Sehluko 13
Nefi ubona embonweni libandla ladeveli limiswe emkhatsini webeTive, kutfolwa kanye nekwakha eMelika, kulahleka kwetincenye letinyenti letisobala kanye naletiligugu teliBhayibheli, simo semphumela wekuhlubuka kwebetive, kubuyiselwa kwelivangeli, kuvela kwembhalo longcwele wemalanga ekugcina, kanye nekwakhiwa kweSiyoni. Cishe ngemnyaka wema-600–592 ngaphambi kwekutalwa kwaKhristu.
1 Futsi kwenteka kutsi ingilosi yakhuluma kimi, yatsi: Buka! Ngabuka ngabona tive letinyenti kanye nemibuso.
2 Futsi ingilosi yatsi kimi: Ubonani na? Ngase ngitsi: Ngibona tive letinyenti kanye nemibuso.
3 Yatsi kimi: Leti tive kanye nemibuso yebeTive.
4 Futsi kwenteka kutsi ngabona emkhatsini wetive tebeTive kwakhiwa kwelibandla lelikhulu.
5 Ingilosi yatsi kimi: Buka kwakhiwa kwelibandla lelinengekile kakhulu ngetulu kwawo onkhe lamanye emabandla, lelibulala labangcwele baNkulunkulu, yebo, futsi lelibahlukubetako libabophele phansi, lelibafaka lijoko lensimbi, leliphindze libabuyisele phansi ekutfunjweni.
6 Futsi kwenteka kutsi ngalibona leli libandla lelikhulu nalelinengekile; ngabona kutsi develi bekangumcambi walo.
7 Ngaphindze ngabona ligolide, kanye nesiliva, kanye nabosilika, kanye nalokubovu, kanye nelineni leyephotselwe ngalokucolisakele, kanye nato tonkhe tinhlobo tetingubo letiligugu; ngabona letinyenti tingwadla.
8 Ingilosi yakhuluma kimi itsi: Buka ligolide, kanye nesiliva, kanye nabosilika, kanye nalokubovu ngalokutopele, kanye nelineni leyephotselwe ngalokucolisakele, kanye netingubo letiligugu, kanye netingwadla, kutifiso talo leli libandla lelikhulu nalelinengekile.
9 Ngetulu kwaloko ngenca yeludvumo lwasemhlabeni babhubhisa labangcwele baNkulunkulu, babayise phansi ekutfunjweni.
10 Futsi kwenteka kutsi ngabuka ngabona emanti lamanyenti; bekahlukanisa beTive nentalelwane yabomnaketfu.
11 Futsi kwenteka kutsi ingilosi yatsi kimi: Buka lulaka lwaNkulunkulu etikwentalelwane yabomnakenu.
12 Ngabuka ngabona indvodza emkhatsini webeTive, leyayehlukaniswe nentalelwane yabomnaketfu ngemanti lamanyenti, ngabona Moya waNkulunkulu, kutsi wehlela phansi, wasebenta kuyo indvodza; futsi yahamba kuwo lamanti lamanyenti, nakuyo intalelwane yabomnaketfu, lebeyiseveni lesetsembiso.
13 Futsi kwenteka kutsi ngabona Moya waNkulunkulu, kutsi wasebenta nakulabanye beTive, baphindze bahamba etikwemanti lamanyenti baphuma ekutfunjweni
14 Futsi kwenteka kutsi ngabona ticuku letinyenti tebeTive kulo live lesetsembiso; ngabona lulaka lwaNkulunkulu, kutsi lwalusetikwentalelwane yabomnaketfu; futsi bebahlakatekile phambi kwebeTive baphindze bashayiwe.
15 Ngabona Moya weNkhosi, kutsi bekasetikwebeTive, futsi baphumelela baphindze balitfola lelive njengelifa labo; ngabona kutsi bebamhlophe, babukeka kahle kakhulu futsi babahle, njengebantfu bami ngaphambi kwekutsi babulawe.
16 Futsi kwenteka kutsi mine, Nefi, ngabona kutsi beTive labebaphume ekutfunjweni batitfoba phambi kweNkhosi, nemandla eNkhosi aba nabo.
17 Ngabona kutsi unina webeTive bekabutsene ndzawonye etikwemanti, ngalokunjalo nasetikwelive, kute balwe nabo.
18 Ngabona kutsi emandla aNkulunkulu bekanabo, futsi nekutsi lulaka lwaNkulunkulu lwalusetikwabo bonkhe labo labebabutsene ndzawonye kute balwe nabo.
19 Futsi mine, Nefi, ngabona kutsi beTive labo labebaphume ekutfunjweni bakhululwa ngemandla aNkulunkulu baphuma etandleni tato tonkhe letinye tive.
