1 He pono, pēnei tā te Ariki ki a koe, e taku pononga e Hōhepa Mete, e āhuareka rawa ana ahau i tō tāpaetanga me āu whakamānawa, kua meatia nei e koe; mō tēnei take i mairangatia ake koe e au, kia whakaatu atu tōku mātauranga mā roto i ngā mea ngoikore o te ao.

2 He pai ō inoi i tōku aroaro; ā, ko taku kupu tēnei hei whakautu atu māu, nā, kua karangatia koe i tēnei wā tonu kia meatia tētahi whakapuakitanga pono o taku rongopai, o tēnei pou hoki nāku nei i whakatōhei kohatu kokonga mō Hīona, e aumiria ai ki te whakaataahuatanga e rite ana ki tētahi whare kīngi.

3 Ka meatia tēnei whakapuakitanga ki ngā kīngi katoa o te ao, ki ngā tōpito e whā o reira, ki te tumuaki whaihōnore, me ngā kāwana whakaaro-teitei o te whenua e noho nei koe, me ngā iwi katoa o te ao e noho marara nei huri noa.

4 Tukua kia tuhia i runga i te wairua māhaki me te mana o te Wairua Tapu, e tau ai ki roto i a koe i te wā o tāu tuhituhi i taua mea;

5 Nā te mea ka hoatu ki a koe e te Wairua Tapu kia mōhio ai e pā ana ki aua kīngi me au kaiwhakahaere tikanga, arā, ko ngā mea e pā ai ki a rātou i ngā rā e takoto mai nei.

6 Nā te mea, nana, whano taku karanga ki a rātou kia aro mai ki te māramatanga me te korōria o Hīona, nā te mea kua tae mai te wā e titiro atu ki reira.

7 Nō reira, karangahia rātou e koutou i runga i te whakapuakitanga kaha rawa, me tō whakaaturanga, e wehi kore ana ki a rātou, nā te mea he rite rātou ki te pātītī, ā, e rite ana tō rātou korōria i reira ki tētahi putiputi meake ka hinga, kei whai wāhi rātou hei amuamu—

8 Ā, kia toro atu au ki a rātou i te rā o te toronga, ina parea atu ai te ārai i te kanohi, ki te whakatau i te wāhi o te kaiwhakapēhi ki waenganui i te hunga arero rua, ki te wāhi i reira te tetēnga niho, ki te whakaparahako rātou i aku pononga me taku whakaaturanga kua huraina atu ki a rātou.

9 Hei āpiti anō, ka toro atu au me te whakangāwari i ō rātou ngākau, ko te nuinga hei painga mō koutou, kia whai painga hoki koutou i ō rātou karu, e tae ake ai rātou ki te māramatanga o te pono, me ngā Tauiwi ki te whakateiteitanga, ki te hikinga ake rānei o Hīona.

10 Nā te mea e wawe mai ana te rā o taku toronga, i tētahi hāora kāore nei e whakaarohia nei e koutou; i reira te haumarutanga o taku iwi, ā, he whakaruruhau mō ngā mea e toe ana o rātou?

11 E oho, E ngā kīngi o te whenua! Haere mai koutou, haere mai, me ā koutou kōura me ā koutou hiriwā, hei āwhina i tōku iwi, ki te whare o ngā tamāhine o Hīona.

12 Hei āpiti anō, he pono tāku e mea atu nei ki a koe, tukua taku pononga a Rāpata P. Tamihana kia āwhina atu i a koe ki te tuhituhi i tēnei whakapuakitanga, nā te mea e āhuareka ana ahau ki a ia, ā, me piri tahi ia ki a koe;

13 Nō reira, tukua ia, kia whakarongo ki ō tohutohu, kātahi au ka manaaki i a ia ki ngā manaakitanga maha; tukua ia kia ū pono i roto i ngā mea katoa haere ake nei, ā, ka nui ia i ōku karu;

14 Engari tukua ia kia maumahara māku tana tiakitanga e tono i ōna ringaringa.

15 Hei āpiti anō, he pono tāku e mea atu nei ki a koe, kua manaakitia taku pononga a Hairama Mete; nā te mea e aroha ana ahau, te Ariki, ki a ia nā te pono o tōna ngākau, ā, nā te mea e aroha ana ia ki ērā mea e tika ana i tōku aroaro, e ai tā te Ariki.

16 Anō, tukua taku pononga a Hoani T. Peneti hei āwhina i a koe i roto i tō mahi tukutuku i taku kupu ki ngā kīngi o te iwi o te whenua, me te tū ki tō taha, ko koe pū anō e taku pononga e Hōhepa Mete, i te hāora whakapāwera; ā, e kore e hē atu tana utu mehemea ka whakarongo ia ki te kupu tohutohu.

17 Ā, ka whakanuia ia mō tōna aroha, nā te mea māku ia mēnā ka mahi pēnei ia, e ai tā te Ariki. Kua kite au i ngā mahi kua meatia e ia, e pai ai ki ahau mēnā ka mahi tonu ia, ā, ka karaunatia ia ki ngā manaakitanga me te korōria nui.

18 Hei āpiti anō, ko taku kupu tēnei ki a koe, nā, ko tāku e pai ai kia haere tonu taku pononga a Raimana Waiti ki te kauhau mō Hīona, i runga i te wairua māhaki, e whāki atu ana i mua i te ao; ā, māku ia e hāpai ake anō nei ko ngā parirau o te kārearea; ā, ka whai korōria, ā, ka whai hōnore ia mōna ake, ā, mō tōku ingoa hoki.

19 Nā, ina mutu tana mahi ka whakawhiwhia ia ki ahau, pērā pū anō i tāku ki taku pononga a Rāwiri Pātini, kei tōku taha i tēnei wā, me taku pononga hoki a Eruera Pātiri, me taku pononga tauheke hoki a Hōhepa Mete Matua., e noho ana ki tō Aperahama ringa katau, ā, kua manaakitia, kua tapu ia, nā te mea nāku ia.

