, e taku kupu rānei, kātahi ka kawenata te tāne ki te wahine mō te wā e noho ana rāua i te ao, kāore e mana ana tō rāua mārenatanga ina mate rāua, ā, ina puta rāua i te ao; nō reira, kāore e herea ana rāua e tētahi ture ina puta rāua i te ao nei.

16 Nō reira, ina puta atu rāua i te ao kāore ō rāua mārenatanga, kāore rānei e taumauhia atu; engari ka whakataua hei anahera i te rangi, ko aua anahera he pononga minita, hei minita mō te hunga e tika ana kia nui noa atu te korōria mau tonu.

17 Nā te mea kīhai aua anahera i pupuri i taku ture; nō reira, tē taea te mea kia nui ake, engari ka noho takitahi tonu, kāore ōna whakateiteitanga, i tō rātou āhuatanga whakaora, ki te mau tonu katoa; ā, atu i reira ehara rātou i te atua, engari he anahera nā te Atua mō āke tonu atu.

18 Hei āpiti atu anō, he pono tāku e mea atu nei ki a koutou, ki te mārena tētahi tāne i tētahi wahine, me te mahi i tētahi kawenata ki a ia mō ngā wā me te mau tonu katoa, mehemea ehara nāku, nā taua kupu rānei taua kawenata, koia taku ture, ā, ki te kore e hīria e te Wairua Tapu o te whakaari, mā roto i a ia te mea nāku noa nei i whakawahi, ā, nāku nei i whakatau ki tēnei mana, kāore e whai mana ana ina puta rāua i te ao nei, nā te mea kīhai i whakahonoa rāua e ahau, e ai tā te Ariki, kīhai rānei e taku kupu; ina puta atu rāua i te ao e kore e taea te whakawhiwhia ki reira, nā te mea ka whakataua ngā atua me ngā anahera ki reira, tē taea e rātou te hipa atu i a rātou; nō reira, tē taea e rātou te whiwhi i taku korōria; nā te mea he whare tika tōku whare, e ai tā te Ariki.

19 Hei āpiti anō, he pono tāku e mea atu nei ki a koutou, ki te mārena tētahi tāne ki tētahi wahine i runga i taku kupu, koia taku ture, ā, i runga i taku kawenata hou mau tonu, ā, kua hīria ake ki a rātou e te Wairua Tapu o te whakaari, e te mea i whakawahia ai, ki te hunga nāku tēnei mana i whakatau atu me ngā kī o tēnei tohungatanga; ā, ka kīa atu ki a rātou—Ka ara mai koutou i te aranga tuatahi; ā, mehemea hei muri i te aranga tuatahi, hei te aranga e whai muri iho; ā, ka whiwhi i ngā torōna, ngā kīngitanga, ngā kīngitanga iti, ngā mana, ngā rangatiratanga, ngā teiteitanga me ngā hōhonutanga katoa—kātahi ka tuhia ki roto i te Pukapuka Oranga a te Reme, kia kaua ia e mahi kōhuru mā konā whakaheke i ngā toto hara kore, ā, ki te puritia taku kawenata, kia kaua e mahi kōhuru mā konā whakaheke i ngā toto hara kore, ka meatia ki a rātou i roto i ngā mea katoa ahakoa he aha te mea i whakatau ai taku pononga ki runga ki a rātou, i ngā wā, ā, i roto i te mau tonu katoa; ā, ka mana rawa ina puta atu rāua i te ao; ā, ka hipa atu rāua i ngā anahera, me ngā atua, kua whakataua ki reira, ki tō rātou whakateiteitanga me tō rātou korōria i roto i ngā mea katoa, pērā i ngā mea kua hīria ake ki runga ki ō rātou māhunga, ka ai taua korōria hei raneatanga, ā, e hono tonu ai i ngā purapura mō āke tonu atu.

20 Ko reira rāua e meinga ai hei atua, nā te mea kāore ō rāua mutunga; nō reira ka ahu mai rāua i te mutunga kore ki te mutunga kore, nā te mea ka hono tonu rāua; kātahi ka eke rāua ki runga i te katoa, nā te mea kei raro ngā mea katoa i a rāua. Ko reira rāua e meinga ai hei atua, nā te mea kei a rāua te mana katoa, ā, kei raro ngā anahera i tō rāua mana.

21 He pono, he pono, tāku e mea atu nei ki a koutou, ki te kore e puritia e koutou taku ture tē taea te whiwhi i tēnei korōria.

