1 Ao ngkai tariu aika kam tangiraki, I a tia ni wareki bwaai aikai bwa kam aonga n atai bwaai aika kaineti ma ana ^aberita aika tabu te Uea are e a tia ni karaoia ma te bata are Iteraera—

2 Bwa e a tia n taetae nakoia Iutaia, ni wiia ana burabeti aika a tabu, ma n moan rikin bwaai, man te roro teuana nakon te roro teuana, ni karokoa te tai are a na manga ^akaokaki iai nakon te ekaretia ae koaua ma ana nanai te Atua; ike a na manga ^bbotaki ni mwengaia iaon ^caban rikiia, ao a na manga tei iaon abaia ni berita ni kabane.

3 Taraia tariu aika kam tangiraki, I a taekin bwaai aikai nakoimi bwa kam aonga ni kimwareirei, ao n ^aeuti atuumi n aki toki, ibukin taian kakabwaia aika e na anga te Uea ae te Atua nakoia natimi.

4 Bwa I ataia ae kam a tia ni karaoa te ukeuke ae korakora, angiia mwaitimi, ni kan atai kanoan bwaai aika a na roko; mangaia ae I ataia bwa kam ataia ae e na roko te kara nakon rabwatara, ao ni mate; e ngae n anne ao ti na kona n noora te Atua n ^arabwatara aikai.

5 Eng, I ataia ae kam ataia bwa e na kaoti n te rabwata nakoia ake a mena i Ierutarem, are ti mwananga mai iai; bwa e riai bwa e na kaoti i buakoia; bwa e riai bwa e na rinanon te maiu n rabwata te ^aTia Karikibwai n ai aroia aomata, ao ni mate ibukiia aomata ni ^bkabane, bwa aonga ni bane n toro irouna aomata ni kabane.

6 Bwa ngkai e reke te mate nakoia aomata ni kabane, ao bwa e aonga ni kakoroaki bukin ana ^ababaire n nanoanga te Tia Karikibwai ae kakannato, e riai n iai te mwaaka ni ^bmangauti, ao e riai bwa e na reke te mangauti nakoia aomata ni kaitaraa te ^cbwaka; ao e a roko te bwaka ibukin riaoan te tua; ao ngkai e rinanon te bwaka te aomata ao a na ^dteweaki nako mai matan te Uea.

7 Mangaia ae e riai n ^aakea tokin te ^bmwakuri ni kamaiu—ma ngkana iai tokin te mwakuri ni kamaiu ao te rabwata ae mka aio e aki kona ni katoka te aki mka. Mangaia ae te ^cmoan motiki taeka are e bwakara te aomata e riai bwa e na ^dtiku n aki totoki. Ao ngkana ngaia anne e na wene te rabwata aio ni mka ao n tamruru n okira te aonaba are e karikaki mai iai, ao n aki mangauti.

8 Ai korakorara ^awanawanan te Atua, ana ^bnanoanga ma ana ^cakoi! Bwa taraia, ngke ^darona bwa a na aki mangauti rabwatara ao a na riki tamneira bwa ana toro te anera are ^ebwaka mai matan te Atua ae Akea Tokina, ao n riki bwa te ^friaboro, n aki mangauti.

9 Ao a na riki tamneira n ai arona, ao ti na riki bwa taian riaboro, ana ^aanera te riaboro, aika a na ^bkararoaaki mai matan te Atua, ao ni maeka ma taman taian ^ckewe, i nanon te korakai, n aiarona; eng, n aiaron te aomata are e ^dkamwaneia ara moan karo, are e ^eonika rabwatana nakon ^faneran te oota, ao ni kamangaoi nanoia natiia aomata bwa a na riki bwa koraki n tiritiri ao ni karaoi ^gbotaki ni karaba aika buakaka aika mwakurin te roo.

10 Ai korakora ra ana raoiroi Atuara, are e a tia ni katauraoa te kawai ibukira are ti kona iai ni birinako mai nanon bain te man ae kakamaku aio; eng, te man ae kakamaku anne, te ^amate ma ^bmoone, are I aranna bwa maten te rabwata, ao maten naba te tamnei.

11 Ao man te kawai ni kamaiu are e ^akatauraoia Atuara, ae Atuan Iteraera ae Tabu, te ^bmate aio, are I a tia n taekinna, ae te mate n rabwata, e na kainaomataia ana mate; are te mate ae te rua ni mate.

12 Ao te ^amate are I a tia n taekinna, ae te mate n tamnei, e na kainaomataia ana mate; are te mate n tamnei bon ^bmoone; ngaia ae te mate ao moone a na kainaomataia aia mate, ao moone e na kainaomataia tamnei ake e tautoronia, ao te rua ni mate e na kainaomataia rabwata ake e tautoronia, ao a na manga ikotaki rabwataia ma ^ctamneia aomata n ^driki bwa ti teuana; ao e na riki aio rinanon mwaakan te mangauti are mwaakan Atuan Iteraera ae Tabu.

