INcwadzi yekuCala yaNefi
Kubusa kanye neMsebenti Wakhe
Indzaba yaLehi nemkakhe Sariya, kanye nemadvodzana akhe lamane, labekabitwa ngekutsi (kusukela kulendzala) nguLamani, Lemuweli, Semu, kanye naNefi. INkhosi icwayisa Lehi kutsi esuke eveni laseJerusalema, ngoba bekaphrofethe kubantfu ngalokuphatselene nebubi babo futsi bafuna kuyibhubhisa imphilo yakhe. Utsatsa luhambo lwemalanga lamatsatfu uya ehlane nemndeni wakhe. Nefi utsatsa bomnakabo ubuyela eveni laseJerusalema kute ayolandza umbhalo wemaJuda. Indzaba ngetinhlupheko tabo. Batsatsa emadvodzakati a-Ishmayeli aba bafati babo. Batsatsa imindeni yabo baphindze bayesuka baya ehlane. Buhlungu babo kanye netinhlupheko tabo ehlane. Indlela labahamba ngayo. Bafika emantini lamanyenti. BomnakaboNefi bayamvukela. Uyabancoba, futsi wakha umkhumbi. Indzawo bayibita ngeligama kutsi yiNala. Bawela emanti lamanyenti baya eveni lesetsembiso, njalonjalo. Loku kungekwendzaba yaNefi; noma ngalamanye emagama, mine, Nefi, ngiwubhalile lombhalo.
Sehluko 1
Nefi ucala umbhalo webantfu bakubo—Lehi ubona embonweni insika yemlilo futsi ufundza encwadzini yetiphrofetho—Udvumisa Nkulunkulu, umemetela ngekuta kwaMesiya, futsi uphrofetha ngekubhujiswa kweJerusalema—Uhlukubetwa ngemaJuda. Cishe ngemnyaka wema-600 ngaphambi kwekutalwa kwaKhristu.
1 Mine, Nefi, ngitelwe batali labebalungile, ngako-ke ngafundziswa ngandlela tsite ngayo yonkhe imfundziso yababe; futsi sengibone tinhlupheko letinyenti emalangeni ekuphila kwami, noko, ngitsandziwe kakhulu yiNkhosi emalangeni ami; yebo, ngitfole lwati lolukhulu lebuhle kanye netimfihlakalo taNkulunkulu, ngako-ke ngenta umbhalo wetento tami emalangeni ekuphila kwami.
2 Yebo, ngenta umbhalo ngelulwimi lwababe, lolucuketse timfundziso temaJuda kanye nelulwimi lwemaGibhithe.
3 Futsi ngiyati kutsi umbhalo lengiwentako uliciniso; ngiphindze ngiwenta ngesami sandla lucobo; futsi ngiwenta ngekwelwati lwami.
4 Ngoba kwenteka kutsi ngekucala kwemnyaka wekucala wekubusa kwaSedekiya, inkhosi yakaJuda, (babe, Lehi, asahlale eJerusalema emalanga onkhe ekuphila kwakhe); futsi ngawo wona lowo mnyaka kwefika baphrofethi labanyenti, baphrofetha kubantfu kutsi kufanele baphendvuke, noma lidolobha lelikhulu iJerusalema kufanele ibhujiswe.
5 Ngaloko-ke kwenteka kutsi babe, Lehi, asahamba wathandaza eNkhosini, yebo, nangenhlitiyo yakhe yonkhe, athandazela bantfu bakubo.
6 Futsi kwenteka kutsi asathandaza eNkhosini, kwachamuka insika yemlilo yahlala etikwelidvwala phambi kwakhe; wabona waphindze weva lokunyenti; futsi ngenca yetintfo latibona nalativa wachachatela waphindze watfutfumela kakhulu.
7 Futsi kwenteka kutsi wabuyela endlini yakhe eJerusalema; waphindze watijika etulu embhedzeni wakhe, enganywe nguMoya kanye netintfo labetibonile.
8 Asenganywe nguMoya kanjalo, watsatfwa ngumbono, kangangekutsi wabona emazulu avuleka, waphindze wabona Nkulunkulu ahleti esihlalweni sakhe, atungeletwe ticuku tetingilosi letingabaleki tisesimeni sekuhlabela nekudvumisa Nkulunkulu wato.