22 Nā te mea he kūiti te kuaha, ā, he whāiti te huarahi e ārahina ana ki te whakateiteitanga me ngā oranga e toitū tonu ai, ā, he ruarua te hunga e kitea ai i reira, nā te mea kāore koutou e whiwhi i ahau i roto i te ao, kāore rānei koutou e mōhio ana ki ahau.

23 Engari ki te whiwhi koutou i ahau i roto i te ao, kātahi koutou ka mōhio ki ahau, ā, ka whiwhi i tō koutou whakateiteitanga; nā, ko te wāhi kei reira au, kei reira hoki koutou.

24 Koinei ngā oranga tonutanga—kia mōhio ai ki te Atua whai mātauranga pono kotahi anake, ki a Ihu Karaiti hoki, kua tonoa mai nei e ia. Ko au ia. Nō reira, me whiwhi koutou i taku ture.

25 He whānui te kuaha, ā, he nui noa atu te ara e ārahina atu ana ki ngā matenga; ā, he tokomaha rawa te hunga e tomo atu ai ki reira, nā te mea kāore rātou e whiwhi i ahau, kāore hoki rātou e pupuri nei i taku ture.

26 He pono, he pono, tāku e mea atu nei ki a koutou, ki te mārena tētahi tāne ki tētahi wahine, kātahi ka hīria e te Wairua Tapu o te whakaari, e rite ana ki taku whakataunga, kātahi ka meatia e ia tētahi hara, ka takahia rānei e ia te kawenata hou mau tonu, ngā āhua katoa o te hara, ā, ki te kore e mahi kōhuru mā konā whakaheke i ngā toto hara kore, heoi ka ara mai i te aranga tuatahi, me te tomo atu ki roto ki te whakateiteitanga; engari ka whakangaromia rāua i te kikokiko, ā, ka tukuna atu ki ngā whakawainga a Hātana tae atu ki te rā o te hokonga, e ai tā te Ariki te Atua.

27 Ko te kohukohu ki te Wairua Tapu e kore rawa e murua i tēnei ao, i waho rānei i tēnei ao, arā, ko te mahi kōhuru mā konā whakaheke i ngā toto hara kore, me te whakaae ki taku matenga, whai muri iho i tō whiwhi i te kawenata hou mau tonu, e ai tā te Ariki te Atua; ā, ko te tangata e kore nei e pupuri i tēnei ture e kore rawa e āhei ki te tomo atu ki roto ki tōku korōria, engari ka pāpunitia, e ai tā te Ariki.

28 Ko au te Ariki tōu Atua, ā, ka hoatu e ahau ki a koe te ture o taku Tohungatanga Tapu, pērā i te mea i whakamanaia ai e māua ko taku Matua i mua i te orokohanganga rā anō o te ao.

29 I whiwhi a Aperahama i ngā mea katoa, ahakoa he aha te mea i whiwhi ai ia, i runga i te whakakitenga me te whakahaunga, i runga i taku kupu, e ai tā te Ariki, ā, kua tomo atu ki roto ki tana whakaoranga, ā, e noho ana ki runga i tana torōna.

30 I whiwhi a Aperahama i ngā whakaari e pā ana ki ōna uri, ā, ko ngā hua o ōna hope—nō ōna hope koutou, arā, ko taku pononga a Hōhepa—te tikanga ia ka haere tonu mō ngā wā kei roto rātou i te ao; ā, mō te taha ki a Aperahama rātou ko ōna uri, ka haere tonu rātou i waho i te ao; ka haere tonu rātou i roto i te ao, i waho hoki i te ao kia rite tō rātou tokomaha ki te tini o ngā whetū; mehemea rānei ka tatau koe i ngā onepū o te tahatai, kua kore rawa e taea te tatau.

31 Nōu anō hoki tēnei whakaari, nā te mea nō Aperahama koutou, ā, i meatia te whakaari ki a Aperahama; ā, mā tēnei ture te hononga tonutanga o ngā mahi a tōku Matua, mā konā whakakorōria ia i a ia anō.

32 Nō reira haere koutou, me te mahi i ngā mahinga a Aperahama; tomo atu koutou ki roto ki taku ture kātahi ka whakaorangia koutou.

33 Engari ki te kore koutou e tomo atu ki roto ki taku ture tē taea te whiwhi i te whakaari o tōku Matua, i meatia ai e ia ki a Aperahama.

