1 Futsi kwenteka kutsi saphindze satsatsa luhambo lwetfu ehlane; sahamba saya ngasemphumalanga kusukela ngaleso sikhatsi kuya phambili. Sahamba sendlula kuletinyenti tinhlupheko ehlane; nebesifazane betfu batala bantfwana khona ehlane.

2 Futsi tatitinkhulu tibusiso teNkhosi kitsi, njengekutsi ngesikhatsi siphila ngenyama leluhlata ehlane, besifazane betfu bamunyisa kakhulu bantfwana babo, futsi bebacinile, yebo, bebanjengalamadvodza imbala; futsi bacala kumelana neluhambo lwabo ngaphandle kwekuvungama.

3 Ngako-ke siyabona kutsi imiyaleto yaNkulunkulu kufanele igcwaliseke. Futsi nangabe bantfwana bebantfu bayayigcina imiyaleto yaNkulunkulu yena uyabondla, aphindze abacinise, abanike emasu ekutsi bakwati kufeza leyontfo labayalete ngayo; ngaloko-ke, wasinika emasu ngesikhatsi sisahleti sikhashana ehlane.

4 Sahlala sikhatsi lesiyiminyaka leminyenti, yebo, iminyaka lesiphohlongo ehlane.

5 Safika eveni lesalibita ngekutsi yiNala, ngenca yebunyenti betitselo talo ngalokunjalo naneluju lwesiganga; futsi tonkhe leti tintfo tatilungiswe yiNkhosi kute singabhubhi. Saphindze sabona lwandle, lesalubita ngekutsi yi-Ireyantumi, lokusho kutsi, uma kuhunyushwa, ngemanti lamanyenti.

6 Futsi kwenteka kutsi samisa emathende etfu dvute nelugu lwelwandle; nanoma sasesihlushwe tinhlupheko letinyenti kanye nebumatima lobunyenti, yebo, kangangekutsi singeke sikubhale konkhe, satfokota kakhulu ngesikhatsi sesifika elugwini lwelwandle; sayibita lendzawo ngekutsi yiNala; ngenca yebunyenti betitselo tayo.

7 Futsi kwenteka kutsi emvakwekutsi mine, Nefi, sengihleti eveni leNala sikhatsi lesingemalanga lamanyenti, livi leNkhosi lefika kimi, litsi: Vuka, uye entsabeni. Futsi kwenteka kutsi ngavuka ngahamba ngakhuphukela entsabeni, ngakhala eNkhosini.

8 Futsi kwenteka kutsi iNkhosi yakhuluma kimi, yatsi: Yakha umkhumbi, ngendlela lengitawukukhombisa ngayo, kute ngitfwale bantfu bakho bawele lamanti.

9 Futsi ngatsi: Nkhosi, ngukuphi lapho ngingaya ngakhona kute ngitfole litje lensimbi ngilincibilikise, kute ngente emathulusi ekwakha umkhumbi ngendlela lewungikhombise ngayo na?

10 Futsi kwenteka kutsi iNkhosi yangitjela kutsi ngukuphi lapho ngingaya khona kute ngitfole litje lensimbi, kute ngakhe emathulusi.

11 Futsi kwenteka kutsi mine, Nefi, ngakha tifutfo tekuvutsela umlilo, ngetikhumba tetilwane; emvakwekutsi sengitakhile tifutfo, kute ngivutsele umlilo ngato, ngabese sengishayanisa ematje lamabili kute ngente umlilo.

12 Ngoba iNkhosi kute kube ngumanje yayingakate isivumele kutsi sibase umlilo lomkhulu, ngesikhatsi sisahamba ehlane; ngoba yatsi: Ngitawukwenta kudla kwenu kunongotele, kute ningakupheki.

13 Ngetulu kwaloko ngitawuba kukhanya kwenu ehlane; ngitawuyilungisa indlela phambi kwenu, uma ngabe niyawugcina imiyaleto yami; ngaloko-ke, nangabe niyawuyigcina imiyaleto yami niyawuholelwa eveni lesetsembiso; futsi niyawukwati kutsi kungenca yami kutsi niyaholwa.

14 Yebo, iNkhosi yaphindze yasho kutsi: Emvakwekutsi senifikile eveni lesetsembiso, niyawukwati kutsi mine, iNkhosi, nginguNkulunkulu; nekutsi mine, iNkhosi, nganikhulula ekubhujisweni; yebo, nekutsi mine nganikhipha eveni laseJerusalema.

