Ana Kauoua Ni Boki Nibwaai

1 Ao ngkai e koro bukina bwa ngkai Ngai ae Nibwaai, ngke I a tia n reireiniia tariu, ao ^atamara, ae Riaai, e taekin nakoia bwaai aika a bati, ao ni manga kaoki riki nakoia, n aron bwaai aika a tamaroa ake e a tia ni karaoi te Uea ibukiia ni kairakiia nako mai aban Ierutarem.

2 Ao e taekin nakoia aron ^aunraaia i nanon marawa, ao ana nanoanga te Atua ngke e kamauri maiuia, ao a aikoa iinako i nanon marawa.

3 Ao e taetae naba nakoia ni kaineti ma te aba ni berita, are e a tia n reke irouia—ai korakorara ana nanoanga te Uea nakoira ngke e tuatua bwa ti na kitana aban Ierutarem.

4 Bwa nooria, e taku, I a tia n noora te ^amii ni burabeti, are I a ataia mai iai bwa e a tia n uruakaki ^bIerutarem; ao ngke arona bwa ti tiku i Ierutarem ao are ti a tia ngkai ni ^cmate.

5 Ma e taku, e ngae ngke ti a tia ni karawawataki ao e a tia n reke iroura te ^aaba ni berita, ae te aba ae ^brineaki i buakoia aaba nako; are te aba are e berita n ae tabu iai nakoiu te Uea ae te Atua bwa e na riki bwa abaia kanoau. Eng, e a tia ni ^cberita n ae tabu te Uea bwa e na anga te aba aio nakoiu, ao nakoia natiu n aki toki, ao nakoia naba ake a na kairaki n nakomai ma n aaba nako n ana kairiri te Uea.

6 Mangaia ae, Ngai, ae Riaai, I taetae ni burabeti n aron ana mwakuri te Tamnei are e mena irou, bwa a na bon ^aakea ae e na roko n te aba aei ma ti ngkana a kairaki ni bain te Uea.

7 Mangaia ae e a tia ni katabuaki te ^aaba aio nakoia ake e kairiia n nakomai te Uea. Ao ngkana a toro irouna n iri ana tua ake e a tia n anganiia, ao e na riki te aba aio bwa te aba n ^binaomata ibukiia; mangaia ae a na aki kona ni manga reke i an te tautoronaki; ao ngkana e riki anne ao e na riki ibukin te bure; ao ngkana e korakora te bure ao e na ^cmaraia te aba ibukin aia mwakuri, ma a na teimatoa kakabwaia nakoia aika a raoiroi n aki toki.

8 Ao taraia, bon te iango ae wanawana bwa e na karabaki te aba aio n te tai aio man aaba ake tabeua; bwa ngkana e ataaki taekana n aaba ake tabeua; a na mwaiti aaba ake a na kaona te aba, ao a na akea abaia ake bon oin kaain te aba.

9 Mangaia ae Ngai, Riaai, I a karekea te berita mai iroun te Uea ae te Atua, bwa a riai aomata ni ^akabane ake a kanakoaki nakon te aba aio mai Ierutarem irouna bwa a na kaawakin ana tua, ao a na ^bmaiu raoi i aon te aba aio; ao a na raba taekaia man aaba ake tabeua, bwa a na abana te aba aio n ti ngaia. Ao ngkana a teimatoa ni ^ckaawakin ana tua ao a na kakabwaiaki i aon te aba aio, ao a na akea ae e kaaitaraia, ke n anai aban rikiia; ao a na maeka i nanon te rau n aki toki.

10 Ma nooria, ngkana e roko te tai are a na bua iai i nanon aia kerikaaki n aia aki onimaki, i mwin reken kakabwaia aika a mwaiti irouia ma ni bain te Uea—ao n ataa aron karikan te aonaba, ao a ataia aomata ni kabane, aron ana mwakuri ae korakora ma ni kamimi te Uea man moan karikan te aonaba; ao n tia ni karekea te mwaaka ni karaoi bwaai ni kabane i nanon te onimaki; ma taian tua ni kabane mani moan rikin bwaai, ao n tia ni kairaki nakon te aba ni berita ae kakawaki aio n ana raoiroi ae aki totoki—ao taraia bwa I taku, bwa ngkana e roko te bong are a na kaitaraa iai Atuan Iteraera ae Tabu, ae te ^aMesia ni koaua, ae aia Tia Kaboia ae Atuaia, ao nooria, e na reke ana moti ae e tutuaraoi iaoia.

11 Eng, e na karokoi ^aaaba riki tabeua nakoia, ao e na anganiia te mwaaka, ao e na anai mai irouia abaia ake aia bwai, ao e na ^bkamaenakoia ma n tiringiia.

12 Eng, e na wakinaki te ^atiritiri man te roro teuana nakon te roro teuana, ao ni kawaraki ma te katuaeaki ae korakora; mangaia ae natiu, I tangiria bwa kam na uringnga; eng, I tangiria bwa kam na ongo n au taeka.

13 O bwa ngke arona bwa kam na uti; kam na uti man te matunako, eng, man te matu ni ^amoone, ao kam na motiki ^btaurekereke aika a buakaka ake kam kabaeaki iai, aika taurekereke aika a kabaeaki iai natiia aomata, ao a kairaki iai bwa taenikai nakon ^cmarawan te rawawata ae akea tokina ma te aki rau.

14 Uti! ao teirake man te tano, ao ongora n ana taeka te ^akaro ae ruru, ao e a kaan karuoan rabwatana nako nanon te ^brua ni mate ae mwaitoro ma n aki rongoaa, ae e aki kona ni manga oki mai iai te tia mwananga; i nanon tabeua te bong ao N nang iranako ^ckawain te aonaba ni kabane.

