1 Ao ngkai, Ngai, Nibwaai, I a taetae ni kaineti ma taian taeka ni burabeti ake e taekin tamau, ni kaineti ma ^aIotebwa, are e uotaki nako Aikubita.

2 Bwa nooria, e koaua ae e taetae ni burabeti ibukiia kanoana ni kabane. Ao a bon aki mwaiti ^ataeka ni burabeti ake a kakawaki riki taekaia nakon taeka ni burabeti ake e koroi. Ao e taetae ni burabeti ni kaineti ma ngaira, ao ibukiia ara roro aika a na roko; ao a koreaki iaon bwaatua aika buraati.

3 Mangaia ae ngke e a toki ana kakarabakau tamau ni kaineti ma taeka ni burabeti ibukin Iotebwa, e weteia natin Reimwan, natina mwaane ao natina aine, ao e taku nakoia: Nooria, natiu mwaane ao aine, aika natin au ^akarimoa, I tangiria bwa kam na ongo au taeka.

4 Bwa e taku ana taeka te Uea ae te Atua: ^aNgkana kam teimatoa ni kaawakin au tua ao kam na maiu raoi n te aba aio; ma ngkana kam aki kaawakin au tua ao kam na kaakeaki mai matau.

5 Ma Nooria, natiu mwaane ao aine, I aki kona ni mate ni karokoa ae I tia ni ^akakabwaiaingkami; bwa nooria, I ataia bwa ngkana kam ^bkaikawaki n te aro ae kam riai n iria ao kam na bon aki kitanna.

6 Mangaia are ngkana kam maraia, nooria, N na katokaa au kakabwaia iaomi, bwa e na anaaki te maraia mai iaomi ao e na ^akatukaki iaoia ami kaaro.

7 Mangaia are man au kakabwaia ao e na ^aaki kariaia te Uea ae te Atua bwa kam na mate; mangaia are e na ^bnanoangaingkami ao kanoami n aki toki.

8 Ao e koro bukina bwa ngke e a tia n taetae tamau nakoia natin Reimwan aika mwaane ao aine, ao e tua bwa a na kairaki natin Remuera mwaane ao aine nakoina.

9 Ao e taetae nakoia ni kangai: Nooria, natiu mwaane ao aine, aika natin au kauoman n naati te mwaane; nooria, I katoka iaomi te kakabwaia ae titebo ma are I a tia ni katoka iaoia natin Reimwan mwaane ao aine; mangaia are kam na aki bane n tiringaki; ma n tokina a na kakabwaiaki kanoami.

10 E koro bukina bwa ngke e a tia n taetae nakoia tamau, nooria, e taetae nakoia natin ^aItimaera mwaane, eng, ao kaain ana utu ni kabane.

11 Ao ngke e a tia n taetae nakoia, ao e taetae nakon Taam, ni kangai: Ko na kakabwaiaki, ma kanoam; bwa kam na abana te aba aio n aiaron tarim ae Nibwaai. Ao a na warekaki kanoam ma kanoana; ao ko na katotonga tarim, ao kanoam a na katotonga kanoana; ao ko na kakabwaiaki ni kabanea bongin maium.

12 Ao e koro bukina bwa ngke e a tia tamau, Riaai, n taetae nakoia kaain ana utu ni kabane, n aron are e namakinna i nanona ma ana kairi Tamnein te Uea are mena i nanona, ao e rootaki rabwatana n te kara. Ao e koro bukina bwa e mate ao e taunaki.

13 Ao e koro bukina bwa e aki maan i mwin matena, ao Reimwan ma Remuera ma natin Itimaera mwaane a un irou ibukin kaetaia iroun te Uea.

14 Bwa Ngai, Nibwaai, are I tia ni katauaki bwa N na taetae nakoia n aron ana taeka; bwa I a tia n taekin bwaai aika a mwaiti nakoia, ao ai arona naba ma tamau, i mwaain matena; a mwaiti mai buakon taeka akanne a koreaki iaon au ^abwaatua ake tabeua; bwa a mwaiti riki mwakoron rongorongon maiura ake a koreaki iaon au bwaatua ake tabeua.

15 Ao I korei iaoni ^abaikai bwaai ake a kaineti ma tamneiu, ma koroboki aika a tabu. Bwa a mwaiti ake a koreaki iaon bwaatua aika buraati. E kimwareirei tamneiu ni koroboki aika a tabu, ao e ^biangoi nanou ma te karaurau, ao I koroi ibukin ^ckawanawanaia ao rakaia natiu.

16 Nooria, e kimwareirei ^atamneiu ni bwaai aika a kaineti ma te Uea; ao e teimatoa ^bnanou n iangoi ma te karaurau bwaai ake I a tia n noori ma n ongo.