15 Ngaloko-ke, mine, Nefi, ngetama kugcina imiyaleto yeNkhosi, ngabakhutsata bomnaketfu ekwetsembekeni kanye nasekukhutsaleni.

16 Futsi kwenteka kutsi ngawenta emathulusi ngelitje lensimbi lengalincibilikisa edvwaleni.

17 Ngesikhatsi bomnaketfu babona kutsi ngasengitokwakha umkhumbi, bacala kungivungamela, batsi: Umnaketfu usilima, ngoba ucabanga kutsi angakha umkhumbi; yebo, ucabanga kutsi angawela lamanti lamakhulu kangaka.

18 Futsi bomnaketfu bangigceka ngalendlela, banesifiso sekutsi bangasebenti, ngoba bebangakholwa kutsi ngingawakha umkhumbi; futsi bebangakholwa kutsi ngangitfunywe yiNkhosi.

19 Manje kwenteka kutsi mine, Nefi, ngadzabuka kakhulu ngenca yebulukhuni betinhlitiyo tabo; manje ngesikhatsi babona kutsi ngasengicala kudzabuka bajabula etinhlitiyweni tabo, kangangekutsi batfokota ngaloko, batsi: Besati kutsi awunokwati kwakha umkhumbi, ngoba besati kutsi awunawo umcondvo lokhaliphile; ngaloko-ke awunokwati kufeza umsebenti lomkhulu kangaka.

20 Futsi ufana nababe, uholwa yimibono yebulima benhlitiyo yakhe; yebo, usiholile wasikhipha eveni laseJerusalema, sizulazule ehlane yonkhe leminyaka leminyenti; nebafati betfu basebente matima, bakhulelwe, baphindze batala bantfwana ehlane bahlupheka kuto tonkhe tintfo, ngaphandle kwekufa; futsi bekuyawuba ncono kutsi bebafile ngaphambi kwekutsi baphume eJerusalema kunekutsi bahlupheke ngaleti tinhlupheko.

21 Buka, leminyaka leminyenti sihluphekile ehlane, lokusikhatsi lengabe sitfokotele loko lesinako kanye nelive lelilifa letfu; yebo, futsi ngabe besijabulile.

22 Siyati kutsi bantfu labebaseveni laseJerusalema kwakubantfu labalungile; ngoba bayigcina imitsetfo kanye netehlulelo teNkhosi, kanye nayo yonkhe imiyaleto yayo, ngekwemtsetfo waMosi; ngaloko-ke, siyati kutsi babantfu labalungile; futsi babe ubahlulele, waphindze wasiholela kudze ngenca yekutsi salalela emavi akhe; yebo, nemnaketfu ufana naye. Futsi kungalendlela yekukhuluma bomnaketfu labasivungamela baphindze basigceka ngayo.

23 Futsi kwenteka kutsi mine, Nefi, ngakhuluma nabo, ngatsi: Niyakholwa yini kutsi bokhokho betfu, labebabantfwana baka-Israyeli, bebangaholwa bakhishwe etandleni temaGibhithe kube bebangawalalelanga emavi eNkhosi na?

24 Yebo, nicabanga kutsi bebayawukhishwa yini ebugcilini kube iNkhosi yayingatfumelanga Mosi kutsi abakhiphe ebugcilini na?

25 Manje niyati kutsi bantfwana baka-Israyeli bebasebugcilini; futsi niyati kutsi bebatfweswe imisebenti, lokwakumatima kutsi bayitfwale; ngaloko-ke, niyati kutsi kufanele kutsi kwaba yintfo lenhle kubo, kutsi bakhishwe ebugcilini.

26 Manje niyati kutsi Mosi bekayaletwe yiNkhosi kwenta lowo msebenti lomkhulu; futsi niyati kutsi ngelivi lakhe emanti eLwandle loluBovu ahlukana ekhatsi aya lena nalena, bawela emhlabatsini lowomile.

27 Kodvwa niyati kutsi emaGibhithe amita eLwandle loluBovu, lawo labekangemabutfo aFaro.

28 Ngetulu kwaloko niyati kutsi bondliwa ngemana ehlane.

29 Yebo, ngetulu kwaloko niyati kutsi Mosi, ngelivi lakhe ngekwemandla aNkulunkulu labekakuye, walishaya lidvwala, kwaphuma emanti, kute bantfwana baka-Israyeli bacime koma kwabo.

