1 Futsi kuyawukwenteka, kutsi uma beTive bayawulilalela liWundlu laNkulunkulu ngalelo langa leliyawutibonakalisa ngalo kubo ngelivi, futsi ngalokunjalo nangemandla, nangetento lucobo, kute kususwe tikhubekiso tabo—

2 Futsi bangatenti lukhuni tinhlitiyo tabo ngekumelana neliWundlu laNkulunkulu, bayawubalwa kanye nentalelwane yeyihlo; yebo bayawubalwa kanye nendlu yaka-Israyeli; futsi bayawuba bantfu lababusisekile eveni lesetsembiso ingunaphakadze; abayuphindze nanini babuyiselwe phansi ekutfunjweni; futsi indlu yaka-Israyeli ayiyuphindze nanini ihlazeke.

3 Futsi lowo mgodzi lomkhulu, lobewumbelwe bona ngulelo bandla lelikhulu nalelinengekile, lelasungulwa ngudeveli kanye nebantfwana bakhe, kute aholele imiphefumulo yebantfu phansi esihogweni—yebo, lowo mgodzi lomkhulu lombelwe kubhubhisa bantfu uyawugcwaliswa ngulabo labawumbako, kute babhujiswe baphele nya, kusho liWundlu laNkulunkulu; hhayi kubhujiswa kwemphefumulo, ngaphandle kwekutsi kube kuphonswa kwawo esihogweni lesingenasiphetfo.

4 Ngoba buka, loku kuyindlela develi latfumba ngayo, futsi ngalokunjalo nendlela yekulunga kwaNkulunkulu, kubo bonkhe labo labatawukwenta imisebenti yebubi kanye nesinengiso phambi kwakhe.

5 Futsi kwenteka kutsi ingilosi yakhuluma kimi, Nefi, yatsi: Ubonile kutsi uma beTive baphendvuka kuyawuba kuhle kubo; futsi ngetulu kwaloko uyati mayelana netivumelwano teNkhosi kuyo indlu yaka-Israyeli; futsi ngetulu kwaloko uvile kutsi loyo longaphendvuki kufanele abhubhe.

6 Ngako-ke, maye kubeTive nangabe batenta lukhuni tinhlitiyo tabo ngekumelana neliWundlu laNkulunkulu.

7 Ngoba sikhatsi siyeta, kusho liWundlu laNkulunkulu, lapho ngitawukwenta umsebenti lomkhulu kanye nalomangalisako emkhatsini webantfwana bebantfu; umsebenti loyawuba waphakadze, kube simo lesitsite kulolunye luhlangotsi noma lesinye ngakulolunye—bakholwiswe kutsi babe nekuthula kanye nekuphila lokuphakadze, noma bakhululwe ebulukhunini betinhlitiyo tabo kanye nasekuphumphutsekisweni kwetingcondvo tabo bate badvonseleke ekutfunjweni, futsi ngalokunjalo nasekubhujisweni, kwesikhashana kanye nekwakamoya, ngekwendlela develi latfumba ngayo, lesengikhulume ngako.

8 Futsi kwenteka kutsi ngesikhatsi ingilosi seyiwakhulumile lamavi, yatsi kimi: Uyatikhumbula yini tivumelwano taBabe kuyo indlu yaka-Israyeli na? Ngatsi kuyo, Yebo.

9 Futsi kwenteka kutsi yatsi kimi: Buka, futsi ubone lelo bandla lelikhulu nalelinengekile, lelingunina wetinengiso, umcambi walo lokungudeveli.

10 Futsi yatsi kimi: Buka mabili kuphela emabandla; linye libandla leliWundlu laNkulunkulu, kantsi lelinye libandla ladeveli; ngaloko-ke, loyo longasuye welibandla leliWundlu laNkulunkulu walelo bandla lelikhulu, lelingunina wetinengiso; futsi uyingwadla yemhlaba wonkhe.

11 Futsi kwenteka kutsi ngabuka ngayibona ingwadla yemhlaba wonkhe, futsi yayihleti etikwemanti lamanyenti; futsi beyibusa ngetulu kwemhlaba wonkhe, emkhatsini wetive tonkhe, tihlobo, tilimi, kanye nebantfu.

12 Futsi kwenteka kutsi ngalibona libandla leliWundlu laNkulunkulu, futsi linani lalo lalimbalwa, ngenca yebubi kanye netinengiso tengwadla leyo leyayihleti etikwemanti lamanyenti; noko, ngabona kutsi libandla leliWundlu, lokwakungulabangcwele baNkulunkulu, bebakhona nabo ngalokunjalo etikwebuso bemhlaba wonkhe; futsi tindzawo letingaphansi kwabo ebusweni bemhlaba tatitincane, ngenca yebubi bengwadla lenkhulu lengayibona.

