Sehluko 10
Lehi uphrofetha kutsi emaJuda ayawuba titfunjwa atfunjwe baseBhabhulona—Watisa emkhatsini wemaJuda kuta kwaMesiya, uMsindzisi, uMhlengi—Lehi ngalokunjalo watisa ngekuta kwaloyo lotawubhabhatisa liWundlu laNkulunkulu—Lehi watisa ngekufa kanye nekuvuswa kwaMesiya—Ucatsanisa kuhlakateka kanye nekugcogcwa kwa-Israyeli nesihlahla semncumo—Nefi ukhuluma ngeNdvodzana yaNkulunkulu, ngesipho saMoya loNgcwele, kanye nangesidzingo sekulunga. Cishe ngemnyaka wema-600–592 ngaphambi kwekutalwa kwaKhristu.
1 Manje mine, Nefi, ngiyachubeka nekulandzisa kulaba bongcwengcwe ngetento tami, kanye nekubusa nemsebenti wami wekushumayela; ngaloko-ke, kuchubeka nekulandzisa kwami, kufanele ngikhulume lokutsite ngetintfo tababe, ngalokunjalo nangetabomnaketfu.
2 Ngoba buka, kwenteka kutsi emvakwekutsi babe sekacedzile kukhuluma emavi eliphupho lakhe, ngalokunjalo nekubancenga kutsi bakhutsale kakhulu, wakhuluma nabo ngalokuphatselene nemaJuda—
3 Kutsi emvakwekutsi asabhujisiwe, nalelo dolobha lelikhulu iJerusalema, futsi lamanyenti atsetfwe atfunjelwa eBhabhulona, ngekwesikhatsi seNkhosi lesifanele, ayophindze abuye futsi, yebo, abuyiselwe emuva aphume ekutfunjweni; emvakwekutsi sekabuyiselwe emuva aphuma ekutfunjweni ayophindze futsi atfole live lelilifa lawo.
4 Yebo, naseminyakeni lengemakhulu lasitfupha kusukela ngesikhatsi babe ashiya eJerusalema, iNkhosi Nkulunkulu iyawuvusa umphrofethi emkhatsini wemaJuda—Mesiya, noma, ngalamanye emagama, uMsindzisi wemhlaba.
5 Futsi waphindze wakhuluma ngalokuphatselene nebaphrofethi, nekutsi bebabanyenti kangakanani labebafakaza ngato leti tintfo, ngalokuphatselene naloMesiya, labekhuluma ngaye noma loMhlengi wemhlaba.
6 Ngaloko-ke, bonkhe bantfu bebasesimeni sekulahleka kanye nesekuwa, futsi bayawuba kuso ngaphandle kwekutsi batsembele kuye loMhlengi.
7 Futsi waphindze wakhuluma ngalokuphatselene nemphrofethi lobekatofika ngaphambi kwaMesiya, kutolungisa indlela yeNkhosi—
8 Yebo, nekutsi utohamba aphindze amemete ehlane atsi: Lungisani indlela yeNkhosi, futsi nente tindlela tayo ticondze; ngoba kukhona lomile emkhatsini wenu leningamati; yena unemandla kunami, umchilo wesicatfulo sakhe lengingakafaneli kuwutfukulula. Futsi kunyenti lokwakhulunywa ngubabe ngalokuphatselene nalentfo.
9 Futsi babe watsi uyobhabhatisa eBhetani, ngesheya kweJordane; waphindze watsi uyobhabhatisa ngemanti; nekutsi uyobhabhatisa Mesiya ngemanti.
10 Futsi emvakwekutsi sekambhabhatisile Mesiya ngemanti, uyobona aphindze anike bufakazi kutsi ubhabhatise liWundlu laNkulunkulu, lelitosusa tono temhlaba.