20 Hei āpiti anō, he pono tāku e mea atu nei ki a koe, ko taku pononga a Hōri Mira, kāore ōna hē; e pai ana kia whakawhirinaki ki a ia nā te pono o tōna ngākau; ā, nā tōna aroha mō tōku whakaaturanga, e aroha ana au, te Ariki, ki a ia.

21 Nō reira au e ki atu nei ki a koe, ka hīria e au te tūranga o te pīhopatanga ki runga ki tōna māhunga, pērā i taku pononga a Eruera Pātiri, kia whiwhi ia i ngā whakatapunga o tōku whare, kia meatia e ia ngā manaakitanga ki runga i ngā māhunga o te hunga rawakore o tōku iwi, e ai tā te Ariki. Kaua e tukua tētahi tangata kia whakahawea i taku pononga a Hōri, nā te mea ka whakahōnore ia i ahau.

22 Tukua taku pononga a Hōri, me taku pononga a Raimana, me taku pononga a Hoani Naira, me ētahi atu, kia waihanga ake i tētahi whare ki tōku ingoa, kia rite anō ki te tauira e whakaaturia atu ai e taku pononga e Hōhepa ki a rātou, ki runga i te wāhi e whakaaturia ai e ia ki a rātou anō hoki.

23 Ā, ka ai tērā whare hei whare manuhiri, he whare e noho mai ai ngā manene o tawhiti i reira; nō reira tukua hei whare pai, e tika ai hei whare e paingia rawatia ana, e rapua ai e te tangata hāereere te oranga me te haumarutanga i a ia e whakaaroarohia ana te kupu a te Ariki; me te kohatu kokonga kua whakataua nei e au mō Hīona.

24 Ka ai tēnei whare hei nohoanga hauora mēnā ka hangaia ake ki tōku ingoa, ā, ki te kore te kāwana e whakataua ai ki tērā whare e tuku i te poke kei tau iho ki a ia. Ka tapu ia, ki te kore e kore te Ariki tō Atua e noho atu ki roto rā.

25 Hei āpiti anō, he pono tāku e mea atu nei ki a koe, tukua aku hunga tapu katoa kia haere mai ai i tawhiti.

26 Ā, tonoa ngā karere hohoro, āe rā, ngā karere kōwhiria, me te kī atu ki a rātou: haere mai koutou, me ā koutou kōura, me ā koutou hiriwā katoa, me ā koutou kohatu tūrua, me ā koutou taonga onamata katoa; ā, me te hunga katoa i a rātou te mātauranga mō ngā taonga onamata, e puta mai ai, kia puta mai ai, ā, haria mai anō te rākau pāka, i te rākau matai, i te rākau kahikātea, me ngā rākau utu nui katoa o te whenua;

27 Ā, i te rino, i te kapa, i te paraehe, me te matā, me ā koutou me utu nui katoa o te whenua; me te hanga ake i tētahi whare ki tōku ingoa, hei nohoanga mō te Runga Rawa.

28 Na te mea kāore e kitea ana tētahi wāhi i runga i te whenua hei hokinga mōna ki te whakahoki anō i ērā mea kua ngaro i a koutou, kua tangohia atu rānei e ia, arā, ko te raneatanga pū anō o te tohungatanga.

29 Nā te mea kāore he wāhi rumakanga i runga i te whenua, e rumakina ai rātou, aku hunga tapu, mō te hunga mate—

30 na te mea he tikanga tēnei nō tōku whare, ā, e kore e whakaaetia e ahau, hei ngā rā tuakoka anake, i reira tē taea e koutou te waihanga i tētahi whare ki ahau.

31 Engari kei te whakahau au i a koutou, e aku hunga tapu katoa, kia waihanga ake i tētahi whare ki ahau; ā, e tukua atu ana e au he wā nui kia hangaia ake tētahi whare ki ahau; ā, ka pai ki ahau ā koutou rumakanga hei tēnei wā.

32 Engari nana, hei te mutunga o tēnei whakataungakua kore ō koutou rumakitanga mō te hunga mate e pai ki ahau; ā, ki te kore koutou e mea ai i ēnei mea hei te mutunga o te whakataungaka whakaparahakotia atu koutou hei hāhi, me ō kotuou mate, e ai tā te Ariki tō koutou Atua.

33 Nā te mea he pono tāku e mea atu nei ki a koutou, nā, ina rahi te wā e hangaia ake ai e koutou tētahi whare ki ahau, nō konā te tikanga tapu o te rumaki i ngā mate, mō konā whakaritea ai taua mea i mua noa atu i te orokohanganga o te ao, e kore ō koutou rumakitanga mō ō koutou hunga mate e whakaaehia e ahau;

34 Kei reira hoki whakamanaia ai ngā kī o te tohungatanga tapu, hei whiwhinga mōu ki te hōnore, ki te korōria hoki.

35 Ā, whai muri iho i tēnei wā, ko ō koutou rumakitanga mō te hunga mate, e te hunga kua whakamararatia whānuitia atu, kāore e whakaaehia e ahau, e ai tā te Ariki.

36 Nā te mea kua whakamanaia i Hīona, i ōna pou hoki, i Hiruharama hoki, ērā wāhi kua whakatauhia e au hei wāhi whakaruruhau, ka meinga ērā wāhi hei wāhi mō ngā rumakitanga i ō koutou mate.

37 Hei āpiti anō, he pono tāku e mea atu nei ki a koutou, me pēhea ō koutou horoinga e whakaaehia ai e ahau, hāunga tā koutou meatanga i ērā i tētahi whare kua hangaia ake nei e koutou i runga i tōku ingoa?

