1 Hei hīri i te whakaaturanga o tēnei pukapuka me te Pukapuka a Moromona, e whakapuakina ake e mātou, nā, kua kōhurutia a Hōhepa Mete te Poropiti rāua ko Hairama Mete te Peteriaka. I pūhia rāua i te whare herehere o Kāriti, i te 27 o Hune, 1844, i te takiwā o te rima karaka o te ahiahi pō, he mea nā tētahi ope kaipāhua—kua pania ki te pango—neke atu i te 150 ki te 200 ngā tāngata. I pūhia a Hairama i te tuatahi, ā, ka hinga mauritau iho ia, e whakapuakina ana: He tangata mate ahau! I rūpeke atu a Hōhepa i te wini, ā, ka pūhia ia kia mate i a ia e pērā ana, e whakapuaki ana: E te Ariki tōku Atua! I pūhia anōtia te tokorua nei ahakoa kua mate kē, i runga i tētahi āhuatanga kino, ā, kua whā matā kei ia o rāua.

2 Ko Hoani Teira rāua ko Wirata Rīhari, he tokorua nō te Tekau Mā Rua, ko rāua anake ngā tāngata i roto i te ruma i taua wā; i taotūngia te mea tuatahi rā i tētahi āhuatanga kino ki ngā matā e whā, engari kua ora anō mai ia mai i taua wā; ko te mea i muri mai, e mawhiti atu, kāore noa tētahi puare i tōna kāhu.

3 Ko Hōhepa Mete, te Poropiti, ā, te Matakite o te Ariki, he nui ake tāna i mea, atu i a Ihu anake, mō te whakaoranga o te tangata i tēnei ao i tā ērā atu tāngata katoa i runga i te whenua. I te takiwā poto o te rua tekau tau, kua whakaputaina mai e ia te Pukapuka a Moromona, nāna nei i whakapākehā i runga i te takohatanga me te mana o te Atua, ā, ko ia hoki te mea nui i roto i te tānga ki ngā whenua e rua; kua tukuna mai te raneatanga o te rongopai mau tonu, kei roto rā, ki ngā tōpito e whā o te ao; kua whakaputaina mai ngā whakakitenga me ngā whakahaunga nā konā hangaia ai tēnei pukapuka o te Whakaakoranga me ngā Kawenata, me ngā tuhinga me ngā tohutohu whai mātauranga maha hei painga mō ngā tamariki a te tangata; ka whakahuihuia ngā Hunga Tapu i ngā Rā o Muri Nei mano tini, kua hangaia tētahi pā nunui, ā, kua hau te rongo mōna, mō tōna ingoa e kore rawa e taea te patu, i rangatira tōna oranga, i rangatira tōna matenga i ngā karu o te Atua me Tana iwi; ā, he pērā i ā te Ariki mea whakawahia i ngā wā onamata, kua hīria tana mīhana me ana mahinga ki ōna ake toto; ā, kua pērā anō a Hairama tōna tuakana. Kāore i weheruatia rāua i te ora, ā, kāore i weheruatia rāua i te mate!

4 I te wā i haere ai a Hōhepa ki Kātiri kia tukuna atu ia anō ki ngā tikanga whakataruna o te ture, e rua, toru rānei ngā rā i mua i tana kōhurutanga, ka mea ia: “E haere ana ahau anō nei he reme kia whakamatea; engarie aiō ana ahau anō nei he ata raumati; e wātea ana tōku hinengaro i ngā hara ki te Atua, ā, ki ngā tāngata katoa hoki. ka mate hara kore ahau, ā, ka kōrerotia mōku—kua kōhurutia ia he mea āta whakarite.”—I taua ata anō, whai muri i tā Hairama whakarite kia haere—me kī pēnei pea, kia whakamatea? Āe, nā te mea i pērāhia—nāna i pānui te kowae e whai ake nei, e tata ana ki te upoko tekau mā rua o Etere, i roto i te Pukapuka a Moromona, kātahi ka tākai iho i te whārangi ki reira:

5 Ā, i pahawa ake, nā, ka inoi ake au ki te Ariki kia aroha ki ngā Tauiwi, kia whai māramatanga rātou. Ā, i pahawa ake, nā, ka kī mai te Ariki ki ahau: Kāore he aha ki a koe ki te kore ō rātou aroha nui ki a koe, kua ū pono koe; nā reira ka meinga ō kāmana kia mā. Ā, i te mea kua kite koe i tō ngoikoretanga, ka whakakahangia koe, tae atu pū anō ki te nohotanga iho i te wāhi kua whakaritea nei e ahau i roto i ngā whare nunui o tōku Matua. Ināianei ahau … e tuku poroporoaki ki ngā Tauiwi; āe rā, ki aku teina anō hoki e arohaina nei e ahau, kia tūtaki anō tātou ki te nohonga-whakawā o te Karaiti, i reira mōhio ai ngā tāngata katoa kāore ōku kāmana i te poke ki ō toto. Kua mate katoa ngā kaiwhakaatu ināianei, ā, kua mana tō rāua whakaaturanga.

6 I whā tekau mā whā tau te pakeke o Hairama Mete i te Pēpuere, 1844, ā, i toru tekau mā waru a Hōhepa Mete i te Tīhema, 1843; nā konā ka whakahuatia ake ō rāua ingoa i te taha o ngā tāngata whakapono katoa kua kōhurutia; ā, ko te utu o tēnei pukapuka o te Whakaakoranga me ngā Kawenata o te hāhi, arā, ko te toto pai ake o te rautau tekau mā iwa hei whakaputa i a rātou mō te whakaoranga o tētahi ao kua whakakinotia; ā, mehemea ka tahuna tētahi rākau kākāriki e te ahi mō te korōria o te Atua, anō te māmā kia tahuna ai ngā rākau maroke hei whakamā i te māra waina o te kino. I ora rāua mō te korōria; i mate rāua mō te korōria; ā, ko te korōria tō rāua utu mau tonu. Ka riro iho ō rāua ingoa mai i tētahi whakatipuranga ki tētahi whakatipuranga hei taonga mō te hunga kua whakatapungia.

7 Kua hara kore rāua, pērā i ngā tā rāua whakawākanga i mua, ā, kua makaia ki roto i te whare herehere i runga i ngā whakapae teka o te hunga kūpapa me ngā tāngata whakarihariha; ā, he hīri whānui ō rāua toto hara kore i runga i te papa i Kātiri e tūhono ana ki te “Moromonatanga” e kore e taea te whakakāhoretia e tētahi kōti i runga i te whenua, ā, ko ō rāua toto hara kore i runga i te puapua mau tohu o te Whenua o Irinoi, i runga i te whakapono whawhati o te Whenua e rite ana ki tā te kāwana oati, he whakaaturanga mō te pono o te rongopai mau tonu tē taea te whakahē e te ao katoa; ā, ko ō rāua toto hara kore i runga i te kara herekore, ā, i runga i te magna charta o ngā Whenua Tōpu, he māngai ia mō te whakapono o Ihu Karaiti, e whakapā atu ai ki ngā ngākau o ngā tāngata pono ki ngā iwi katoa; ā, ka karanga ake ō rāua toto hara kore me ngā toto hara kore katoa o te hunga whakapono katoa kua kōhurutia i raro i te ahurewa i kitea ai e Hoani, ki ngā Ariki o ngā Mano tae noa ki tana rapu utu mō aua toto i runga i te whenua. Āmine.