1 Nim no saib seb, tau muaj tias kuv, Yakhauj, tau hais lus ntau los qhuab qhia kuv cov neeg, (thiab kuv tsis muaj cuab kav sau tsuas yog qhov me ntsis ntawm kuv tej lus xwb, vim yog qhov uas muab peb tej lus sau rau saum cov phiaj nyuaj heev) thiab peb paub tias tej yam uas peb muab sau rau saum cov phiaj yeej yuav nyob tsis ploj mus;

2 Tiam sis txhua yam uas yog peb tsis muab sau rau saum cov phiaj ces yeej yuav piam sij thiab ploj mus; tiam sis peb muaj cuab kav sau ob peb lo lus rau saum cov phiaj, kom yuav ua rau peb cov me nyuam, thiab rau peb cov kwv tij uas peb hlub, paub me me txog peb, los sis txog lawv cov poj koob yawm txwv—

3 Nim no peb zoo siab heev rau tej no; thiab peb rau siab ntso ua hauj lwm sau tej lus no rau saum cov phiaj, cia siab ntsoov tias peb cov kwv tij uas peb hlub thiab peb cov me nyuam yuav tau txais cov lus no nrog lub siab ua tsaug ntxaws, thiab ua zoo nyeem cov lus no xwv kom lawv yuav kawm nrog kev xyiv fab es tsis yog nrog kev tu siab, thiab tsis thuam txog lawv thawj nkawm niam txiv.

4 Vim, rau lub ntsiab no peb thiaj sau tej yam no, xwv kom lawv yuav paub tias peb paub txog Khetos, thiab peb tau muaj kev cia siab rau nws lub yeeb koob ntau pua xyoo ua ntej nws los; thiab tsis yog peb tus kheej xwb uas tau muaj kev cia siab rau nws lub yeeb koob, tiam sis tag nrho cov yaj saub dawb huv uas nyob ua ntej peb thiab.

5 Saib seb, lawv ntseeg Khetos thiab teev tiam Leej Txiv los ntawm nws lub npe, thiab peb los kuj teev tiam Leej Txiv los ntawm nws lub npe thiab. Thiab yog vim lub ntsiab no peb thiaj coj Mauxes txoj kev cai, vim tej no taw ntsoov peb tej ntsuj plig mus rau nws; thiab yog vim li no Vajtswv pom zoo tias peb ua ncaj ncees, ib yam li tau muaj rau Anplaham nyob hauv roob moj sab qhua kom ua raws li Vajtswv tej lus txib ntawm kev muab nws tus tub Ixaj los txi, uas yog ib lub cim piv txog Vajtswv thiab nws Tib Leeg Tub.

6 Yog li ntawd, peb kawm tej uas cov yaj saub tau sau, thiab peb muaj ntau yam kev tshwm sim thiab muaj lub txiaj ntsim qhia tau tej yuav muaj los yav tom ntej; thiab vim peb muaj tag nrho tej pov thawj no peb thiaj tau txais kev cia siab, thiab peb txoj kev ntseeg hloov kom ua khov kho, ua rau peb thiaj muaj cuab kav txib los ntawm Yexus lub npe thiab tej ntoo, thiab tej roob, thiab tej ntas dej hiav txwv puav leej mloog peb lus.

7 Txawm li ntawd los, tus Tswv uas yog Vajtswv qhia rau peb txog peb txoj kev qaug zog xwv kom peb yuav paub tias twb yog los ntawm nws txoj kev tshav ntuj, thiab nws tej kev nqis los nrog noob neej nyob, es peb thiaj muaj hwj chim ua tau tej yam no.

8 Saib seb, tej yam uas tus Tswv ua yeej yog tej uas tseem ceeb thiab zoo kawg nkaus. Nws tej txuj ci uas neeg paub tsis txog los tib neeg yuav nrhiav tsis tau; thiab tsis muaj hnub uas tib neeg yuav nrhiav tau tag nrho nws tej kev li. Thiab tsis muaj leej twg yuav paub txog nws tej kev tsuas yog muab ua tshwm sim los rau nws xwb; yog li ntawd, cov kwv tij, tsis txhob muab Vajtswv tej kev tshwm sim saib tsis rau nqi.

9 Vim saib seb, los ntawm lub hwj chim ntawm nws txoj lus tib neeg tshwm los rau hauv lub ntiaj teb, lub ntiaj teb uas yog lub hwj chim ntawm nws txoj lus tsim. Yog li ntawd, yog hais tias Vajtswv muaj peev xwm hais lus es cia li muaj lub ntiaj teb, thiab hais lus es cia li tsim tau tib neeg, auj yog li ntawd, vim li cas nws ho tsis muaj hwj chim txib lub ntiaj teb, los sis txib nws tej tes tej hauj lwm nyob hauv lub ntiaj teb, raws li nws lub siab xav thiab siab nyiam?

