1 Futsi kwenteka kutsi iNkhosi yangiyaleta, ngaloko-ke ngenta bongcwengcwe belitje lensimbi kute ngicophe kubo umbhalo webantfu bakitsi. Futsi kulaba bongcwengcwe lengabenta ngacopha umbhalo wababe, futsi ngalokunjalo neluhambo lwetfu ehlane, kanye netiphrofetho tababe; kanjolo netiphrofetho tami letinyenti ngiticophe kubo.

2 Angatanga ngesikhatsi ngibenta kutsi ngangitoyaletwa yiNkhosi kutsi ngibente laba bongcwengcwe; ngaloko-ke, umbhalo wababe, kanye nemlandvo wesitukulwane sabokhokho bakhe, kanye nencenye lenkhulu yetento tetfu ehlane ticoshwe kubo labongcwengcwe bekucala lengikhulume ngabo; ngaloko-ke, tintfo letenteka ngaphambi kwekutsi ngente labongcwengcwe, teliciniso, kuphawulwa kakhulu ngato kulabongcwengcwe bekucala.

3 Emvakwekutsi sengibentile labongcwengcwe ngendlela yekuyaletwa, mine, Nefi, ngatfola umyaleto wekutsi umsebenti kanye netiphrofetho, ikakhulukati leyo ncenye yato lesobala kanye naleligugu, kufanele ibhalwe kulaba bongcwengcwe; futsi nekutsi leto tintfo letatibhaliwe kufanele tigcinelwe kufundzisa bantfu bami, labayohlala kulelive, futsi ngetulu kwaloko nangaletinye tizatfu tekuhlakanipha, tizatfu letatiwa yiNkhosi

4 Ngaloko-ke, mine, Nefi, ngenta umbhalo kulabanye bongcwengcwe, lolandzisa, noma lolandzisa ngemininingwane yetimphi kanye netincabano nekubhujiswa kwebantfu bami. Futsi loku ngikwentile, ngabayaleta bantfu bami kutsi kufanele benteni emvakwekutsi mine sengingasekho; nekutsi laba bongcwengcwe kufanele bendluliselwe njani kusuka kusinye situkulwane kuya kulesinye, noma kusuka kumunye umphrofethi kuya kulomunye, kute kufike leminye imiyaleto yeNkhosi.

5 Indzaba yami yekwenta laba bongcwengcwe iyawuniketwa emvakwaloku; futsi emvakwaloko, buka, ngiyachubeka njengobe ngikhulumile; futsi loku ngikwentela kute tintfo letinyenti letingcwele tigcinelwe kutsi bantfu bami batati.

6 Noko, angibhali lutfo kulaba bongcwengcwe ngaphandle kwekutsi ngicabanga kutsi kungcwele. Manje, uma ngiphambuka, nabo baphambuka basendvulo; hhayi kutsi ngiyawuticolela ngenca yalabanye bantfu, kodvwa ngenca yebutsakatsaka lobukimi, ngekwenyama, ngiyawuticolela.

7 Ngoba tintfo labanye bantfu labatatisa kakhulu, enyameni kanye nasemphefumulweni, labanye batenta lite futsi batinyatsele ngaphansi kwetinyawo tabo. Yebo, naNkulunkulu wema-Israyeli lucobo bantfu bamnyatsela ngaphansi kwetinyawo tabo. Ngitsi, bamnyatsela ngaphansi kwetinyawo tabo kodvwa ngitokhuluma ngalamanye emagama—bamenta lite, bangalilaleli livi lakhe lekucondzisa.

8 Buka uyeta, ngekwemavi engilosi, eminyakeni lengemakhulu lasitfupha kusukela esikhatsini babe esuka eJerusalema.

9 Nemhlaba, ngenca yebubi bawo, uyawumehlulela njengentfo lelite; ngaloko-ke bayawumbhacabula, avume; baphindze bamshaye, avume. Yebo, bayomkhafulela ngematse, avume, ngenca yemusa wakhe lonelutsandvo lolukhulu kanye nekumela bulukhuni kwakhe kubantfwana bebantfu.

10 Futsi Nkulunkulu wabokhokho betfu, labaholwa baphuma eGibhithe, baphuma ebugcilini, ngetulu kwaloko bagcinwa nguye ehlane, yebo, Nkulunkulu wa-Abrahama, kanye na-Isaka, kanye naNkulunkulu waJakobe, watidzela, ngekwemavi engilosi, njengemuntfu, etandleni tebantfu lababi, kute aphakanyiswe, ngekwemavi aZenokhi, futsi kute abetselwe, ngekwemavi aNewumi, futsi kute angcwatjwe ethuneni, ngekwemavi aZenoshi, lawakhuluma mayelana nemalanga lamatsatfu ebumnyama, lokwakufanele abe sibonakaliso lesasitoniketwa ngekufa kwakhe kulabo labekufanele bahlale etichingini telwandle, ikakhulukati lesanikwa labo lokwakubendlu yaka-Israyeli.