13 O ai korakora ra ana ^ababaire Atuara! Bwa irarikin aei ao ana ^bbwaretaiti te Atua e na kainaomataia tamneia aika a raoiroi, ao te rua ni mate e na kainaomataia rabwataia aika a raoiroi; ao a na ^cmanga ikotaki te tamnei ma te rabwata n ti teuana, aomata ni kabane a na riki n aki mka, ao a na ^daki maamate, ao n riki bwa tamnei aika a maiu, n reke irouia te ^ewanawana ae n ^fai arora aika iai rabwatara, ma e na kakororaoaki raoi wanawanara.

14 Ngaia ae ti na karekea te ^aatatai ae kororaoi n ara ^bbure, ni kabane, ma ara aki itiaki ma ara ^cbebeekan; ao aika a raoiroi a na karekea te atatai ae kororaoi n aia kimwareirei, ao ^draoiroia ni ^ekunnikaiaki n te ^fitiaki, eng, n te ^gninira ae e raoiroi.

15 Ao e na koro bukina bwa ngke a tia aomata ni kabane n rinanon te moani mate nakon te maiu, n te maiu n aki maamate, ao a na tei i matan ana kai n toka ni ^amotikitaeka Atuan Iteraera ae Tabu; ao e na karaoaki te ^bmotikitaeka, ao a na motikaki taekaia n aron ana motikitaeka ae tabu te Atua.

16 Ao e koaua n aron ae maiu te Uea, n aron are e a tia n taekinna te Uea ae te Atua, ao bon ana ^ataeka ae akea tokina, ae aki kona ni ^bbua, bwa a teimatoa n raoiroi ake a tia n raoiroi, ao aika a ^ckammaira a na teimatoa ni ^dkammaira; ngaia ae aomata aika a kammaira bon te ^eriaboro ma ana anera; ao a na nako nakon te ai ae ^faki totoki; are e a tia ni katauraoaki ibukiia; ao karawawataaia aiaron te ^gnei n ai, ao te burimton are e waerake urana n aki totoki ao akea tokina.

17 O ai korakorara ao ai ^amotiraoira Atuara! Bwa e kakoroi bukin ana taeka, aika a tia n otinako mai wiina, ao a na kakoroaki bukin ana tua.

18 Ma taraia, ngkami aika a raoiroi, ana ^aaomata aika itiaki Atuan Iteraera ae Tabu, aika a kakoaua Atuan Iteraera ae Tabu, aika a tia n teimatoa n rinanon te ^bbwainikirinaki man te aonaba, ao n aki ongea te kamamaeaki iai, e na ^creke irouia ^duean te Atua, are e a tia ni katauraoaki ibukiia ^eman moan karikan te aonaba, ao kimwareireia e na onrake n ^faki toki.

19 O ai korakora ra ana nanoanga Atuara, ae Atuan Iteraera ae Tabu! Bwa e ^akamaiuia ana aomata aika a itiaki mai iroun te man ae ^bkakamaku ae te riaboro, ao te mate, ao ^cmoone, ao te nei n ai, ao te burimton ae te kammarakaki n aki totoki.

20 O ai korakora ra ^atabun Atuara! Bwa e ^batai bwaai ni kabane, ao bon akea te bwai ae e aki ataa taekana.

21 Ao e a roko nakon te aonaba bwa e na ^akamaiuia aomata ni kabane ake a ongo ni bwanaana; bwa taraia, e a tia ni kammarakaki ibukiia aomata ni kabane, eng, ni ^bmarakiia bwaai ni kabane aika a maiu, n ai aroia mwaane, aine, ma ataei, aika kaain ana utu ^cAtam.

22 Ao e karaoa aio bwa e aonga ni kona n reke te mangauti nakoia aomata ni kabane, bwa aonga n tei aomata ni kabane i matana n te bong ni motikitaeka ae korakora.

23 Ao e tuatua nakoia aomata ni kabane bwa a na ^arairinanoia, ao a na ^bbwabetitoaki n arana, ao ni karekea i nanoia te onimaki ae kororaoi iroun Atuan Iteraera ae Tabu, bwa ngkana a aki ao a na aki kona ni kamaiuaki nako nanon uean te Atua.

24 Ao ngkana a aki kan rairinanoia ma ni karekea kakoauan ^aarana, ma ni bwabetitoaki n arana, ao n ^bteimatoa ni karokoa te toki, ao a na ^ckabuakakaaki; bwa e a tia n taekina aio te Uea ae te Atua, ae Atuan Iteraera ae Tabu.