20 Futsi kwenteka kutsi mine, Nefi, ngabona kutsi baphumelela kulelive; ngabona incwadzi, yayindluliswa emkhatsini wabo.
21 Ingilosi yatsi kimi: Uyayati yini inchazelo yalencwadzi na?
22 Ngatsi kuyo: Angiyati.
23 Yatsi: Buka iphuma emlonyeni weliJuda. Mine, Nefi, ngayibona; yatsi kimi: Lencwadzi loyibonako ingumbhalo wemaJuda, locuketse tivumelwano teNkhosi, leyatenta nendlu yaka-Israyeli; ngetulu kwaloko icuketse tiphrofetho letinyenti tebaphrofethi labangcwele, futsi ingumbhalo lonjengemibhalo lecoshiwe lokubongcwengcwe belitfusi, ngaphandle nje kwekutsi atitinyenti tona kakhulu; noko, nato ticuketse tivumelwano teNkhosi, leyatenta nendlu yaka-Israyeli; ngaloko-ke, tinguletibaluleke kakhulu kubeTive.
24 Ingilosi yeNkhosi yatsi kimi: Ubonile kutsi lencwadzi iphume emlonyeni weliJuda; futsi ngesikhatsi iphuma emlonyeni weliJuda beyicuketse livangeli leliphelele leNkhosi, lelo baphostoli labalishumi nakubili labanika bufakazi ngalo; baphindze banika bufakazi njengekweliciniso lelo lelikulo liWundlu laNkulunkulu.
25 Ngaloko-ke, leti tintfo tiphuma kumaJuda timsulwa tiya kubeTive, njengekweliciniso laNkulunkulu.
26 Futsi emvakwekutsi setiphumile tahamba ngesandla sebaphostoli labalishumi nakubili beliWundlu, tisuka kumaJuda tiya kubeTive, uyawukubona kwakhiwa kwalelo bandla lelikhulu nalelinengekile, lelinengeke kakhulu ngetulu kwawo onkhe lamanye emabandla; ngoba buka, batisusile evangelini leliWundlu tincenye letinyenti letisobala naletiligugu lelikhulu; futsi ngalokunjalo netivumelwano letinyenti teNkhosi batisusile.
27 Futsi konkhe loku bakwentile kute baguculele tindlela letilungile teNkhosi, kute baphumphutsekise emehlo baphindze bente lukhuni tinhlitiyo tebantfwana bebantfu.
28 Ngaloko-ke, uyabona kutsi emvakwekutsi incwadzi seyindlulile etandleni talelo bandla lelikhulu nalelinengekile, kutsi kube khona letinyenti naletisobala futsi letiligugu tintfo letikhishiwe encwadzini, lokuyincwadzi yeliWundlu laNkulunkulu.
29 Emvakwekutsi leti tintfo letisobala futsi letiligugu setikhishiwe yendlulela kuto tonkhe tive tebeTive; emvakwekutsi seyendlulele kuto tonkhe tive tebeTive, yebo, nangesheya kwemanti lamanyenti lawo lowuwabonile nebeTive labaphume ekutfunjweni, uyabona—ngenca yaleto tintfo letisobala letinyenti naletiligugu letikhishiwe encwadzini, letatisobala kutsi ticondvwe bantfwana bebantfu, njengaloko lokusobala lokukulo liWundlu laNkulunkulu—ngenca yaleti tintfo letikhishiwe evangelini leliWundlu, labanyenti kakhulu bayakhubeka, yebo, kangangekutsi Sathane unemandla lamakhulu etikwabo.
30 Noko, uyabona kutsi beTive labaphuma ekutfunjweni futsi baphakanyiswa ngemandla aNkulunkulu ngetulu kwato tonkhe letinye tive, ebusweni balelo live lelikhetsekile ngetulu kwawo onkhe lamanye emave, lokulive iNkhosi Nkulunkulu leyente sivumelwano ngalo neyihlo kutsi intalelwane yakhe kufanele ilitfole kube live lelilifa labo; ngaloko-ke uyabona kutsi iNkhosi Nkulunkulu ayitukuvumela kutsi beTive bayibhubhise nya inhlanganisela yentalelwane yakho, leyo lesemkhatsini kweyabomnakenu.
31 Futsi ayitukuvuma kutsi beTive babhubhise intalelwane yabomnakenu.
32 Futsi iNkhosi Nkulunkulu ayitukuvuma kutsi beTive bahlale njalonjalo kuleso simo lesibi kakhulu sekuphumphutseka, leso lobabone bakuso, ngenca yetincenye letisobala futsi letiligugu kakhulu telivangeli leliWundlu letigodlwe ngilo lelo bandla lelinengekile, kwakhiwa kwalo lowukubonile.