34 I whakahau te Atua i a Aperahama, kātahi ka tonoa atu a Hakara e Hera ki a Aperahama hei hoa wahine māna. Ā, he aha ia i pērā ai? Nā te mea koinei te ture; ā, he tokomaha te hunga i hua mai ai i a Hakara. Nō reira, i te whakatutuki tēnei i ngā whakaari, hāunga ētahi atu mea.

35 Nō reira, kei raro a Aperahama i tētahi whakahēanga? He pono tāku e mea atu nei ki a koutou, Kāo; nā te mea nāku, nā te Ariki, i whakahau.

36 I whakahaua a Aperahama kia tāpaea atu tana tama a Ihaka; hei aha koa, i tuhia: Kaua koe e whakamate. Heoi anō, kīhai a Aperahama i whakakore, ā, ka tatauria atu mōna hei mea tika.

37 I whiwhi a Aperahama i ngā hoa wāhine tūtūā, ā, i whānau mai ai he tamariki māna; ā, i tatauria iho mōna hei mea tika, nā te mea i hoatu rātou ki a ia, ā, i ū ia ki taku ture; pērā i a Ihaka rāua ko Hākopa hoki i te mea kīhai i mahi i tētahi mea kē atu i te mea i whakahaua ai rāua, kua tomo atu rāua ki roto ki tō rāua whakateiteitanga, e rite ana ki ngā whakaari, ā, kia noho ai ki runga i ngā torōna, ā, ehara i te anahera engari he atua.

38 I whiwhi anō a Rāwiri i ngā hoa wāhine tokomaha me ngā hoa wāhine tūtūā tokomaha, me Horomona hoki rāua ko Mohi aku pononga, pērā i aku pononga tokomaha, mai i te tīmatanga o te hanganga tae noa iho mai ki tēnei wā; ā, kīhai rātou i hara hāunga i roto i ngā mea kīhai rātou i whiwhi i ahau.

39 I hoatu ngā hoa wāhine me ngā hoa wāhine tūtūā a Rāwiri ki a ia i ahau, e te ringa o Nātana, taku pononga, me ērā atu o ngā poropiti i a rātou ngā kī o tēnei mana; ā, kīhai ia i hara ki ahau i roto i ēnei mea hāunga i tāna ki a Uria rāua ko tana hoa wahine; nō reira, kua taka iho ia i tana whakateiteitanga, ā, kua whiwhi i te wāhi ki a ia; ā, e kore ia e whiwhi i ērā i waho atu i te ao, nā te mea i hoatu ērā e au ki tētahi atu, e ai tā te Ariki.

40 Ko au te Ariki tō koutou Atua, ā, nāku i hoatu ki a koe, taku pononga a Hōhepa, tētahi whakatau, me te whakahoki i ngā mea katoa. Inoia tāu e pai ai, kātahi ka hoatu ki a koe e rite ana ki taku kupu.

41 Ā, pērā i tāu i inoi mai ai e pā ana ki te pūremu, he pono, he pono, tāku e mea atu nei ki a koutou, ki te whiwhi tētahi tāne i tētahi wahine i roto i te kawenata hou mau tonu, ā, mehemea ka pā atu ia ki tētahi atu tāne, ā, mehemea kāore au i whakataua atu ia e te whakawahinga tapu, kua pūremu ia, ā, ka whakangaromia.

42 Ki te kore ia i roto i te kawenata hou mau tonu, kātahi ka pā atu ki tētahi atu tāne, kua pūremu ia.

43 Ā, ki te pā atu tana hoa tāne ki tētahi atu wahine, ā, kei raro ia i tētahi oati, kua takahia e ia tana oati, ā, kua pūremu.

44 Ā, mehemea kīhai ia i pūremu, engari he hara kore ia kīhai ia i takahi i tana oati, ā, e mōhio ana hoki ia, kātahi ka whakakitea atu e au ki a koe, e taku pononga e Hōhepa, kātahi ka whai mana koe, mā taua mana o taku Tohungatanga Tapu, kia haria atu ia me te hoatu i a ia ki tētahi atu kāore anō kia pūremutia engari kua ū pono ia; nā te mea ka meinga ia hei rangatira i runga i te tokomaha.

45 Nā te mea kua whakataua iho e au ki runga i a koe ngā kī me te mana o te tohungatanga, mā konā au e whakahoki ai i ngā mea katoa, me te whakamōhio atu ki a koe ngā mea katoa i te wā e rite ana.