38 Nā te mea, mō tēnei take ahau i whakahau ai i a Mohi kia hangaia ake e ia tētahi tapenākara, kia mauria haereita hoki e rātou i te koraha, me te hanga ake i tētahi whare i te whenua o te kupu whakaari, kia huraina ai ērā tikanga tapu kua hunaia nei i mua i te hanganga o te ao.

39 Nō reira, he pono tāku e mea atu nei ki a koutou, ko ō koutou whakawahinga, me ō koutou horoinga, me ō koutou rumakitanga mō te hunga mate, me ā koutou huihuinga tapu, me ā koutou whakamaharatanga mō ō koutou whakahere i whakaherea ai e ngā tama a Rewi, ā, mō ō koutou matatuhi i roto i ō koutou wāhi tino tapu rawa e whiwhi kōrero ai koutou, me ō koutou ture me ō koutou whakawākanga, mō te tīmatanga o ngā whakakitenga me te tūāpapa o Hīona, me te korōria, te hōnore me te hoatutanga o ōna wāhi, kua whakamanaia e te tikanga tapu o tōku whare tapu, koia nā hoki te mea e whakahaua tonutia ana tōku iwi kia hangaia ake ki tōku ingoa tapu.

40 Ā, he pono tāku e mea atu nei ki a koutou, tukua tēnei whare kia hangaia ake ki tōku ingoa, kia taea ai e au te hura i aku tikanga tapu i reira ki tōku iwi;

41 Nā te mea e whakaaro ana au kia huraina ki aku hāhi ngā mea kua hunaia i mua i te orokohanganga o te ao, arā, ngā mea e pā ana ki te raneatanga o ngā wā.

42 Ā, māku e whakaatu atu ki taku pononga a Hōhepa ngā mea katoa e pā ana ki tēnei whare, me tō reira tohungatanga, me te wāhi e hangaia ake ai ia.

43 Ā, me hanga ake e koutou ki runga i te wāhi e whakaarohia nā e koutou, nā te mea koia te wāhi kua kōwhiria nei e ahau hei hanganga mā koutou.

44 Ki te whakapau koutou i ō koutou kaha, māku taua wāhi e whakatapu kia meinga hei wāhi tapu.

45 Ā, ki te whakarongo tōku iwi ki tōku reo, ki te reo hoki o aku pononga kua whakataua hei ārahi i tōku iwi, nana, he pono tāku e mea atu nei ki a koutou, e kore rawa e peia atu rātou i tō rātou wāhi.

46 Engari ki te kore rātou e whakarongo mai ki tōku reo, ki te reo rānei o ēnei tāngata kua tohua mai nei e ahau, e kore e manaakitia rātou, nā te mea kei te pokea e rātou ōku wāhi tapu, me aku wāhi tapu, me aku tikanga tapu, me ngā pukapuka whakamana, me aku kupu tapu e hoatu nei e au ki a rātou.

47 Ā, ka pahawa ake, nā, ki te hanga koutou i tētahi whare ki tōku ingoa, engari kāore e meatia tāku e kī ake nei, e kore e meatia e au te oati e oatitia nei e au ki a koutou, e whakatutuki rānei i ngā whakaari e tonoa mai nei e koutou i aku ringaringa, e ai tā te Ariki.

48 Nā te mea mahue he manaakitanga, mā koutou, mā ā koutou ake mahinga, e kukume mai ngā kanga, te riri, te āritarita, me ngā whkaawākangaki runga i ō koutou ake māhunga, he mea mā ō koutou kuare, me ō koutou mōrikarika katoa, e meatia ana i tōku aroaro, e ai tā te Ariki.

49 He pono, he pono, tāku e mea atu nei ki a koutou, nā, ina tuku au i tētahi whakahaunga ki tētahi o aku tama a te tangata kia meatia tētahi mahi i tōku ingoa, kātahi ka haere ake aua tama a te tangata i runga i ō rātou kaha katoa me ngā mea katoa kei a rātou ki te mahi i taua mahi, ā, e whakapaua ana ō rātou kaha, kātahi ka whakaeke iho ō rātou hoariri ki runga ki a rātou me te whakararu i tā rātou meatanga i taua mahi, nana, e tika ana mōku kia kaua e tonoa anōtia taua mahi i ngā ringaringa o aua tama a te tangata, engari kia whakaaetia ō rātou tāpaetanga.

50 Ā, ka torona iho e au te hara me te takahanga o aku ture tappu, me aku whakahaunga ki runga i ngā māhunga o te hunga nāna nei taku mahi i whakararu, tae atu ana ki te whakatipuranga tuatoru me te whakatirpuranga tuawhā, ki te kore rātou e rīpenetā, ki te whakamauāhara ki ahau, e ai tā te Ariki te Atua.

51 Nō reira, mō tēnei take i whakaaehia e au ngā tāpaenga o te hunga nāku noa nei i whakahau kia hangaia ake ai tētahi pā me tētahi whare ki tōku ingoa, i te takiwā o Tiakimana, Mītori, ā, te hunga i whakararungia e ō rātou hoariri, e ai tā te Ariki tō koutou Atua.

52 Ā, māku te whakawākanga, te riri, te āritarita, te auē, te pōuritanga, me te tetēatanga o ngā niho ki runga ki ō rātou māhunga, tae atu ana ki te whakatipuranga tuatoru me te whakatipuranga tuawhā, ki te kore rātou e rīpenetā, me te whakamauāhara ki ahau, e ai tā te Ariki tō koutou Atua.

53 Ā, ka meinga tēnei e au hei tauira ki a koutou, kia hari ai ō koutou ngākau e pā ana ki te hunga katoa kua whakahaua ki te mahi i tētahi mahi, ā, kua whakararuraruhia e ngā ringaringa o ō rātou hoariri, e te whakapēhitanga hoki, e ai tā te Ariki tō koutou Atua.

54 Nā te mea ko au te Ariki tō koutou Atua, ā, ka whakaorangia e ahau ō koutou teina katoa i mā ai te ngākau, ā, kua whakamatea i te whenua o Mītori, e ai tā te Ariki.