17 Ma e ngae ngke e korakora ^araoiroin te Uea, ngke e kaoti nakoiu ana mwakuri aika korakora ma ni kamiimi, e takarua nanou ni kangai: O te aomata ngai ae e ^bkainanou. Eng, e rawawata nanou ibukin rabwatau; tamneiu e rawawata ibukin au bure.

18 I otabwaniniaki n taiani kariri ao bure aika I kai ^arootaki iai.

19 Ao ngke I a kani kukurei, ao e tang nanou ibukin au bure; ma e ngae n anne, I ataia bwa antai ae I onimakinna.

20 Bon Atuau riki te tia buokai; e a tia ni kairirai i nanon au tai ni karawawataki i nanon te rereua; ao e a tia ni kamaiuai i nanon te marawa ae nano.

21 E a tia ni kaonai n ana ^atangira, n te aro are a rootaki iai irikou ni kabane.

22 E a tia ni kamangaoia au ^akairiribai, n te aro are a ruru imatau.

23 Nooria, e a tia n ongo tangiu n te ngaina, ao e a tia n anganai te ataibwai n te ^amii ni burabeti n te bong.

24 Ao n te ngaina, I a tia ni kakorakoraai n ^atataro mwaaka imatana; eng, I a tia ni kanakoa bwanau nako ike rietata; ao a ruo anera ni buokai.

25 Ao iaon bain Tamneina e a tia rabwatau ni ^auotaki nako aon maunga aika a raka rietaia. Ao a tia matau n noori bwaai aika korakora, eng, aika moan te korakora ibukiia aomata; mangaia are I tuangaki bwa N na aki koroi taekaia.

26 O, ao ngke tao I a tia n noori baika a rangi ni korakora; ao ngkana te Uea, ni karinanoakina nakoia natia aomata, e a tia ni kawariia aomata ma te nanoanga ae bati, ^ae aera ngkai e na rawawata nanou ao e mena tamneiu ni mwaruan te nanokawaki, ao e na bua marurungin rabwatau, ao e na kerikaaki korakorau ibukin karawawatakiu?

27 Ao bukin tera ngkai N na ^abwaka nakon te bure, ibukin rabwatau? Eng, bukin tera ngkai N na konaaki n te ^bkaririaki, ao ni karekea nnen teuare buakaka inanou bwa e na urua ^crauu ma ni karawawata tamneiu? Bukin tera ngkai I un irouia au kairiribai?

28 Uti, tamneiu! Tai manga bwaka i nanon te bure. Kimwareirei, O ngkoe nanou, ao tai manga karekea nnen ana ^akairiribai tamneiu.

29 Tai manga un riki ibukiia au kairiribai. Tai kakerikaka korakorau ibukin karawawatakiu.

30 Kimwareirei, O ngkoe nanou, ao taang nakon te Uea ni kangai: O te Uea, N na neboiko n aki toki; eng, e na kimwareirei tamneiu iroum, Atuau, ae te ^abwa ibukin kamaiuau.

31 O te Uea, ko kona ni kabooa tamneiu? Ko kona ni kamaiuai mai nanon baia au kairiribai? Ko kona ni karikai bwa N na ruru ni kaotin te ^abure?

32 Ke a teimatoa ni kainaki mataroan moone imwaiu, ngkai e uruaki ^ananou ao e raraoma tamneiu! O te Uea, ko na tai kaina mataroan raoiroim imwaiu, bwa I aonga n ^bnakonako ni kawain te mwarua ae rinano, ao bwa I aonga n teimatoa n toua te kawai ae eti!

33 O te Uea, ko kona n otabwaniniai n niniram ae raoiroi! O te Uea, ko kona ni katauraoa kawaiu ni birinako mai irouia au kairiribai! Ko kona ni karaoa kawaiu ae eti imatau! Ko kona n aki kawenea te bwai ni tatanako i mwaain kawaiu—ma ko na kaitiaka kawaiu imwaiu, ao n aki tuka kawaiu, ma ko na tuki kawaia au kairiribai.

34 O te Uea, I a tia n onimakiniko, ao N na ^aonimakiniko n aki toki. N na aki katoka au ^bonimaki iaon te iriko; bwa I ataia bwa e na maraia ane e ^conimakina te iriko. Eng, e na maraia ane e katokaa ana onimaki iaon te aomata ke e onimakina te korakora mai iroun te aomata.

35 Eng, I ataia bwa e ^atituaraoi n angaanga te Atua nakoia akana a butiia. Eng, e na anganai Atuau ngkana I ^bbubuti n ae ^criai; mangaia are N na tabeka bwanaau nakoim; eng, N na tang nakoim, Atuau, ae ^dbwaan au raoiroi. Nooria, e na waerake bwanaau nakoim n aki toki, au bwa ma Atuau ae e aki totoki. Amen.