11 Ngoba wakhuluma kanje umphrofethi: INkhosi Nkulunkulu ngempela iyawuyivakashela yonkhe indlu yaka-Israyeli ngalelo langa, labanye ngelivi lakhe, ngenca yekulunga kwabo, kube yinjabulo lenkhulu kanye nensindziso kubo, futsi labanye ngekudvuma kanye nangemibani yemandla akhe, ngesivunguvungu, ngemlilo, nangentfutfu, kanye nangenkhungu yebumnyama, kanye nangekuvuleka kwemhlaba, kanye nangetintsaba letiyawuphakanyiselwa etulu.

12 Tonkhe leti tintfo kufanele nakanjani tenteke, kusho umphrofethi Zenoshi. Nemadvwala emhlaba kufanele adzabuke; futsi ngenca yekububula kwemhlaba, emakhosi lamanyenti etichingi taselwandle atawusetjentwa nguMoya waNkulunkulu, kute amemete atsi: Nkulunkulu wemvelo uva buhlungu.

13 Futsi mayelana nalabo labaseJerusalema, kusho umphrofethi, bayawuhlushwa ngibo bonkhe bantfu, ngenca yekutsi bambetsela Nkulunkulu wema-Israyeli, futsi badukisa tinhlitiyo tabo, batilahla tibonakaliso kanye netimangaliso, kanye nemandla nenkhatimulo yaNkulunkulu wema-Israyeli.

14 Futsi ngenca yekudukisa tinhlitiyo tabo, kusho umphrofethi, futsi bamedzelela loNgcwele waka-Israyeli bayawuzulazula basenyameni, babhubhe, babe yinhlekisa nesiga, baphindze batondvwe emkhatsini wetive tonkhe.

15 Noko, uma lelo langa lifika, kusho umphrofethi, kutsi bangabe basaphindze futsi badukise tinhlitiyo tabo ngekumelana naloNgcwele waka-Israyeli, ngaleso sikhatsi utawutikhumbula tivumelwano latenta kubokhokho babo.

16 Yebo, ngaleso sikhatsi utawutikhumbula tichingi telwandle; yebo, kanye nabo bonkhe bantfu lokubendlu yaka-Israyeli, ngitawubagcogca, kusho iNkhosi, ngekwemavi emphrofethi Zenoshi, kuwo emagumbi lamane emhlaba.

17 Yebo, futsi wonkhe umhlaba uyawuyibona insindziso yeNkhosi, kusho umphrofethi; tonkhe tive, tihlobo, tilimi kanye nebantfu bayawubusiswa.

18 Mine, Nefi, ngibabhalele leti tintfo bantfu bami, kute mhlawumbe ngibakhutsate kutsi bayikhumbule iNkhosi uMhlengi wabo.

19 Ngaloko-ke, ngikhuluma kuyo yonkhe indlu yaka-Israyeli, nangabe batotitfola leti tintfo.

20 Ngoba buka, nginemizwa lecinile emoyeni, lengenta ngibe nekukhatsateka kangangoba onkhe emalunga ami abutsakatsaka, ngalabo labaseJerusalema; ngoba kube iNkhosi ayikabi nesihawu, kungikhombisa mayelana nabo, njengobe yenta kubaphrofethi basendvulo, ngabe nami bengitobhubha futsi.

21 Futsi ngempela yababonisa baphrofethi basendvulo tonkhe tintfo mayelana nabo; futsi ngalokunjalo yababonisa labanyenti mayelana natsi; ngaloko-ke, kufanele kutsi sati mayelana nabo ngoba tibhaliwe kubongcwengcwe belitfusi.

22 Manje kwenteka kutsi mine, Nefi, ngabafundzisa bomnaketfu leti tintfo; futsi kwenteka kutsi ngabafundzela tintfo letinyenti, letaticoshwe kubongcwengcwe belitfusi, kute bati mayelana netento teNkhosi kulamanye emave, emkhatsini webantfu basendvulo.

23 Futsi ngabafundzela tintfo letinyenti letatibhalwe etincwadzini taMosi; kodvwa kute ngibakhutsate ngalokugcwele kutsi bakholwe kuyo iNkhosi uMhlengi wabo ngabafundzela naloko lokwakubhalwe ngumphrofethi Isaya; ngoba ngayibhekisa kitsi yonkhe imibhalo lengcwele, kute ibe lusito kitsi futsi isifundzise.

24 Ngaloko-ke ngakhuluma nabo, ngatsi: Vanini emavi emphrofethi, nine leniyinsali yendlu yaka-Israyeli, leniligala lelihleshuliwe; vanini emavi emphrofethi, lawabhalela yonkhe indlu yaka-Israyeli, futsi niwabhekise kini, kute nibe nelitsemba njengabo bomnakenu lenihleshulwe kubo; ngoba umphrofethi ubhale ngalendlela.