13 Futsi kwenteka ngabona kutsi unina lomkhulu wetinengiso watibutsisa ndzawonye ticuku etikwebuso bemhlaba wonkhe, emkhatsini wato tonkhe tive tebeTive, kutsi tilwe neliWundlu laNkulunkulu.

14 Futsi kwenteka kutsi mine, Nefi, ngabona emandla eliWundlu laNkulunkulu, kutsi ehlela etikwalabangcwele belibandla leliWundlu, kanye nasetikwebantfu besivumelwano beNkhosi, labo labebahlakateke etikwebuso bemhlaba wonkhe; futsi bebahlonyiswe ngekulunga kanye nangemandla aNkulunkulu enkhatimulweni lenkhulu.

15 Futsi kwenteka kutsi ngabona kutsi lulaka lwaNkulunkulu lwatfululelwa etikwalelo bandla lelikhulu nalelinengekile, kangangekutsi kwabakhona timphi kanye nemahemuhemu etimphi emkhatsini wato tonkhe tive kanye netihlobo temhlaba.

16 Futsi ngesikhatsi kucala kuba khona timphi kanye nemahemuhemu etimphi emkhatsini wato tonkhe tive lokwakukwenina wetinengiso, ingilosi yakhuluma kimi, yatsi: Buka, lulaka lwaNkulunkulu lusetikwenina wetingwadla; futsi buka, uyatibona tonkhe leti tintfo—

17 Futsi uma lilanga selifika kutsi lulaka lwaNkulunkulu lutfululelwe etikwenina wetingwadla, lokulibandla lelikhulu nalelinengekile lemhlaba wonkhe, umcambi walo lokungudeveli, ngalelo langa, umsebenti waBabe uyawucala, wekulungisa indlela yekugcwalisa tivumelwano takhe, latenta kubantfu bakhe lababendlu yaka-Israyeli.

18 Futsi kwenteka kutsi ingilosi yakhuluma kimi, yatsi: Buka!

19 Ngabuka ngabona indvodza, leyayigcoke ingubo lemhlophe.

20 Futsi ingilosi yatsi kimi: Buka lomunye webaphostoli labalishumi nakubili beliWundlu.

21 Buka, uyawubona futsi abhale ngalokusele kwaleti tintfo; yebo, futsi ngalokunjalo netintfo letinyenti letike taba khona.

22 Futsi ngetulu kwaloko uyawubhala mayelana nekuphela kwemhlaba.

23 Ngaloko-ke, leto tintfo layawutibhala tilungile futsi tiliciniso; futsi buka tibhaliwe encwadzini leyo loyibone iphuma emlonyeni weliJuda; futsi ngesikhatsi tiphuma emlonyeni weliJuda, noma, ngesikhatsi incwadzi iphuma emlonyeni weliJuda, leto tintfo letatibhaliwe tatisobala futsi timsulwa, futsi tiligugu lelikhulu futsi tilula kucondvwa bantfu bonkhe.

24 Futsi buka, letintfo lomphostoli weliWundlu layawutibhala titintfo letinyenti wena lose utibonile; futsi buka, lokusele utokubona.

25 Kodvwa letintfo lotawutibona emvakwaloku awunawutibhala; ngoba iNkhosi Nkulunkulu ibeke umphostoli weliWundlu laNkulunkulu kutsi atibhale.

26 Futsi ngalokunjalo nalabanye labebakhona, kubo utikhombisile tonkhe tintfo; futsi batibhalile; futsi tivalelwe tabekwa kute tiphume timsulwa; ngekweliciniso lelo lelikulo liWundlu, ngesikhatsi lesifanele seNkhosi, tiye kuyo indlu yaka-Israyeli.

27 Futsi mine, Nefi, ngeva futsi nginika bufakazi, kutsi libito lalomphostoli weliWundlu bekunguJohane, ngekwelivi lengilosi.

28 Buka, mine, Nefi, angikavunyelwa kutsi ngibhale lokusele kwetintfo lengatibona futsi ngativa; ngaloko-ke tintfo lengitibhalile tiyangenelisa; futsi ngibhale kuphela incenye lencane yetintfo lengatibona.

29 Futsi nginika bufakazi kutsi ngatibona letintfo babe latibona; futsi ingilosi yeNkhosi yatembula kimi.

30 Futsi manje sengenta siphetfo senkhulumo yami mayelana naletintfo lengatibona ngesikhatsi ngihlwitfwe nguMoya; futsi uma ngabe tonkhe tintfo lengatibona tingakabhalwa, tintfo lengitibhalile tiliciniso. Futsi kunjalo nje. Amen.