1 Whakarongo mai, E koutou e te iwi o taku hāhi, e ai tā te Ariki tō koutou Atua, me te whakarongo ake ki te kupu a te Ariki e pā ana ki a koutou—

2 Ko te Ariki, te mea e puta wawe mai ki tana temepara; ko te Ariki, te mea e heke iho ki runga i te ao me tētahi kanga hei whakawā; āe rā, ki runga i ngā iwi katoa e wareware ai ki te Atua, ā, ki runga hoki i te hunga atua kore i waenganui i a koutou.

3 Nā te mea ka huraina tōna ringa tapu ki mua i ngā karu o ngā iwi katoa, ā, ka kite ngā tōpito katoa o te whenua i te whakaoranga o tō rātou Atua.

4 Nā reira, whakatakatū i a koutou, E taku iwi; whakatapua koutou anō; whakahuihui tahi, E koutou te iwi o taku hāhi, ki runga i te whenua o Hīona, koutou katoa kāore anō kia whakahaua kia noho mai.

5 E puta atu koutou i Papurona. Kia mā koutou e ngā kaimau i ngā oko o te Ariki.

6 Karangatia ō koutou huihuinga karakia, me kōrero putuputu tētahi ki tētahi. Ā, tukua ngā tāngata katoa kia karanga ake ki te ingoa o te Ariki.

7 Āe rā, he pono tāku e mea atu anō ki a koutou, kua tae mai te wā e puaki ai te reo o te Ariki ki a koutou: E puta atu koutou i Papurona; whakahuihui i a koutou i waenganui i ngā iwi, mai i ngā hau e whā, mai i tētahi pito o te rangi ki tētahi atu.

8 Tonoa atu ngā erata o taku hāhi ki ngā iwi o tawhiti mamao; ki ngā moutere o te moana; tonoa atu ki ngā whenua kē; karangahia ngā iwi katoa, ki ngā tauiwi tuatahi, kātahi ki ngā Hūrae.

9 Ā nana, titiro, koinei tā rātou karanga, ā, ko te reo o te Ariki ki ngā iwi katoa: Haere atu koutou ki te whenua o Hīona, kia whakawhānuitia atu ngā rohe o tōku iwi, ā, kia whakakahangia ōna pou, ā, kia haere atu a Hīona ki ngā rohe huri noa.

10 Āe rā, tukua te karanga kia rere atu ki waenganui i ngā tāngata katoa: E oho, ā, whakatika ake kia haere atu ki te tūtaki i te Tāne Taumau; nana, titiro, e haere mai ana te Tāne Taumau; haere atu koutou kia tūtaki ki a ia. Me whakatakatū i a koutou anō mō taua rā nui o te Ariki.

11 Nō reira kia mataara, nā te mea kāore koutou e mōhio ana ki te rā, ki te hāora rānei.

12 Nō reira tukua rātou, te hunga kei waenganui i ngā Tauiwi kia tahuti atu ki Hīona.

13 Ā, tukua rātou nō te manga o Hura kia tahuti atu ki Hiruharama, ki ngā maunga o te whare o te Ariki.

14 E puta atu koutou i ngā iwi, mai i Papurona pū anō, i waenganui i te whakarihariha, koia te Papurona ā-wairua.

15 Engari he pono, pēnei tā te Ariki, kaua e tukua kia whāwhai, engari tukua kia whakaritea ngā mea katoa i mua i a koe; ā, ko te tangata e haere ana, tukua ia kia kaua e titiro whakamuri kei pā iho te whakangaromanga wawetanga ki runga ki a ia.

16 Whakarongo, kia rongo, E koutou e ngā tāngata o te whenua. Whakarongo ngātahi mai, e koutou e ngā erata o taku hāhi, ā, kia rongo ai i te reo o te Ariki; nā te mea e karangatia ana e ia ngā tāngata katoa, ā, e whakahaua ana ngā tāngata katoa kei ngā wāhi katoa kia rīpenetā.

