1 Manje kwenteka kutsi emvakwekutsi mine, Nefi, sengitifundzile leti tintfo lebeticoshwe kubongcwengcwe belitfusi, bomnaketfu beta kimi batsi: Tisho kutsini leti tintfo lebewutifundza na? Buka, ngabe kufanele ticondvwe njengetintfo takamoya, letiyawukwenteka ngekwamoya hhayi ngekwenyama na?

2 Futsi mine, Nefi, ngatsi kubo: Bukani tabonakaliswa kumphrofethi ngelivi laMoya; ngoba ngaMoya tonkhe tintfo tembulwa kubaphrofethi, letiyawufika kubantfwana bebantfu ngekwenyama.

3 Ngaloko-ke, tintfo lengitifundzile tintfo letiphatselene netintfo tesikhashana kanye netakamoya; ngoba kubukeka shangatsi indlu yaka-Israyeli, kungekudzala, itawuhlakatwa ebusweni bemhlaba wonkhe, futsi ngalokunjalo nasemkhatsini wetive tonkhe.

4 Futsi bukani, kukhona labanyenti lasebavele balahlekile ekwatini labo labaseJerusalema. Yebo, incenye lenkhulu yetive tonkhe seyiholelwe kudze; futsi tisakatwe lena nalena etichingini taselwandle; futsi kutsi tikuphi kute namunye wetfu lowatiko, ngaphandle kwekutsi siyati kutsi baholelwa khashane.

5 Futsi njengobe baholelwe khashane, leti tintfo tiphrofethiwe mayelana nabo, futsi ngalokunjalo mayelana nabo bonkhe labo labayawusakatwa futsi bahlaziswe, ngenca yaloNgcwele waka-Israyeli; ngoba batawuticinisa tinhlitiyo tabo ngekumelana naye; ngaloko-ke, bayawusakatwa emkhatsini wetive tonkhe futsi bayawutondvwa ngibo bonkhe bantfu.

6 Noko, emvakwekutsi sebondliwe beTive, futsi neNkhosi seyisiphakamisile sandla etikwebeTive yabamisa njengesibonakaliso, nebantfwana babo sebabagonile emikhonweni yabo, kanye nemadvodzakati abo bawetfwala emahlombe abo, bukani leti tintfo lekukhulunywa ngato tesikhashana; ngoba tinjalo tivumelwano teNkhosi nabokhokho betfu; futsi kushiwo kitsi emalangeni latako, futsi ngalokunjalo nakubo bonkhe bomnaketfu lababendlu yaka-Israyeli.

7 Futsi kusho kutsi sikhatsi siyeta lapho emvakwekutsi yonkhe indlu yaka-Israyeli seyihlakatiwe futsi yahlaziswa, iNkhosi Nkulunkulu itawuvusa tive letinemandla emkhatsini webeTive, yebo, nasetikwebuso balo lelive; futsi ngato intalelwane iyawusakatwa.

8 Futsi emvakwekutsi intalelwane yetfu seyihlakatiwe iNkhosi Nkulunkulu itawuchubeka nekwenta umsebenti lomangalisako emkhatsini webeTive, loyawuba ligugu lelikhulu kuyo intalelwane yetfu; ngaloko-ke, kufaniswa nekondliwa kwabo beTive kanye nekugonwa emikhonweni yabo kanye nekwetfwalwa emahlombe abo.

9 Futsi ngetulu kwaloko kuyawuba ligugu kubeTive; hhayi kuphela nje kubeTive kodvwa kuyo yonkhe indlu yaka-Israyeli, ekwatiseni ngetivumelwano taBabe wasezulwini ku-Abrahama, atsi: Kuyo intalelwane yakho tonkhe tihlobo temhlaba tiyawubusiswa.

10 Futsi ngifuna, bomnaketfu, kutsi nati kutsi tonkhe tihlobo temhlaba ayinakubusiswa ngaphandle kwekutsi yembule ingalo yayo emehlweni etive.

11 Ngaloko-ke, iNkhosi Nkulunkulu itawuchubeka yembule ingalo yayo emehlweni ato tonkhe tive, ekuletseni tivumelwano tayo kanye nelivangeli layo kulabo lababendlu yaka-Israyeli.

12 Ngaloko-ke, itawuphindze ibakhiphe ekutfunjweni, futsi bayawugcogcana ndzawonye emaveni langemafa abo; futsi bayawukhishwa ekusitsekeni nasebumnyameni; futsi bayawukwati kutsi iNkhosi inguMsindzisi wabo kanye neMhlengi wabo, loneMandla waka-Israyeli.

13 Futsi ingati yalelo bandla lelikhulu nalelinengekile, leliyingwadla yemhlaba wonkhe, liyawuphendvukela tinhloko tabo; ngoba bayawukulwa bodvwa, futsi inkemba yetandla tabo lucobo iyawuwela etikwetinhloko tabo; futsi bayawudzakwa yingati yabo.

14 Futsi tive tonkhe letiyawukulwa nawe, O ninendlu yaka-Israyeli, tiyawujikelana timelane todvwa, futsi tiyawuwela kuwo lowo mgodzi letawumbela kutsiya bantfu beNkhosi. Futsi bonkhe labo labalwa neSiyoni bayawubhujiswa, futsi naleyo ngwadla lenkhulu, leguculele tindlela letilungile teNkhosi, yebo, lelo bandla lelikhulu nalelinengekile, liyawuwela elutfulini futsi kuyawuba kukhulu kuwa kwalo.