33 Ngaloko-ke litsi liWundlu laNkulunkulu; Ngitawuba nesihawu kubeTive, kangangoba ngiyakuyijezisa insali yendlu yaka-Israyeli ngekwehlulela lokukhulu.
34 Futsi kwenteka kutsi ingilosi yeNkhosi yakhuluma kimi, yatsi: Buka, kusho liWundlu laNkulunkulu, emvakwekutsi sengijezise insali yendlu yaka-Israyeli—lensali lengikhuluma ngayo iyintalelwane yeyihlo—ngaloko-ke, emvakwekutsi sengiyijezisile ngekwehlulela, futsi ngayishaya ngesandla sebeTive, emvakwekutsi beTive sebakhubeka kakhulu, ngenca yetincenye letisobala kakhulu futsi letiligugu telivangeli leliWundlu letigodlwe ngulelo bandla lelinengekile, lelingunina wetingwadla, kusho liWundlu—Ngitawuba nesihawu kubeTive ngalelo langa, kangangekutsi, ngitawuletsa kubo, ngemandla ami, lokunyenti kwelivangeli lami, lokuyawuba sobala futsi kube ligugu, kusho liWundlu.
35 Ngoba, buka, kusho liWundlu: Ngitawutibonakalisa lucobo lwami kuyo intalelwane yakho, kute ibhale tintfo letinyenti lengiyawubafundzisa tona, letiyawube tisobala futsi tiligugu; emvakwekutsi intalelwane yakho seyibhujisiwe, yancishelwa lukholo, futsi ngalokunjalo nentalelwane yabomnakenu, buka, leti tintfo tiyawutfukuswa, kute tivetwe kubeTive, ngesipho kanye nangemandla eliWundlu.
36 Futsi kuto kuyawubhalwa livangeli lami, kusho liWundlu, nelidvwala lami kanye nensindziso yami.
37 Futsi babusisiwe labo labayawufuna kusungula iSiyoni yami ngalelo langa, ngoba bayawuba nesipho kanye nemandla aMoya loNgcwele, futsi uma babeketela kute kube sekugcineni bayawuphakanyiswa ngelilanga lekugcina, futsi bayawusindziswa embusweni waphakadze weliWundlu; futsi nalabo labayawumemetela kuthula, yebo, tindzaba tenjabulo lenkhulu, bayawuba bahle kangakanani etintsabeni.
38 Futsi kwenteka kutsi ngabona insali yentalelwane yabomnaketfu, ngalokunjalo nencwadzi yeliWundlu laNkulunkulu, leyayiphume emlonyeni weliJuda, kutsi yavela kubeTive yaya kuyo insali yentalelwane yabomnaketfu.
39 Futsi emvakwekutsi seyivelile yaya kubo ngabona letinye tincwadzi, letavela ngemandla eliWundlu, tivela kubeTive tiya kubo, ekukholwiseni beTive kanye nensali yentalelwane yabomnaketfu, futsi ngalokunjalo nemaJuda labekahlakateke etikwebuso bemhlaba wonkhe, kutsi imibhalo yebaphrofethi neyebaphostoli labalishumi nakubili beliWundlu iliciniso.
40 Futsi ingilosi yakhuluma kimi, yatsi: Lena mibhalo yekugcina, loyibonile emkhatsini webeTive, iyawucinisekisa liciniso laleyo yekucala, lokungeyebaphostoli labalishumi nakubili beliWundlu, futsi iyawukwatisa ngaloko lokusobala kanye nangetintfo letiligugu letikhishwe kuyo; futsi iyawukwatiswa kutto tonkhe tihlobo, tilimi, kanye nakubantfu, kutsi liWundlu laNkulunkulu liyiNdvodzana yaBabe waPhakadze, futsi linguMsindzisi wemhlaba, nekutsi bonkhe bantfu kufanele bete kulo, noma angeke basindziswe.
41 Futsi kufanele bete njengekwemavi lawo layawumiswa ngemlomo weliWundlu; futsi emavi eliWundlu ayawukwatiswa emibhalweni yentalelwane yakho, ngalokunjalo nasemibhalweni yebaphostoli labalishumi nakubili beliWundlu; ngaloko-ke yomibili iyawumiswa ibe yinye; ngoba Nkulunkulu munye futsi neMelusi munye ngetulu kwemhlaba wonkhe.
42 Futsi sikhatsi siyeta lapho ayawutibonakalisa etiveni tonkhe, kumaJuda ngalokunjalo nakubeTive; futsi emvakwekutsi asatibonakalisile kumaJuda ngalokunjalo nakubeTive, uyawubese sewuyatibonakalisa kubeTive ngalokunjalo nakumaJuda, futsi bekugcina bayawuba bekucala, nebekucala bayawuba bekugcina.