1 Ngetulu kwaloko futsi: Lalelani, O ninendlu yaka-Israyeli, nonkhe nine lenehlukanisiwe futsi nakhishwa ngenca yebubi bebelusi bebantfu bami; yebo, nonkhe nine lenehlukanisiwe nasakatwa ndzawo tonkhe, nine lenibantfu bami, O ninendlu yaka-Israyeli. Ngilaleleni, O tichingi, futsi lalelani nine bantfu labakhashane; iNkhosi ingibite esibeletfweni; etibilinini tamake yenta kutsi libito lami likhunjulwe.

2 Futsi yente umlomo wami waba njengenkemba leloliwe; emtfuntini wesandla sayo ingitfukusile, yangenta umcibisholo lololongiwe; emgodleni wayo ingitfukusile;

3 Yatsi kimi: Uyinceku yami, O Israyeli, ngawe ngitawudvunyiswa.

4 Emvakwaloko ngatsi, ngikhandlekele lite, ngicitse emandla ami ngelite nalokungenalutfo; ngempela kwehlulelwa kwami kuseNkhosini, futsi nemsebenti wami ukuNkulunkulu wami.

5 Manje, itsi iNkhosi—leyangibumba kusukela esibeletfweni kutsi ngibe yinceku yayo, kute ngiphindze ngibuyisele Jakobe kuyo—noma Israyeli angakagcogcwa, noko ngiyawuba nenkhatimulo lenkhulu emehlweni eNkhosi, futsi Nkulunkulu wami uyawuba ngemandla ami.

6 Futsi yatsi: Kuyintfo lelula kutsi ube yinceku yami kute uvuse tive takaJakobe, futsi ubuyisele labasele baka-Israyeli. Ngetulu kwaloko ngitawukubeka ube kukhanya kubeTive, kute ube yinsindziso yami kute kube semikhawulweni yemhlaba.

7 Naku lokushiwo yiNkhosi, uMhlengi waka-Israyeli, loNgcwele wakhe, lodzelelwa ngumuntfu, losinengiso etiveni, kuyo inceku yebabusi: Emakhosi ayawubona futsi aphakame, tikhulu nato tiyawukhotsama, ngenca yeNkhosi leyetsembekile.

8 Naku lokushiwo yiNkhosi: Ngesikhatsi lesivumelekile nginivile, O tichingi telwandle, futsi ngelilanga lensindziso nginisitile; futsi ngitawunilondvolota, ngininike inceku yami njengesivumelwano sebantfu, kumisa umhlaba, kubenta badle emafa lacitsekile;

9 Kute utsi kulababoshiwe: Phumani; nakubo labo labahleti ebumnyameni: Tiveteni. Bayawutondla basetindleleni, futsi emadlelo abo ayawuba kuto tonkhe tindzawo letiphakeme.

10 Angeke balambe noma bome, futsi kushisa nelilanga angeke kubashaye; ngoba loyo lonebubele kubo uyawubahola, uyawubacondzisa nasemitfonjeni yemanti.

11 Futsi ngitawutenta tonkhe tintsaba tami tibe tindlela, nemigwaco yami lemikhulu iyawuphakanyiswa.

12 Emvakwaloko, O ninendlu yaka-Israyeli, buka, laba bayawuta bavela khashane; futsi buka, laba bayawuphuma enyakatfo kanye nasenshonalanga; kutsi laba bayawuphuma eveni laseSinimu

13 Hlabelani, O mazulu; nitfokote, O mhlaba; ngoba labo labasemphumalanga bayawucinisekiswa; futsi bahlokome ngekuhlabelela, O tintsaba; ngoba abayukushaywa nanini; ngoba iNkhosi ibadvudvutile bantfu bayo, futsi itawuba nebubele kulabahluphekile bayo.

14 Kodvwa, buka, iSiyoni yatsi: INkhosi ingishiyile, futsi iNkhosi yami ingikhohliwe—kodvwa itawukhombisa kutsi ayikakhohlwa.

15 Ngoba wesifazane angamkhohlwa yini umntfwana wakhe lomunyako, kutsi angabi nebubele kuyo indvodzana yesibeletfo sakhe na? Yebo, bangakhohlwa, kodvwa mine angitukukhohlwa nguwe, O ninendlu yaka-Israyeli.

16 Buka, ngikucophe entsendzeni yetandla tami; tibondza takho tisembikwami njalo.

17 Bantfwabakho bayawuphutfuma ngekumelana nebabhubhisi bakho, futsi nalabo labakwenta lite bayawuphuma kuwe.

18 Phakamisa emehlo akho ucalate ndzawo tonkhe futsi ubuke; bonkhe laba labagcogcene ndzawonye, bayawuta kuwe. Futsi njengobe ngiphila, kusho iNkhosi, nakanjani uyakubembatsa bonkhe, njengemhlobiso, futsi utibophe ngabo njengamakoti.

19 Ngoba tindzawo takho letingenalutfo naletitindzala, kanye nelive lakho lembubhiso, liyawuba lincane kakhulu manje ngenca yesizatfu salabakhile kulo; futsi nalabo labakonako bayawuba khashane.

20 Bantfwana loyawuba nabo, emvakwekutsi sowulahlekelwe bekucala, bayawuphindze batsi etindlebeni takho: Lendzawo yincane kakhulu kimi; ngiphe indzawo kute ngihlale.

21 Ngaleso sikhatsi uyawutsi enhlitiyweni yakho: Ngubani longitalele laba, loku mine ngalahlekelwa bantfwana bami, futsi anginantalo, ngingumtfunjwa, futsi ngingulozulazula lena nalena na? Ngubani lokhulise laba na? Buka, mine ngasala ngingedvwa vo; laba, bebakuphi na?

22 Naku lokushiwo yiNkhosi Nkulunkulu: Buka, ngitawuphakamisa sandla sami kubo beTive, futsi ngimise sibonakaliso sami kubantfu; futsi bayawuletsa emadvodzana akho etandleni tabo, futsi emadvodzakati akho bayawuwatfwala emahlombe abo.

23 Futsi emakhosi ayawuba boyihlo labakondlako, futsi nemakhosikati abo bomake bakho labakondlako; bayawukukhotsamela buso babo bubheke phansi, futsi bakhotse lutfuli lwetinyawo takho; futsi uyawukwati kutsi mine ngiyiNkhosi; ngoba abayukujabha labangetsembako.

24 Ngoba iyawususwa yini imphango kubo labanemandla, noma labatfunjwe ngekwemtsetfo bakhululwe na?

25 Kodvwa naku lokushiwo yiNkhosi, nalabatfunjiwe balabo labanemandla bayawususwa, futsi nemphango yalabo labesabekako iyawukhululwa; ngoba ngitawuphikisana naye loyo lophikisana nawe, futsi ngitawubasindzisa bantfwana bakho.

26 Futsi ngitawubadlisa inyama yemtimba wabo labo labakucindzetelako; bayawudzakwa yingati yabo lucobo njengeliwayini lelinongotelako; futsi wonkhe muntfu uyawukwati kutsi mine, iNkhosi, nginguMsindzisi wakho kanye neMhlengi wakho, loneMandla waJakobe.