15 Ngoba buka, kusho umphrofethi, sikhatsi siyeta masinyane lapho Sathane angayuba nemandla ngetulu kwetinhlitiyo tebantfwana bebantfu; ngoba lilanga liyeta masinyane lapho bonkhe labatigcabhako kanye nalabo labenta bubi bayawuba njengetinhlanga; futsi lilanga liyeta lekutsi bashiswe.

16 Ngoba sikhatsi siyeta masinyane lapho lulaka loluphelele lwaNkulunkulu luyawutfululwa etikwabo bonkhe bantfwana bebantfu; ngoba akatuvumela kutsi lababi babhubhise labalungile.

17 Ngaloko-ke, utawubalondvolota labalungile ngemandla akhe, noma ngabe lulaka loluphelele lwakhe kufanele lufike, futsi labalungile balondvolotwe, kangangoba kubhujiswa titsa tabo ngemlilo. Ngaloko-ke, labalungile akukameli besabe; ngoba usho kanje umphrofethi, bayawusindziswa, noma ngabe kungaba ngemlilo.

18 Bukani, bomnaketfu, ngitsi kini, leti tintfo kufanele tenteke masinyane; yebo, ingati, kanye nemlilo, kanye nesimoko sentfutfu kufanele kufike; futsi kufanele kube sebusweni balomhlaba; futsi kuta kubantfu ngekwenyama nangabe batawutenta lukhuni tinhlitiyo tabo kuloNgcwele waka-Israyeli.

19 Ngoba bukani, labalungile abayukubhubha; ngoba nakanjani sikhatsi kufanele sifike sekutsi bonkhe labo labalwa neSiyoni bahlukaniswa naNkulunkulu.

20 Futsi nakanjani iNkhosi itawuyilungisa indlela yebantfu bayo, ekugcwaliseni emavi aMosi, lawakhuluma, atsi: Umphrofethi iNkhosi Nkulunkulu wenu iyawumvusa kini, lonjengami; niyawumlalela kuto tonkhe tintfo layawutisho kini. Futsi kuyawukwenteka kutsi bonkhe labo labangatumuva loyo mphrofethi bayawuhlukaniswa emkhatsini webantfu.

21 Manje mine, Nefi, ngiyamemetela kini, kutsi lomphrofethi Mosi lakhuluma ngaye kwakunguye loNgcwele waka-Israyeli; ngaloko-ke, uyawukwehlulela ngekulunga.

22 Futsi labalungile akukameli besabe, ngoba ngibo labo labangayukubhujiswa. Kodvwa ngumbuso wadeveli loyawukwakhiwa emkhatsini webantfwana bebantfu, loyo mbuso loyawusungulwa emkhatsini wabo labo labasenyameni—

23 Ngoba sikhatsi siyawusheshe sifike kutsi onkhe emabandla lakhelwe kutfola inzuzo, kanye nawo onkhe lawo lakhelwe kutfola emandla ngetulu kwenyama, kanye nalawo lakhelwe kutfola ludvumo emehlweni emhlaba, kanye nalabo labafuna inkhanuko yenyama kanye netintfo temhlaba, kanye nekwenta tonkhe tinhlobo tebubi; yebo, kwephetsa, bonkhe labo lababembuso wadeveli ngibo lekumele besabe, futsi bachachatele, futsi batfutfumele; ngibo labo lekufanele behliselwe phansi elutfulini; ngibo labo lekufanele bashiswe njengetinhlanga; futsi loku kungekwemavi emphrofethi.

24 Futsi sikhatsi siyawufika masinyane lapho labalungile kufanele baholwe njengemankhonyane esisingeni, futsi loNgcwele waka-Israyeli kufanele abuse ngekuphatsa, ngebukhulu nangemandla, kanye nangenkhatimulo lenkhulu.

25 Ugcogca bantfwabakhe kumagumbi lamane emhlaba; futsi uyatibala timvu takhe, tiyamati; futsi kuyawuba nemhlambi munye nemelusi munye; uyawutondla timvu takhe, kuye tiyawutfola lidlelo.

26 Ngenca yekulunga kwebantfu bakhe, Sathane akanamandla; ngaloko-ke, akanakukhululwa sikhatsi lesiyiminyaka leminyenti; ngoba akanamandla etinhlitiyweni tebantfu, ngoba bahleti ngekulunga, futsi loNgcwele waka-Israyeli uyabusa.

27 Manje bukani, mine, Nefi, ngitsi kini tonkhe leti tintfo kufanele tenteke ngekwenyama.

28 Kodvwa, bukani, tonkhe tive, tihlobo, tilimi, kanye nebantfu bayawuhlala ngekuphepha kuye loNgcwele waka-Israyeli nangabe batawuphendvuka.

29 Manje mine, Nefi, ngenta siphetfo lapha; ngoba anginawulokotsa ngichubeke ngikhulume mayelana naleti tintfo.

30 Ngaloko-ke, bomnaketfu, ngifisa kutsi nizindle ngekutsi letintfo letibhalwe kubongcwengcwe belitfusi tiliciniso; futsi tifakaza ngekutsi umuntfu kufanele ahloniphe imiyaleto yaNkulunkulu.

31 Ngaloko-ke, akukameli nicabange kutsi mine nababe ngitsi kuphela lesifakazile, saphindze safundzisa ngayo. Ngaloko-ke, uma niyawuyihlonipha imiyaleto, futsi nibeketele kute kube sekugcineni, niyawusindziswa ngelilanga lekugcina. Futsi kunjalo nje. Amen.