1 ^aBwakan ^bBwaburon are e nooria Itaia are natin Amoti.

2 Katei ami ^aburaeki iaon taian maunga aika a rietata, karieta te bwanaa nakoia, ^banoanoiia, bwa a aonga n rin i nanon aia mataroa tooka.

3 I a tia n tua nakoia au ^aaomata aika a kaitiakaki, I a tia naba ni weteiia aika a korakora, bwa e aki un nanou irouia aika a kimwareirei n rietatau.

4 Karongoaia aomata aika a uanao iaon te maunga ai aron karongoaia te botanaomata ae korakora, te rongoaa ae riao ^aman aba n ^buea nako, ae tangin taanga ni buaka aika e botiia aia Uea Taanga ni Buaka.

5 A roko man aaba aika a raroa, man tokin karawa, eng, te Uea ma bwainibuaka aika bwain unna, bwa e na urua te aonaba ni kabane.

6 Kam na takaaka, bwa e a kaan ana bong te Uea; e na roko n aiaron te urubwai iroun ae Moan te Mwaaka.

7 Mangaia ae a na bane n akea korakoraia aomata, ao a na bwara nanoia ni kabane;

8 Ao a na bane ni maaku; a na bane n taonaki n te maraki ma te nanokawaki; a na kuba ngkana a kaitaraa; ao a riki moaia n ai aron te mwaakaro.

9 Nooria, e na roko ana bong te Uea, ae boota te nanobuaka ma te un ae korakora, bwa e na kamaroaea te aonaba; ao e na ^atiringia taan bure aika a maeka iai.

10 Bwa a na akea ootaia itoin karawa ma bwain karawa nako; ao e na karooaki ^ataai n tain butina, ao a na akea ootan namwakaina.

11 Ao N na ^akatuaaea te aonaba ibukin buakakana, ma aika a buakaka ibukin aia bure; N na katoka kainikatongaia aika a ^bkamoamoa, ao N na katoki aia kainikatonga aika a kamwaraa.

12 N na karieta kakawakin te ^aaomata nakon te koora ae tamaroa; e na kakawaki riki te aomata nakon te mwakora ni koora i Obira.

13 Mangaia ae N na ioioa karawa, ao e na ^amwaing aonaba man nnena, n tain unin nanon aia Uea Taanga ni Buaka, ao ni bongin korakoran marakin nanona.

14 Ao e na riki aio n ai aron te ^aria ae kaeaki, ao n ai aron te tiibu ae aki mwaannanoaki; ao aomata a na okiria aia koraki, ao a na bane ni biri nako n okira oin abaia.

15 A na ewaraki aomata ni kabane aika a kamoamoa; eng, ao aomata ni kabane aika a itoman ma aika a buakaka a na bwaka n te kabaang.

16 A na tiringaki natiia, ni boaaki ketaia i mataia; a na iraeaki bwain aia auti ao a na tauaki buuia.

17 Nooria, N na kateirakeia I-Miria ni kaaitaraia, aika a aki tabe nanoia n te tirewa ke te koora, ke ni mataai iai.

18 Ao aia bwai ni katebe; e na kamaenikunia; ao a na akea aia nanoanga nakon uaan te biroto; ao a na aki kamauriia ataei.

19 Ao Bwaburon, are te kabanea ni mimitong n aba n uea, are a ^akamoamoa tikiraoina I-Kareria, e na riki n aiaron ^bTotom ao Komora ngke a uruakaki iroun te Atua.

20 E na bon aki manga ^akaainaki, ke ni maekanaki man te roro teuana nakon te roro teuana; ke ni iai I-Arabia ake a na manga katea umwaianrianna iai; ke ni iai taan kaawakin tiibu ake a na manga kaweneia aia nanai iai.

21 Ma a na maeka iai manin te ^arereua aika a kaakang; ao a na onrake aia auti irouia maan aika a tangitang; ao a na maeka aaoro iai, ao a na eweewe ikekei ^bkooti aika a aki manana.

22 Ao a na tangitang manin aaba aika a kaakang i nanon aia ^aauti aika a kamaroa, ao taian ^braakon i nanon aia bareti aika a raraoi; ao e a kan roko ana tai, ao e na aki kamaanaki ana bong. Bwa N na waekoa n uruakia; eng, N na nanoangaia au botanaomata, ma a na bane ni mate aika a kamwaraa.