25 Mangaia ae e a tia n anga te ^atua; ao ike ^bakea te tua are e taekinaki ao a na akea naba te rekenikai; ao ngkana akea te rekenikai ao a na akea naba te kabuakakaaki; ao ngkana akea te kabuakakaaki ao e na mena ana nanoanga Atuan Iteraera ae Tabu i aoia, ibukin te mwakuri ni kamaiu; bwa a kainaomataaki man te mwaaka are mai irouna.

26 Bwa te ^amwakuri ni kamaiu e kanakoraoa nanon ana ^bmotiraoi iaoia ake a ^ctuai n anganaki te ^dtua, bwa a na kamaiuaki man te man ae kakamaku, te mate ao moone, ao te riaboro, ao te nei n ai ma te burimton, ao te kammarakaki n aki totoki; ao a na kaokaki nakon te Atua are e anganiia te ^eikeike, ae Atuan Iteraera ae Tabu.

27 Ma e na reke kain ane e a tia n anganaki te ^atua, eng, ane iai i nanona ana tua te Atua ni kabane, n ai arora, ao e aki ongeaba nako iai, ao e kabanebuaka bongin kataakina, bwa e na kananoanga arona!

28 O ana ^ababaire ni kamwamwane teuare buakaka! O aia ^bkamoamoa, ma mamaaraia ao burababaia aomata! Ngkana iai ^crabakauia ao a taku bwa a rangi ni ^dwanawana, ao a aki kan ongo n ana ^etaeka n reirei te Atua, ao a kaaki taekana, n taku bwa a ataa taekana i bon irouia, mangaia ae te baba wanawanaia ao akea te raka are a na karekea mai iai. Ao a na mate.

29 Ma e raoiroi te ataibwai ngkana a ^aongo n ana ^breirei te Atua.

30 Ma e na reke kaiia akana a ^akaubwai, aika a kaubwai ni kaubwain te aonaba. Bwa ngkai a kaubwai ao a ribaia aika a ^bkainnano, ao a bwainikirinia aika a nimamannei, ao a memena nanoia iaon kaubwaia; mangaia ae kaubwaia bon atuaia. Ao taraia, e na mauna kaubwaia ma ngaia.

31 Ao e na reke kaiia akana a bonotaninga ma n aki kan ^aongo taeka; bwa a na mate.

32 E na reke kaiia akana a mataki aika a rawa n nooraba; bwa a na mate naba.

33 E na reke kaiia akana a aki korotobibiaki i nanoia, bwa ataakin aia bure e na tiringia n te kabanea ni bong.

34 E na reke kain te ^atia kewe, bwa e na teweaki nako ^bmoone.

35 E na reke kain te tia tiriaomata are e ^atiritiri n oin nanona, bwa e na ^bmate.

36 A na reke kaiia ^akabekaau, bwa a na teweaki nako moone.

37 Eng, e na reke kaiia akana ^ataromauri bouananti, bwa e kukurei irouia te riaboro are e mena i aoia riaboro ni kabane.

38 Ao, ni kakimototoa, e na reke te maraia nakoia ake a bane ni mate i nanon aia bure; bwa a na ^aokira te Atua, ma n noora matana, ao a na tiku n aroia ni bure.

39 O tariu, aika kam tangiraki, uringa buakakan te bure nakon te Atua ae Tabu, ao buakakan naba te bwaka nakon ana kariri te ^atia kamwane. Uringnga, te ^bnano ni bwain te aonaba bon te ^cmate ao te nano ni bwain te tamnei, bon te ^dmaiu are ^eakea tokina.

40 O tariu, aika kam tangiraki, ongo n au taeka. Uringa korakoran Atuan Iteraera ae Tabu. Kam na tai taku bwa I a tia n taekin bwaai aika a matoatoa nakoimi; bwa ngkana kam karaoia, ao kam na kabuakaka te ^akoaua; bwa I a tia n taekin ana taeka are E karikingkami. I ataia bwa a ^bmatoatoa taekan te koaua nakoia aomata ni kabane aika a aki itiaki; ma aomata aika a raoiroi a aki maaku, bwa a tangira te koaua ao a aki kamwaieieaki mai iai.

41 O ngaia ae tariu aika kam tangiraki, ^anakomai nakon te Uea, te Atua ae Tabu. Uringnga bwa kawaina a raoiroi. Taraia, te ^bkawai ibukiia aomata, e ^cwariki, ma e wene raoi n eti i matana, ao te tia taraa te ^dmataroa bon Atuan Iteraera ae Tabu; ao akea te toro ae kamwakuria ikekei; ao akea riki te kawai nako iai ma ti rinanon te mataroa; bwa e aki kona ni mwaamwanaaki, bwa te Uea ae te Atua arana.

