1 Kwaye ngoku kwenzekile okokuba kubekho isihlwele esikhulu sihlanganisane kunye, sabantu bakaNifayi, macala onke etempile eyaye ikulo ilizwe iNdyebo; kwaye babemangele kwaye bemangalisiwe omnye nomnye, kwaye bebonisana omnye nomnye utshintso olukhulu nolumangalisayo olwenzekileyo.

2 Kwaye babencokola kanjalo ngalo Yesu Krestu, ekwakunikwe umqondiso ngaye malunga nokufa kwakhe.

3 Kwaye kwenzekile okokuba ngeli lixa babencokola njalo omnye nomnye, beva izwi ngokungathi laliphuma emazulwini; baza baphosa amehlo abo macala onke, kuba babengaliqondi izwi elo ababeliva; kwaye yayingelozwi lirhabaxa, ingelilo nezwi elikhulu; nangona kunjalo, laye ililizwi elincinane elaye labahlaba abo baye baliva embindini, kangangokuba kwakungekho lungu lomzimba wabo elalingazange lingenzeki ukuba lingcangcazele; ewe, laye labahlaba kanye emphefumlweni, kwaye laye lazibangela iintliziyo zabo ukuba zitshise.

4 Kwaye kwenzekile okokuba kwakhona baliva izwi, baza abaliqonda.

5 Kwaye kwakhona ilixa lesithathu baye baliva izwi, kwaye baye bazivula iindlebe zabo ukuba balive; kwaye amehlo abo ayejolise ngakuso isandi salo; kwaye baye bakhangela ngokuthe ntshongasezulwini, apho isandi sasivela ngakhona.

6 Kwaye qaphelani, okwesithathu baye baliqonda izwi abalivayo; laza lathi kubo:

7 Mboneni uNyana wam oyiNtanda, endikholiweyo nguye, endilizukisileyo ngaye igama lam—mveni yena.

8 Kwaye kwenzekile, bakube beliqonda bawaphosa amehlo abo phezulu kwakhona ngasezulwini; kwaye qaphelani, babona iNdoda isehla iphuma ezulwini; kwaye yayinxibe isambatho esimhlophe; yaze yehlela ezantsi yaza yema embindini wabo; aza amehlo aso sonke isihlwele aguqukela kuyo, kwaye babengekhe balinge ukuyivula imilomo yabo, kwanomnye komnye, kwaye bengazi ukuba yayithetha ntoni na, kuba babecinga ukuba yayiyingelosi leyo yayibonakala kubo.

9 Kwaye kwenzekile okokuba yasolula isandla sayo yaza yabhekisa kubo abantu, isithi:

10 Qaphelani, Mna ndinguYesu Krestu, lowo abaprofeti bangqinayo uya kuza ehlabathini.

11 Kwaye qaphelani, mna ndikukukhanya nobomi behlabathi; kwaye ndisele kuloo ndebe ikrakra awathi uBawo wandinika yona, kwaye ndamzukisa uBawo ngokuthabathela kum izono zehlabathi, endithe ngayo ndathobela intando kaBawo kuzo zonke izinto ukususela ekuqalekeni.

12 Kwaye kwenzekile okokuba akuba uYesu ewathethile la mazwi isihlwele sonke siphela sawela emhlabeni; kuba sakhumbula okokuba kwakuprofethiwe phakathi kwaso okokuba uKrestu kumele azibonakalise kubo emva kokunyukela kwakhe ezulwini.

13 Kwaye kwenzekile okokuba iNkosi yathetha kubo isithi:

14 Phakamani nize nisondele kum, ukuze nibe nokufaka izandla zenu ecaleni lam, kananjalo nokuba nibe nokuweva amanxeba ezikhonkwane ezandleni zam kwaye nasezinyaweni zam, ukuze nazi okokuba mna ndinguThixo kaSirayeli, noThixo wawo wonke umhlaba, kwaye ndabulawa ngenxa yezono zehlabathi.

15 Kwaye kwenzekile okokuba isihlwele sabheka phambili, saza sazifaka izandla zaso ecaleni lakhe, baza baweva amanxeba ezikhonkwane ezandleni zakhe nasezinyaweni zakhe; kwaye oku baye bakwenza, bebheka phambili ngabanye ngabanye bade bonke babe babheke phambili, kwaye baye babona ngamehlo abo kwaye baye beva ngezandla zabo, kwaye bazi ngokuqinisekileyo kwaye baye banika ubungqina, bokokuba yayinguye, lowo kwakubhaliwe ngaye ngabaprofeti, oya kuza.

16 Kwaye bakuba bonke bebheke phambili kwaye bezingqinele ngokwabo, baye badanduluka ngamxhelo mnye, besithi:

17 Hosana! Malibongwe igama loThixo oseNyangweni! Kwaye baye bawela phantsi ezinyaweni zikaYesu, kwaye baye bamnqula.

18 Kwaye kwenzekile okokuba wabhekisa kuNifayi (kuba uNifayi wayephakathi kwesihlwele) waza wamyalela okokuba makeze ngaphambili.

19 Waza uNifayi waphakama waza wabheka phambili, waza waqubuda phambi kwayo iNkosi kwaye waye wazanga iinyawo zayo.

20 Yaza iNkosi yamyalela okokuba makaphakame. Waza waphakama waza wema phambi kwayo.

21 Yaza iNkosi yathi kuye: Ndikunika igunya lokokuba uya kubabhaptiza aba bantu xa ndiya kube kwakhona ndinyukele ezulwini.