17 Nana rā, kua tonoa e te Ariki te anahera e karangahia ana i waenganui pū o te rangi, e mea ana: Whakaritea e koutou te huarahi o te Ariki, ā, meatia ōna huarahi hei mea tōtika, nā te mea kua tae mai te hāora o tana haerenga mai—

18 Ina tū te Reme ki runga o Maunga Hīona, ā, me te kotahi rau whā tekau mā whā mano i tōna taha, kua tuhia te ingoa o tōna Matua ki runga i ō rātou rae.

19 Nā reira, whakatakatū koutou mō te haerenga mai o te Tāne Taumau; haere koutou, haere koutou kia tūtaki ki a ia.

20 Nana rā, ka tū ia ki runga i te maunga o Oriwete, ā, ki runga i te moana nui, arā, ko te rire nui pū anō, ki runga hoki i ngā moutere o te moana, ā, ki runga i te whenua o Hīona.

21 Ā, ka puaki atu tōna reo i Hīona, ā, ka kōrero ia i Hiruharama, ā, ka rangona tōna reo i roto i ngā iwi katoa;

22 Ā, ka rite te reo anō nei ko ngā reo o ngā wai maha, ā, anō nei ko te reo whatitiri, e whakahoroa iho ai ngā maunga, ā, e kore e kitea ngā raorao.

23 Māna te rire nui e whakahau, ā, ka āia whakamuri ki roto ki ngā whenua raki, ā, ka meinga ngā moutere hei whenua kotahi;

24 Ā, ka hoki atu anō te whenua o Hiruharama me te whenua o Hīona ki ō rāua ake wāhi, ā, ka rite te whenua ki tōna āhua i mua i tana wehenga.

25 Ā, ka tū te Ariki, āe rā te Kaiwhakaora pū anō, ki waenganui i tōna iwi, ā, ka kīngi i runga i te kikokiko katoa.

26 Ā, ka maumaharatia te hunga kei ngā whenua raki i te aroaro o te Ariki, ā, ka rongo ō rātou poropiti i tōna reo, ā, e kore tonu e pupuri i a rātou anō; ā, ka pākia e rātou ngā kohatu, ā, ka rere iho te haupapa i tō rātou aroaro.

27 Ā, ka whakarewaina ake tētahi huarahi matua i waenganui i te rire nui.

28 Ka meinga ō rātou hoariri hei pārurenga mā rātou,

29 Ā, kei ngā wāhi tītōhea e pupū ake ai ngā puna waiora; ā, e kore anō te whenua maroke e matewai atu anō.

30 Ā, ka whakaputaina mai ō rātou taonga ki ngā tamariki a Eparaima, aku pononga.

31 Ā, ka wiriwiri ngā rohe o ngā hiwi mutunga kore i tō rātou aroaro.

32 Ā, i reira hinga iho ai rātou, ā, ka karaunatia ki te korōria, ko Hīona pū anō, e ngā ringaringa o ngā pononga a te Ariki, ko ngā tamariki pū anō a Eparaima.

33 Ā, ka kikī rātou i ngā waiata o te koa mutunga kore.

34 Nana, koinei te manaakitanga o te Atua mau tonu ki runga ki ngā iwi o Iharaira, ā, ko te manaakitanga nui ake ki runga i te māhunga o Eparaima me ōna hoa.

35 Ā, ko rātou hoki nō te iwi o Hura, whai muri iho i tō rātou mamae, ka whakatapua ki ngā tapu i mua i te Ariki, ki te noho i tōna aroaro i te ao, i te pō, mō āke tonu atu.

36 Ināianei ā, he pono tā te Ariki, kia mōhiotia ēnei mea ki waenganui i a koutou, E ngā tāngata o te whenua, kua tonoa atu e au taku anahera e rere ana ki roto i te rangi, i a ia te rongopai mau tonu, kua puta mai nei ki ētahi, ā, kua whakataua atu ki te tangata, e puta mai ai ki te hunga tokomaha i runga i te whenua.

37 Ā, ka kauhautia atu tēnei rongopai ki ngā iwi, ngā hapū, ngā reo me ngā huihuinga tāngata katoa.