55 Hei āpiti anō, he pono tāku e mea atu nei ki a koutou, e whaahau ana anō ahau ki a koutou kia hangaia ake tētahi whare ki tōku ingoa, ki tēnei wāhi pū anō, kia whakaatu mai rā koutou ki ahau, nā, e pono ana koutou i roto i ngā mea katoa ahakoa he aha tāku e whakahau ai ki a koutou, kia manaaki ai au i a koutou, ā, kia karaunatia koutou ki te hōnore, te oranga mutunga kore, me te oranga tonutanga.

56 Ināianei ā, ko taku kupu tēnei ki a koutou, e pā ana ki taku whare manuhiri kua whakahaua atu nei e au ki a koutou kia waihanga ai hei wharenoho mō te hunga manene, tukua kia hangaia ki tōku ingoa, ā, tukua tōku ingoa kia tapaina ai ki runga rā, ā, tukua taku pononga a Hōhepa me tōna whare kia whaiwāhi ai ki roto rā, mai i tētahi whakatipuranga ki tētahi whakatipuranga.

57 Nā te mea kua whakatau iho au i tēnei whakawahinga ki runga ki tōna māhunga, kia whakataua hoki tana manaakitanga ki runga i te māhunga o ōna uri whai muri iho i a ia.

58 Ā, he pērā i tāku i mea atu nei ki a Aperahama e pā ana ki ngā iwi o te whenua, koia anō tāku e mea atu nei ki taku pononga a Hōhepa: Mā roto i a koe, i ōu uri hoki e manaakitia ai ngā iwi o te whenua.

59 Nō reira, tukua taku pononga a Hōhepa rātou ko ōna uri whai muri iho i a ia kia whaiwāhi ai ki roto i taua whare, mai i tētahi whakatipuranga ki tētahi whakatipuranga, mō āke tonu atu, e ai tā te Ariki.

60 Ā, tukua te ingoa o taua whare kia karangatia ko te Whare Nāwhu; ā, tukua hei wāhi noho āhuareka mō te tangata, ā, hei okiokinga mō te tangata hāereere, kia āta whakaarohia e ia te korōria o Hīona, me te korōria o tēnei, te kohatu kokonga o reira;

61 Kia whiwhi anō ia i ngā tohutohu i te hunga nāku nei i whakanoho hei putiputi rongonui, ā, hei kaimataara i runga i ōna taiapa.

62 Nana, he pono tāku e mea atu nei ki a koutou, tukua taku pononga a Hori Mira, me taku pononga a Raimana Waiti, me taku pononga a Hoani Naira, me taku pononga a Pita Hō, kia whakarite i a rātou anō, me te whakatū i tētahi hei tumuaki i runga i tō rātou kōrama, mō te hanganga o taua whare.

63 Ā, ka piri rātou hei kōmiti, nā konā rātou whiwhi ai i tētahi pūtea mō te hanganga o taua whare.

64 Ā, e kore rātou e whiwhi i te moni iti iho i te rima tekau tāra mō te hea kotahi i roto i taua whare, ā, ka whakaaengia rātou kia whiwhi i te tekau mā rima mano tāra mai i te tangata kotahi hei hea mōna ki roto i taua whare.

65 Engari e kore rātou e whakaaehia kia whiwhi i tua atu i te tekau mā rima mano tāra mai i tangata kotahi.

66 Ā, e kore rātou e whakaaehia kia whiwhi i te moni iti iho i te rima tekau tāra i te tangata kotahi hei hea i roto i taua whare.

67 Ā, e kore hoki rātou e whakaaehia kia whiwhi ai i te tangata kotahi, hei kaipupuri hea i tēnei whare, ki te kore ia e hoatu i tana pūtea ki roto ki ō rātou ringaringa i te wā e whiwhi ai ia i ana hea;

68 Ā, kia rite tonu ki te nui o ngā pūtea e hoatu ana e ia ki roto i ō rātou ringaringa, te nui o te hea mōna ki roto i taua whare; engari ki te kore ia e hoatu putea ki roto ki ō rātou ringaringa e kore ia e whiwhi hea i roto i taua whare.

69 Ā, ki te utu tētahi i te putea ki roto i ō rātou ringaringa ka meinga tērā hei hea mōna ki roto i taua whare, mōna ake, ā, mō tōna whakatipuranga whai muri iho i a ia, mai i tētahi reanga ki tētahi reanga, arā, ki te pupuri ia me ōna uri i aua hea, ki te kore hoki e hokona atu, e tuku atu rānei aua hea i ō rātou ringaringa i runga i tō rātou ake hiahia, me tā rātou ake mahi, ki te mahi i tāku e pai ai, e ai tā te Ariki tō koutou Atua.

70 Hei āpiti anō, he pono tāku e mea atu nei ki a koutou, mehemea taku pononga a Hori Mira, me taku pononga a Raimana Waiti, me taku pononga a Hoani Naira, me taku pononga a Pita Hō, e whiwhi ai i tētahi hea ki roto i ō rātou ringaringa, ahakoa he moni, ahakoa he taonga rānei mā konā whiwhi ai i te wāriu tika o ngā moni, kua kore rātou e whakapau atu i taua moni ki tētahi atu take kē, i roto anake i taua whare.

71 Ā, ki te whakapau atu i tētahi wāhi o aua moni ki wāhi kē atu, i roto anake i taua whare, ki te kore hoki e whakaaehia e te kaipupuri hea, ā, ki te kore e tataki-whā i ta rātou whakautu i te moni i whakapaua rā e rātou ki te wāhi kē ake, i roto anake i taua whare, ka kangaia rātou, ā, ka whakanekehia atu rātou i tō rātou tūranga, e ai tā te Ariki te Atua; nā te mea ko ahau, ko te Ariki, te Atua, ā, kua kore rawa e taea te tinihangatia i roto i tētahi o ēnei mea.

