Mwakoro 7
Iakobwa e reitanako ana wareware man Itaia: E taekina te Mesia Itaia—E na taetae te Mesia n aiaron te aomata ae wanawana—E na anga nukana nakoia ake a na kataerea—E na aki kamamaeaki—Kabootaua ma Itaia 50. Uakaan ma 559–545 I.K.
1 Eng, bwa e taku te Uea: I a tia ni kararoako, I a tia ni kanakoko n aki toki? Bwa e taku te Uea: E ngaara beeban rauren tinam? Antai are I a tia ni kanakoko nakoina, ke antai mai buakoia taan kataarau are I a tia ni kabooko nako nakoia? Eng, antai are I a tia ni kabooko nako nakoina? Taraia, ko a bon tia ni akabooko nako n oin am buakaka, ao e a kairaki nako tinam ibukin riaoan tua iroum.
2 Mangaia ae ngke I roko ao bon akea te aomata; ngke I aweewete, eng, ao bon akea are e na kaeka. O te bata are Iteraera, e a tia ni kakimototoaki baiu n te aro are I aki kona ni kabooko, ke ai akea mwaakau ni kamaiu? Taraia ni bwanaau ao I kona ni kamwaua btaari, I kona n onea aia ckaraanga nakon taian rereua ao a na mwaung aia dika ngkai akea te ran, ao a na mate ibukin te taka.
3 I rabuna karawa n te aroo, ao ni karika te bkunnikai ae raerobwa n ruamwiin karawa.
4 E a tia te Uea ae te Atua n anganai te anewe ae wanawana, ao I rabakau ni katea au taetae n taina ae riai nakoim, O te bata are Iteraera. Ngkana kam a kua ao e na kautingkami ni katoa ingabong. Ao e na kauki taningau n aiaron te aomata ae wanawana.
5 E a tia ni kauki ataningau te Uea ae te Atua, ao I aki kaitaraa, ke n tannako mai irouna.
6 I tannako mai iroun te atia kataere, ao n anga tabau nakoia ake a kouta irau. I aki karaba matau mai irouia ake a kamamaeai ke ni bawareai.
7 Bwa e na bon buokai te Uea ae te Atua, mangaia ae e na bon aki kamamaeaki. Mangaia ae I a tia ni kamatoa ubu n aiaron te atibu ae matoatoa, ao I ataia bwa N na bon aki maamaa.
8 Ao e kaan te Uea, ao e na kaotia bwa I eti. Antai ae e na kauntaeka ma ngai? Ti tei ni botaki. Antai au kairiribai? Ke nakomai nako rarikiu, ao N na oroia ni korakoran wiiu.
9 Bwa e na buokai te Uea ae te Atua. Ao aomata ni kabane ake a akatuaeai, taraia, a na bane n riki n aiaron taian kunnikai aika a mane, ao a na kanaki iroun te koa.
10 Antai mai buakomi ae maaka te Uea, ae e ongeaba n ana ataeka ana toro, ae e nakonako i nanon te roo n akea ana taura?
11 Taraia ngkami ni kabane aika a kaura te ai, aika kam otabwaniningkami n te mwaakaro, kam na nakonako i nanon aami ai ma mwaakaro ake kam a tia ni kaurai. Aio are kam na karekea mai irou—kam na wene i nanon te rawawata.