1 Futsi kwenteka kutsi sasesibutsise ndzawonye tonkhe tinhlobonhlobo tetinhlanyelo, tinhlavu tayo yonkhe inhlobo, kanye netetinhlanyelo tetitselo tayo yonkhe inhlobo.

2 Futsi kwenteka kutsi ngesikhatsi babe ahleti ehlane wakhuluma kitsi watsi: Bukani, ngiphuphe liphupho; noma, ngalamanye emagama, ngibone umbono.

3 Bukani, ngenca yentfo lengiyibonile, nginesizatfu sekutfokota eNkhosini ngenca yaNefi ngalokunjalo naSemu; ngoba nginesizatfu sekucabanga kutsi bona, ngalokunjalo nalabanyenti bentalelwane yabo, batawusindziswa.

4 Kodvwa bukani, Lamani nawe Lemuweli, ngiyesaba kakhulu ngenca yenu; ngoba bukani, shangatsi ngibone ephusheni lami, lihlane lelimnyama nalelidzabukisako.

5 Futsi kwenteka kutsi ngabona indvodza, yayembetse ingubo lemhlophe; yeta kimi yema phambi kwami.

6 Futsi kwenteka kutsi yakhuluma kimi, yangiyala kutsi ngiyilandzele.

7 Futsi kwenteka kutsi ngisayilandzela ngatibona kutsi ngisendzaweni lemnyama naledzabukisako lapho kungekho lutfo loluphilako khona.

8 Emvakwekutsi sengihambe sikhatsi lesidze ebumnyameni, ngacala kuthandaza eNkhosini kutsi ibe nebubele kimi, ngekwemusa wayo lomkhulu.

9 Futsi kwenteka emvakwekutsi sengithandazile eNkhosini ngabona insimi lenkhulu nalevulekile.

10 Futsi kwenteka kutsi ngabona sihlahla, sitselo saso lesasitsandzeka kakhulu ekwenteni umuntfu ajabule.

11 Futsi kwenteka kutsi ngachubekela phambili ngasidla sitselo saso; ngabona kutsi sasimnandzi kakhulu, ngetulu kwato tonkhe lengake ngatinambitsa ngaphambilini. Yebo, futsi ngabona kutsi sitselo saso sasimhlophe, kwendlula bonkhe bumhlophe lengake ngabubona.

12 Ngesikhatsi ngisidla lesitselo saso sawugcwalisa umphefumulo wami ngenjabulo lenkhulu kakhulu; ngaloko-ke, ngacala kufisa kutsi shangatsi umndeni wami ungasidla nawo futsi; ngoba bengati kutsi besitsandzeka ngetulu kwato tonkhe letinye titselo.

13 Ngesikhatsi ngiphonsa emehlo ami ngicalata ngala nangala, kute mhlawumbe ngibone umndeni wami futsi, ngabona umfula wemanti; ugobhota, usedvutane naleso sihlahla lengangidla sitselo kuso.

14 Ngabuka kute ngitfole kutsi uchamuka kuphi; ngayibona inhloko yawo bucadlwana; khona lapho enhloko yawo ngabona make wenu Sariya, naSemu, kanye naNefi; bebeme shangatsi abati kutsi kufanele baye ngakuphi.

15 Futsi kwenteka kutsi ngabakhweba; ngaphindze ngasho kubo ngelivi lelikhulu kutsi bete kimi, batodla leso sitselo, lesasitsandzeka ngetulu kwato tonkhe letinye titselo.

16 Futsi kwenteka kutsi beta kimi nabo basidla lesitselo.

17 Futsi kwenteka kutsi ngaba nesifiso sekutsi Lamani naLemuweli bete nabo batodla lesitselo; ngaloko-ke, ngaphonsa emehlo ami ngasenhloko yemfula, ngicabanga kutsi mhlawumbe ngitawubabona nabo.

18 Futsi kwenteka kutsi ngababona, kodvwa bona abavumanga kuta kimi batodla lesitselo.

19 Ngabona indvuku yensimbi, yayichubeka ngalokulinganisene nelusentse lwemfula, iholela esihlahleni leso lengangime ngakuso.