72 He pono tāku e mea atu nei ki a koutou, tukua taku pononga a Hōhepa kia utua e ia te moni ki roto ki ō rātou ringaringa mō te hanganga ake o taua whare, e rite ana ki tāna e pai ai; engari tē taea e taku pononga e Hōhepa te utu i tua atu i te tekau mā rima mano tāra mō ngā hea i taua whare, tē taea rānei te mea iti iho i te rima teka tāra; tē taea rānei e tētahi atu tangata rānei, e ai tā te Ariki.

73 Ā, kei reira ētahi atu anō e manako ana kia mōhio ki tāku e pai ai e pā ana ki a rātou, nā te mea kua tonoa tērā e rātou i aku ringaringa.

74 No reira, ko taku kupu tēnei e mea atu nei ki a koutou e pā ana ki taku pononga a Winihana Naiti, mēnā ka meatia e ia tāku e pai ai tukua ia kia tuku putea ki roto ki taua whare mōna ake anō, ā, mō tōna whakatipuranga whai muri iho i a ia, mai i tētahi whakatipuranga ki tētahi whakatipuranga.

75 Ā, tukua ia ki whakaarahia ake tōna reo kia roa, kia kaha, ki waenganui i tēnei iwi, ki te totohe mō te taha ki te hunga rawakore me te hunga hapa; ā, kaua e tukuna ia kia hinga, kaua rānei e tukuna kia hē tōna manawa; kātahi au ka whakaae ki ana tāpaenga, nā te mea e kore e rite ērā ki ngā tāpaenga a Kaina, nā te mea māku ia, e ai tā te Ariki.

76 Tukua tana whānau kia hari, ā, kia whakatahuri kē atu i ō rātou ngākau i te whakamamaetanga; nā te mea kua kōwhiria ia, ā, kua whakawahia ia e au, ā, ka whakahōnoretia ia i waenganui i tōna whare, nā te mea ka murua ōna hara katoa, e ai tā te Ariki. Āmine.

77 He pono tāku e mea atu nei ki a koutou, tukua taku pononga a Hairama kia tuku moni ki taua whare e rite ana ki tāna e pai ai, mōna ake anō, ā, mō tōna whakatipuranga whai muri iho i a ia, mai i tētahi whakatipuranga ki tētahi whakatipuranga.

78 Tukua taku pononga a Ihaka Karana kia tuku moni ki roto ki taua whare; nā te mea e aroha ana au, te Ariki, ki a ia mō ngā mahi kua meatia e ia, ā, māku ōna hara katoa e muru; nō reira, tukua kia maumaharatia ia kia whai hea ai ia ki roto ki taua whare mai i tētahi whakatipuranga ki tētahi whakatipuranga.

79 Tukua taku pononga a Ihaka Karana kia whakatūria i waenganui i a koutou, ā, kia whakamanaia ai e taku pononga a Wiremu Māka, ā, kia manaakitia e ia, kia haere tahi me taku pononga a Hairama ki te whakatutuki i te mahi e tohua ai e taku pononga a Hōhepa ki a rātou, ā, ka manaakitia nuitia rātou.

80 Tukua taku pononga a Wiremu Māka kia tuku moni ki taua whare, e rite ana ki tāna e pai ai, mōna ake anō, ā, mō tōna whakatipuranga, mai i tētahi whakatipuranga ki tētahi whakatipuranga.

81 Tukua taku pononga a Henare T. Herewaru kia tuku moni ki taua whare, e rite ana ki tāna e pai ai, mōna ake anō, ā, mō ōna uri whai muri iho i a ia, mai i tētahi whakatipuranga ki tētahi whakatipuranga.

82 Tukua taku pononga a Wiremu Rō kia tuku moni ki taua whare, mōna ake anō, ā, mō ōna uri whai muri iho i a ia, mai i tētahi whakatipuranga ki tētahi whakatipuranga.

83 Mēnā ka meatia e ia tāku e pai ai, tēnā, kaua e tukua kia haria e ia tōna whānau ki ngā whenua whakaterāwhiti, ki Katarana pū anō; hei aha koa, māku, mā te Ariki, e hanga ake a Katarana, engari māku, mā te Ariki, tētahi whakawhiunga e whakarite mō ngā tāngata i reira.

84 Ā, mō taku pononga a Aramona Pāpiti, he maha rā ngā mea kāore e pai ana ki ahau; nana, e whai ana ia kia whakapūmauhia e ia tōna ake tikanga i runga kē i tāku i whakamanaia ai, i runga ake anō i tā te Tumuakitanga o taku Hāhi; ā, e whakaritea ana e ia tētahi kuao kau kōura hei koropikotanga mō tōku iwi.

85 Kaua e tukua te tangata kotahi kia haere atu ai i tēnei wāhi, arā, te mea kua haere mai nei ki te pupuri i aku whakahaunga.

86 Ki te noho mai rātou ki konei, tukua kia noho mai i roto i ahau; ā, ki te mate rātou, tukua kia mate i roto i ahau; nā te mea ka okioki rātou i ā rātou mahinga i konei, ā, ka hono tonu ā rātou mahinga.

87 No reira, tukua taku pononga a Wiremu kia whakawhirinaki mai ki ahau, ā, ki aoti tana wehi e pā ana ki tōna whānau, nā te māuiuitanga o te whenua. Ki te aroha mai koe ki ahau, puritia aku whakahaunga; kātahi ka huri mai te māuiuitanga o te whenua ki tō korōria.

88 Tukua taku pononga a Wiremu kia haere me ter whakapuaki i taku rongopai mau tonu i runga i te reo kaha, ā, i runga i te hari nui, i a ia e whakakorikoria ana e te Wairua, ki ngā tāngata e noho ana ki Wōtō, ki ngā tāngata hoki ki Katate, me ngā tāngata ki Peringitana hoki, me ngā tāngata ki Matihana, me te tatari i runga i te manawanui mō ētahi atu tohutohu i taku huinga whānui o te hāhi, e ai tā te Ariki.

