1 Nooria, e koro bukina bwa Ngai, Nibwaai, I tang nakon te Uea ae Atuau, ibukin ^auniia tariu.

2 Ma nooria, e rikirake riki uniia irou, n te aro are a kataia n anaa maiu.

3 Eng, a ngurengureakina taekau, ni kangai: E taku tarira are te teei bwa e na ^atautaeka i aora; ao ti a tia n rinanon kaangaanga ibukina; mangaia ae ti na tiringnga, bwa ti aonga n aki manga karawawataki man ana taeka. Bwa nooria, ti aki tangiria bwa e na riki bwa ara tia tautaeka; bwa bon anne ara bwai, ngaira taari mwaane aika a ikawai riki, te tautaeka iaoia te botanaomata aio.

4 Ngkai I aki koroi iaon bwaatua aikai taeka ni kabane ake a ngurengureakinai iai. Ma I taku bwa e kakawaki ae N na taekinna ae a kataia n anaa maiu.

5 Ao e koro bukina bwa e a ^akaongoai te Uea, bwa I aonga ngai, ^bNibwaai, ni kitania ao ni birinako nakon te rereua, ma ake a kan irai.

6 Mangaia are e koro bukina bwa Ngai, Nibwaai, I kairiia kaain au utu, ao ^aTioram naba ma ana utu, ao Taam, are karimoau ma ana utu, ao Iakobwa ma Iotebwa, ake karimwiu, ao mwaaneu naba, ao aomata ni kabane ake a kan irai. Ao aomata ni kabane ake a kan irai bon ngaia ake a kakoauai ana taeka ni ^bkauring ma ana kaotioti te Atua; mangaia are a ongeaba n au taeka.

7 Ao ti a uoti umwaranrianna ma bwaai ni kabane ake ti kona n anai, ao ti a mwananga i nanon te rereua i nanon te maan ae boong aika a mwaiti. I mwin mwanangara i nanon te rereua i nanon te maan ae boong aika a mwaiti ao ti a katei umwaranrianna.

8 Ao a tangiria au botanaomata bwa ti na arana te tabo arei bwa ^aNibwaai; mangaia are ti aranna bwa Nibwaai.

9 Ao a booti nanoia aomata ake a irai bwa a na araniia bwa ana ^abotanaomata Nibwaai.

10 Ao ti teimatoa n ongeaba n taian babaire ao taian moti, ma ana tua te Uea iaon bwaai ni kabane, ni kaineti ma ana ^atua Mote.

11 Ao e mena iroura te Uea; ao ti rikirake ni maiu raoi; bwa ti uniki taian koraa, ao ti tai uaaia aika a mwaiti. Ao ti a moana kaikawakiarake nanai n tibu ma nanai ni kao ao maan n aekaia nako.

12 Ao Ngai, Nibwaai, I uoti taian rongorongo ake a koreaki iaon taian ^abwaatua aika buraati; ao te ^bbooro ke te ^ckambwati, are e katauraoaki ibukin tamau ni bain te Uea, n aron are e a tia ni koreaki.

13 Ao e koro bukina bwa ti a rikirake ni maiu raoi, ao ni karakai mwaitira iaon te aba.

14 Ao Ngai, Nibwaai, I anaa naba ana ^akabaang Raban, ao ti karaoi kabaang aika mwaiti n ai arona, bwa e a raawa n roko n ekiiranako te botanaomata are e aranaki bwa ^bReimwanaite ni kamaunaira; bwa I ataa korakoran ribakiu irouia ma natiu ao aomata ni kabane ake aranaki bwa au botanaomata.

15 Ao I reireiniia au botanaomata bwa a na karaoi kateitei, ao ni karaoi bwaai nako man te kai, ao te ^abiti, ao te kaobwa, ao te buraati, ao te biti ae matoatoa, ao te koora, ao te tirewa, ao taano aika a reke biiti mai iai aika kakawaki, aika mwaiti kurikuri.

16 Ao Ngai, Nibwaai, I katea te ^atembora; ao I a kateia n aiaron ^bana tembora Toromon, ma akea iai taian atibu aika a ^ckakawaki; ngkai aki kona ni kuneaki iaon te aba, mangaia are e aki kona ni katotonga aron ana tembora Toromon. Ma titebo aron kateana ma ana tembora Toromon; aron mwakuriana e bon rianako tamaroan kateana.