46 He pono, he pono tāku e mea atu nei ki a koe, ko ngā mea katoa e hīria ai ki runga i te whenua e hīria ai ki te rangi, i runga i tōku ingoa, ā, i runga i taku kupu, e ai tā te Ariki, ka herea tonutia ki ngā rangi; ā, ko ngā hara katoa e murua ai e koe ki runga i te whenua ka murua tonutia ki ngā rangi; ā, ko ngā hara katoa e whakamaua ai e koe ki runga i te whenua, ka whakamaua ki te rangi.

47 Hei āpiti anō, he pono tāku e mea atu nei, ko te tangata e manaakitia e koe, ka manaakitia e ahau, ā, ko te tangata e kangaia ai e koe, ka kangaia e au, e ai tā te Ariki; nā te mea ko ahau te Ariki, tō koutou Atua.

48 Hei āpiti anō, he pono tāku e mea atu nei ki a koe, e taku pononga e Hōhepa, nā, ko tāu e hoatu ai i runga i te whenua, ā, ko wai rānei tāu e hoatu ai i runga i te whenua, mā taku kupu, ā, e rite ana ki taku ture, ka torona iho ki ngā manaakitanga kaua ko ngā kanga, me taku mana, e ai tā te Ariki, ā, kāore ōna whakahēanga i runga i te whenua, i roto rānei i te rangi.

49 Nā te mea ko ahau te Ariki tōu Atua, ā, ka noho tonu ki a koe tae atu pū anō ki te mutunga o te ao, ā, puta noa i te mau tonu katoa; nā te mea he pono kei te hīri au ki runga ki a koe tō whakateiteitanga, me te whakarite i tētahi torōna mōu i te kīngitanga o tōku Matua, ki a Aperahama tōu tupuna.

50 Nana, kua kite au i ō whakahere; ā, ka murua ō hara katoa; kua kite au i ō whakahere i runga i te ngohengohe ki taua mea nāku i kī atu ki a koe. Nō reira, haere, ā, māku e mea tētahi huarahi hei putanga mōu, i te mea i whakaae au i te tāpaenga o Aperahama i tana tama a Ihaka.

51 He pono, tāku e mea atu nei ki a koe: Kei te hoatu e au tētahi whakahaunga ki taku pononga wahine, kua hoatu nei e au ki a koe, me pupuri ia e ia anō, ā, kia kaua e tango i te mea kua whakahaua koe e ahau kia hoatu ki a ia, e ai tā te Ariki, kia whakamātauria koutou katoa, pērā i tāku ki a Aperahama, ā, me kore pea au e tono i tētahi tāpaenga i tō ringa, he mea nā te kawenata me te whakahere.

52 Ā, tukua taku pononga wahine, a Ema Mete, kia whiwhi i te hunga katoa kua hoatu nei ki taku pononga a Hōhepa, ā, te hunga ngākau urutapu me te hunga poke kore i taku aroaro; ā, ka whakangaromia te hunga ehara nei i te poke kore engari kua kīa e rātou he poke kore, e ai tā te Ariki tō Atua.

53 Nā te mea ko au te Ariki tō Atua, ā, me whakarongo koe ki taku reo; ā, e hoatu e au ki taku pononga a Hōhepa kia meinga ia hei rangatira i runga i ngā mea maha; nā te mea kua pono ia i runga i ētahi mea, ā, atu i konā māku ia e whakakaha.

54 Ā, e whakahaua ana e au taku pononga wahine, a Ema Mete, kia ū, kia piri ki taku pononga a Hōhepa, kaua ki tētahi atu. Engari ki te kore ia e ū ki tēnei whakahaunga ka whakangaromia ia, e ai tā te Ariki; nā te mea ko ahau te Ariki tōu Atua, ā, ka whakangaromia ia ki te kore ia e ū ki taku ture.

55 Engari ki te kore ia e ū ki tēnei whakahaunga, ko reira meatia ai e taku pononga, e Hōhepa ngā mea katoa mōna, pērā i tāna i kōrero ai; ā, māku ia e manaaki, ā, ka meinga ia kia tini, ā, tatakirau ngā mea mōna i tēnei ao, ngā matua me ngā whaea, ngā teina me ngā tuāhine, ngā whare me ngā whenua, ngā hoa wāhine me ngā tamariki, ngā karauna me ngā oranga tonutanga i ngā ao mau tonu.

56 Hei āpiti anō, he pono tāku, tukua taku pononga wahine kia muru i ngā hara o taku pononga a Hōhepa; kātahi ka murua ōna hara, kua hara nei ia ki ahau; kātahi au, te Ariki tō Atua, ka manaaki i a ia, ā, ka tatakirau ngā mea mōna, ā, ka meinga tōna ngākau kia koa.