89 Mēnā ka meatia e ia tāku e pai ai tukua ia i tēnei wā kia whakarongo ki ngā tohutohu a taku pononga a Hōhepa, ā, mā tāna moni e tautoko te hunga rawakore, me te tā i te whakapākehātanga hou o taku kupu tapu ki ngā tāngata o te ao.

90 Ā, ki te pēnei ia māku ia e manaaki ki ngā manaakitanga maha, kia kaua ia e whakarērea, e kore rānei e mahue ōna uri kia kitea ai e pīnono paraoa ana.

91 Hei āpiti anō, he pono tāku e mea atu nei ki a koutou, tukua taku pononga a Wiremu kia whakatūria, kia whakamanaia, ā, kia whakawahia, hei kaikaunihera ki taku pononga a Hōhepa, i roto i te ruma o taku pononga o Hairama, kia hāpaingia e taku pononga a hairama te tūranga o te Tohungatanga me te Peteriaka, kua whakataua ki a ia e tōna matua, mā te manaakitanga, mā te tika hoki mōna taua tūranga;

92 Kia puritia i tēnei wā haere ake nei ngā kī o ngā manaakitanga peteriaka ki runga i ngā māhunga o taku iwi katoa,

93 Kia manaakitia te tangata e manaakitia ai e ia, ā, kia kangaia te tangata e kangaia ai e ia; ko tāna hoki e here ai i runga i te whenua, e herea ai i te rangi; ā, ko tāna e wewete ai i runga i te whenua, e wewete ai i te rangi.

94 Ā, mai i tēnei wā haere ake nei māku e whakatau iho ki runga ki a ia kia tū ai ia hei poropiti, hei matakite, hei kaiwhakakite hoki ki taku hāhi, rāua tahi anō ko taku pononga a Hōhepa;

95 Kia mahi tahi anō rāua ko taku pononga a Hōhepa; ā, kia whiwhi tohutohu ia i taku pononga a Hōhepa, māna hoki ngā kī e hura atu ki a ia mā konā ia inoi ai, whiwhi ai, ā, ka karaunatia ki taua manaakitanga, ki taua korōria, ki taua hōnore, me taua tohungatanga, me ngā takoha o te tohungatanga, i whakanohoa ai ki runga ki taku pononga a Oriwa Kautere;

96 Kia whakaatu ai taku pononga a Hairama mō ngā mea e huraina ai e ahau ki a ia, kia meatia tana ingoa hei maharatanga hōnore mai i tētahi whakatipuranga ki tētahi whakatipuranga, mō āke tonu atu.

97 Tukua taku pononga a Wiremu Rō anō hoki kia whiwhi i ngā kī mā konā taea te inoi me te whiwhi manaakitanga; tukua ia kia whakaiti i tōku aroaro, kia tinihanga kore, kātahi ia ka whiwhi i tōku Wairua, arā, ko te Kaiwhakaaio pū anō, e whakakitea atu te pono o ngā mea katoa, ā, ka hoatu ki a ia, i taua hāora pū anō, ngā kupu hei whakapuakanga māna.

98 Ā, ka whai ēnei tohu i a ia—ka mahu ia i te hunga māuiui, ka pei ia i ngā rēwera, ā, ka whakaorangia i te hunga e whāngaia atu ai te paitini whakamate ki a ia;

99 Ā, ka ārahina ia i ngā ara e kore e taea e te nākahi paitini kino tōna rekereke, ā, ka pupukehia ake ia i runga i te auaha o ōna whakaaro anō nei ko ngā parirau o te kāhu.

100 Ā, ka pēhea me ka hiahia au kia whakaaarahia ake e ia te hunga mate, tukua kia kaua ia e kaiponu tōna reo.

101 Nō reira, tukua taku pononga a Wiremu kia karangatia ake, ā, kia kaua e kaiponutia iho, i runga i te hari me te koa, me ngā ōhana ki a ia e noho mai nā i runga i te torona mō āke tonu atu, e ai tā te Ariki tō koutou Atua.

102 Nana, ko taku kupu tēnei e mea atu nei ki a koutou, he mīhana tāku mō taku pononga a Wiremu, me taku pononga a Hairama, mō rāua anake; ā, tukua taku pononga a Hōhepa kia noho ai i te kāinga, nā te mea he mahi māna i reira. Ka whakakitea atu e au te toenga atu a muri ake nei. Koia anō. Āmine.

103 Hei āpiti anō, he pono tāku e mea atu nei ki a koutou, ki te mahi taku pononga a Hirini ki ahau me te tū hei kaikaunihera ki taku pononga a Hōhepa, tukua ia kia matika ake me te tū i te tūranga o tana karangatanga, me te whakaiti i a ia anō i tōku aroaro.

104 Ā, ki te tāpae ia i tētahi tāpaenga pai ki ahau, me ngā whakamānawa, me te noho tonu ki tōku iwi, nana, māku, mā te Ariki tō koutou Atua e mahu ia kia whaiora ai ia; ā, ka whakaarahia ake e ia tōna reo anō ki ngā maunga, me te tū hei kaikōrero i mua i tōku aroaro.

105 Tukua ia kia haere mai me te kimi i tōna whānau i te hapori e noho mai nei taku pononga a Hōhepa.

106 Ā, tukua ia i roto i āna hāereere katoa kia hikina ake tōna reo anō nei te reo o te tētere, me te whakatūpato i ngā tāngata o te ao kia tahuti atu i te riri e kainamu mai nei.

