1 Futsi kwenteka kutsi ngakhuluma nabomnaketfu, ngitsi: Asikhuphukeni siye eJerusalema, futsi asetsembekeni ekugcineni imiyaleto yeNkhosi; ngoba bukani yona inemandla ngetulu kwemhlaba wonkhe, pho kuyangani ingabi nemandla kunaLabani kanye nalabangemashumi lasihlanu bakhe, yebo, noma nalabangemashumi latinkhulungwane bakhe na?

2 Ngako-ke asikhuphukeni; asicineni njengaMosi; ngoba wakhuluma emantini eLwandle loluBovu futsi ahlukana ngalana nangalana, futsi bokhokho betfu badzabula ekhatsi, baphuma ekutfunjweni, baphumela emhlabatsini lowomile, kanjalo emabutfo aFaro alandzela futsi amita emantini eLwandle loluBovu.

3 Manje bukani nine niyati kutsi loku kuliciniso; kanjalo niyati kutsi ingilosi ikhulumile kini; ngaloko-ke kuyangani ningabate na? Asikhuphukeni; iNkhosi iyakwati kusikhulula, njengabokhokho betfu, futsi ibhubhise Labani, njengemaGibhithe.

4 Manje ngesikhatsi sengikhulume lamavi, besebatfukutsele, futsi bebasachubeka nekuvungama; noko-ke bangilandzela sakhuphuka sate safika ngaphandle kwetindvonga teJerusalema.

5 Futsi bekungusebusuku; ngenta kutsi bayobhaca ngaphandle kwetindvonga. Emvakwekutsi sebabhacile, mine, Nefi, nganyonyoba ngangena edolobheni ngahamba ngaya ngasendlini yaLabani.

6 Mine ngangiholwa nguMoya, ngingati ngaphambilini ngetintfo lebekuyofanele ngitente.

7 Noko ngaya phambili, futsi ngesikhatsi ngisondzela dvutane nendlu yaLabani ngabona indvodza, yayiwele phansi phambi kwami, ngoba yayidzakwe liwayini.

8 Ngesikhatsi ngifika kuyo ngatfola kutsi kwakunguLabani.

9 Ngabona inkemba yakhe, ngayikhokha emgodleni wayo; futsi umphini wayo kwakunguweligolide lelihlantekile, kwakhiwa kwayo kwakungulokusezingeni lelisetulu kakhulu, futsi ngabona kutsi lokusikako kwayo kwakukwensimbi leligugu kakhulu.

10 Futsi kwenteka kutsi ngaphocelelwa nguMoya kutsi ngiyombulala Labani; kodvwa ngatsi enhlitiyweni yami: Angikate nanoma ngusiphi sikhatsi ngicitse ingati yemuntfu. Ngashwaphana ngingafuni kumbulala.

11 Moya waphindze watsi kimi: Buka iNkhosi imnikele etandleni takho. Yebo, futsi kanjalo ngangati kutsi bekafuna kutsatsa imphilo yami; yebo, futsi bekangafuni kulalela imiyaleto yeNkhosi; futsi kanjalo bekatsatse imphahla yetfu.

12 Futsi kwenteka kutsi Moya waphindze watsi kimi: Mbulale, ngoba iNkhosi imnikele etandleni takho;

13 Buka iNkhosi ibulala lababi kute ivete tinhloso tekulunga kwayo. Kuncono kutsi umuntfu munye abhubhe kunekutsi sive sinciphe siphindze sibhubhe ngekungakholwa.

14 Manje, ngesikhatsi mine, Nefi, sengiwavile lamavi, ngawakhumbula emavi eNkhosi leyayiwakhulume kimi ehlane, isho loku: Nangabe intalelwane yakho iyawuyigcina imiyaleto yami, iyawuphumelela eveni lesetsembiso.

15 Yebo, futsi kanjalo mine ngacabanga kutsi yona yayingenukwati kugcina imiyaleto yeNkhosi ngekwemtsetfo waMosi, ngaphandle kwekutsi iyoba nemtsetfo.

16 Futsi kanjalo ngati kutsi umtsetfo wawucoshwe kubongcwengcwe belitfusi.

17 Ngetulu kwaloko, ngati kutsi iNkhosi yayimnikele Labani etandleni tami ngenca yalesi sizatfu—kute ngiyitfole imibhalo njengekwemiyaleto yayo.

18 Ngako-ke ngalilalela livi laMoya, ngamtsatsa Labani ngetinwele tenhloko, ngancuma inhloko yakhe ngenkemba yakhe.

19 Emvakwekutsi sengimncume inhloko yakhe ngenkemba yakhe, ngatsatsa tembatfo taLabani ngatigcoka; yebo, tonkhe; futsi mine ngasibopha sikhali sakhe elukhalo lwami.