57 Hei āpiti anō, ko tāku, kaua e tukua taku pononga a Hōhepa kia tuku atu i ōna taonga i ōna ringaringa, kei haere mai tētahi hoariri ka whakangaro i a ia; nā te mea e whaia ana e Hātana ki te whakangaro; nā te mea ko au te Ariki tōu Atua, ā, koia taku pononga; ā nana, titiro, kei a ia ahau, pērā i taku piri ki a Aperahama, tōu tupuna, tae noa atu ki tana whakateiteitanga me tana korōria.

58 Nā, ki te taha ki te ture o te tohungatanga, he maha ngā mea e hāngai ana ki reira.

59 He pono, ki te karangahia tētahi tāne e tōku Matua, pērā i a Arona, i runga i tōku ake reo, i runga hoki i te reo o te tangata nāna au i tono, ā, kua hoatu ki a ia ngā kī o te mana o tana tohungatanga, ki te mahi ia i tētahi mahi i runga i tōku ingoa, ā, e rite ana ki taku ture me taku kupu, e kore ia e hara, ā, ka whakatikaia ia e ahau.

60 Nō reira, kaua e tukua tētahi kia whakahē i taku pononga a Hōhepa; nā te mea māku ia e whakatika; nā te mea māna e mea te whakahere e tonoa ai e ahau i ōna ringaringa mō ōna hara, e ai tā te Ariki tō koutou Atua.

61 Hei āpiti anō, ki te taha ki te ture o te tohungatanga—ki te mārena tētahi tāne ki tētahi puhi, kātahi ka hiahia ki te mārena ki tētahi atu, kātahi ka whakaae te tuatahi, ā, ki te mārena ia ki te tuarua, ā, mehemea he puhi rāua, ā, kua oatitia atu ki tētahi atu tāne, tēnā kua tika tāna; tē taea e ia te mahi pūremu i te mea kua hoatu rāua ki a ia; nā te mea kāore tērā i te pūremu ki ērā mea nāna, ehara i te mea nā tētahi atu.

62 Ā, mehemea tekau ngā puhi kua hoatu nei ki a ia i runga i tēnei ture, kāore tērā i te pūremu, nā te mea nāna rātou, ā, kua hoatu rātou ki a ia; nō reira e tika ana tāna.

63 Engari mehemea tētahi mea kotahi o ngā puhi tekau, whai muri iho i tana mārena, e pā atu ki tētahi atu tāne, kua pūremu ia, ā, ka whakangaromia; nā te mea kua hoatu ki a ia kia tini kia kapi te whenua, e rite ana ki taku whakahaunga, ā, kia whakatutuki i te whakaari i homai ai e taku Matua i mua i te orokohanganga rā anō o te ao, ā, mō tō rātou whakateiteitanga i roto i ngā ao mau tonu, kia whakawhānau mai i ngā wairua o te tangata; nā konā haere tonu atu te mahi a tōku Matua, kia whakakorōriatia ia.

64 Hei āpiti anō, he pono, he pono tāku e mea atu nei ki a koutou, ki te whai hoa wahine tētahi tāne, e mau nei ngā kī o tēnei mana, kātahi ka whakaakona ia e te tāne te ture o taku tohungatanga, ki ngā mea e hāngai ana ki ēnei mea, kātahi ia ka whakapono me te minita ki a ia, ka whakangaromia rānei ia, e ai tā te Ariki tō koutou Atua; nā te mea māku ia e whakangaro; nā te mea ka whakanuia e au tōku ingoa ki runga i te hunga e whiwhi ai, e puritia ai taku ture.

65 Nō reira, ka tika i roto i ahau, ki te kore ia e whiwhi i tēnei ture, kia whiwhi ai te tāne i ngā mea katoa e hoatu ai e ahau, e te Ariki tōna Atua ki a ia, nā te mea kāore ia i whakapono me te minita ki a ia e rite ana ki taku kupu; kātahi ka meinga te wahine hei kaitakahi ture; kātahi ka wātea ia i te ture o Hera, nāna nei i minita atu ki a Aperahama e rite ana ki te ture i whakahau ai au ki a Aperahama kia mārena ki a Hakara.

66 Ināianei ā, ki te taha ki ngā mea e hāngai ana ki tēnei ture, he pono, he pono tāku e mea atu nei ki a koe, ka whakakitea atu ētahi atu mea e ahau ki a koe, ā muri ake nei; nō reira, kāti ake tēnei mō nāianei. Nana, ko au te Arepa me te Omeka. Āmine.