107 Tukua ia kia āwhina i taku pononga a Hōhepa, ā, tukua anōtia taku pononga a Wiremu Rō kia āwhina ai i taku pononga a Hōhepa, i te meatanga o tētahi whakapuakitanga pono ki ngā kīngi o te whenua, pērā pū anō ki tāku i kī ai ki a koutou.

108 Mēnā ka meatia e taku pononga a Hirini i tāku e pai ai, tukua ia kia kaua e kawe atu i tōna whānau ki ngā whenua whakaterāwhiti, engari tukua ia kia tīnia tō rātou wāhi noho, pērā pū anō ki tāku i kī ai.

109 Nana, ehara i tāku e pai ai kia rapu wāhi haumaru, whakaruruhau rānei i waho noa atu i te pā kua whakataua e au ki a koutou, arā i te pā o Nāwhu.

110 He pono tāku e mea atu nei ki a koutou, ināianei pū anō, ki te whakarongo ia ki tōku reo, ka whai painga i a ia. Koia anō. Āmine.

111 Hei āpiti anō, he pono tāku e mea atu nei ki a koutou, tukua taku pononga a Amoho Rēweti kia tukua he moni ki roto ki ngā ringaringao te hunga kua whakatūria nei e au kia hangaia ake tētahi whare hei whare noho, arā, ko te Whare Nāwhu pū anō.

112 Tukua ia kia pēnei mehemea he hiahia tōna; ā, tukua ia kia whakarongo ki ngā tohutohu o taku pononga a Hōhepa, me te mahi ki ōna ake ringaringa kia rangona ai ia e te tangata.

113 Ā, ina kitea he mea pono ia i roto i ngā mea katoa e tukua ai māna hei tiaki, āe rā, arā, he mea ruarua pū anō, ka meinga ia hei kaiwhakahaere i runga i te tokomaha;

114 Nō reira tukua ia kia whakaitia ia anō kia whakateiteingia ia. Koia anō. Āmine.

115 Hei āpiti anō, he pono tāku e mea atu nei ki a koutou, mehema ka whakarongo taku pononga a Rōpati T. Whohita ki tōku reo, tukua ia kia hangaia ake tētahi whare mō taku pononga a Hōhepa, e rite ana ki te kirimana kua meatia e ia ki a ia, i te mea ka tūwheratia ake te tatau ki a ia i tēnei wā, i tēnei wā.

116 Ā, tukua ia kia rīpenetā mō ōna hē katoa, me te whakakākahu i a ia anō ki te aroha noa; ā, kia mutu tana mahi kino, me te whakataha atu i āna kōrero mārō;

117 Me te utu hoki ia i tētahi moni ki roto i ngā ringaringa o te kōrama o te Whare Nāwhu, mōna ake anō, ā, mō tōna whakatipuranga whai muri iho i a ia, mai i tētahi whakatipuranga ki tētahi whakatipuranga;

118 Me te whakarongo hoki ki ngā tohutohu a aku pononga a Hōhepa rātou ko hairama, ko Wiremu Rō, ā, ki ngā mana hoki kua karangatia nei e ahau kia whakatakotoria iho te tūāpapa o Hīona; ā, ka pai ki a iamō āke tonu atu. Koia anō. Āmine.

119 Hei āpiti anō, he pono tāku e mea atu nei ki a koutou, kaua e tukua tētahi tangata kia tuku moni ki te kōrama o te Whare Nāwhu ki te kore ia e whakapono ana ki te Pukapuka a Moromona, me ngā whakakitenga kua hoatu nei e au ki a koutou, e ai tā te Ariki tō koutou Atua;

120 Nā te mea he kino te mea e nui ake ana, e iti iho ana i tēnei, ā, ka haere ngātahi me ngā kangakanga kaua ko ngā manaakitanga, e ai tā te Ariki tō koutou Atua. Koia anō. Āmine.

121 Hei āpiti anō, he pono tāku e mea atu nei ki a koutou, tukua kia tika te utu o te kōrama o te Whare Nāwhu mō ā rātou mahi e meatia nei e rātou ki te hanga ake i te Whare Nāwhu; ā, tukua kia whakaaehia tō rātou utu i waenganui i a rātou anō, e rite ana ki tō reira utu.

122 Ā, tukua ngā tāngata katoa e tuku moni ai kia pikauria e ia tōna wāhi ki te taha ki tō rātou utu, mehemea e tika ana anō, hei oranga mō rātou, e ai tā te Ariki; ki te kore, ka meinga ā rātou mahi hei hea mō rātou ki roto i taua whare. Koia anō. Āmine.

123 He pono tāku e mea atu nei ki a koutou, kei te hoatu nei e au ki a koutou e ngā āpiha nō tōku Tohungatanga, kia puritia e koutou ngā kī o reira, arā, ko te Tohungatanga pū anōnō te ritenga o Merekihereke, nō te ritenga o tāku Tama Kotahi Anake.

124 Tuatahi, kei te hoatu e au ki a koutou a Hairama Mete hei peteriaka mō koutou, kia puritisa ngā manaakitanga hīri o taku hāhi, arā, ko te whakaari pū anō o te Wairua Tapu, mā konā hīria ake ai koutou mō te rā o te hokonga, kia kore ai koutou e taka hei aha koa te hāora o te whakawainga e kainamu mai ai ki runga ki a koutou.

125 Kei te hoatu e au ki a koutou taku pononga a Hōhepa hei erata whakahaere i runga i taku hāhi katoa, hei kaiwhakamāori, hei kaiwhakakite, hei matakite, ā, hei poropiti.

126 Kei te hoatu e au ki a ia hei kaikaunihera mōna taku pononga a Hirini Rikitana me taku pononga a Wiremu Rō, kia meatia ēnei hei kōrama, ā, hei Tumuakitanga Tuatahi, kia whakawhiwhia ngā matatuhi mō taku hāhi katoa.