10 Yog li ntawd, cov kwv tij, tsis txhob nrhiav kev ntuas tus Tswv, tiam sis txais lus ntuas los ntawm nws txhais tes. Vim saib seb, nej tus kheej twb paub hais tias nws ntuas nrog tswv yim, thiab nrog kev txim lij, thiab nrog kev hlub tshua uas ntau heev, thoob plaws tag nrho nws tej hauj lwm.

11 Yog li ntawd, cov kwv tij uas kuv hlub, cia li los sib raug zoo nrog nws los ntawm Khetos, uas yog nws Tib Leeg Tub txoj kev theej txhoj, thiab nej yuav tau txais ib txoj kev sawv rov los, raws li lub hwj chim ntawm txoj kev sawv rov los uas los ntawm Khetos, thiab muab nej uas yog Khetos thawj cov txiv ntoo pub rau Vajtswv, vim nej muaj kev ntseeg, thiab tau txais txoj kev cia siab zoo tias nej yuav tau yeeb koob los ntawm nws ua ntej nws los tshwm sim ntawm sab nqaij daim tawv.

12 Thiab nim no, cov uas kuv hlub, txhob xav tsis thoob tias cas kuv qhia tej yam no rau nej; yog vim li cas thiaj yuav tsis qhia txog Khetos txoj kev theej txhoj, thiab nrhiav kom tau txoj kev paub zoo tag nrho txog nws, ib yam li nrhiav kom tau txoj kev paub txog txoj kev sawv rov los thiab lub neej uas yuav los?

13 Saib seb, kuv cov kwv tij, tus uas yuav qhia tej yuav muaj los yav tom ntej, cia nws yeej meem qhia tej yuav muaj los yav tom ntej raws li tib neeg txoj kev to taub; vim tus Ntsuj Plig hais qhov tseeb thiab tsis dag. Yog li ntawd, nws hais txog tej uas yeej muaj tiag, thiab txog tej uas yeej yuav muaj tiag; yog li ntawd, tau muab tej yam no ua tshwm sim los rau peb paub tseeb, rau peb tej ntsuj plig txoj kev cawm seej. Tiam sis saib seb, peb tsis yog tib cov uas ua pov thawj txog tej yam no nkaus xwb; vim Vajtswv kuj tau hais tej yam no rau cov yaj saub thaum ub thiab.

14 Tiam sis saib seb, cov Neeg Yudais yog ib co neeg tawv ncauj; thiab lawv tsis quav ntsej txog tej lus uas qhia meej, thiab lawv tua cov yaj saub, thiab nrhiav tej yam uas lawv tsis to taub. Yog li ntawd, vim yog lawv txoj kev dig muag, uas yog txoj kev dig muag uas tau los vim lawv ntsia dhau lub hom phiaj, lawv yuav tsum poob; vim Vajtswv tau muab nws txoj kev qhia meej tshem tawm ntawm lawv mus, thiab tau muab ntau yam rau lawv uas lawv tsis muaj peev xwm to taub, vim yog lawv xav tau tej ntawd. Thiab vim yog lawv xav tau tej ntawd Vajtswv thiaj tau ua tej ntawd, xwv kom lawv yuav dawm ko taw.

15 Thiab nim no tus Ntsuj Plig tshoov kuv, Yakhauj, lub siab kom qhia tej yuav muaj los yav tom ntej; vim kuv paub los ntawm tus Ntsuj Plig tej kev tshoov siab uas nyob hauv kuv tias, los ntawm cov Neeg Yudais txoj kev dawm ko taw lawv yuav xyeej lub pob zeb uas yog lawv qhov chaw tsa thiab lub hauv paus ruaj khov.

16 Tiam sis saib seb, raws li hauv vaj lug kub, lub pob zeb no yuav los ua lub hauv paus tseem ceeb, thiab lub hauv paus kawg, thiab tib lub hauv paus tseeb, uas cov Neeg Yudais tsa tau rau saud.

17 Thiab nim no, cov uas kuv hlub, tom qab lawv cov no tau xyeej lub hauv paus tseeb, lawv yuav ua li cas muaj peev xwm tsa tau rau saum lub hauv paus no, xwv kom lub hauv paus no yuav los ua lub thawj ntawm lawv lub ces kaum?

18 Saib seb, kuv cov kwv tij uas kuv hlub es, kuv yuav qhia qhov uas neeg paub tsis txog no rau nej; yog hais tias tsis muaj tej yam dab tsi ua rau kuv plam qhov ruaj khov los ntawm tus Ntsuj Plig, thiab ua rau kuv dawm ko taw vim yog kuv txhawj nej.