9 Futsi kwenteka kutsi wabona loYedvwa ehla aphuma ekhatsi nekhatsi nelizulu, waphindze wabona kutsi kukhatimula kwakhe kwakungetulu kwelilanga ekhatsi nemini.
10 Waphindze, wabona labanye labalishumi nakubili bamlandzela, futsi kwabo kukhanya kwakwendlula kwetinkhanyeti esibhakabhakeni.
11 Behlela phansi bahamba etikwebuso bemhlaba; wekucala weta wema ngembili kwababe, wamnika incwadzi, futsi wamyala kutsi ayoyifundza.
12 Futsi kwenteka kutsi asafundza, wagcwaliswa nguMoya weNkhosi.
13 Wafundza, watsi: Maye, maye, kuwe Jerusalema, ngoba ngitibonile tinengiso takho! Yebo, futsi tinyenti tintfo babe latifundza mayelana neJerusalema—kutsi kumele ibhujiswe kanye nalabahlala kuyo; labanyenti kuyomele babhujiswe ngenkemba, futsi labanyenti bayawuba titfunjwa eBhabhulona.
14 Futsi kwenteka kutsi ngesikhatsi babe asatifundzile aphindze atibonile tintfo letinkhulu naletimangalisako, wababata tintfo letinyenti eNkhosini; njengekutsi: Mikhulu iphindze iyamangalisa imisebenti yakho, O Nkhosi Nkulunkulu Somandla! Sihlalo sakho sisetulu emazulwini, futsi emandla, nebuhle, kanye nebubele bakho kusetulu kwabo bonkhe labahlala emhlabeni; futsi, ngoba unemusa, ngeke uvumele labo labeta kuwe kutsi babhujiswe.
15 Futsi kwakungalendlela lakhuluma ngayo babe ngelulwimi lwakhe advumisa Nkulunkulu; ngoba umphefumulo wakhe wajabula, nenhlitiyo yakhe yonkhe yagcwaliswa, ngenca yetintfo labetibonile, yebo, leto iNkhosi leyayimtjengise tona.
16 Manje mine, Nefi, anginiketi indzaba lephelele ngetintfo babe latibhalile, ngoba ubhale tintfo letinyenti latibona ngemibono kanye nasemaphusheni; futsi ngetulu kwaloko ubhale tintfo letinyenti latiphrofetha nalatikhuluma kubantfwana bakhe, lengiyawenta indzaba lephelele ngato.
17 Kodvwa ngiyawukwenta indzaba ngetento tami emalangeni ekuphila kwami. Buka, ngifinyeta umbhalo wababe kubongcwengcwe lengibentile ngetami tandla lucobo; ngaloko-ke, emvakwekutsi sengiwufinyetile umbhalo wababe, ngitawubese sengenta indzaba ngemphilo yami.
18 Ngako-ke, ngifuna kutsi nati, kutsi emvakwekutsi iNkhosi seyimtjengise tintfo letinyenti letimangalisako babe, Lehi, yebo, mayelana nekubhujiswa kweJerusalema, buka wahamba waya emkhatsini webantfu, wacala kuphrofetha nekumemetela kubo tintfo labetibonile futsi nalebekativile.
19 Futsi kwenteka kutsi emaJuda ahlekisa ngaye ngenca yetintfo latifakaza ngawo; ngoba wafakaza ngebubi kanye netinengiso tawo; waphindze wafakaza ngekutsi tintfo labetibonile nalebekativile, kanjalo netintfo latifundza encwadzini tatibonakalisa ngalokusobala kuta kwaMesiya, kanjalo nangekuhlengwa kwemhlaba.
20 Futsi ngesikhatsi emaJuda ativa letintfo amtfukutselela; yebo, nanjengebaphrofethi basendvulo, lababacosha, nalababagcoba ngematje, nalabababulala; futsi ngetulu kwaloko afuna imphilo yakhe, kutsi ayitsatse. Kodvwa buka, mine, Nefi, ngitawunikhombisa kutsi umusa weNkhosi ungetulu kwabo bonkhe labo labakhetsile, ngenca yelukholo lwabo, kubenta babe nemandla lamakhulu nangemandla ekukhululwa.