127 Kei te hoatu e au ki a koutou taku pononga a Pirikama Ianga hei tumuaki i runga i te kaunihera Tekau Mā Rua e hāereere ana;

128 Kei taua Tekau Mā Rua ngā kī hei whakatūwhera ake te mana o tōku kīngitanga ki runga ki ngā kokonga e whā o te whenua, ā, whai muri iho i tērā kia tonoa atu taku kupu ki ngā mea ora katoa.

129 Ko rātou tēnei e whai ake nei, ko Hipa T. Kimara, Pāri P. Parata, ko Orihana Haiti, ko Wiremu Mete, ko Hoani Teira, ko Hoani E. Peeti, ko Wirawha Wuruwha, ko Wirata Rihara, rātou ko Hōri A. Mete;

130 Kua tangohia ake a Rāwiri Pātene mōku ake anō; nana, e kore tōna Tohungatanga e tangohia atu e te tangata; engari, he pono tāku e mea atu nei ki a koutou, e āhei ana kia tohua tētahi atu ki taua karangatanga anō.

131 Hei āpiti anō, ko taku kupu tēnei ki a koutou, kei te hoatu e au ki a koutou tētahi Kaunihera Teitei, hei kohatu kokonga mō Hīona—

132 Arā, ko Hamuera Peneta, ko Henare K. Herewuru, ko Hōri W. Hārihi, ko Tiare T. Riti, ko Tāmati Korowa, ko Nuera Naiti, ko rāwiri Tota, ko Tanapa Wirihana—kua tangohia ake a Himona Paranihana ki ahau anō; e kore e tangohia atu tōna Tohungatanga e te tangata, engari e āhei ana kia tohua tētahi atu ki taua tohungatanga hei kaiwhakakapi mōna; ā, he pono tāku e mea atu nei ki a koutou, tukua taku pononga a Ārona Teonehana kia whakamanaia ai ki tōna karangatanga—ko Rāwiri Whuruma, ko Arapiu Katara rātou ko Wiremu Haningitana.

133 Hei āpiti anō, kei te hoatu e au ki a koutou a Tana T. Mete hei tumuaki i runga i tētahi kōrama pirihi teitei;

134 Ko taua tikanga tapu i whakaritea ai hei whakarite i te hunga e tohua ai hei tumuaki, hei pononga rānei i runga i ngā momo pou ā-rohe e mararatia atu nei;

135 Ā, e āhei ana rātou kia hāereere mehemea e hiahia ana rātou, engari kia whakamanaia kētia hei tumuaki e tū ana; koinei te tūranga o tō rātou karangatanga, e ai tā te Ariki tō koutou Atua.

136 Kei te hoatu e au ki a ia a Amaha Raimana rāua ko Noa Pakata hei kaikaunihera mōna, kia whakahaere ai rāua i runga i te kōrama pirihi teitei o taku hāhi, e ai tā te Ariki.

137 Hei āpiti anō, ko taku kupu tēnei ki a koutou, kei te hoatu e au ki a koutou a Hoani A. Hiki rāua ko Hehi Peika, ko taua tohungatanga he mea whakahaere i runga i te kōrama erata, koia te kōrama i whakaritea ai mō ngā minita e tū ana; hei aha koa e āhei ana rātou kia hāereere, heoi, kua whakamanaia rātou hei minita e tū ana i taku hāhi, e ai tā te Ariki.

138 Hei āpiti anō, kei te hoatu e au ki a koutou a Hōhepa Ianga, ko Hōhaia Patawhira, ko Henare Heremana, ko Tera Puriwha, ko Rewi Hanakaka, ko Hēmi Whohita hei whakahaere i runga i te kōrama whitu tekau;

139 Ko taua kōrama i whakaritea ai mō ngā erata hāereere kia whakaaturia mō tōku ingoaki te ao katoa, ahakoa kei hea te kaunihera hāereere, aku āpōtoro, e tono ai i a rātou ki te whakarite i tētahi huarahi i mua i tōku kanohi.

140 Ko te rerekētanga i tēnei kōrama me te kōrama erata koia tēnei, ka hāereere tētahi i ngā wā katoa, ā, ka whakahaere tētahi i runga i ngā hāhi i tētahi wā, i tētahi wā; kei tētahi te haepapa o te whakahaere i tēnei wā, i tēnei wā, ā, kāore he haepapa tō tērā atu ki te whakahaere, e ai tā te Ariki tō koutou Atua.

141 Hei āpiti anō, ko taku kupu tēnei ki a koutou, kei te hoatu ki a koutou a Winihana Naiti, a Hamuera H. Mete, rātou ko Hataraka Rauni, mehemea ka pai ki a ia, hei whakahaere i runga i te p1ihopatanga; kua tukuna atu tētahi mātauranga o taua pīhopatanga ki a koutou i roto i te pukapuka o te Whakaakoranga me ngā Kawenata.

142 Hei āpiti anō, ko taku kupu tēnei ki a koutou, ko Hamuera Rowhe rātou ko ana kaikaunihera hei pirihi, me te tumuaki o ngā kaiako me ana kaikaunihera, me te tumuaki anō hoki o ngā rīkona me ana kaikaunihera, me te tumuaki anō hoki o te pou ā-rohe me ana kaikaunihera.

143 Kua hoatu e au ngā tūranga i runga ake nei, me ō reira kī, hei āwhinatanga, ā, hei kāwanatanga, mō te mahi a te minitatanga me te whakatikatikahanga o aku hunga tapu.

144 Ā, he whakahaunga e hoatu nei e au ki a koutou, kia whakakīa ake ēnei tūranga katoa me te whakaae i aua ingoa kua whakahuatia ake e au, ki te whakakore rānei i aua ingoa rā i taku huinga whānui o te hāhi;

145 Ā, kia whakarite anō koutou i ngā rūma mō ēnei tūranga katoa i roto i taku whare ina hangaia ake ki tōku ingoa, e ai tā te Ariki tō koutou Atua. Koia anō. Āmine.