22 Yaza kwakhona iNkosi yabiza abanye, yaza yathetha kubo ngokunjalo; yaza yabanika igunya lokubhaptiza. Kwaye yathi kubo: Ngolu hlobo niya kubhaptiza; kwaye akuyi kubakho zimpikiswano phakathi kwenu.

23 Inene ndithi kuni, ukuthi nabanina oguqukayo ezonweni zakhe ngenxa yamazwi enu, kwaye anqwenele ukubhaptizwa egameni lam, ngale ndlela niya kubabhaptiza—Qaphelani, niya kwehlela ezantsi nize nime emanzini, kwaye egameni lam niya kubabhaptiza.

24 Kwaye ngoku qaphelani, la ngamazwi eniya kuwathetha, nibabiza ngegama, niya kuthi:

25 Ndinegunya endilinikiweyo nguYesu Krestu, ndiya kubhaptiza egameni loYise, neloNyana, neloMoya oyiNgcwele. Amen.

26 Kwaye ngoko niya kubantywilisela emanzini, nize niphume kwakhona emanzini.

27 Kwaye ngolu hlobo niya kubabhaptiza egameni lam; kuba qaphelani, inene ndithi kuni, ukuthi uYise, noNyana, noMoya oyiNgcwele banye, kwaye mna ndikuye uBawo, kwaye noBawo ukum, kwaye uBawo kunye nam sibanye.

28 Kwaye ngokohlobo endiniyalele ngalo njalo niya kubhaptiza. Kwaye akusayi kubakho zimpikiswano phakathi kwenu, njengokuba kude kube ngoku bekunjalo; kungayi kubakho zimpikiswano phakathi kwenu malunga namanqaku emfundiso yam, njengokuba kude kwaba ngoku bekunjalo.

29 Kuba inene, inene ndithi kuni, lowo unomoya wembambano akanguye owam, kodwa ungowakhe umtyholi, onguyise wembambano, kwaye uyazivuselela iintliziyo zabantwana babantu ukuba balwe ngomsindo, omnye nomnye.

30 Qaphelani, le asiyiyo imfundiso yam, ukuvuselela iintliziyo zabantu ngomsindo, omnye ngokuchasene nomnye; kodwa le yiyo imfundiso yam, yokokuba izinto ezinjalo kumele zipheliswe.

31 Qaphelani, inene, inene, ndithi kuni, ndiya kuyivakalisa kuni imfundiso yam.

32 Kwaye le yiyo imfundiso yam, kwaye iyiyo imfundiso awathi uBawo wandinika yona; kwaye ndinika ubungqina ngoBawo, noBawo unika ubungqina ngam, noMoya oyiNgcwele unika ubungqina ngoBawo nangam; kwaye ndinika ubungqina bokokuba uBawo uyalela bonke abantu, endaweni zonke, ukuba baguquke kwaye bakholelwe kum.

33 Kwaye nobani abakholelwayo kum, baze babhaptizwe, kwabona abo baya kusindiswa; kwaye bangabo baya kubudla ilifa ubukumkani bukaThixo.

34 Kwaye nabani na ongakholelwayo kum, aze angabhaptizwa, uya kugwetywa.

35 Inene, inene, ndithi kuni, ukuthi le yimfundiso yam, kwaye ndinika ubungqina ngayo ivela kuBawo; kwaye nabani na okholelwayo kum uyakholelwa nakuBawo kanjalo; kwaye kulowo uBawo uya kunika ubungqina ngam, kuba uya kumvelela ngomlilo nangawo uMoya oyiNgcwele.

36 Kwaye njalo uBawo uya kunika ubungqina ngam, kwaye uMoya oyiNgcwele uya kunika ubungqina kulowo ngoBawo nangam; kuba uBawo, nam, noMoya oyiNgcwele sibanye.

37 Kwaye ndithi kwakhona kuni, kufuneka niguquke, nize nibhaptizwe egameni lam, nibe njengabantwana abancinane, nize egameni, okanye aninako nangayiphina indlela ukuzifumana ezi zinto.

38 Kwaye kwakhona ndithi kuni, kufuneka niguquke, kwaye nibhaptizwe egameni lam, kwaye nibe njengomntwana omncinane, okanye aninako nangayiphina indlela ukubudla ilifa ubukumkani bukaThixo.

39 Inene, inene, ndithi kuni, ukuthi le yiyo imfundiso yam, kwaye nabani na owakhela phezu kwale wakhela phezu kolwalwa lwam, kwaye amasango esihogo awayi koyisa ngokuchasene nabo.

40 Kwaye nabani na oya kuvakalisa ngaphezulu okanye ngaphantsi kunoku, aze ayimisele njengemfundiso yam, yena lowo uvela kongendawo, kwaye akakhelwanga phezu kolwalwa lwam; kodwa wakhelwe phezu kwesiseko sentlabathi, kwaye amasango esihogo ahleli evulekile ukuba amamkele onjalo zakuba zifikile izikhukula kwaye nemimoya ibethe phezu kwakhe.

41 Ke ngoko, bhekani phambili kubo aba bantu, nize niwavakalise amazwi lawo endiwathethileyo, kuzo zonke iziphelo zomhlaba.