38 Ā, ka haere atu ngā pononga a te Atua, e mea ana i tētahi reo kaha: Kia wehi ki te Atua, ā, whakakorōriatia ia, nā te mea kua tae mai te hāora o tana whakawākanga;

39 Ā, me koropiko ki a ia ki te mea nāna te rangi, me te whenua, me te moana, me ngā mātāpuna o ngā wai—

40 E karangatia ana te ingoa o te Ariki i te ao me te pō, e mea ana: Auē, haehaea e koe ngā rangi, kia heke iho mai koe, kia rere iho ngā maunga i tō aroaro.

41 Ā, ka whakautua ki runga ki ō rātou māhunga; nā te mea ka rite te aroaro o te Ariki ki te ahi whakarewa e mura ana, ā, ka rite ki te ahi koropupū i ngā wai.

42 E te Ariki, ka heke iho mai koe kia whakamōhiotia atu ō hoariri ki a koe, ā, ka tūoioi ngā iwi katoa i tō aroaro—

43 Ina meatia e koe ngā mahi whakarihariha, ngā mea kāore e rapua ana e rātou;

44 Āe rā, ina heke iho mai koe, kātahi ka rere iho ngā maunga i tō aroaro, māu e tūtaki ki a ia te mea e hari ana, ā, e mahi tika ana, e mahara ana ki a koe i ō huarahi.

45 Nā, mai i te timatanga o te ao, kāore anō rānei te tangata kia rongo, kia whakamāramahia rānei e te taringa, kāore anō rānei kia kitea e te karu, E te Atua, hāunga koe, anō te nui o ngā mea kua whakaritea mai nei e koe mō te tangata e tatari ana ki a koe.

46 Ā, ka kī ake: Ko wai tēnei e heke iho mai ana i te Atua i te rangi me ngā kākahu kara; āe rā, mai i ngā rohe kāore e mōhiotia ana, e kākahuria ana i ōna kākahu korōria, e haere ana i runga i te nui o tōna kaha?

47 Ā, ka kī ake ia: Ko au te mea nāna nei i kōrero i runga i te tika, e kaha ana ki te whakaora.

48 Ā, ka whero ngā kākahu o te Ariki, ā, ka pērā ōna kākahu ki te mea e totoa nei i roto i te tūranga wāina.

49 Ā, anō te nui o te korōria o tana aroaro nā konā ka huna te rā i tōna mata i runga i te whakamā, ā, ka kaiponu te marama i tōna māramatanga, ā, ka whiua ngā whetū i ō rātou wāhi.

50 Ā, ka rangona tōna reo: Kua takahia e ahau anake te takahanga wāina, ā, kua whakaritea te whakawā ki runga ki tōku iwi; ā, ko ahau anake;

51 Ā, kua takahia rātou i runga i te riri, ā, nāku rātou i takahi i runga i tōku riri, ā, kia ruiruia iho ō rātou toto ki runga i ōku kākahu, ā, kua whakaparua ōku kākahu katoa; nā te mea koinei te rā o taku ngaki mate i roto nei i tōku ngākau.

52 Ināianei ā kua tae mai te tau o tāku i hoko ai; ā, ka whakahua ake rātou i te aroha nui o tō rātou Ariki, me ngā mea katoa kua whakataua iho e ia ki runga ki a rātou e rite ana ki tana painga, ā, e rite ana ki tōna aroha nui, mō āke tonu atu.

53 I whakamamaetia ia i roto i ō rātou ake whakamamaetanga. Ā, nā te anahera o tana aroaro rātou i whakaora; i runga i tōna aroha, me tōna atawhai, nāna rātou i hoko, nāna hoki rātou i pīkau, i waha i ngā rā onamata katoa;

54 Āe rā, me Enoka anō hoki, me te hunga i tōna taha; ngā poropiti i mua i a ia; me Noa anō hoki, me te hunga katoa i mua i a ia; me Mohi anō hoki, me te hunga katoa i mua i a ia;

55 Ā, mai i a Mohi ki a Irāia, ā, mai i a Irāia ki a Hoani, i te taha i a te Karaiti i tōna aranga, me ngā āpotoro tapu, me Aperahama, Ihaka, rātou ko Hākopa, kei te aroaro o te Reme.