17 Ao e koro bukina bwa Ngai, Nibwaai, I a kairiia au botanaomata bwa a na ^amwammwakuri, ao ni kabonganai baia.

18 Ao e koro bukina bwa a tangiria bwa N na riki bwa aia ^auea. Ma Ngai, Nibwaai, I tangiria bwa a na akea aia uea; ma e ngae n anne, I karaoi bwaai ibukiia n aron are iai mwaakau ni karaoi.

19 Ao nooria, a kakoroaki bukin ana taeka te Uea ake e taekin nakoia tariu, ake e taekin ni kaineti nakoia, are N na riki bwa aia ^atia tautaeka ma aia ^btia reirei. Mangaia are I a riki bwa aia tia tautaeka ma aia tia reirei, n aron ana tua te Uea, ni karokoa te tai are a na kataia iai n anaa maiu.

20 Mangaia ae e a kakoroaki bukin ana taeka te Uea are e taekinna nakoiu, are e kangai: Ngkana a ^aaki ongeaba nakon am taeka ao a na kaakeaaki mai matan te Uea. Ao nooria, a ^bkaakeaaki mai matana.

21 Ao e karokoa te ^amaraia iaoia, eng te maraia ae kakaiaki ibukin aia bure. Bwa taraia, a kamatoai nanoia ni kaaitara, ao a riki n ai aroia atibu aika matoatoa; mangaia, ae ngkai a mainaina man rianako tamaroaia man ^bkakukurei tarakia, n te aro are a na aki bwaka au botanaomata irouia, ao e a onea kuniia te Uea ae te Atua nakon te ^ckun ae bwatabwata.

22 Ao e taku te Uea ae te Atua: N na karikiia bwa a na ^akammaira nakoia am botanaomata, ti ngkana a rairinanoia man aia bure.

23 Ao a na maraia akana a ^akariki ma aia kariki; bwa a na rootaki n te maraia naba aio. Ao e taekinna te Uea, ao e koro bukina.

24 Ao man korakoran te maraia are a taonaki iai, ao a riki bwa aomata aika a ^ataningaroti, a maiubuaka ma ni kamwamwane, ao a ukoukori maan i nanon te rereua ake a kaakang.

25 Ao e taku te Uea ae te Atua nakoiu: A na riki bwa taan aki karauia kanoam, n riki bwa taan kauring ibukiu; ao ngkana a aki uringai, ao n ongeaba nakon au taeka, ao a na aki karauaki ni karokoa mateia.

26 Ao e koro bukina bwa Ngai ae Nibwaai, I a ^akatabuia Iakobwa ma Iotebwa, bwa a na riki bwa ibonga ma taan reirei n abaia au botanaomata.

27 Ao e koro bukina bwa ti maiuakina te kukurei.

28 Ao ai tenibwi te ririki i mwin kitanan Ierutarem.

29 Ao Ngai ae Nibwaai, I a kaawakin rongorongo iaon au bwaatua, aika I a tia ni karaoi, ibukiia au aomata ni karokoa ngkai.

30 Ao e koro bukina bwa e taku te Uea ae te Atua nakoiu: Karaoi ^abwaatua riki tabeua; ao ko na koroi iaoia bwaai aika a mwaiti aika a raraoi i matau, ibukin kabwaiaia am botanaomata.

31 Mangaia ae Ngai ae Nibwaai, n ongeabau nakon ana tua te Uea, I a nako ni karaoi ^abwaatua aikai are I a koroi iaoia bwaai aikai.

32 Ao I a koroi bwaai aika a kakukurei imatan te Atua. Ao ngkana a kukurei au botanaomata n ana bwai te Atua ao a na kukurei ni bwaai aika I a tia ni koroi iaon taian bwaatua aikai.

33 Ao ngkana au aomata a kan ataa riki bwaninin rongorongoia ao a riai ni wareki au bwaatua ake tabeua.

34 Ao I a kan taekinna bwa ai abwi te ririki n nako, ao e a tia ni moanaki te buaka ma te itabaraara imarenau ma tariu.