30 Futsi nanoma bebaholwa, iNkhosi Nkulunkulu wabo, uMhlengi wabo, ahamba phambi kwabo, abahola emini aphindze abaniketa kukhanya ebusuku, abentela tonkhe tintfo letatidzingeka kutsi umuntfu atitfole, batenta lukhuni tinhlitiyo tabo futsi baphumphutsekisa tingcondvo tabo, baphindze bametfuka Mosi kanye naNkulunkulu weliciniso nalophilako.

31 Futsi kwenteka kutsi ngekwelivi lakhe wababhubhisa; nangekwelivi lakhe wabahola; nangekwelivi lakhe wabentela tonkhe tintfo, futsi kwakute intfo lengentiwa ngaphandle kwekutsi kube ngekwelivi lakhe.

32 Emvakwekutsi sebewele umfula iJordane wabenta baba nemandla ngalokwanele ekucosheni bantfwana bakulelo live, yebo, kubahlakatela ekubhujisweni.

33 Manje, nicabanga kutsi bantfwana bakuleli live labo labebaseveni lesetsembiso, labakhishwa bokhokho betfu, nicabanga kutsi bebalungile na? Bukani, ngitsi kini, Cha.

34 Ngabe nicabanga kutsi bokhokho betfu bebayawukhetfwa ngetulu kwabo kube bebalungile na? Ngitsi kini, Cha.

35 Bukani, iNkhosi yatisa wonkhe umuntfu ngalokufanako; loyo lolungile uyatsandvwa nguNkulunkulu. Kodvwa bukani, labantfu bawalahla onkhe emavi aNkulunkulu, futsi bavutfwa ebubini; nelulaka loluphelele lwaNkulunkulu beselusetikwabo; futsi iNkhosi yalicalekisa lelive ngekumelana nabo, yalibusisela bokhokho betfu; yebo, yalicalekisa ngekumelana nabo kute babhujiswe, yalibusisela bokhokho betfu kute batfole emandla ngetulu kwalo.

36 Bukani, iNkhosi iwudalile umhlaba kute kuhlalwe kuwo; futsi ibadalile bantfwana bayo kute ube ngewabo.

37 Ivusa sive lesilungile, ibhubhise tive talababi.

38 Ihola labalungile ibayise emaveni laligugu, lababi ibabhubhise, iphindze icalekise live ngenca yabo.

39 Ibusa ngetulu emazulwini, ngoba sihlalo sayo sebukhosi, futsi lomhlaba usenabelo setinyawo tayo.

40 Iyabatsandza labo labatawuyenta ibe nguNkulunkulu wabo. Bukani, yabatsandza bokhokho betfu, yaphindze yenta sivumelwano nabo, yebo, na-Abrahama, na-Isaka, kanye naJakobe; futsi yatikhumbula tivumelwano leyatenta; ngaloko-ke, yabakhipha eveni laseGibhithe.

41 Futsi yabajezisa ehlane ngendvuku yayo, ngoba batenta lukhuni tinhlitiyo tabo, njengobe nani nentile; futsi iNkhosi yaletsa kukhatsateka ngenca yebubi babo. Yatfumela tinyoka letinemlilo letindizako emkhatsini wabo; emvakwekutsi sebalunyiwe yalungisa indlela kutsi baphiliswe; futsi umsebenti lokwakufanele bawente kwakukutsi babuke; ngenca yekuba sobala kwaleyo ndlela, noma yekuba lula kwayo, baba banyenti lababhubha.

42 Futsi batenta lukhuni tinhlitiyo tabo tikhatsi ngetikhatsi, bametfuka Mosi, kanjalo naNkulunkulu; noko, niyati kutsi baholelwa phambili ngemandla akhe langenakulinganiswa baya eveni lesetsembiso.

43 Manje, emvakwato tonkhe leti tintfo, sikhatsi sesifikile sekutsi babe ngulababi, yebo, sebayavunwa; angati kodvwa sebadvute nelilanga lekubhujiswa; ngoba ngiyati kutsi lilanga kufanele nakanjani lifike kutsi babhujiswe, ngaphandle kwalabambalwa kuphela, labayawuholelwa ekutfunjweni.

44 Ngaloko-ke, iNkhosi yayaleta babe kutsi esuke aye ehlane; emaJuda ngetulu kwaloko abefuna kutsatsa imphilo yakhe; yebo, nani ngalokunjalo nifuna kutsatsa imphilo yakhe; ngaloko-ke, nibabulali etinhlitiyweni tenu futsi nani nifana nawo.