42 Bwa ane karebwerebwe ao e na kaukia nakoina; iai aika a ^awanawana, ma aika a rabakau, ma aika a kaubwai, ma aika a ^bkamoamoa ibukin rabakauia, ma wanawanaia, ma kaubwaia—eng, bon aomata aikai aika e ribaia; ao ngkana a aki kaaki bwaai aikai, man iangoia bwa aomata aika ^cbaba imatan te Atua, ao ni ^dkarinanoia, ao e na aki kaukia nakoia.

43 Ma a na ^akarabaki aia bwai aika a wanawana ma aika a motiraoi mai irouia n aki toki—eng, ae te kukurei are e a tia ni katauraoaki ibukiia aomata aika itiaki.

44 O tariu, aika kam tangiraki, uring au taeka. Taraia, I buuti kunnikaiu, ao I ioioi i matami; I tataro nakon te Atua are te tia kamaiuai bwa e na taraai ni matana aika e ^akona n noori iai bwaai ni kabane; mangaia ae kam na ataia bwa n te kabanea ni bong, are a na bane ni motikaki iai taekaia aomata n aron aia mwakuri, ae e a tia ni kakoaua Atuan Iteraera ae I a tia n ^bioioi nako ami bure man tamneiu, ao I tei i nanon te oota i matana, ao ni ^cmwaawa man raraami.

45 O, tariu aika kam tangiraki, kitan ami bure; ioi nako ana ^ataurekereke te aomata are kan kabaeingkami ni kamatoatoa; nakomai nakon te Atua are ngaia te ^bbwaa ibukin kamaiuakimi.

46 Katauraoi tamneimi nakon te bong are e mimitong are e karaoaki iai te ^amotiraoi nakoia aika a raoiroi, are te bong ni ^bmotikitaeka, bwa kam na aki keanako ma te maaku ae korakora; bwa kam aonga n aki uring bwaninin raoi ami ^cbure aika a kakamaku, ao n tauaki nanomi nakon te kan takaruaea: E tabu, e tabu aron am motikitaeka, O te Uea ae te Atua ae ^dMoan te Mwaaka—bwa I ataa au bure; I a tia n riaon nakon am tua, ao riaon tua irou bon au bure; ao I a tia n reke iroun te riaboro, ao I a riki bwa konana ngai ni karawawatakina ae korakora.

47 Ma taraia, tariu, e riai bwa N na kautingkami nakon korakoran kakamakun koauan bwaai aikai? E riai bwa N na karawawatai tamneimi ngkana a itiaki ami kaantaninga? E riai bwa N na karawawata au taeka nakoimi n aron korakoran te koaua ngkana kam kainaomataki man te bure?

48 Taraia, ngke arona bwa kam tabu ao N na taekin bwaai aika a tabu nakoimi; ma ngkai kam aki tabu, ao kam onimakinai bwa te tia reirei ngai, ao e riai bwa N na ^areiakin nakoimi mwiin ami ^bbure.

49 Taraia, e ribaki te bure iroun tamneiu, ao e kukurei nanou n te raoiroi; ao N na ^aneboa aran te Atua ae tabu.

50 Nakomai, tariu, ni kabane ake a taka, nakomai nakon te ^aran; ao ane akea ana mwane, nakomai bobwai ao amwarake; eng, nakomai kabooa te wain ao te miriki n akea te ^bmwane ao n akea boona.

51 Mangaia ae tai kabanebuaka te mwane ni bwaai aika akea bonganaia, ke ^akorakoram ni bwaai aika aki kakukureiko. Kakaonimaki n ongeaba nakoiu, ao uring taian taeka aika I a tia n taekin; ao nakomai nakon Atuan Iteraera ae Tabu, ao ^bkanuaiko ni bwaai aika aki kona ni bua, ke ni mka, ao kakukureia tamneim bwa e na marika.

52 Taraia tariu aika kam tangiraki, uring ana taeka Atuami; tataro nakoina n tai nako n te ngaina, ao anga ami ^akaaitau nakon arana ae tabu n te tairiki. Kakukurei nanomi.

53 Ao kam na nora korakoran ana ^aberita aika a tabu te Uea, ma aron korakoran ruona nakon te aonaba nakoia natia aomata; ao man korakorana, ma ana akoi ma ana ^bnanoanga, ao e a tia ni tuea nakoira bwa a na aki tiringaki ni kabane kanoara, n kaineti ma te rabwata, ma e na kamaiuia; ao n rooro aika a na roko ao a na riki bwa te ^cmwanga ae raoiroi nakon te bata are Iteraera.

54 Ao ngkai, tariu, I kan taekin bwai riki tabeua nakoimi; ma n N na taekin nikiran au taeka nakoimi nakon te ingabong. Amen.