1 Ina puta mai te Kaiwhakaora, ka kite tātou i a Ia i Tōna ake āhua. Ka kite tātou, nā, he tangata Ia pērā i a tātou.

2 Ā, ko taua hono whanaungatanga e mau nei i a tātou ki konei, e mau tonu ki reira, heoi, ka haere ngātahi me te korōria mau tonu, kāore anō tātou kia rongo ki taua korōria i tēnei wā.

3 Hoani 14:23—Ko te putanga mai a te Matua rāua ko te Tama, i taua whiti, nā, he putanga ki te tangata ake; ā, he whakaaro tawhito, ā, he whakaaro teka te kōrero e mea ana e noho ana te Matua rāua ko te Tama i roto i te ngākau o te tangata.

4 I tētahi whakautu ki te pātai—Kāore rānei e rite ana te wā o te Atua, o te anahera, o te poropiti, o te tangata, ki te ao e noho nei rātou?

5 Taku whakautu, Āe. Engari kāore tētahi anahera e minita ai ki tēnei ao hāunga te hunga no tēnei ao.

6 Kāore ngā anahera e noho ana ki tētahi ao pēnei i tēnei ao;

7 Engari e noho ana rātou ki te aroaro o te Atua, i runga i tētahi ao anō nei he moana karaihe, he kapura, i reira kitea ai ngā mea katoa hei korōria mō rātou, o mua, o nāianei, o muri iho hoki, ā, kei mua tonu hoki i te aroaro o te Ariki.

8 He Urama Tāmama nui te wāhi e noho nei te Atua.

9 Ka meatia tēnei ao, i tōna āhua tapu me tōna āhua mate kore, kia rite ki te tioata, ā, ka meinga hei Urama Tamama ki ngā tāngata katoa e noho ai ki reira, mā konā whakakitea ai ki te hunga e noho ana ki reira ngā mea o te kīngitanga i raro iho i a ia, ngā kīngitanga rānei nō te ritenga i raro iho; ā, nō te Karaiti tēnei ao.

10 Ko reira te kohatu mā i kōrerohia nei i Whakakitenga 2:17, e meinga ai hei Urama Tāmama ki ia tangata, ki ia tangata e whiwhi ai ki tētahi, mā reira hoki e whakamōhiotia atu ngā mea katoa e hāngai ana ki tētahi ritenga teitei ake o ngā kīngitanga;

11 Ā, ka hoatu tētahi kohatu mā ki ia o aua hunga e tomo atu ai ki roto i te kīngitanga Tikitiki o Rangi, mā reira tuhia iho tētahi ingoa hou, kāore e mōhiotia ana e tētahi tangata hāunga te tangata e whiwhi ai. Ko te ingoa hou te kupu e tūwhera ai te tatau.

12 E poropiti ana ahau, i runga i te ingoa o te Ariki te Atua, ko te tīmatanga o ngā uauatanga mā konā puta mai ai te hekenga toto nui i mua tata i te haerenga mai o te Tama a te Tangata, nā, ka tīmata ki Kararaina ki te Tonga.

13 Tērā pea ka ara ake i te pātai taurekareka. I whakapuakina tēnei e tētahi reo ki ahau, i ahau e inoi pono ana e pā ana ki taua kaupapa, Tīhema 25, 1832.

14 I tētahi wā i te kaha inoi ahau kia mōhio ai ki te wā e haere mai ai te Tama a te Tangata, kātahi ka rongo au i tētahi reo e toai ana i ngā mea e whai ake nei:

15 E Hōhepa, e taku tama, ki te ora tonu koe kia tae ki te waru tekau mā rima te pakeke, ka kite koe i te mata o te Tama a te Tangata; nō reira waiho tēnei, ā, kaua e whakararuraru i ahau e pā ana ki tēnei take.

16 I mahue pēnei ahau, kāore i taea te whakatau mehemea i te hāngai atu tana haerenga mai ki te tīmatanga ake o te manonga tau, ki tētahi atu putanga mai rānei i mua, mehemea rānei ka mate au kātahi ka kite atu i tōna mata.

17 E whakapono ana ahau e kore te Tama a te Tangata e haere mai ai i mua i taua wā.

18 Ahakoa he aha ngā tikanga o te mātauranga e riro mai ai i a tātou i tēnei oranga, ka ara ake anō ērā me tātou hei te aranga.

19 Ā, ki te nui ake tō tētahi mātauranga i tō tētahi atu tangata i tēnei oranga he mea nā tana tākare me tana ngohengohe, ka nui ake tōna kakenga i te ao e haere mai nei.

20 Kei reira tētahi ture, kua whakapuakina rawatia i te rangi i mua i te orokohanganga rā anō o tēnei ao, nā konā ahu mai ai ngā manaakitanga katoa—

21 Ā, ina whiwhi tātou i tētahi manaakitanga i te Atua, he mea nā te ngohengohe ki taua ture e ahu mai ai i reira taua manaakitanga.

22 He tinana kikoiwi tō te Matua e rite ana ki tō te tangata; te Tama anō hoki; engari kāore ō te Wairua Tapu tinana kikoiwi, engari he Wairua. Me i kore, kāore i taea e te Wairua Tapu te noho mai ki roto i a tātou.

23 E āhei ana kia whiwhi te tangata ki te Wairua Tapu, ā, e taea ana kia heke iho ki runga ki a ia, engari e kore e piri tonu ki a ia.