45 Niyashesha kwenta lokubi kodvwa niyaphuta kukhumbula iNkhosi Nkulunkulu wenu. Niyibonile ingilosi, futsi yakhuluma kini; yebo, nilivile livi layo tikhatsi ngetikhatsi; futsi ikhulumile kini ngelivi lelincane lelipholile, kodvwa nanibutfuntfu, kangangoba anikhonanga kuweva emavi ayo; ngaloko-ke, ikhulume kini ngelivi lekudvuma, lelenta kutamatame phansi shangatsi kutohlukana ekhatsi.

46 Ngetulu kwaloko niyati kutsi ngemandla elivi layo lelikhulu ingenta kutsi umhlaba ubhubhe; yebo, futsi niyati kutsi ngelivi layo ingenta tindzawo letimahhedle tibe busheleleti, netindzawo letibusheleleti tiyawugedvuka. O, pho, kungani, nitente lukhuni kangaka tinhlitiyo tenu na?

47 Bukani, umphefumulo wami udzabukile ngebuhlungu ngenca yenu, futsi inhlitiyo yami ibuhlungu; ngiyesaba funa nilahlwe ingunaphakadze. Bukani, ngigcwele Moya waNkulunkulu, kangangekutsi sicu semtimba wami asisenamandla.

48 Manje kwenteka kutsi ngesikhatsi sengiwakhulumile lamavi bangitfukutselela, futsi bebafuna kungiphonsa ekujuleni kwelwandle; ngesikhatsi beta kutongibamba ngakhuluma nabo, ngatsi: Egameni laNkulunkulu Somandla, ngiyaniyaleta kutsi ningangitsintsi, ngoba ngigcwele emandla aNkulunkulu, kangangekutsi angacotfula inyama yami, futsi loyo loyawungibamba uyawubuna njengemhlanga lowomile; uyawuba lite lelite phambi kwemandla aNkulunkulu, ngoba Nkulunkulu uyawumshaya.

49 Futsi kwenteka kutsi mine, Nefi, ngatsi kubo bangaphindzi nanini bamvungamele uyise; noma bangigodlele emandla abo, ngoba Nkulunkulu ungiyaletile kutsi ngakhe umkhumbi.

50 Ngatsi kubo: Uma Nkulunkulu angiyaletile kutsi ngente tonkhe tintfo ngingakwati kutenta. Uma angangiyaleta kutsi ngitsi kulamanti, bani ngumhlaba, ayoba ngumhlaba; futsi uma ngingasho, kuyawukwenteka.

51 Manje, uma iNkhosi inemandla lamakhulu kangaka, futsi seyente timangaliso letinyenti kangaka emkhatsini webantfwana bebantfu, kungani ingenakungiyala, kutsi ngakhe umkhumbi na?

52 Futsi kwenteka kutsi mine, Nefi, ngakhuluma tintfo letinyenti kubomnaketfu, kangangekutsi batfotjiswa futsi abatange basakwati kuphikisana nami; abatange basalokotsa kungibamba noma kungitsintsa ngeminwe yabo, sikhatsi lesingemalanga lamanyenti. Manje abalokotsanga bakwenta loku funa babune phambi kwami, bekamakhulu emandla aMoya waNkulunkulu; futsi wasebenta kanjalo-ke etikwabo.

53 Futsi kwenteka kutsi iNkhosi yatsi kimi: Yelulela sandla sakho futsi kubomnakenu, futsi abayubuna phambi kwakho, kodvwa ngitawubatfutfumelisa, kusho iNkhosi, loku ngitawukwenta, kute bati kutsi ngiyiNkhosi Nkulunkulu wabo.

54 Futsi kwenteka kutsi ngaselulela kubomnaketfu sandla sami, futsi abatange babuna phambi kwami; kodvwa iNkhosi yabavevetelisa, ngekwelivi leyilikhulumile.

55 Manje, batsi: Sesiyati ngekweliciniso kutsi iNkhosi inawe, ngoba siyati kutsi ngemandla eNkhosi lawa lasivevetelisako. Bawa phansi phambi kwami, futsi besebatongikhonta, kodvwa angibavumelanga, ngatsi: Ngingumnakenu, yebo, umnakenu lomncane; ngaloko-ke khontani iNkhosi Nkulunkulu wenu, nihloniphe uyihlo nenyoko, kute emalanga enu andze eveni iNkhosi Nkulunkulu wenu layawuninika lona.