1 A na reke kaiia aika a katei tua aika a aki raoiroi, ao a na reke kaiia akana a koroi tua aika a kananokawaki ao a tia ni katei;

2 Ni kanakoia aika a kainnano man te ^amoti, ao n anaa te inaomata mai irouia aika a kainnano mai buakoia au botanaomata, bwa aonga n riki ^baine aika akea buuia bwa konaia, ao bwa a aonga naba n iraeia aika akea tamaia!

3 Ao tera ae ko na karaoia n te bong ni ^akatuaeaki, ao n te urubwai are e na roko mai kiraroa? ko na biri nakon antai ibukin buokam? ao ko na katuka ia kaubwaim?

4 Ngke akea ngai ao a na bobaraaki i buakoia taenikai, ao a na mate i buakoia aika tiringaki. Bwa e tuai n toki unin nanona, ngkai e teimatoa n arora baina.

5 O I-Aturia, are a na kai unun nanou, te oko are i nanon ^abaia bon unin nanoia.

6 N na kanakoa ni ^akaitaraa te aba, ae te tia mwaamwana te aba, ao nakoia aomata aika I un irouia bwa e na iraei aia bwai, ao e na anai kaubwaia, ao e toubekaia n ai aron te bokaboka i nanon te kawai.

7 E ngae n anne e na aki karaoia, ke n namakinna i nanona; ma e taku i nanona bwa e ira oin nanona ni kan ekinako aaba aika a mwaiti.

8 Bwa e kangai: a na aki riki au nati n uea bwa taian uea?

9 Tiaki Kareno aron Karekemiti? Ao tiaki Amata aron Arebata? Ao tiaki Tamaria aron Tameteko?

10 N aiaron ^abaiu ae e a tia ni katei ueaia antiia, aika a korakora riki nakoia boua aika kaaraki ake mai Ierutarem ao Tamaria;

11 E riai ke e aki bwa N na karaoa are I a tia ni karaoia nakon Tamaria ma antina, bwa N na karaoia nakon Ierutarem ma antina?

12 Mangaia ae e na koro bukina bwa n tian te Uea ni karaoa ana mwakuri ae bwanin iaon te Maunga are Zion ma Ierutarem, ao N na katuaea ^auaan kamoamoan uean ^bAturia, ma mimitongin rietatan ana taratara.

13 Bwa ^ae kangai: I a tia ni karaoi bwaai aikai ni kabane ni korakoran baiu ao ni wanawanau; bwa I wanawana; ao I a tia ni kamwaingi tiaia botanaomata, ao n iraei kaubwaia, ao I kabwakaia kaaina n ai aron te aomata ae korakora;

14 Ao e a tia baiu ni kunea ae kaubwaia aomata ai aron ngaoia maan; ao ike a tia ni botaki iai bunnatoi ao I anai ni kabutaa te aonaba; ao bon akea are tabeka baina ni kiba, ke ni kauka wiina, ke ni kaninganinga.

15 E ^akona ni kamoa te ^btanai bwa e korakora riki nakon te aomata are taua? E kona ni kamoa te taoo bwa e aki kainnanoa te aomata are kabongana? Ke e kona n oro te kai i bon irouna ngkana akea ae taua, ke e kona n nakonako te oko i bon irouna n ai aron ae e aki riki man te kai!

16 Mangaia ae te Uea, ae aia Uea Taanga ni Buaka, e na karuoa nako aoia aika a marika, te bakitaia, ao ibukin ^aana kamoa uean Aturia, e na waakina te urubwai ae ai aron uran te ai.

17 Ao e na riki ootan Iteraera bwa te ai, ao e na riki Teuare e Tabu bwa te mwaakaro, ao e na ura ma ni kang ana akanta ma ana kateketeke i nanon teuana te bong;

18 Ao e na ^akana mimitongin ana buakonikai, ao ana nne n aroka ae e kariki uaa, n tamnei ao n rabwata; ao a na aki ataa te bwai ae e riki nakoia n ai aron te tia ua buraeki ae tong.

19 Ao a na ^ati tabekai kanoan ana buakonikai, n te aro are e kona ni wareki mwaitia te ataei.

20 Ao e na koro bukina bwa man te ^abong arei, nikiraia Iteraera nako, n ai aron te ^bbata are Iakobwa ake a reke maiuia, a na aki manga ^conimakina te aomata are e katuaeia, ma a na onimakina te Uea, ae Atuan Iteraera ae Tabu, n te koaua.

21 E na manga oki ^anikiraia, eng, ae nikiraia Iakobwa, nakon te Atua ae mwaaka.

22 Bwa e ngae ngke am botanaomata ae Iteraera a na mwaiti n aron tanon taari ma e na iai nikiraia ake a na oki ao te ^aurubwai are e a tia ni baireaki e na ^branganako n te raoiroi.

23 Bwa e a tia ni kataua te Atua ae aia Uea Taanga ni Buaka bwa e ^ana urua te aba ni kabane.

24 Mangaia ae e kangai te Atua ae aia Uea Taanga ni Buaka: O au botanaomata aika a maeka i Tion, kam na aki maakuia I-Aturia; e na oroingkami n ana kai, ao e na tabekarake okona ni kaaitaraingkami n ^aaiaron are e riki i Aikubita.

25 Man te tai ae e aki maan, ao e na toki uniu iroumi, ao e na riki uniu bwa bukin tiringaia.

26 Ao aia Uea Taanga ni Buaka e na bairea tuaana n ai aron tiringaia ^aI-Mirian n te bwaa are Orebi; ao n aron are e arora ana kai iaon taari e na tabekia n aiaron are riki i Aikubita.

27 Ao e na koro bukina bwa n te bong arei e na tabekaki ana ^arawawata mai aon angami, ao e na tabekaki amona mai aon roroami, ao e na urubekeaki te amo ngkai kam a tia ni ^bkabiraki.

28 ^aE na roko i Aiata, ao e nako nakon Mikeron; ao e na katikui uotana i Mikemati.

29 A rimarenan maunga; ao a tiku i Keba; e maaku Rama; e kitana Kibea are aban Tauro.

30 Kanenea te bwanaa O ainen Karim; bwa aonga n ongo ake a mena i Raitia, O ai kananoangara Anatota.

31 E a tia ni kitanaki Matemena; a katauraoia kaain Kebim bwa a na birinako.

32 Ma e na tiku i Nobi n te bong arei; e na ioa baina ni kaitaraa ana maunga natin Tion te aine, ae taubukin Ierutarem.

33 Noria, e nang koroi mwangana te Uea, ae aia Uea Taanga ni Buaka, ma te aro ae kakamaku; ao a na kabwabuaki aika a ^arietata; ao a na karinanoaki aika a kamoamoa.

34 Ao e na koroi matentenin te buakonikai n te biti, ao e na bwaka Rebanon iroun ae korakora.