20 Ngaphindze ngabona indlela lencane nalengumntjuntju kakhulu, leyayita ngekulinganisana nendvuku yensimbi nasesihlahleni leso lengangime ngakuso; futsi ngetulu kwaloko yaholela yate yefika ngasenhloko yemtfombo, nakuleyo nsimi lenkhulu levulekile, lekungatsi ngumhlaba.

21 Ngabona ticuku letingabaleki tebantfu, labanyenti babo baphikelele phambili, kute batfole indlela leyo leholela kulesihlahla lengangime ngakuso.

22 Futsi kwenteka kutsi bachubekela phambili, bacala bangena endleleni leyayiholela kulesihlahla.

23 Futsi kwenteka kutsi kwabese kuvuka inkhungu yebumnyama; yebo, lenkhulu kakhulu inkhungu yebumnyama, kangangekutsi labo lebesebayicalile indlela yabalahlekela indlela yabo, kangangekutsi badvwanguta futsi balahleka.

24 Futsi kwenteka kutsi ngabona labanye baphikelela phambili, beta ngembili bate basibamba siphetfo sendvuku yensimbi; baphikelela phambili kuyo inkhungu yebumnyama, babambelele kuyo indvuku yensimbi, bate beta ngembili batodla lesitselo salesihlahla.

25 Emvakwekutsi sebasidlile lesitselo salesihlahla bacalata ngala nangala kungatsi banemahloni.

26 Futsi nami ngaphindze ngacalata ngala nangala, ngabona, ngesheya kwemfula wemanti, sakhiwo lesikhulu lesivulekile, sime shangatsi sisemoyeni, siphakeme ngetulu kwemhlaba.

27 Sasigcwele bantfu, labadzala kanye nalabancane, labadvuna kanye nalabasikati, futsi indlela yabo yekugcoka yayisezingeni lelisetulu; bebasesimeni sekuhhalatisa bakhomba ngeminwe yabo kulabo labesebetile esihlahleni futsi sebasidla lesitselo.

28 Emvakwekutsi sebasinambitsile lesitselo baba nemahloni, ngenca yalabo labebabahhalatisa, base bawela etindleleni letingavunyelwa futsi balahleka.

29 Manje mine, Nefi, angiwakhulumi onkhe emavi ababe.

30 Kodvwa, kuba mfisha ekubhaleni, buka, wabona letinye ticuku tiphikelela phambili; tefika tawubamba umphetfo wendvuku yensimbi; futsi taphikelela ngendlela yato yekuya phambili, njalonjalo tibambe ticinisile endvukwini yensimbi, tate tefika tawa phansi tasidla lesitselo salesihlahla.

31 Futsi waphindze wabona letinye ticuku tiphutsata indlela yato leya lapho kuleso sakhiwo lesikhulu futsi lesivulekile.

32 Futsi kwenteka kutsi labanyenti bamita ekujuleni kwemtfombo; futsi labanyenti balahleka emehlweni akhe, badvwanguta emigwacweni lengakajwayeleki.

33 Futsi sasisinyenti sicuku lesangena kuleso sakhiwo lesingakajwayeleki. Emvakwekutsi sesingenile kuleso sakhiwo sangikhomba ngemunwe wekuhhalatisa kanye nalabo labebadla lesitselo futsi; kodvwa tsine asibanakanga.

34 Lawa ngemavi ababe: Ngoba bonkhe labo lababanaka, bawa.

35 Futsi Lamani naLemuweli abasidlanga lesitselo, kwasho babe.

36 Futsi kwenteka kutsi emvakwekutsi babe sekawakhulumile onkhe lamavi eliphupho lakhe noma umbono, labekamanyenti, watsi kitsi, ngenca yaleti tintfo latibona embonweni, bekesaba kakhulu ngenca yaLamani naLemuweli, yebo wesaba funa basuswe ebukhoneni beNkhosi.

37 Wabancenga ngaleso sikhatsi ngemizwa yonkhe yemtali lomnene, kutsi baweve emavi akhe, nekutsi mhlawumbe iNkhosi yayiyawuba nemusa kubo, ingete yabakhipha; yebo, babe wabashumayela.

38 Emvakwekutsi sekabashumayele, ngetulu kwaloko sekaphrofethile kubo ngetintfo letinyenti, wabayala kutsi bagcine imiyaleto yeNkhosi; wabese uyayekela kukhuluma nabo.