11 Futsi kwenteka emvakwekutsi babe sekawashito lamavi wakhuluma kubomnaketfu ngalokuphatselene nelivangeli leliyoshunyayelwa emkhatsini wemaJuda, ngalokunjalo nalokuphatselene nekuncishelwa lukholo kwemaJuda. Emvakwekutsi sekambulele Mesiya, loyo loyawuta, futsi emvakwekutsi sekabulewe uyovuka kulabafile, uyawutibonakalisa, ngaMoya loNgcwele, kubeTive.
12 Yebo, nababe wakhuluma kakhulu mayelana nebeTive, futsi ngalokunjalo nangendlu yaka-Israyeli, kutsi kufanele icatsaniswe nesihlahla semncumo, emagala aso lekufanele ancunywe bese ahlakatwa ebusweni bemhlaba wonkhe.
13 Ngaloko-ke, watsi kufanele kutsi tsine siholwe ngenhlitiyo yinye kuya eveni lesetsembiso, kugcwalisa livi leNkhosi, lekutsi kufanele sihlakateke ebusweni bemhlaba wonkhe.
14 Emvakwekutsi indlu yaka-Israyeli seyihlakatiwe iyophindze ibutselwe ndzawonye futsi; noma-ke, kwephetsa, emvakwekutsi beTive sebalitfolile liVangeli leliphelele, emagala emvelo aleso sihlahla semncumo, noma insali yendlu yaka-Israyeli, iyawuhlunyeleliswa, noma yati ngaMesiya weliciniso, iNkhosi yabo kanye neMhlengi wabo.
15 Futsi babe waphrofetha waphindze wakhuluma kubomnaketfu ngalendlela yekukhuluma, ngalokunjalo nangaletinye letinyenti tintfo lengingatibhali kulencwadzi; ngoba ngitibhalile letinyenti tato njengobe kwakudzingeka kimi kulenye incwadzi yami.
16 Futsi tonkhe leti tintfo, lesengikhulume ngato, tenteka ngesikhatsi babe ahleti ethendeni, esigodzini saLemuweli.
17 Futsi kwenteka kutsi emvakwekutsi mine, Nefi, sengiwevile onkhe emavi ababe, mayelana netintfo latibona embonweni, ngalokunjalo netintfo latikhuluma ngemandla aMoya loNgcwele, emandla lawo lawatfola ngelukholo kuyo iNdvodzana yaNkulunkulu—futsi iNdvodzana yaNkulunkulu kwakunguMesiya loyo lobekayofika—Mine, Nefi, nganginesifiso nami sekutsi ngibone, ngive, ngiphindze ngati, ngaleti tintfo, ngemandla aMoya loNgcwele, losipho saNkulunkulu kubo bonkhe labo labamfuna ngekukhutsala, etikhatsini tasemandvulo njengasetikhatsini lapho ayawutibonakalisa ngaso kubantfwana bebantfu.
18 Ngoba uyafana itolo, lamuhla, naphakadze; futsi indlela ilungiselelwe bonkhe bantfu kusukela ekusekelweni kwemhlaba, uma ngabe bayaphendvuka futsi beta kuye.
19 Ngoba loyo lofuna ngekukhutsala uyawutfola; futsi timfihlakalo taNkulunkulu tiyawukwembulwa kubo, ngemandla aMoya loNgcwele, etikhatsini tamanje njengasetikhatsini tasemandvulo, etikhatsini tasemandvulo njengasetikhatsini letitako; ngaloko-ke, indlela yeNkhosi yinye naphakadze.
20 Ngako-ke khumbula, O muntfu, ngoba ngato tonkhe tento takho uyawuletfwa ekwehlulelweni.
21 Ngaloko-ke, uma ufune kwenta bubi emalangeni ekuvivinywa kwakho, nakunjalo utfolakala ungakahlanteki phambi kwesihlalo sekwehlulela saNkulunkulu; futsi kute intfo lengcolile lengahlala naNkulunkulu; ngaloko-ke, kufanele ulahlwe ingunaphakadze.
22 Futsi Moya loNgcwele unginika ligunya lekutsi ngikhulume leti tintfo futsi ngingatigodli.