56 Ā, ka tūwheratia ake ngā rua tūpāpaku o te hunga tapu; ā, ka puta mai rātou me te tū ki te ringa matau o te Reme, ina tū ake ia ki runga i te Maunga o Hīona, ā, ki runga i te pā tapu, te Hiruharama Hou; ā, ka waiatahia e rātou te waiata a te Reme, ao atu, pō atu mō āke tonu atu.

57 Ā, mō tēnei take, kia meinga te tangata hei kairapu i ngā korōria e huraina ai, ka tonoa atu e te Ariki te raneatanga o tana rongopai, tana kawenata mau tonu, e whakamāramahia ana i runga i te mārama me te ngāwari—

58 Hei whakatakatū i te hunga ngoikore mō aua mea e haere mai ana ki runga i te whenua, ā, mō tā te Ariki hei te rā ina whakapōauautia te hunga matatau e te hunga ngoikore, ā, ka meinga te mea iti hei iwi kaha, ā, mā ngā mea e rua e mea ai ngā tekau mano kia tahuti atu.

59 Ā, mā ngā mea ngoikore o te whenua tā te Ariki e patu i ngā iwi ki te kaha o tōna Wairua.

60 Ā, mō tēnei take i homai ai ēnei whakahaunga; i whakahaua kia kaiponutia i te ao i te rā i homai ai, engari ināianei e tika ana kia puta atu ki te kikokiko katoa—

61 Ā, pēnei e rite ana ki ngā whakaaro me tā te Ariki e pai ai, arā, te kaiwhakahaere o ngā kikokiko katoa.

62 Ā, ka hoatu te oranga tonutanga ki te tangata e rīpenetā ai, e whakatapu ai i a ia anō i te aoraro o te Ariki.

63 Ā, ka whakatutukihia ki runga i te hunga e kore nei e whakarongo ki te reo o te Ariki ērā mea kua tuhia e te poropiti Mohi, tērā ka hātepea atu rātou ki waho o te iwi.

64 Waihoki, ko aua mea anō i tuhia ai e te poropiti Maraki: Nā te mea, nana, e tata mai ana te rā e wera ai te whenua anō nei he umu, ā, ka meinga te hunga whakapehapeha, āe rā, te hunga katoa e mahi kino ana, hei pāpapa; ā, ka wera rātou katoa i te rā e kainamu mai ana, e ai tā te Ariki o ngā Mano, mā konā kāore ō rātou pakiaka, manga rānei.

65 Nā reira, koinei te whakautu a te Ariki ki a rātou:

66 I taua rā i haere mai ai au ki ōku ake, kāore tētahi tangata i waenganui i a koutou i whiwhi i ahau, ā, ka āia atu koutou.

67 I a au e karanga ana anō kāore tētahi o koutou i whakautu; heoi kāore i whakapotohia kau iho taku ringa kia kore e taea te hoko, taku kaha rānei hei whakaputa.

68 Nana, ka maroke te moana i taku kohete. Māku ngā awa hei koraha; ā rātou ika kia pirau, ā, kia mate i te mate inu.

69 E whakakākahuria ana e au ngā rangi ki te mangu kerekere, ā, ka hangaia e ahau he kahuata hei uhi mō rātou.

70 Ā, koinei tā koutou i tōku ringa—ka tīraha iho koutou i runga i te pōuri.

71 Nana, titiro, kāore i reira tētahi hei whakaputa i a koutou; nā te mea kīhai koutou i whakarongo ki tōku reo i te wā i karanga atu au ki a koutou i ngā rangi; kīhai koutou i whakapono ki aku pononga, ā, i te wā i tonoa atu ai rātou ki a koutou kīhai koutou i whiwhi ai i a rātou.

72 Nā reira, i hīria ake e rātou te whakaaturanga, ā, i herea ake te ture, ā, i tukuna atu koutou ki te pōuritanga.

73 Ka haere atu ēnei ki roto ki te pōuritanga ki tua, i reira te auē, te tangihanga, me te tetēatanga o ngā niho.

74 Nana, nā te Ariki tō koutou Atua i kōrero. Āmine.