15 Ma nooria, e a tia te Uea ni ^akabooa tamneiu mai moone; I a tia n noora mimitongina, ao I a katobibiaki n ^bbain ana ^ctangira n aki toki.

16 Ao I tangiria bwa kam na uringnga n iri nanon ana ^atua ao ana moti te Uea; nooria, aio bon tabeaiangan tamneiu mai moana.

17 E a tia ni karawawataki nanou n te rawawata man te tai teuana nakon te tai teuana, bwa I raraoma, bwa e na bwakaringkami bwaninin ^aunin te Uea ae Atuami ibukin matoan nanomi ao kam na ^bkaakeaki ma n tiringaki n aki toki.

18 Ke e na roko te maraia i aomi i nanon ^arooro aika a mwaiti; ao e roko te kabang i aomi, ma taian rongo, ao kam ribaki, ao kam kairaki ni kaineti ma ana kantaninga ao ana tautaeka te ^briaboro.

19 O natiu aika mwaane, bwa a na aki riki bwaai aikai nakoimi, ao bwa kam na riki bwa aomata aika rineaki ma n ^atangiraki iroun te Uea. Ma nooria, e na karaoaki are nanona; bwa a raoiroi ^bkawaina n aki toki.

20 Ao e a tia n taekinna bwa: ^aNgkana kam kaawakin au ^btua, ao kam na ^ckakabwaiaki n te aba; ma ngkana kam aki kaawakin au tua, ao kam na kaakeaki mai matau.

21 Ao ngkai e aonga ni kukurei tamneiu iroumi, ao bwa e aonga ni kiitana te aonaba nanou ma te kukurei iroumi, bwa e aonga n aki irianaki mateu n te nanokawaki ma te rawawata, teirake man te tano, natiu mwane, ao kam na riki bwa ^aoinimwaane, ao nanomatoa n te kaantaninga ae ti ^bteuana ma te nano ae ti teuana, ni katiteuanaaki ni bwaai ni kabane, bwa kam aonga n aki reke i aan te tautoronaki.

22 Bwa kam aonga n aki kamaraiaaki n te maraia ae rawawata; ao riki bwa kam na aki karekea aki kukurein te Atua ae ^amotiraoi, are e na reke te tiringaki iai, eng, are e na tiringaki iai n akea tokina te tamnei ma te rabwata.

23 Uti, natiu mwane; katokaa ^aotangan te raoiroi. Motiki taurekereke ake kam kabaeaki iai, ao otinako man te aki ataibwai, ao teirake man te tano.

24 Tai manga kaaitaraa tarimi ae mimitong ana iango, are e a tia ni kaawakin taian tua man te tai are ti kiitana iai Ierutarem; are e a tia n riki bwa tabonibain te Atua, ni buoka kairara nakon te aba ni berita; bwa ngke arona bwa e aki karaoia, ao ti na kaman tia ni mate ni ^abaki i nanon te rereua; e ngae n anne, ao kam a tia ni kataia n ^banaa maiuna; eng, ao e a tia n rinanon te rawawata ibukimi.

25 Ao e korakora maakun ma rurun rabwatau iroumi, bwa rimwi e na manga karawawataaki riki; bwa nooria, kam a tia ni bukinna bwa e ukoukora karekean te mwaaka ma te ^akariaiakaki i aomi; ma I ataia bwa e aki kan karekea te mwaaka ma te kariaiakaki i aomi, ma e a tia ni ukoukora mimitongin te Atua, ao mweraoimi ae akea tokina.

26 Ao kam a tia ni ngurengure ngkai e mataata are taekin nakoimi. Kam taku bwa e ^aetimatoa; kam taku bwa e a tia n un nakoimi; ma nooria, etimatoana bon etimatoan mwaakan ana taeka te Atua, are e mena i nanona; ao te bwai are kam aranna bwa te un bon te koaua, n aron are e booraoi ma nanon te Atua, are e aki kona ni karabai, ni kaoti ma te koaua taekan ami bure iai.

27 Ao e riai bwa e na mena ^amwaakan te Atua irouna, n aiaron te tai naba are e tua nakoimi iai bwa kam na ongeaba. Ma nooria, bon tiaki ngaia, bwa bon ^bTamnein te Uea are mena irouna, are ^ckauka wiina bwa e na taekin bwaai n aki kona ni kainna.

28 Ao ngkai natiu te mwane, Reimwan, ao Remuera naba ma Taam, ao ai uana naba ma natiu mwaane ake natin Itimaera, nooria, ngkana kam ongeaba n ana taeka Nibwaai ao kam na aki tiringaki. Ao ngkana kam ongeaba nakoina ao N na katoka au ^akakabwaia i aomi, eng, are bon moan au kakabwaia.

29 Ma ngkana kam aki ongeaba nakoina, ao N na anaa au ^amoan kakabwaia, eng, are bon au kakabwaia, ao e na tiku i aona.

30 Ao ngkai, Tioram, I taetae nakoim: Nooria, ngkoe ae anaa ^atoro Raban; e ngae n anne, ko a tia ni uotaki nako mai Ierutarem, ao I ataia bwa ngkoe bon raoraon natiu ae Nibwaai ni koaua, n aki toki.

31 Mangaia, ae ngkai ko a tia ni kakaonimaki ao a na kakabwaiaki kanoam ^airoun kanoana, bwa a na maeka ma te mwengaraoi i aon te aba aio; ao bon akea te bwai teuana, ma ti aia buakaka, ae kona n urua mwengaraoiia i aon te aba aio n aki toki.

32 Mangaia ae ngkana ko kaawakin ana tua te Uea, ao e a tia te Uea ni katabua te aba aio ibukin mwengaraoiia kanoam rinanon kanoaia natiu te mwaane.