Sehluko 6
Nefi ubhala ngetintfo taNkulunkulu—Inhloso yaNefi kukhutsata bantfu kutsi bete kuNkulunkulu wa-Abrahama baphindze basindziswe. Cishe ngemnyaka wema-600–592 ngaphambi kwekutalwa kwaKhristu.
1 Manje mine, Nefi, anginiketi umlandvo wesitukulwane sabokhokho kulencenye yembhalo wami; futsi angiyuwunika nanoma ngusiphi lesinye sikhatsi kulaba bongcwengcwe lengibhala kubo; ngoba uniketiwe embhalweni logcinwe ngubabe; ngako-ke angituwubhala kulomsebenti.
2 Ngoba kuyangenelisa kusho kutsi tsine sibentalelwane yaJosefa.
3 Futsi akukabaluleki kutsi ngicophelele ekunikeni indzaba lephelele ngato tonkhe tintfo tababe; ngoba angeke tibhalwe kulabongcwengcwe, ngoba ngifuna sikhala kute ngibhale ngetintfo taNkulunkulu.
4 Ngoba inhloso yami lephelele kutsi ngikhutsate bantfu kutsi bete kuNkulunkulu wa-Abrahama, naNkulunkulu wa-Isaka, kanye naNkulunkulu waJakobe, futsi basindziswe.
5 Ngaloko-ke, tintfo letitfokotisa umhlaba angitibhali, kodvwa ngibhala tintfo leto letitfokotisako kuNkulunkulu kanye nakulabo labangasibo belive.
6 Ngaloko-ke, mine ngiyawuniketa umyaleto kuyo intalelwane yami, wekutsi ayiyusebentisa labo bongcwengcwe ngetintfo letingakabaluleki kubantfwana bebantfu.