20 Emvakwekutsi sengikwentile loku, ngachubekela phambili endzaweni yekugcina ingcebo yaLabani. Ngesikhatsi ngichubeka ngiya ngasendzaweni yekugcina ingcebo yaLabani, buka, ngabona inceku yaLabani leyayiphetse tikhiya tendzawo yekugcina ingcebo. Ngayitfuma ngelivi laLabani, kutsi ihambe nami siye endlini yekugcina ingcebo.

21 Futsi yayicabanga kutsi ngiyinkhosi yayo, Labani, ngoba yayibona tembatfo kanjalo nenkemba ilenga elukhalo lwami.

22 Yakhuluma nami mayelana nalabadzala bemaJuda, ngekwati kutsi inkhosi yayo, Labani, yayiphumile ebusuku isemkhatsini wawo.

23 Nami ngakhuluma nayo shangatsi nginguye Labani.

24 Kanjalo ngakhuluma kuyo kutsi kufanele ngiyotsatsa imibhalo leyayicoshiwe kubongcwengcwe belitfusi, ngiyiyise kubomnaketfu labadzala, labebangaphandle kwetindvonga.

25 Ngetulu kwaloko ngayiyala kutsi ayingilandzele.

26 Yona, ngekucabanga kutsi mine ngangikhuluma ngabomnaketfu belibandla, nekutsi mine nganginguye ngempela Labani loyo lengasengimbulele, ngaloko-ke yangilandzela.

27 Yakhuluma kimi tikhatsi letinyenti mayelana nalabadzala bemaJuda, ngesikhatsi mine ngichubeka ngiya kubomnaketfu, labo labebangephandle kwetindvonga.

28 Futsi kwenteka kutsi ngesikhatsi Lamani angibona wetfuka kakhulu, kanjalo naLemuweli kanye naSemu. Babaleka phambi kwami; ngoba bebacabanga kutsi kwakunguLabani, nekutsi besekangibulele sekatofuna kutsatsa netabo timphilo futsi.

29 Futsi kwenteka kutsi ngabamemeta, bangiva; ngaloko-ke bayekela kungibalekela.

30 Futsi kwenteka kutsi ngesikhatsi inceku yaLabani ibona bomnaketfu yacala kutfutfumela, futsi yaseyitongibalekela ibuyele edolobheni laseJerusalema.

31 Manje mine, Nefi, ngiyindvodza lendze lenkhulu, ngetulu kwaloko ngitfole emandla lamakhulu eNkhosini, ngako-ke ngayibamba inceku yaLabani, futsi ngayivimba, kute ingabaleki.

32 Futsi kwenteka kutsi ngakhuluma nayo, kutsi uma ingalalela emavi ami, njengobe iNkhosi iphila, futsi njengobe nami ngiphila, kanjalo uma yona ingalalela emavi etfu, sasiyoyisindzisa imphilo yayo.

33 Ngakhuluma nayo, nangekufunga imbala, kutsi yona akudzingeki yesabe; nekutsi yayitoba yindvodza lekhululekile njengatsi uma nje yayingehla iye ehlane kanye natsi.

34 Ngetulu kwaloko ngakhuluma nayo, ngatsi: Ngempela iNkhosi isiyaletile kutsi sente lentfo; futsi singakhutsali yini kugcina imiyaleto yeNkhosi na? Ngako-ke, uma ungehla natsi uye ehlane kubabe uyawuba nendzawo kanye natsi.

35 Futsi kwenteka kutsi Zoramu wema sibindzi emavini lengawakhuluma. Manje Zoramu bekulibito lenceku; watsembisa kutsi uyawukwehla aye ehlane kubabe. Yebo, waphindze wenta sifungo kitsi kutsi besekayawuhlala natsi kusukela kuleso sikhatsi kuya phambili.

36 Manje tsine sasinesifiso sekutsi ahlale natsi ngalesizatfu, sekutsi emaJuda angaze ati mayelana nekubaleka kwetfu kuya ehlane, funa asicoshe futsi asibhubhise.

37 Futsi kwenteka kutsi ngesikhatsi Zoramu sekente sifungo kitsi, kwesaba kwetfu ngaye kwaphela.

38 Futsi kwenteka kutsi tsine satsatsa bongcwengcwe belitfusi kanye nenceku yaLabani, sesuka saya ehlane, satsatsa luhambo loluya ethendeni lababe.